1. 1) ¿Tlake techtlajtolmaka Filipenses 2:3? 2) ¿Uan kenijkatsa techpaleuis tlaj tijchiuasej tlen kiijtoua?

NOCHI katli tijtekipanouaj Jehová amo timoueyimatij uan tijchiuaj tlen tlanauatia pampa tijmatij san ya nopa techpaleuis (Efes. 4:22-24). Pampa amo timoueyimatij, tikachtouitlaliaj toTeotsij itlanauatiljuaj uan nopa techpaleuia tikinpatiitasej sekinok. Kema kiampa tijchiuaj, techpaleuia kuali ma timouampojchiuakaj iuaya Jehová uan ininuaya toikniuaj (xijpoua Filipenses 2:3).

2. 1) ¿Tlake kiijtok Pablo? 2) ¿Uan tlake tikitasej ipan ni tlamachtili?

² Tlaj amo timomokuitlauiaj, peuas timoueyimatisej uan san tojuantij timoiknelisej, kej kichiuaj maseualmej katli Satanás kinnauatia. * Ipan achtoui siglo nojkia kiampa pejtoya kichiuaj, yeka apóstol Pablo kiniljuik toikniuaj tlen Roma: “Amo ximoiljuikaj para más inuejueyij iixpa toTeko uan axkeja kinamiki. San ximoiljuikaj tlen melauak” (Rom. 12:3). Pablo kiijtok amo kenijki tlaj timopatiitaj kej kinamiki. Uan tlaj amo timoueyimatij techpaleuis ma timoitakaj kej kinamiki. Ipan ni tlamachtili tikitasej eyi tlamantli tlen techpaleuis amo timoiljuisej san tojuantij tlauel topati: 1) katli mosenkajtokej, 2) tekitl tlen techmakaj ipan tlanechikoli uan 3) redes sociales.

3. 1) ¿Kenke katli mosenkajtokej kemantika kipiaj kuesoli? 2) ¿Tlake moiljuiaj sekij kema kipiaj kuesoli?

³ Jehová kineki ma yolpakikaj katli mosenkajtokej. Uan  pampa nochi titlajtlakolejkej, kemantika tijpiaj kuesoli. Pablo nojkia kiijtok katli mosenkauaskiaj kipiaskiaj kuesoli (1 Cor. 7:28). Sekij toikniuaj katli mosenkajtokej tlauel mokualaniaj, yeka kemantika moiljuiaj amo mosenkajtoskiaj. Tlaj moiljuiaj kej maseualmej, uajka kinextisej san inijuantij moikneliaj uan kinekisej kiixpolosej nopa amatl kampa nesi mosenkajtokej.

4. ¿Tlake amo kinamiki moiljuisej katli mosenkajtokej?

⁴ Katli mosenkajtokej amo kinamiki moiljuisej ayokmo uelis itstosej sansejko. Moneki kiilnamikisej san uelis kiixpolosej nopa amatl kampa nesi mosenkajtokej, tlaj se tlen inijuantij momekatis (Mat. 5:32). Yeka, tlaj katli mosenkajtokej kipiasej se kuesoli tlen Pablo kiijtok, amo kinamiki moiljuisej: “¿Nechmaka tlen na nijneki katli iuaya nimosenkajtok? ¿Nelia nechiknelia? ¿Tlauel niyolpakis tlaj nimosenkauas iuaya seyok?”. Tlauel amo kuali tlaj kiampa moiljuisej, pampa kinextisej tlauel moueyimatij. Maseualmej kiijtouaj uelis kichiuasej san tlen inijuantij kinekij uan san tlen inijuantij kinyolpakiltis, maske ayokmo itstosej sansejko. Katli kichiuaj tlen Biblia tlamachtia amo san moiljuiaj ipan tlen inijuantij kinpaleuis, moiljuiaj ipan tlen kinpaleuis sekinok (Filip. 2:4). Jehová kineki katli mosenkajtokej nochipa ma itstokaj sansejko (Mat. 19:6). Ya kineki ma timoiljuikaj ipan tlen ya kipaktia uan amo ipan tlen tojuantij techpaktia.

