1. ¿Tlake kineki Jehová ma mochiua ipan ni tonali?

 IPAN ni tonali Jehová kineki ma momoyaua nopa kuali tlamachtili tlen toTeotsij iTlanauatijkayo ipan nochi Tlaltipaktli (Mar. 13:10; 1 Tim. 2:3, 4). Ni tekitl iaxka Jehová uan tlauel ipati, yeka kikajtok iKone ma kiyakana. Uelis timotemachisej kema kitsontlamiltisej tlen amo kuali, Jehová yolpakis pampa kiitas Jesús kichijki kej ya kinekiyaya uan kuali kiyakanki ni tekitl (Mat. 24:14).

2. ¿Tlake tikitasej ipan ni tlamachtili?

² Ipan ni tlamachtili tikitasej Jesús kitekiuia “tlalnamijkatlatekipanojketl” uan kiampa techmaka tlamachtili tlen techpaleuia uan kiita kenijkatsa titlajtolmoyauasej ipan nochi Tlaltipaktli (Mat. 24:45). Nojkia tikitasej tlake uelis tijchiuasej uan kiampa tikinpaleuisej Jesús uan “tlalnamijkatlatekipanojketl”.

3. ¿Tlake tekitl kimakakej Jesús?

³ ¿Kenijkatsa tijmatij Jesús kiyakana tlajtolmoyaualistli? Kema nechka tlakuepiliskia iluikak, kinsentilik itokilijkauaj ipan se tepetl tlen Galilea uan kiniljuik: “Nochi tlanauatili nechmakatokej ipan iluikaktli uan ipan Tlaltipaktli”, uan teipa nojkia kiijtok: “Xiakaj, uan xijchiuakaj ma elikaj notokilijkauaj maseualmej tlen nochi altepemej” (Mat. 28:18, 19, TNM). Kej tikitaj, Jesús kichiua sekinok tekitl uan nojkia kiyakana tlajtolmoyaualistli.

4. ¿Kenke timotemachiaj Jesús nojua kiyakantok tlajtolmoyaualistli?

⁴ Jesús kiijtok ipan nochi Tlaltipaktli itokilijkauaj tlajtolmoyauaskiaj uan kinpaleuiskiaj sekinok ma mochiuakaj  itokilijkauaj, uan nojkia kiijtok nochipa itstoskia ininuaya “kema tlamis nochi tlamantli tlen amo kuali” (Mat. 28:20, TNM). Ni tlajtoli kinextia Jesús nojua kiyakanaskia tlajtolmoyaualistli ipan ni tonali.

5. ¿Kenijkatsa titlapaleuiaj ma moaxiti Salmo 110:3?

⁵ Jesús motemachijtoya ipan itlamia tonali, itstoskiaj miakej katli tlajtolmoyauaskiaj. Kimatiyaya moaxitiskia ni tlajtolpanextili: “Motlakauaj ualasej kampa ta uan motenkauasej [...] ika miak pakilistli” (Sal. 110:3). Tlaj nojkia tijmoyaua nopa kuali tlamachtili, tikinpaleuia Jesús uan “tlalnamijkatlatekipanojketl”, uan titlapaleuia ma moaxiti ni tlajtolpanextili. Maske kampa ueli titlajtolmoyauaj, onka se keski tlamantli tlen uelis kichiuas ouij ma tijchiuakaj nopa tekitl.

6. ¿Tlake tlamantli uelis kichiuas ouij ma titlajtolmoyauakaj?

⁶ Se tlamantli tlen kichiua ouij ma titlajtolmoyauakaj, eli kema apóstatas, políticos uan katli tlayakanaj ipan religiones, kiistlakauiaj Jehová itlanechikol. Tlaj tochampoyouaj, toteixmatkauaj uan katli ininuaya titekitij kineltokasej tlen kiijtouaj, uelis kichiuasej ayokmo ma tijtekipanokaj Jehová yon ma titlajtolmoyauakaj. Ipan se keski altepemej tokualankaitakauaj techiljuiaj techchiuilisej tlen amo kuali, techtlaijiyouiltiaj uan techtsakuaj. Ni tlamantli amo kichiua ma timosentlachilikaj pampa Jesús kiijtok: “Tlakamej tlen nochi tlaltinij inmechkokolisej pampa innechneltokaj” (Mat. 24:9). Tlen kichiuaj kinextia nelia tijneltokaj tlen Jesús kiijtok uan Jehová kuali techita (Mat. 5:11, 12). Maske Satanás kichiua nochi ni tlamantli, amo kema uelis kitlanis Jesús. Miakej maseualmej kikakij nopa kuali tlamachtili tlen toTeotsij iTlanauatijkayo pampa Jesús techpaleuia.

