1. ¿Kenke tikijtouaj Jehová iaxka nochi tlamantli tlen onka? (Xikita nopa achtoui tlaixkopinkayotl).

NOCHI tlamantli Jehová iaxka, kej “Tlaltipaktli uan nochi iluikaktli hasta nopa iluikak tlen más uejkapa, uan nochi tlen eltok ipani” (Deut. 10:14; Apoc. [Rev.] 4:11). Uan pampa kinchijchijki maseualmej, tojuantij nojkia tiiaxkauaj (Sal. 100:3). Ipan nochi xiuitl tlen panotiualajtok, Jehová kintlapejpenijtok san se keskij maseualmej katli kinita kej iaxkauaj.

2. ¿Ajkia inijuantij kinita Jehová kejuak iaxkauaj?

² Salmo 135 kiijtoua Jehová “kintlapejpenik [...] ma elikaj iaxkauaj” nopa israeleuanij (Sal. 135:4). Uan pilamochtsi Oseas kiijtoua miakej nojkia eliskiaj toTeotsij itekipanojkauaj maske amo israeleuanij (Os. 2:23). Ni tlajtolpanextili moaxitik kema toTeotsij pejki kintlapejpenia katli tekichiuaskiaj iuaya Jesús maske amo eliyayaj judíos (Hech. 10:45; Rom. 9:23-26). Nopa maseualmej katli kintlapejpenijtokej ika itonal toTeotsij kintokaxtiaj “ueyi altepetl tlen tlakamej tlatsejtseloltikej” uan ‘tlen toTeko kinkojtok para elisej iaxkauajʼ (1 Ped. 2:9, 10). Uan miakej toTeotsij itekipanojkauaj, katli motemachiaj itstosej ipan Tlaltipaktli, nojkia kinita kej ialtepe uan tlapejpenilmej (Is. 65:22).

3. 1) Ipan ni tonali, ¿ajkia inijuantij kuali mouampojchijtokej iuaya Jehová? 2) ¿Tlake tikitasej ipan ni tlamachtili?

 ³ Ipan ni tonali, katli motemachiaj yasej iluikak uan katli motemachiaj itstosej ipan Tlaltipaktli, sansejko kitekipanouaj Jehová (Luc. 12:32; Juan 10:16). Nelia moneki tlauel ma tijtlaskamatilikaj Jehová pampa kikajtok ma timouampojchiuakaj iuaya. Ipan ni tlamachtili tikitasej se keski tlamantli tlen ika uelis tijnextisej tijtlaskamatiliaj.

4. 1) ¿Kenijkatsa uelis tijnextisej tijtlaskamatiliaj Jehová pampa techkaua ma timouampojchijtokaj iuaya? 2) ¿Tlake kichijki Jesús?

⁴ Kema tijmaktiliaj Jehová tonemilis, tijnextiaj tijtlaskamatiliaj. Uan kema timoatsonpoliuiltiaj, sekinok kiitaj tielij tiiaxkauaj Jehová uan kiitaj timosentlalijtokej nochipa tijneltokasej (Heb. 12:9). Jesús kiampa kichijki kema moatsonpoliuiltik, kejuak kiiljuik Jehová: “¡NoTeko Dios! Nechpaktia nijchiuas mopakilis” (Sal. 40:7, 8). Jesús motemaktilik ika toTeotsij maske tlakatki ipan se altepetl kampa nochi motemaktilijtoyaj ika Jehová.

5, 6. 1) ¿Tlake kiyolmatki Jehová kema Jesús moatsonpoliuiltik? 2) Xikixtoma se tlamantli tlen kinextia kenijkatsa kiyolmati Jehová kema tijmaktiliaj tonemilis.

⁵ ¿Tlake kiyolmatki Jehová kema Jesús moatsonpoliuiltik? Biblia kiijtoua: “Teipa kema kiatsonpoliuiltijkej Jesús, nimantsi kiski ipan atl; uan, ¡xikita!, tlapojki iluikaktli, uan ya kiitak itsonpak temotiualayaya toTeotsij itonal kej se paloma. ¡Xikita! Nojkia kakistik ne iluikak se tlen kiijtok: ‘Ya ni noKone, katli nikiknelia uan kuali nikita’” (Mat. 3:16, 17, TNM). Jehová tlauel yolpajki kema kiitak iKone, katli eliyaya iaxka, kinejki san ya kitekipanos. Kema tijmaktiliaj tonemilis, nojkia tlauel yolpaki uan yeka tlauel techteochiuas (Sal. 149:4).

