1. Kej kiijtoua 3 Juan 3, 4, ¿tlake tlamantli kichiua tlauel ma tiyolpakikaj?

KEMA apóstol Juan kimatki katli kinpaleuijtoya ma mochiuakaj Cristo itokilijkauaj nojua kitekipanoyaya Jehová, tlauel yolpajki. Katli kinpaleuijtoya kinitayaya kej ikoneuaj. Uan pampa kipixtoyaj kuesoli, Juan kichijki miak tlamantli uan kiampa kinpaleuik nojua kuali ma tlaneltokakaj. Tojuantij nojkia tiyolpakij kema tikinitaj tokoneuaj o katli tikinmachtijkej, kimaktiliaj Jehová ininnemilis uan nojua kitekipanouaj (xijpoua 3 Juan 3, 4).

2. ¿Kenke Juan kiijkuilok eyi amatlajkuiloli?

² Juan uelis itstoya ipan Éfeso o nechka tlen nopa altepetl ipan xiuitl 98 y.u.J. Uelis nopaya tlakuepilik kema ayokmo kitsaktoyaj ipan Patmos. Uajka, Jehová kitekiuik itonal uan kiampa Juan kiijkuilok eyi amatlajkuiloli. Nopa amatlajkuiloli kinpaleuiskia Cristo itokilijkauaj nojua ma tlaneltokakaj ipan Jesús uan nojua ma kichiuakaj tlen melauak.

3. ¿Tlake tikitasej ipan ni tlamachtili?

³ Ipan nopa tonali san itstoya Juan, yeka motekipachouayaya pampa ipan tlanechikoli itstoyaj katli tlamachtiyayaj tlen amo melauak (1 Juan 2:18, 19, 26). * Ni apóstatas maske kiijtouayayaj kiixmatij toTeotsij, amo kichiuayayaj itlanauatiljuaj. Ipan ni tlamachtili tikitasej tlen Juan kintlajtolmakak uan nojkia tijnankilisej eyi tlajtlanili: ¿Tlake kiijtosneki tinemisej ipan tlen melauak? ¿Tlake tlamantli tikixnamikij? ¿Kenijkatsa timopaleuisej nojua tinemisej ipan tlen melauak?

4. Kej kiijtoua 1 Juan 2:3-6 uan 2 Juan 4, 6, ¿tlake kinamiki tijchiuasej tlaj tijnekij tinemisej ipan tlen melauak?

⁴ Tlaj tijnekij tinemisej ipan tlen melauak, achtoui moneki tijmatisej tlake nelnelia tlamachtia Biblia. Nojkia, moneki tijchiuasej tlen Jehová tlanauatia (xijpoua 1 Juan 2:3-6; 2 Juan 4, 6). Jesús kuali kinextik kenijkatsa uelis tijchiuasej. Yeka, tlaj tijnekij tijneltokasej Jehová, moneki tijchiuasej kampeka tijchiuasej kej Jesús kichijki (Juan 8:29; 1 Ped. 2:21).

5. ¿Ipan tlake tlamantli moneki timotemachisej?

⁵ Tlaj tijnekij tinemisej ipan tlen melauak, moneki timotemachisej Jehová amo kema istlakati uan yeka tlen kiijtoua ipan Biblia eli melauak. Nojkia moneki tijneltokasej Jesús eli Mesías katli kitlapejpenijtokej. Ipan ni tonali miakej amo kineltokaj tlaj Jesús nelia kitlapejpenijkej ma tlanauati ipan toTeotsij iTlanauatijkayo. Juan kiijtok ‘itstokej miakej tlakajkajyauanij’, katli uelis kinkajkayauasej katli amo motemachiaj tlaj Jehová uan Jesús kichiuaj tlen melauak (2 Juan 7-11). Juan kiijkuilok: “Tojuantij tijmatij ajkeya istlakati. Istlakatij tlen kiijtouaj Jesús axya nopa Cristo tlen toTeko techiljuik techtitlaniliskia” (1 Juan 2:22). Tlaj timomachtiaj Biblia, techpaleuis amo ma techkajkayauakaj uan nojua tikixmatisej Jehová uan iKone (Juan 17:3). Tlaj kiampa tijchiuasej, techpaleuis timotemachisej tlen tijneltokaj nelia eli melauak.

6. ¿Tlake tlamantli kiixnamikij telpokamej katli kitekipanouaj toTeotsij?

