IPAN Biblia ijkuilijtok miak tlajtoli tlen kinextia kenijkatsa kiyolmatiyayaj maseualmej katli eliyayaj “keja tojuantij” (Sant. 5:17). Kej apóstol Pablo, katli kiijtok: “[Maske] tijnekij tijchiuasej tlen kuali, tijchiuaj tlen axkuali. [...] ¡Nelia niteiknelti!” (Rom. 7:21-24). Uelis nojkia tijyolmatij kej ya. Kema tijchiuaj kampeka amo tijchiuasej tlen techyoltilana, tlen ya kiijtok techyolchikaua.

Pablo nojkia kiijtok kenijkatsa kiyolmatiyaya pampa Jesús motemaktilik. Ipan Gálatas 2:20 kiijtok: “IKone toTeko [...] nechiknelik uan motemaktilik uan mijki nopampa na”. Pablo tlauel motemachijtoya ipan nopa tlamantli. ¿Nojkia timoiljuiaj kej ya? Uelis kemantika achi ouij tijneltokasej nopa.

Tlaj tlauel amo kuali tijyolmatij pampa uejkajkia titlajtlakolchijkej, uelis kemantika ouij timoiljuisej Jehová nelia techiknelia uan techtlapojpoljuijtok. Uan nojua tlauel ouij tijmatij tijneltokasej nopa tlaxtlauili eli se nemaktli tlen techchiuilijtokej sejse tlen tojuantij. ¿Nelia kiampa kineki toTeotsij ma tikitakaj? Uan, ¿tlake techpaleuis ma tikitakaj kej se nemaktli? Ma tijnankilikaj ni ome tlajtlanili.

Jesús kineki ma tijselikaj inemilis tlen temaktilik kej se nemaktli tlen ya techmakatok. ¿Kenke temachtli tijmatij nopa? Ma timoiljuikaj kenijkatsa panok tlen kiijtoua Lucas 23:39-43. Se tlakatl katli kikuapilojtokej inakastla Jesús kiijtoua kena kinamiki ma kitlatsakuiltikaj. Uelis kichijki tlen tlauel amo kuali, pampa san kinkuapilouayayaj katli nelia tlauel kichiuayayaj tlen amo kuali. Nopa tlakatl tlauel amo kuali kiyolmati, uan yeka kitlajtlania Jesús: “Xinechilnamiki kema titlanauatis”.

¿Kenijkatsa kinankilia Jesús? Ximoiljui kenijkatsa tlauel kikokoua itsonteko kema kiolinia pampa kineki kiixtlachilis nopa tlakatl. Maske tlauel kuajkualo, kichiua kampeka kiixuetskilis uan ika miak tlaiknelili kiiljuia: “Nelia nimitsiljuia nama: tiitstos nouaya ipan Xochimili”. Jesús ueltoskia san kiilnamikilis ya ualajtoya temaktiliki inemilis uan kiampa kinmakixtiki maseualmej (Mat. 20:28). Maske ueltoskia kiampa kichiuas, ya kipaleuik nopa tlakatl ma kikuamachili imikilis kipaleuiskia. Ika miak tlaiknelili, Jesús kiiljuik “tiitstos nouaya”, uan pampa Jesús temakaskia se tlaxtlauili, nopa tlakatl kiseliskia se tlamantli tlen tlauel kuali: itstoskia nochipa ipan se xochimili.

Nopa tlakatl ayokmo kema ueliskia kitekipanos toTeotsij. Yeka, Jesús kinekiyaya nopa tlakatl ma kikuamachili kema Jesús mikiskia eliskia kejuak se nemaktli tlen ya kimakayaya. Tlaj Jesús kinejki nopa tlakatl ma kikuamachili nopa, uajka nojkia kineki se itokilijka katli moatsonpoliuiltijtok ma kikuamachili imikilis eli kej se nemaktli tlen ya kimakatok. Uajka, ¿tlake techpaleuis ma tijneltokakaj Cristo imikilis nelia techpaleuia sejse tlen tojuantij maske uejkajkia tlauel titlajtlakolchijkej?