7. ¿Tlake tlamantli kinextia ya moaxitia Apocalipsis 14:6, 7?

⁷ Maseualmej amo kamanaltij sanse tlajtoli, nopa nojkia kichiua ouij ma tijmatikaj titlajtolmoyauasej. Jesús kiiljuik apóstol Juan ipan se temiktli maske kiampa panoskia, nojua momoyauaskia nopa kuali tlamachtili (xijpoua Apocalipsis 14:6, 7). ¿Tlake techpaleuijtok tijchiuasej nopa tekitl? Ipan jw.org, maseualmej uelis kipantisej miak tlamachtili tlen mokixtijtok ipan Biblia ipan kipano 1,000 tlajtoli. Katli kinyakanaj Jehová itlajtoltemakauaj kiijtojkej ma motlajtolkuepa ipan kipano 700 tlajtoli amochtli Nochipa xiitsto tlen ika titlamachtiaj. Nojkia onka videos tlen ika momachtiaj katli amo tlakakij uan amatlajkuiloli ika braille tlen kinpaleuia katli amo tlachiaj. Nochi ni tlamantli, kinpaleuia tlauel miakej maseualmej ma kimatikaj tlen kichiuas toTeotsij iTlanauatijkayo. Tikitaj nelia moaxitia ni tlajtolpanextili: maseualmej katli “kamanaltij miak tlajtoli” kiyekouaj tlen melauak, tlen eli kej “se kuali tlajtoli” (Zac. 8:23, TNM; Sof. 3:9, TNM). Ni tekitl ueli mochiua pampa Jesús tlauel kuali kiyakana.

8. ¿Tlake panotok ipan ni tonali pampa nojua titlajtolmoyajtokej?

⁸ Ipan ni tonali, itstokej kipano ocho millones toikniuaj ipan 240 altepemej uan pilaltepetsitsij. Uan sejse xiuitl tlauel miakej moatsonpoliuiltiaj. Maske kiampa pano, Jehová nojua tlauel kipatiita kema kinextiaj kuajkuali tlamantli ipan ininnemilis, pampa  kejuak mokentiaj se yoyomitl tlen yankuik (Col. 3:8-10). Miakej katli achtouia auilnemiyayaj, mosisiniyayaj, techikoitayayaj uan mokalakiyayaj ipan política, nama ayokmo kiampa kichiuaj. Nelia moaxitia tlen Isaías 2:4 kiijtoua: “Ayok monekis momachtisej para tlateuisej”. Tijchiuaj kampeka kuali timonejnemiltisej uan nopa kichiua maseualmej ma kinekikaj itstosej ipan toTeotsij itlanechikol uan nojkia tijnextiaj tijtokiliaj totlayakanka Jesús (Juan 13:35; 1 Ped. 2:12). ¿Kenke pano ni tlamantli? Pampa Jesús techpaleuia.

9. Kej kiijtoua Mateo 24:45-47, ¿tlake kiijtok Jesús panoskia ipan itlamia tonali?

⁹ (Xijpoua Mateo 24:45-47). Jesús kiijtok ipan itlamia tonali kitekimakaskia “se tlalnamijkatlatekipanojketl tlen nelia temachtli” katli techmakaskia tlamachtili tlen techpaleuiskia. Ni tlatekipanojketl chikauak tlatekipanoskia ipan ni tonali, uan nelia kiampa kichiua. Jesús kintekiuia se keskij toikniuaj katli kintlapejpenijtokej ma yakaj iluikak, inijuantij techmakaj tlamachtili tlen techpaleuia uan nojkia kinpaleuiaj sekinok katli kinekij kiixmatisej Jehová. Maske kiampa kichiuaj, inijuantij nojkia san tlatekipanouaj (2 Cor. 1:24). Kimatij Jesús san ya eli totlayakanka uan totlamachtijka (Is. 55:4).