⁶ Nochi Cristo itokilijkauaj moneki timomokuitlauisej uan kiampa amo techkajkayauasej ika tlen maseualmej moiljuiaj (1 Juan 2:26). Telpokamej moneki tlauel momokuitlauisej ika tlen maseualmej moiljuiaj. Alexia, * se tosiuaikni katli eua Francia uan kipia 25 xiuitl, kiijtoua: “Kema niauiyaya escuela, nimomachtik evolución uan se keski tlamantli tlen maseualmej moiljuiaj. Ni kichiuayaya ma nimoiljui amo melauak tlen nijneltoka. Kemantika nechpaktiyaya tlen nechmachtiyayaj. Teipa nimoiljuik amo kinamiki san nikintlakakilis, monekiyaya nikiniljuis kenijkatsa kiita Jehová”. Alexia momachtik amochtli La vida... ¿cómo se presentó aquí? ¿Por evolución, o por creación? San ipan se keski tonali ayokmo kineltokak tlen kiixtomayayaj kampa momachtiyaya.  Ya kiijtoua: “Noselti nikitak tlen Biblia tlamachtia eli melauak. Nojkia nikitak tlaj nijchiuas tlen nopaya kiijtoua nechpaleuis ma niyolpaki uan ma niitsto ika tlaseuilistli”.

7. ¿Ika tlake tlamantli moneki tijchiuasej kampeka, uan kenke?

⁷ Tlaj ya tiuejueyij o nojua titelpokamej, moneki tijchiuasej kampeka amo timoiljuisej uelis tijtekipanosej Jehová uan nojkia tijchiuasej tlen amo kuali. Juan kiijtok amo uelis tinemisej ipan tlen melauak uan nojkia timomekatisej (1 Juan 1:6). Tlaj tijnekij nochipa kuali ma techita Jehová, moneki kuali timonejnemiltisej uan timoiljuisej nochipa techtlachilijtokej. Jehová kiita nochi tlamantli tlen tijchiuaj (Heb. 4:13).

8. ¿Tlake tlamantli amo kinamiki tijchiuasej?

⁸ Nojkia amo ma tikitakaj kej maseualmej kiitaj tlajtlakoli. Juan kiijtok: “Intla tikijtouaj axtijpiaj tlajtlakoli, uajka timokajkayauaj ika toseltsitsij” (1 Juan 1:8). Kema Juan itstoya, apóstatas kiijtouayayaj se maseuali maske tlajtlakolchiuas nojua uelis mouampojchijtos iuaya Jehová. Ipan ni tonali miakej kiampa moiljuiaj. Maske kiijtouaj kineltokaj nelia itstok toTeotsij, inijuantij amo kiitaj se tlajtlakoli kej Jehová kiita, kej kema omej motekaj sansejko o kema momekatiaj. Tlen Jehová kiita kej tlajtlakoli, maseualmej amo kiampa kiitaj, yeka kiijtouaj se akajya uelis kichiuas tlen kipaktia.

9. ¿Kenijkatsa kinpaleuia telpokamej kema kichiuaj tlen Biblia kiijtoua?

⁹ Telpokamej nojkia uelis peuasej moiljuisej amo kenijki kej maseualmej monejnemiltiaj, pampa uelis katli ininuaya momachtiaj o katli ininuaya tekitij kiampa moiljuiaj. Kiampa kipanok Aleksandar, ya kiijtoua: “Se keskij ichpokamej katli ininuaya nimomachtiyaya, nechtetsopayayaj ma nimoteka ininuaya. Kiijtouayayaj nikinixtokayaya tlakamej,  yeka amo ninemiyaya iuaya se ichpokatl”. Telpokatl, uelis nojkia kiampa mitspano. Xikilnamiki, tlaj tijchiuas tlen Biblia kiijtoua sekinok kuali mitsitasej, mitspaleuis tiyolpakis uan kuali timouikas iuaya Jehová. Kema amo tijchiuas tlen sekinok kinekij xijchiua, mitspaleuis nochipa tijchiuas tlen kuali. Xikilnamikto Satanás kinauatia Tlaltipaktli uan kineki ma momekatikaj. Uelis tijtlanis Satanás, tlaj amo timoiljuis kej maseualmej moiljuiaj (1 Juan 2:14).