5. Kej kiijtoua Efesios 5:33, ¿tlake moneki kichiuasej katli mosenkajtokej?

⁵ Katli mosenkajtokej moneki moiknelisej uan motlepanitasej (xijpoua Efesios 5:33). Biblia kiijtoua: “Pakilistli kiselia tlen temaka se tlenijki, uan axkeja tlen kiselia” (Hech. 20:35). Yeka, tlaj katli mosenkajtokej kinekij moiknelisej uan motlepanitasej, moneki amo moueyimatisej. Nopa kinpaleuis  amo mosentlalisej san ipan tlen inijuantij kinekij (1 Cor. 10:24).

6. ¿Tlake techmachtia tlen kiijtojkej toikniuaj Steven uan Stephanie?

⁶ Miakej katli mosenkajtokej tlauel yolpakij kema amo moueyimatij. Ma timoiljuikaj tlen kiijtok toikni Steven: “Tlaj sansejko inkichiuaj se tlamantli uan inmopaleuiaj, uajka kema onkas kuesoli nojkia inmopaleuisej. Amo ma timoiljuikaj ‘¿tlake uelis nechpaleuis?’, moneki timoiljuisej ‘¿tlake uelis techpaleuis?’”. Isiua, katli itoka Stephanie, nojkia kiampa kiijtoua: “Amo tijnekiskiaj tiitstosej iuaya se akajya katli techkualankaita. Kema tijpiaj se kuesoli tikitaj kenke kiampa pano, timomaijtouaj, tijtemouaj tlamachtili uan timokamanaljuiaj. Tijchiuaj kampeka tijsenkauasej nopa kuesoli uan amo san timokualanijtosej”. Yeka, tlaj katli mosenkajtokej amo moueyimatij, tlauel yolpakisej.

7. ¿Tlake moneki kichiuas se toikni kema kiselia se tekitl ipan tlanechikoli?

⁷ Tlauel tiyolpakij kema tijchiuaj kampeka tlauel tijtekipanosej Jehová (Sal. 27:4; 84:10). Amo kenijki kema se toikni kipaktia tlatekipanos ipan Jehová itlanechikol. Biblia kiijtoua: “Intla se tlakatl kineki mochiuas se ueuejtlaneltokaketl para tlayakanas ipan tlasentilistli, kineki se kuali tekitl” (1 Tim. 3:1). Uan tlaj kiselis se tekitl ipan tlanechikoli, amo kinamiki moueyimatis (Luc. 17:7-10). Moneki mosentlalis kintekipanos sekinok (2 Cor. 12:15).

8. ¿Tlake techmachtia tlen kichijkej Diótrefes, Uzías uan Absalón?

⁸ Ipan Biblia nesi se keskij maseualmej katli tlauel moueyimatkej, kej Diótrefes katli moiljuiyaya san ya ueliyaya kichiua nochi tlamantli uan kipaktiyaya san ya tlayakanas ipan tlanechikoli (3 Juan 9). Uzías kinextik moueyimatiyaya kema kinejki kichiuas se tekitl tlen Jehová amo kinauatijtoya ma kichiua (2 Crón. 26:16-21). Uan Absalón pejki kinpaleuia maseualmej san pampa kinejki ma kipaleuikaj elis tlanauatijketl (2 Sam. 15:2-6). Kej tikitaj, Jehová amo kipaktia kema se akajya moueyimati (Prov. 25:27). Kema se akajya moueyimati uan kineki miak tlamantli, tlauel amo kuali itstok (Prov. 16:18).

9. ¿Kenijkatsa techpaleuia tlen Jesús kichijki?

⁹ Jesús amo kiampa kichijki, ya techmakak se kuali neskayotl. Biblia kiijtoua maske ya “ueltoskia mokajtoskia kampa ipa itstoya iuaya toTeko Dios, axmoiljuik para moneki mokauas nopona ika nopa ueyi tlanauatili tlen kipixtoya” (Filip. 2:6). Tijmatij san Jehová kipia nochi chikaualistli, uan maske Jesús nojkia kipia tlauel miak chikaualistli, ya amo moueyimati. Ya kiniljuik itokilijkauaj: “Uan aki ueli tlen inmojuantij tlen más moiknonekis, yajaya más kipias tekiuejkayotl” (Luc. 9:48). Tlauel tiyolpakij kema titlatekipanouaj ininuaya precursores, tlapaleuianij, ueuejtlakamej, toikniuaj katli tepaxalouaj chijchikuasej metstli pampa kichiuaj kampeka amo moueyimatisej kej Jesús. Kema nochi katli tijtekipanouaj Jehová amo timoueyimatij, tijnextiaj nelia moikneliaj ipan toTeotsij itlanechikol (Juan 13:35).