10. ¿Tlake amochtli tlen nesi ipan tlaixkopinkayotl mitspaleuik xijmati tlen melauak?

¹⁰ Ipan 1919 nopa “tlalnamijkatlatekipanojketl” pejki kichijchiua miak amochtli tlen ika kinpaleuijtok maseualmej ma kimatikaj tlen melauak. Uan ipan 1921 kikixtik ika inglés nopa amochtli El Arpa de Dios, tlen ika kinmachtiyaya maseualmej  tlen nelia tlamachtia Biblia. Kej panotiajki xiuitl, kikixtijtiajki sekinok amochtli. ¿Ika tlake timomachtik uan tikixmatki Jehová? Uelis elki se tlen ni amochtli: “Sea Dios veraz”, La verdad que lleva a vida eterna, Usted puede vivir para siempre en el paraíso en la Tierra, El conocimiento que lleva a vida eterna, ¿Tlake nelnelia tlamachtia Biblia? o ¿Qué nos enseña la Biblia? O uelis tijtekiuia nopa yankuik amochtli Nochipa xiitsto. Nochi ni amochtli techpaleuijtok ma tikinmachtikaj sekinok ma mochiuakaj Cristo itokilijkauaj uan kistok kema kinamiki.

11. ¿Kenke moneki nochi kuali timomachtisej?

¹¹ Amo san katli namanok momachtiaj Biblia moneki tlauel kuali momachtisej uan kiixmatisej Jehová, nochi moneki kiampa tijchiuasej. Apóstol Pablo kiijtok: “Tlakualistli tlen tetik eltok para tlakamej tlen ya moskaltijtokej uan uelij kimachiliaj iTlajtol toTeko”. Nojkia kiijtok tlaj tijchiuaj ipan tonemilis tlen timomachtiaj, techpaleuis ma tijmatikaj “tlen kuali uan tlen axkuali” (Heb. 5:14). Ipan ni tonali maseualmej tlauel amo kuali monejnemiltiaj, yeka uelis tijmatisej ouij tijneltokasej toTeotsij itlanauatiljuaj. Maske kiampa tijmatij, Jesús techmaka tlamachtili tlen mokixtia ipan Biblia uan techpaleuia kuali ma titlaneltokakaj. Uan kipaleuia “tlalnamijkatlatekipanojketl” ma kichijchiua uan ma kimoyaua tlamachtili tlen tlauel techpaleuia.

12. ¿Tlake tijchijtokej pampa tijtlepanitaj toTeotsij itoka kej Jesús kichijki?

¹² Sanse kej Jesús kichijki, tojuantij nojkia tlauel tijtlepanitaj toTeotsij itoka (Juan 17:6, 26). Yeka, ipan 1931 timotokaxtijkej Jehová itlajtoltemakauaj, ni tijkixtijkej ipan Biblia. Kiampa tijnextiaj tijnekij tijtekiuisej itoka toTata Jehová  uan tijtlepanitaj (Is. 43:10-12). Uan ipan octubre tlen nopa xiuitl, pejki nesi itoka ipan ipantsajka Tlen Tematiltia ika inglés. Nojkia, ipan Traducción del Nuevo Mundo kitlalijtokej toTeotsij itoka kampa kinamiki. Sekinok religiones amo kiampa kichiuaj pampa ipan biblias tlen kitekiuiaj kiixpolojtokej Jehová itoka.