10. ¿Kenijkatsa 1 Juan 1:9 techpaleuia ma tijtekipanokaj Jehová ika kuali totlalnamikilis?

¹⁰ Jehová kinamiki kiijtos tlake tlamantli eli tlajtlakoli. Yeka, tijchiuaj kampeka uan kiampa amo titlajtlakolchiuasej. Uan tlaj timokuapolouaj, tikiljuiaj Jehová (xijpoua 1 Juan 1:9). Kema tijchiuaj se ueyi tlajtlakoli, tikiniljuiaj ueuejtlakamej pampa Jehová kintekimakatok ma techpaleuikaj (Sant. 5:14-16). Tlaj uejkajkia tijchijkej se tlajtlakoli, amo ma tijkauakaj ma techyolkokojto nopa tlajtlakoli. ¿Kenke? Pampa Jehová katli tlauel teiknelia, temaktilik ikone ma techtlapojpoljui totlajtlakoljuaj. Kema Jehová kiijtoua kitlapojpoljuis se akajya katli moyolkueptok, kiampa kichiua pampa amo istlakati. Yeka, uelis tijtekipanosej uan amo techyolkokos totlalnamikilis (1 Juan 2:1, 2, 12; 3:19, 20).

11. ¿Tlake uelis tijchiuasej tlaj nojua tijnekij kuali titlaneltokasej uan kiampa amo tijchiuasej tlen apóstatas kiijtouaj?

¹¹ Nojkia, amo ma tijneltokakaj tlen apóstatas kiijtouaj. Kema pejki tlanechikoli, Satanás nochipa kintekiuijtok maseualmej uan kiampa kichijtok toTeotsij itekipanojkauaj ma kineltokakaj tlen amo kuali. Yeka, moneki tikitasej tlake tlamachtili eli melauak uan tlake amo. * Tokualankaitakauaj uelis  kitekiuisej Internet uan redes sociales uan kiampa kichiuasej ayokmo ma timotemachikaj ipan Jehová uan ayokmo ma tikiniknelikaj toikniuaj. Yeka, amo ma tijneltokakaj tlen kiijtoua Satanás pampa san istlakati (1 Juan 4:1, 6; Apoc. 12:9).

12. ¿Kenke nojua moneki timomachtisej se keski tlamachtili tlen ya tijmatij?

¹² Tlaj tijnekij tijtlanisej tlen Satanás kitekiuia, moneki timotemachisej ipan Jesús uan tikitasej kenijkatsa Jehová kitekiuia ma mochiua ipakilis. Nojkia, moneki timotemachisej ipan nopa “tlalnamijkatlatekipanojketl” katli Jehová kitekimakatok ma techyakana ipan itlanechikol (Mat. 24:45-47). Yeka, tlaj mojmostla timomachtiaj Biblia, techpaleuis ma timotemachikaj ipan toTeotsij uan nojua kuali titlaneltokasej, kiampa tielisej kej se kuauitl katli kipia uejkatla ineljuayo. Kema Pablo kintlajkuiljuilik toikniuaj tlen Colosas kiijtok: “Keja inkiselijkej toueyiTeko Jesucristo pampa inkineltokayayaj, ama keja nopa xinemikaj iuaya. Uan ximokauakaj inmotlatskilijtokej ipan ya. Ximotlatskilikaj ipan Cristo uan xijkauakaj para yajaya ma inmechchiua senkistok intemachmej ipan tlen inkineltokaj” (Col. 2:6, 7). Tlaj kuali titlaneltokaj kej kiijtoua ni versículo, uajka amo uelis techtlanis tlen Satanás o tlen maseualmej kitekiuiaj (2 Juan 8, 9).

13. ¿Tlake kimatij Cristo itokilijkauaj uan kenke?

¹³ Tijmatij maseualmej techkualankaitasej (1 Juan 3:13). Juan kineki ma tikilnamikikaj “Tlaltipaktli mokauaj ipan ichikaualis Axkualtlakatl” (1 Juan 5:19). Nochi tlen amo kuali nechka tlamis, yeka Satanás tlauel kualani (Apoc. 12:12). Yeka, amo san kitekiuia auilnemilistli uan istlakatili tlen kimoyauaj apóstatas, nojkia kichiua ma techtlaijiyouiltikaj. Satanás kimati amo poliui miak tonali kitsontlamiltisej, yeka kitemolia kenijkatsa kichiuas ayokmo ma titlajtolmoyauakaj uan ayokmo ma titlaneltokakaj. Ipan se keski altepemej toikniuaj ayokmo kinkauaj ma kitekipanokaj toTeotsij. Maske toikniuaj kiampa kinpanotok, inijuantij kiijiyouijtokej. Kinextiaj maske Diablo kichiua miak tlamantli uan kiampa techtlaijiyouiltis, tojuantij amo tijtlauelkauasej Jehová.