10. ¿Tlake kinamiki tijchiuasej tlaj ipan tlanechikoli tikitaj amo kisenkauaj se keski kuesoli?

¹⁰ Kema ipan totlanechikol tikitaj onka se keski kuesoli, amo kinamiki tikinijilnamikisej toikniuaj katli techyakanaj pampa timoiljuisej amo kuali kichiuaj ininteki. Tojuantij moneki amo timoueyimatisej uan tikinpaleuisej katli techyakanaj (Heb. 13:17). ¿Kenijkatsa uelis tijchiuasej? Ma timotlatsintokikaj:  “¿Nelia eli tlauel ueyi nopa kuesoli tlen pano ipan tlanechikoli? Tlaj nopa kuesoli moneki mosenkauas, ¿nimantsi kinamiki mochiuas? ¿Kinamiki na nijsenkauas? Ika tlen nijneki nijchiuas, ¿kinextis nijneki sansejko ma itstokaj toikniuaj o san pampa nijneki ma nechueyimatikaj?”.

11. Kej kiijtoua Efesios 4:2, 3, ¿tlake panos tlaj amo timoueyimatij kema tijtekipanouaj Jehová?

¹¹ Jehová tlauel kipatiita kema se akajya amo moueyimati uan amo pampa kimati kichiuas miak tlamantli, uan nojkia kipatiita kema sansejko tiitstokej uan amo kema se akajya kichiua miak tekitl. Yeka, ma tijchiuakaj kampeka amo timoueyimatisej kema tijtekipanouaj Jehová, kiampa sansejko tiitstosej ipan tlanechikoli (xijpoua Efesios 4:2, 3). Nochipa ma titlajtolmoyauakaj uan ma tijchiuakaj tlamantli tlen kinpaleuis sekinok. Nojkia, nochi ma tikinselikaj uan amo san katli kintekimakatokej ipan tlanechikoli (Mat. 6:1-4; Luc. 14:12-14). Tlaj kiampa tijchiuasej, sekinok amo san kiitasej ueli tijchiuaj se keski tlamantli, nojkia kiitasej amo timoueyimatij.

12. Xikixtoma kenke Biblia kiijtoua moneki tikinpiasej touampoyouaj.

¹² Jehová kineki ma timoyolpakiltikaj ininuaya tochampoyouaj uan touampoyouaj (Sal. 133:1). Jesús nojkia kinpiayaya iuampoyouaj (Juan 15:15). Nojkia, Biblia kiijtoua tlauel techpaleuia kema tikinpiaj kuali touampoyouaj (Prov. 17:17; 18:24). Uan nojkia kiijtoua kema se akajya mouejkatlaliaj amo kuali itstok (Prov. 18:1). Miakej moiljuiaj redes sociales uelis kinpaleuis kinpiasej  miakej ininuampoyouaj uan kiampa amo kiyolmatisej itstokej ininselti. Tlaj tijtekiuiaj redes sociales, moneki timomokuitlauisej.

13. ¿Kenke katli tlauel kitekiuiaj redes sociales tlauel mokuesouaj uan kimatij itstokej ininselti?

¹³ Se keskij ixtlamatinij kiijtouaj katli san kitlachiliaj tlaixkopinkayomej tlen sekinok kitlaliaj uan san kipouaj tlen kiijtouaj ipan redes sociales, amo kuali kiyolmatij uan tlauel mokuesouaj. ¿Kenke? Pampa ipan redes sociales kitlaliaj tlaixkopinkayomej kema nesij tlauel yolpaktokej, kema kisaj ininuaya ininuampoyouaj uan kema paxalotoj kanajya. Yeka, kema se akajya kitlachilia, uelis moiljuis ya amo yolpaki. Se tosiuaikni katli kipia 19 xiuitl kiijtoua: “Tlauel nimokuesouayaya kema nikitayaya sábados uan domingos sekij moyolpakiltiyayaj, uan na san niitstoya nochaj uan amo tleno nijchiuayaya”.

14. ¿Kenijkatsa 1 Pedro 3:8 techpaleuia kuali ma tijtekiuikaj redes sociales?