⁶ Ma tikitakaj se neskayotl tlen techpaleuis ma tijkuamachilikaj kenijkatsa kiyolmati Jehová kema tijmaktiliaj tonemilis. Ma timoiljuikaj se tlakatl kitoka ikalixpa miak xochitl tlen tlauel yejyektsitsij. Se tonali, ipilsiuapil kiteki se xochitl uan kimaka. Maske nochi iaxka, nopa tetaj tlauel yolpaki kema ipilsiuapil kimaka nopa xochitl, pampa kiampa kinextilia tlauel kiiknelia. Yeka san nopa xochitl kiita tlauel yejyektsi. Nojkia kiampa pano ika Jehová, ya tlauel yolpaki kema san ya tijmaktiliaj tonemilis (Éx. 34:14).

7. ¿Kenijkatsa tlen kiijtoua Malaquías techpaleuia ma tijkuamachilikaj kenijkatsa kiyolmati Jehová pampa kiita tijtekipanouaj ika nochi toyolo?

⁷ (Xijpoua Malaquías 3:16). Katli ayamo motemaktiliaj uan moatsonpoliuiltiaj tlauel moneki moiljuisej ipan ni ome tlamantli. Maske nochi tiiaxkauaj Jehová pampa ya techchijchijtok, ma timoiljuikaj kenijkatsa tlauel yolpaki kema tikitaj kej toTlanauatijka uan kema timotemaktiliaj uan tijchiuaj ipakilis (Prov. 23:15). Uan ya kinixmati katli elij iaxkauaj uan kiijkuiloua ipan “se libro [...] inintoka nopa tlakamej tlen kimakasij uan moyoliljuiaj tlen ya”.

8, 9. ¿Tlake kineki Jehová ma kichiuakaj katli ijkuilijtok inintoka ipan nopa “libro”?

⁸ Tlaj tijnekij totokaj ma ijkuilijto ipan nopa amochtli tlen Jehová kipia, moneki tijchiuasej se keski tlamantli. Malaquías kiijtok moneki timoyoliljuisej ipan toTeotsij itoka uan amo tijyolkokosej. Tlaj tijueyichiuaj se tlamantli o se akajya, uan amo Jehová, ya kiixpolos totokaj ipan nopa amochtli kampa kiijtoua ajkia inijuantij itstosej nochipa (Éx. 32:33; Sal. 69:28).

 ⁹ Uajka, kema tijmaktiliaj Jehová tonemilis amo san kiijtosneki tikiljuisej tijchiuasej ipakilis uan timoatsonpoliuiltisej. Sempatsi timotemaktiliaj uan timoatsonpoliuiltiaj uan amo miakpa. Uajka, tiitstosej inechka Jehová uan tielisej itekipanojkauaj kiijtosneki mojmostla ipan tonemilis tijnextilisej tijneltokaj ika tlen tijtlapejpenisej tijchiuasej (1 Ped. 4:1, 2).

10. ¿Tlake tlamantli moneki nesis ika katli kitekipanouaj Jehová uan ika katli amo?

¹⁰ Ipan nopa seyok tlamachtili timomachtijkej tlen kichijkej Caín, Salomón uan israeleuanij. Maske inijuantij kiijtouayayaj kiueyichiuayayaj Jehová, amo san ya kiueyichiuayayaj. Tlen kinpanok technextilia katli nelia elij iaxkauaj Jehová moneki kichiuasej tlen xitlauak uan kikualankaitasej tlen amo kuali (Rom. 12:9). Teipa, kema Malaquías kiijtok tlen nopa amochtli kampa toTeotsij kiijkuiloua inintoka katli kineltokaj, Jehová nojkia kiijtok: “Axsanse tlamantli kipantisej tlakamej tlen nechueyitlepanitaj ika tlakamej tlen axnechtlepanitaj” (Mal. 3:18).

11. ¿Kenke sekinok moneki kiitasej timotemaktilijtokej ika Jehová?

