Ipan xiuitl 29 kema Jesús moatsonpoliuiltik, Jesús kitekimakakej kej Sumo Sacerdote. ¿Kenijkatsa tijmatij? Pampa kema moatsonpoliuiltik kinextik kinejki temakas inemilis kej tlakajkaualistli kejuak ipan se tlaixpamitl, tlen kiixnextia “ipakilis toTeko” (Gál. 1:4; Heb. 10:5-10). Nopa tlaixpamitl pejki kema Jesús moatsonpoliuiltik, yeka tijmatij ipan nopa tonali nojkia pejki Jehová itlanechikol. Jehová itlanechikol kiixnextia nochi tlamantli tlen techpaleuia tijueyichiuasej kej ya kipaktia pampa Jesús temaktilik inemilis (Mat. 3:16, 17; Heb. 5:4-6).

Kema pejki toTeotsij itlanechikol monekiyaya se sumo sacerdote. Yeka, Jehová kitlapejpenik Jesús uan “kimakak itonal uan miak chikaualistli” (Hech. 10:37, 38; Mar. 1:9-11). Nama, ¿kenijkatsa tijmatij Jesús kitlapejpenijkej kej Sumo Sacerdote kema ayamo temaktilijtoya inemilis uan ayamo moyolkuitoya? Tijmatij ni tlamantli pampa tikitstokej tlen Aarón kichijki kej sumo sacerdote uan tlen kichijkej sekinok sumos sacerdotes kema moyakanayayaj ika nopa Tlanauatili tlen Moisés kimakatoyaj.

Nopa Tlanauatili kiijtouayaya san nopa sumo sacerdote kinamikiyaya kalakis Kampa tlauel tlatsejtseloltik uan teipa kampa teokali. Nopa ome cuartos Kampa tlatsejtseloltik uan Kampa tlauel tlatsejtseloltik kitlajkoxelojtoyaj ika se cortina, uan nopa sumo sacerdote ueliyaya kalaki san ipan nopa tonali kema Kiixtsakuayayaj inintlajtlakoljuaj (Heb. 9:1-3, 6, 7). Aarón uan katli kitekipatlaskiaj kej sumo sacerdote kintekimakakej kema ayamo kalakiyayaj kampa “nopa cortina” tlen ika kitlajkoxelojtoyaj nopa tabernáculo. Nojkia, Jesús kitekimakakej kej Sumo Sacerdote ipan toTeotsij itlanechikol kema ayamo temaktilijtoya inemilis. Teipa nopa cortina motlapok “kema Jesús temaktilik itlakayo uan mijki” (Heb. 10:20). Apóstol Pablo kiijtok Jesús “mochijtok nopa Ueyi toTajtsi” o Sumo Sacerdote uan teipa “yajaya axkalajki Kampa Más Tlatsejtseloltik ipan se teopamitl tlen tlamachijchiuali ipan ni Tlaltipaktli” pampa “kalajki Kampa Más Tlatsejtseloltik nepa iluikak” (Heb. 9:11, 24).

Nopa yankuik tlajtolsenkaualistli kipixki iteki uan pejkej kitekiuiaj ipan sanse tonali. ¿Kenke kiampa tikijtouaj? Pampa kema Jesús yajki iluikak uan kiiljuito Jehová temakak inemilis pampa kinejki kinmakixtis maseualmej, pejkej kichiuaj se keski tlamantli tlen kichiuaskia ma kipia iteki nopa yankuik tlajtolsenkaualistli uan kiampa ueliskiaj kitekiuisej. Ma tikitakaj kenijkatsa mochijki.

Se, Jesús monextito iixpa Jehová. Ome, Jesús kiiljuik iTata kenijkatsa tepaleuiskia imikilis. Uan eyi, Jehová kipatiitak Jesús ieso tlen temakak kej tlakajkaualistli. Nopa yankuik tlajtolsenkaualistli kipixki iteki kema panok ni eyi tlamantli.

Biblia amo kiijtoua kema Jehová kiselik ni tlakajkaualistli tlen tlauel ipati. Maske amo uelis tikijtosej kema kipixki iteki uan kema pejki motekiuia nopa yankuik tlajtolsenkaualistli, kena tijmatij Jesús yajki iluikak kema nojua poliuiyaya matlaktli tonali tlen nopa iljuitl Pentecostés (Hech. 1:3). Uelis ipan se tlen nopa tonali, panok nopa eyi tlamantli tlen achtouia tikijtojkej, uan Jehová kiselik nopa tlakajkaualistli (Heb. 9:12). Ipan Pentecostés neski kenijkatsa nopa yankuik tlajtolsenkaualistli pejtoya motekiuia (Hech. 2:1-4, 32, 33).

Ma tikilnamikikaj tlen tikixtonkej. Kema Jehová kiselik Jesús ieso kej tlakajkaualistli, nopa yankuik tlajtolsenkaualistli pejki motekiuia uan nama katli kintlapejpenijtokej uelisej tekichiuasej iluikak. Ipan nopa tonali, Jesús pejki tekichiua kej Sumo Sacerdote, pampa tlapaleuiskia Jehová ma techtlapojpoljui (Heb. 7:25; 8:1-3, 6; 9:13-15).