14. ¿Kenijkatsa uelis tikinpaleuisej toikniuaj nojua ma nemikaj ipan tlen melauak?

¹⁴ Tlaj tikinikneliaj toikniuaj, uelis tikinpaleuisej nojua ma nemikaj ipan tlen melauak (1 Juan 3:10, 11, 16-18). Moneki tikiniknelisej toikniuaj kema kuali itstokej o kema kipiaj kuesoli. Ma timoiljuikaj: “¿Itstok se toikni katli mijki se tlen katli tlauel kiikneliyaya uan moneki tijyolchikauasej o moneki tijpaleuisej ika sekinok tlamantli? ¿Uelis moneki tikinpaleuisej toikniuaj ma kikualchijchiuakaj kampa mosentiliaj o ininchaj pampa kintlasojsoljuilik se tlenijki?”. Tlaj nelnelia tikinikneliaj uan tikintlasojtlaj, uajka tikinpaleuisej uan amo san tikijtosej tikinikneliaj.

15. Kej kiijtoua 1 Juan 4:7, 8, ¿tlake kinamiki tijchiuasej?

¹⁵ Kema timoiknelia, tijchiuaj kej Jehová katli tlauel teiknelia (xijpoua 1 Juan 4:7, 8). Kema timotlapojpoljuiaj, tijnextiaj nelia timoiknelia. Yeka, kema se akajya techyolkokoua, tijtlapojpoljuiaj uan tikilkauaj tlen techchiuilik pampa tikikneliaj (Col. 3:13). Ma tikitakaj tlen kipanok toikni Aldo. Tlauel moyolkokok kema se toikni  katli tlauel kitlepanitayaya kiijtok tlen amo kuali tlen momajtokej kichiuaj kampa eua Aldo. Ya kiijtoua: “Mojmostla nikiljuiyaya Jehová ma nechpaleui amo nijkualankaitas toikni”. Teipa, Aldo kitlanejki toikni ma tlajtolmoyaua iuaya. Uajka kiiljuik toikni tlen kiyolmatiyaya, kiijtoua: “Kema nikiljuik nechyolkokok tlen kiijtok, uajka nechiljuik ma nijtlapojpoljui. Nikitak nelia amo kinekiyaya nechyolkokos. Tijsenkajkej nopa kuesoli uan tikilkajkej tlen panok”.

16, 17. ¿Tlake moneki timosentlalisej tijchiuasej?

¹⁶ Juan tlauel kinikneliyaya toikniuaj uan kinpaleuiyaya nojua kuali ma tlaneltokakaj. Kema kiijkuilok nopa eyi amatlajkuiloli, kinextik nelnelia kinikneliyaya. Tlauel techyolchikaua pampa tijmatij katli tlanauatisej iuaya Jesús, nojkia kiyolmatij kej Juan (1 Juan 2:27).

¹⁷ Ma tijchiuakaj ipan tonemilis tlen tikitstokej ipan ni tlamachtili. Ma tinemikaj ipan tlen melauak uan ma tijchiuakaj tlen Jehová technauatia. Ma timomachtikaj iTlajtol uan ma timotemachikaj nelnelia eli melauak. Nojua ma titlaneltokakaj ipan Jesús. Amo ma tijneltokakaj tlen maseualmej moiljuiaj uan tlen apóstatas kiijtouaj. Ma tijchijtokaj kampeka san Jehová tijtekipanosej uan amo tijchiuasej san tlen tojuantij techpaktia uan amo ma titlajtlakolchiuakaj. Ma timoyakanakaj ika Jehová itlanauatiljuaj. Uan ma tikintlapojpoljuikaj katli techyolkokouaj uan ma tikinpaleuikaj toikniuaj kema kinpoloua se tlamantli, nopa kinpaleuis nojua kuali tlaneltokasej. Kiampa maske tikixnamikisej tlaouijkayotl, nojua tinemisej ipan tlen melauak.