¹¹ Seyok tlamantli tlen ika uelis tijnextisej tijtlaskamatij Jehová pampa techtlapejpenijtok kej iuampoyouaj eli kema sekinok kiitaj kenijkatsa kuali titlaneltokatiauij (1 Tim. 4:15; Mat. 5:16). Ma timotlajtlanikaj: “¿Kiitaj sekinok maseualmej nelia nijchiua tlen Jehová kineki? ¿Nijneki sekinok maseualmej ma kimatikaj nieli se tlen Jehová itlajtoltemakauaj?”. Jehová tlauel moyolkokoskia tlaj kiitaskia katli kintlapejpenijtok ma elikaj itekipanojkauaj pinauaj kiniljuisej sekinok elij iaxkauaj (Sal. 119:46; xijpoua Marcos 8:38).

12, 13. ¿Kenke amo tijmatij tlaj sekij nelia elij Jehová itlajtoltemakauaj?

¹² Miakej Jehová itlajtoltemakauaj nojkia moyakanaj ika “tonaltsi tlen [eltok] ipan ni Tlaltipaktli” uan yeka nesij sanse kej katli amo kitekipanouaj toTeotsij (1 Cor. 2:12). Katli kiampa kichiuaj san mosentlaliaj ipan tlen inijuantij kinekij  (Efes. 2:3). Sekij, maske miakpa kintlajtolmakatokej, nojua moyoyontiaj uan moyejyekchiuaj kej amo kinamiki. Tlauel titichtik o tatakatstik tlen mokentiaj o kitekiuiaj yoyomitl tlen kichiua ma nesi se keski tlamantli tlen inintlakayo, uan sekij kiampa moyoyontiaj kema yauij tlanechikoli. Uan sekinok moximaj uan moxiljuiaj kej amo kinamiki (1 Tim. 2:9, 10). Yeka, kema itstokej ininuaya sekinok maseualmej, amo tijmatij ajkia tlen inijuantij elij toTeotsij itekipanojkauaj (Sant. 4:4).

¹³ Uan sekinok toikniuaj kichiuaj se keski tlamantli tlen kinextia nojua kinpaktia tlen maseualmej kichiuaj. Kema yauij ipan se iljuitl, mijtotiaj uan kichiuaj tlen amo kinamiki kichiuasej Cristo itokilijkauaj. Uan kitlaliaj ipan redes sociales inintlaixkopinka uan kiijkuilouaj se keski tlamantli tlen amo kiijkuiloskia se akajya katli kuali tlaneltoka. Maske uelis amo kintlalnamiktijtokej ipan tlanechikoli pampa amo kichijtokej se ueyi tlajtlakoli, tlaj timomatisej ininuaya uelis kichiuasej ayokmo kuali ma titlaneltokakaj (xijpoua 1 Pedro 2:11, 12).

14. ¿Tlake moneki tijchiuasej tlaj tijnekij nojua kuali timouampojchijtosej iuaya Jehová?

¹⁴ “Tlen onka ipan ni Tlaltipaktli technotsa ma tijchiuakaj san tlen totlajtlakolchijkanakayo kineki kichiuas. Techyoltilana ma tijnekikaj timoaxkatisej nochi tlen tikitaj, uan techchiuilia ma timoueyimatikaj ika tlen tijpiaj” (1 Juan 2:16). Tojuantij tiiaxkauaj Jehová uan yeka ya technauatia “ma tijkajteuakaj nochi tlen axkipaktia uan nochi tlen tlakamej tlen ni Tlaltipaktli tlauel kinekij. Yajaya kineki ma timonauatikaj kuali ama ipan ni tonali. Ma tijchiuakaj nochi tlen xitlauak, uan ma tiitstokaj más keja yajaya” (Tito 2:12). Ipan nochi tonemilis, kej tikamanaltij, kej tikitaj tlakualistli uan tlaili, kej timoyoyontiaj, kej timoyejyekchiuaj uan kej titekitij, moneki nesi nelia san Jehová tijmaktilijtokej tonemilis (xijpoua 1 Corintios 10:31, 32).

15. ¿Kenke moneki tikiniknelisej uan kuali tikinnojnotsasej toikniuaj?

¹⁵ Kej tikinitaj sekinok toikniuaj nojkia  kinextia tlaj nelia tijpatiitaj timouampojchijtosej iuaya Jehová. Inijuantij nojkia elij Jehová iaxkauaj. Tlaj nochipa tikilnamiktosej nopa, uajka nochipa tijnextisej tikinikneliaj uan kuali tikinnojnotsasej (1 Tes. 5:15). Jesús kiniljuik itokilijkauaj: “Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:35).