13. Kej kiijtoua Juan 6:68, ¿tlake kichiua ximotemachi Jesús kiyakana “tlalnamijkatlatekipanojketl”?

¹³ Jesús kitekiuijtok “tlalnamijkatlatekipanojketl”, uan kiampa kichijtok itekipanojkauaj ma itstokaj ipan Jehová itlanechikol uan ma tlaueyichiuakaj kej kinamiki. ¿Kenijkatsa tikita ni tlanechikoli? Uelis tijyolmati kej Pedro, ya kiiljuik Jesús: “San tlapik eliskia tlaj seyok tijtokiliskiaj. San ta titlamachtia nopa tlajtoli tlen ueli [temaka] yolistli” (Juan 6:68). ¿Kenijkatsa tiitstoskiaj tlaj amo tikixmajtoskiaj toTeotsij itlanechikol? Jesús kitekiuia tlanechikoli uan kiampa techpaleuia kuali ma titlaneltokakaj uan ma titlamachtikaj. Nojkia techpaleuia kuali ma timonejnemiltikaj uan kiampa tijyolpakiltisej Jehová (Efes. 4:24).

14. ¿Kenijkatsa mitspaleuijtok ipan ni ueyi kokolistli pampa tiitstok ipan Jehová itlanechikol?

¹⁴ Kema tikixnamikij se tlaouijkayotl, Jesús kuali techyakana. Uan kiampa tikitakej kema pejki kokolistli COVID-19. Maske miakej maseualmej amo kimatiyayaj tlake kichiuasej, Jesús kinpaleuik toikniuaj ma kimatikaj kenijkatsa techyakanasej uan kiampa tijmatisej tlake tijchiuasej. Techiljuijkej ma timotentsakuakaj uan amo tlauel ma timonejnechkauikaj ika sekinok. Ueuejtlakamej  kiniljuijkej ma kinnojnotsakaj toikniuaj, ma kiitakaj tlaj kinpoloua se tlamantli uan ma kinpaleuikaj nojua kuali ma tlaneltokakaj (Is. 32:1, 2). Uan ipan tlen techmatiltiaj Katli kinyakanaj Jehová itlajtoltemakauaj, techiljuijtokej tlake tijchiuasej uan techyolchikajtokej.

15. ¿Tlake sekinok tlamantli techiljuijtokej ipan ni ueyi kokolistli, uan kenijkatsa techpaleuijtok?

¹⁵ Kema pejki ueyi kokolistli, techiljuijkej kenijkatsa timosentiliskiaj uan titlajtolmoyauaskiaj. Yeka, nima pejki timosentiliaj uan tikitaj uejueyi tlanechikolistli ipan videoconferencia, uan pejki titlajtolmoyauaj ika amatlajkuiloli uan ika teléfono. Jehová kiteochijtok tlen tijchiuaj. Miak kali Betel, kiitstokej tlauel momiakilijtokej tlajtolmoyauanij. Nojkia, miakej toikniuaj kiijtojtokej kinpanotok miak tlamantli tlen tlauel teyolchikaua. (Xikita recuadro “ Jehová kiteochiua tlajtolmoyaualistli”).

16. ¿Ipan tlake uelis timotemachisej?

¹⁶ Se keskij toikniuaj uelis moiljuijkej Jehová itlanechikol ayamo kuali kimatiyaya tlake panoskia ipan ni ueyi kokolistli uan ya techiljuiyaya ma tijchiuakaj se keski tlamantli. Maske kiampa moiljuijkej, tikitstokej nochipa kuali techyakana (Mat. 11:19). Tlaj timoyoliljuiaj Jesús techyakana ika miak tlaiknelili, uelis timotemachisej ya uan iTata nojua kiampa kichiuasej maske tikixnamikisej tlen ueli tlaouijkayotl (xijpoua Hebreos 13:5, 6).

17. ¿Kenijkatsa tijyolmatij pampa Jesús techyakana?

¹⁷ ¡Tlauel tiyolpakij pampa Jesús techyakana! Tiitstokej ipan Jehová itlanechikol, uan nopaya amo mochikoitaj maske amo tieuaj ipan sanse altepetl, amo timomajtokej tijchiuaj sanse tlamantli, yon tikamanaltij sanse tlajtoli. Jehová nochipa techmaka kuali tlamachtili uan nojkia techmachtia kenijkatsa titlajtolmoyauasej. Uan sejse tlen tojuantij nojua tijchiuaj kampeka tijpatlasej tonemilis uan titeiknelisej. Yeka, ¡tlauel kuali tijyolmatij pampa Jesús techyakana!