Pablo kikuamachilik Jesús mijki ipampa kema kinauatik ma kinmatilti sekinok nopa kuali tlamachtili. Pablo kiijtok: “Nijtlaskamati toueyiTeko Jesucristo tlen nechyolitak para nitemachtli uan yeka nechmakak ni iteki uan nechfuerzajmakatok  ma nijchiua. [Maske] yajaya kuali kimatiyaya para achtouia nikauilmatiyaya itoka Cristo. Achtoui nikintlaijiyouiltiyaya itlakauaj uan nelia nimosisiniyaya” (1 Tim. 1:12-14). Pampa kimakakej nopa tekitl, Pablo motemachik Jesús nelia kitlasojtlayaya, kiikneliyaya uan motemachiyaya ipan ya. Nama, Jesús nojkia techmakatok sejse tlen tojuantij nopa tekitl: ma tijmoyauakaj nopa kuali tlamachtili tlen toTeotsij iTlanauatijkayo (Mat. 28:19, 20, TNM). ¿Nojkia techpaleuia ni tekitl kej kipaleuik Pablo?

Ma tikitakaj tlen kipanok Albert, katli sampa pejki kitekipanoua Jehová maske kikixtijtoyaj tlen tlanechikoli nechka 34 xiuitl. Ya kiijtoua: “Maske nochipa nikilnamiki notlajtlakoljuaj, kema nitlajtolmoyaua, nikilnamiki Jesús nechmakatok na nopa tekitl sanse kej Pablo. Nopa kichiua tlauel ma niyolpaki uan nechpaleuia ma nimoita kej kinamiki, ma nijpatiita nonemilis uan tlen nijselis teipa” (Sal. 51:3).

Allan tlauel mosisiniyaya uan kichijki miak tlamantli tlen amo kuali kema ayamo momachtiyaya Biblia. Ya kiijtoua: “Nojua nimoiljuia kenijkatsa nikinchiuilik sekinok tlen tlauel amo kuali. Maske kemantika tlauel nimoyolkuesoua, nijtlaskamatilia Jehová pampa nechkaua nikinmatiltis sekinok nopa kuali tlamachtili maske nitlajtlakole. Kema maseualmej kuali nechtlakakiliaj, nechpaleuia ma nikilnamiki Jehová tlauel kuali iyolo uan tlauel techiknelia. Nimoiljuia ya nechtekiuia uan kiampa kinpaleuia maseualmej katli elij kej na nieliyaya”.

Kema titlajtolmoyauaj techpaleuia ma timosentlalikaj tijchiuasej tlen kuali uan timonejneuilisej ipan tlen kuali. Techpaleuia ma timotemachikaj Jesús nelia techtlasojtla, techiknelia uan motemachia ipan tojuantij.

Tlaj ayamo kintsontlamiltijtosej kampa Satanás tlanauatia, uelis nojua techyolkokojtos nochi tlen amo kuali katli tijchijkej. ¿Tlake techpaleuis amo tlauel ma techyolkokojto?

Jean nojkia tlauel moyolkokoua pampa kema telpokatl kichiuayaya tlen amo kuali maske kitekipanouayaya toTeotsij. Maske kiampa kiyolmati, ya kiijtoua: “Tlauel nechpaktia nikilnamikis ‘tlen toTeko kiijtoua tlen tojuantij ipati más tlen nopa tlen toyolo techiljuia’” (1 Juan 3:19, 20). Tojuantij nojkia tlauel techyolchikaua tijmatisej Jehová uan Jesús kikuamachiliaj tielij titlajtlakolejkej. Ma tikilnamikikaj inintlaiknelijkayo kinyololinik ma temakakaj se tlaxtlauili tlen ika kinmakixtiskiaj tlajtlakolchiuanij uan amo maseualmej tlen amo elij tlajtlakolejkej (1 Tim. 1:15).

Uelis timotemachisej nopa tlaxtlauili eli se nemaktli tlen techmakatokej tlaj tijchiuasej ome tlamantli: timonejneuilisej kenijkatsa Jesús kinitak maseualmej katli eliyayaj tlajtlakolejkej uan tijchiuasej kampeka ika nochi toyolo titlajtolmoyauasej kej ya technauatijtok. Kiampa, uelis tikijtosej kej Pablo: Jesús “nechiknelik uan motemaktilik uan mijki nopampa na”.