16. ¿Tlake neskayotl kinextia kenijkatsa kinita Jehová itekipanojkauaj?

¹⁶ Ma tikitakaj se neskayotl tlen techpaleuis ma tijkuamachilikaj kenijkatsa kinamiki timouikasej ipan tlanechikoli. Uejkajkia, nopa tlamantli tlen kitekiuiyayaj ipan teokali kiiyokatlalijtoyaj uan monekiyaya kitekiuisej san kema kiueyichiuaskiaj Jehová. Nopa Tlanauatili tlen kimakakej Moisés kuali kiijtouayaya kenijkatsa monekiyaya kimokuitlauisej, uan monekiyaya kinmiktisej katli kiixpanoskiaj nopa tlanauatili (Núm. 1:50, 51). Tlaj Jehová tlauel kimokuitlauiyaya nopa tlamantli tlen motekiuiyaya kema kiueyichiuayayaj, uajka nojkia tlauel kinmokuitlauis itekipanojkauaj katli kimaktilijtokej ininnemilis uan amo kitlauelkauaj. Se tonali, kiniljuik itekipanojkauaj: “ToTeko kiijtoua para aki ueli tlen inmechkuatotonia, inintlakauaj, eltok keja kikokoua iixteyol sitlal, nopa tlen iaxka tlen achi más kimokuitlauia” (Zac. 2:8).

17. ¿Tlake tlamantli kiita Jehová?

¹⁷ Tlajtolpanextijketl Malaquías kiijtoua Jehová kikaki uan kiita kema itekipanojkauaj kuali mouikaj (Mal. 3:16). Kena, “toTeko kinixmati inijuantij tlen nelia iaxkauaj” (2 Tim. 2:19). Ya kineki kuali kiitas nochi tlamantli tlen tijchiuaj uan tlen tikijtouaj (Heb. 4:13). Uan kema tijnextiaj amo tikinikneliaj toikniuaj, Jehová nojkia kiita nopa. Uan temachtli tijmatij nojkia kiita kema tikintlapojpoljuiaj toikniuaj, kuali tikinseliaj, tikinikneliaj uan kema tikinmakaj tlen tijpiaj (Heb. 13:16; 1 Ped. 4:8, 9).

18. ¿Kenijkatsa tijnextiaj tijtlaskamatiliaj Jehová pampa tiitstokej ipan itlanechikol?

¹⁸ Tijnekij ika nochi toyolo tijnextisej tlauel tijtlaskamatiliaj Jehová pampa tiitstokej ipan itlanechikol. Nelia tlauel kuali tlen tijtlapejpenijkej kema tijnejkej tijmaktilisej tonemilis. Maske tiitstokej kampa maseualmej “tlauel fiero inintlalnamikilis”, tijnekij sekinok ma kiitakaj tijpiaj “se yolistli tlen tlapajpaktik” uan tijchiuaj kejuak “ma kauani [t]otlauil” (Filip. 2:15). Amo tijnekij tijchiuasej yon se kentsi tlen amo kuali (Sant. 4:7). Uan tikinikneliaj uan tikintlepanitaj toikniuaj, pampa tijmatij nojkia elij iaxkauaj Jehová (Rom. 12:10).

19. ¿Kenijkatsa kinteochiua Jehová katli amo kitlauelkauaj?

¹⁹ Biblia techtenkauilia ni: “ToTeko axkintlauelkauas itlakauaj pampa inijuantij iaxkauaj” (Sal. 94:14). Jehová nelia kichiuas tlen techtenkauilijtok. Yon mikilistli uelis kichiuas toTeotsij amo ma techikneli (Rom. 8:38, 39). “Tlaj tiitstosej, tiitstosej kej tiiaxkauaj Jehová, uan tlaj timikisej, timikisej kej tiiaxkauaj Jehová. Uajka, tlaj tiitstosej o timikisej, tojuantij tiiaxkauaj Jehová” (Rom. 14:8, TNM). Tijnekij ma asi nopa tonali kema Jehová kinyolkuis nochi iuampoyouaj katli amo kema kitlauelkajkej (Mat. 22:32). Ipan ni tonali tijseliaj miak tlateochiualistli. Kej Biblia kiijtoua, “pakij tlakamej ipan nopa tlali tlen motemachiaj ipan toTeko. Kena, nelia pakij nopa tlakamej tlen toTeko kintlapejpenijtok para iaxkauaj” (Sal. 33:12).