¹⁴ Redes sociales uelis techpaleuis tlaj kuali tijtekiuiaj, kej kema timokamanaljuikaj ininuaya tochampoyouaj uan touampoyouaj. Maske techpaleuia, moneki tikitasej tlen maseualmej kitlaliaj ipan redes sociales san kinekij ma kintlachilikaj. Nojkia, sekij kitlaliaj tlajtoli sokiyo ipan ininixkopinka o ipan sekinok ininixkopinka. Nochi ni tlamantli amo kipaleuia se Cristo itokilijkaj ma kinexti kuajkuali tlamantli, kej amo moueyimatis uan kitekipachos tlen kinpano sekinok (xijpoua 1 Pedro 3:8).

15. ¿Kenijkatsa Biblia techpaleuia amo timoueyimatisej?

¹⁵ Tlaj tijtekiuiaj redes sociales, moneki timotlatsintokisej: “¿Tlake tlamantli nikijkuiloua uan tlake tlaixkopinkayotl uan videos nijtlalia? ¿Kinextia nimoueyimati? ¿Kichiua ma nechkualankaitakaj?”. Biblia kiijtoua: “Nochi tlamantli tlen onka ipan ni Tlaltipaktli technotsa ma tijchiuakaj san tlen totlajtlakolchijkanakayo kineki kichiuas. Techyoltilana ma tijnekikaj timoaxkatisej nochi tlen tikitaj, uan techchiuilia ma timoueyimatikaj ika tlen tijpiaj ipan tonemilis nikaj. Pero ni tlamantli axuala tlen toTeko Dios” (1 Juan 2:16). Ipan seyok Biblia kiijtoua nopa tlajtoli “ma timoueyimatikaj ika tlen tijpiaj ipan tonemilis”,  kiijtosneki kema se akajya san “kineki ma kiitakaj tlauel ipati maske amo kiampa eli”. Cristo itokilijkauaj amo kichiuaj se keski tlamantli san pampa kinekij ma kinitakaj. Tojuantij tijchiuaj tlen Biblia kiijtoua: “Ma ayok tijtemokaj ajkeya techueyimatis. Ma ayok timonajnankilikaj. Uan ma ayok tikixtokakaj tlen sekinok kipiaj” (Gál. 5:26). Tlaj amo timoueyimatij, amo tijchiuasej sekinok ma moiljuikaj tlauel topati, kej maseualmej kichiuaj.

16. ¿Kenke amo tijnekij timoueyimatisej?

¹⁶ Amo kinamiki timoueyimatisej, pampa katli moueyimatij kinextiaj amo kuali monejnemiltiaj (Rom. 12:3). Inijuantij kinpaktia mokualanisej ininuaya sekinok uan san inijuantij mopatiitaj. Nojkia, tlen moiljuiaj uan tlen kichiuaj tlauel kintlanauia, uan amo kinpaleuia sekinok. Tlaj amo kipatlaj tlen moiljuiaj, Satanás kichiuas ma kipiakaj amo kuali inintlalnamikilis (2 Cor. 4:4; 11:3). Uan katli amo moueyimatij, inijuantij kuali monejnemiltiaj. Moitaj kej kinamiki, uan kimatij amo san inijuantij uelij kichiuaj miak tlamantli (Filip. 2:3). Nojkia kimatij toTeotsij “axkinkualita tlen moueyimatij, pero ueyi iyolo ika tlen moiknochiuaj iixtla” (1 Ped. 5:5). Yeka, amo tijnekij tijchiuasej Jehová amo kuali ma techita.

17. ¿Tlake moneki tijchiuasej uan kiampa amo timoueyimatisej?

¹⁷ Tlaj amo tijnekij timoueyimatisej, moneki tijchiuasej tlen Biblia kiijtoua: “Keja se mokixtilia itlake sosoltik, ya inmokixtilijtokej inmotlajtlakolchijkatlalnamikilis tlen inmechnauatiyaya uan inkikajtejtokej nochi nopa fiero tlamantli tlen inkichiuayayaj. Ama keja se tlakatl tlen mokentia iyoyo tlen yankuik, toTeko inmechmakatok se inmonemilis tlen yankuik tlen eltok keja ya” (Col. 3:9, 10; 1 Ped. 2:21). Tlaj kiampa tijchiuaj tlauel techpaleuis. Yeka, tlaj amo timoueyimatij tochampoyouaj nojua tlauel yolpakisej, sansejko tiitstosej ininuaya toikniuaj uan kuali tijtekiuisej redes sociales. Kiampa Jehová nochipa kuali techitas uan nochipa techteochiuas.