Notata tlayakanayaya ipan Iglesia Unida tlen Canadá. Yeka sejse domingo ika ijnalok techtitlaniyaya na uan nosiuaikni ma timomachtitij Biblia ininuaya sekinok konemej. Teipa tiauiyayaj titlapaleuiaj ipan nopa iglesia ika tlajkotona, uan ika tiotlak tiauiyayaj iuaya nonana ipan Kali kampa mosentiliaj Jehová itlajtoltemakauaj. Uan tikitayayaj nopa ome religiones amo eliyayaj sanse.

Nonana yajki kinitato Bob uan Marion Hutcheson, inijuantij eliyayaj iuampoyouaj, kinpouilito tlen kiyekojtoya uan inijuantij nojkia mochijkej Jehová itlajtoltemakauaj. Ipan 1958, Bob uan Marion techuikakej na uan eyij ininkoneuaj ipan se ueyi tlanechikolistli kampa yauij tlen miak altepemej, tlen kitokaxtijkej “Voluntad Divina”. Ni ueyi tlanechikolistli mochijki Nueva York uan uejkajki chikueyi tonali. Nama tlauel nijpatiita tlen kichijkej pampa monejki kichiuasej miak tlamantli para nechuikasej ipan nopa ueyi tlanechikolistli tlen tlauel nechpaleuik.

Kema nieliyaya nitelpokatl niitstoya kampa itstoyaj miakej tlapialmej uan tlauel nechpaktiyaya nikinmokuitlauis. Nijnekiyaya nimomachtis Veterinaria. Nonana kipouilik se ueuejtlakatl tlen nijnekiyaya nijchiuas. Nopa toikni nechilnamikilik tiitstokej “itlamia tonali” uan nojkia kichijki ma nimoiljui kenijkatsa kichiuaskia ayokmo kuali ma nimouika iuaya Jehová tlaj nimomachtiskia universidad (2 Tim.  3:1). Kuali nimoiljuik ipan ni tlamantli yeka amo niajki nimomachtito.

Pero kema nijtlamiltik secundaria amo nijmatiyaya tlake nijchiuas. Maske nitlajtolmoyauayaya se sábado uan domingo, amo tlauel nechpaktiyaya. Yeka nimoiljuiyaya amo ueliskia nimochiuas precursor. Notata uan se notío, katli amo kitekipanouayayaj Jehová, tekitiyayaj Toronto ipan se empresa katli tlauel kiixmatiyayaj, nopaya kinamakayayaj seguros uan nechiljuiyayaj nojkia ma nitekititi nopaya. Notío kimakatoyaj se kuali tekitl ipan nopa empresa, yeka nijselik nopa tekitl.

Nopaya nitekitiyaya hasta tlayoua uan se tonal niitstoya ininuaya katli amo kitekipanouaj Jehová. Nopa kichijki ayokmo ma nijchiua tlen nechpaleuiskia kuali ma nitlaneltoka. Ipan nopa tonali niitstoya iuaya noueyitata, ya nojkia amo kitekipanouayaya Jehová, teipa mijki uan monejki nijtemos kanke niitstoti.

Bob uan Marion, katli nechuikakej ipan nopa ueyi tlanechikolistli ipan 1958, nikinitayaya kejuak notatauaj. Inijuantij nechiljuijkej ma niitstoti ininuaya uan nechpaleuijkej sampa kuali ma nijtekipano Jehová. Ipan 1960 nimoatsonpoliuiltik iuaya John, se ininkone. John mochijki precursor uan nechpaleuik más ma nitlajtolmoyaua. Toikniuaj kiitakej kuali nijtekipanouayaya Jehová, yeka teipa nechtekimakakej kej siervo de la Escuela del Ministerio Teocrático. a

Ipan 1966, nimosiuatik iuaya Randi Berge, se precursora katli tlauel kipaktiyaya tlajtolmoyauas kampa monekij tlajtolmoyauanij. Nopa toikni katli techpaxalouayaya chijchikuasej metstli, tlauel techyolchikajki uan techiljuik tlaj tijnekiyayaj tiasej titlatekipanotij ipan se tlanechikoli tlen Orillia (Ontario). Yeka, ¡timotlajtlalilijkej uan tiajkej!

Randi tlauel nechpaleuik pampa tlajtolmoyauayaya ika pakilistli. Yeka kema tionasitoyaj Orillia, nimochijki precursor uan nimosentlalik kuali nitlamachtis. Pejki tlauel niyolpaki pampa nikinmachtiyaya sekinok ika Biblia. Ipan Orillia tikinpaleuijkej se  tlakatl uan isiua ma kipatlakaj ininnemilis uan ma kitekipanokaj Jehová.

Se tonali kema niajki Toronto, nikixmatki Arnold MacNamara, se toikni katli kiyakanayaya Betel. Ya techtlajtlanik tlaj tijnekiyayaj titlatekipanosej kej precursores especiales uan nima nijnankilik: “Kena tijnekij, san amo techtitlanikaj Quebec”. Kiampa nikijtok pampa katli itstoyaj Canadá uan kamanaltiyayaj inglés, kinchikoitayayaj katli itstoyaj Quebec uan kamanaltiyayaj francés. Ipan nopa tonali, políticos tlen Quebec kinekiyayaj moxelosej tlen sekinok altepemej.

Arnold nechiljuik: “Kali Betel san kintitlani precursores especiales ipan Quebec”. Nima nikijtok kena tiasej pampa nijmatiyaya Randi kinekiyaya yas nopaya tlatekipanoti. Teipa nikitak tlauel kuali tlen tijtlapejpenijtoyaj tijchiuasej.

Techmachtijkej francés makuili metstli, teipa techtitlankej iuaya seyok toikni uan isiua ipan altepetl Rimouski, tlen mokaua se 540 kilómetros ika noroeste tlen Montreal. Maske ya techmachtijtoyaj nopa tlajtoli, neski amo kuali nijyekojtoya pampa kema nitematiltik se keski tlamantli ipan tlanechikoli, nikijtok ipan ueyi tlanechikolistli itstoskiaj “toikniuaj avestruces” uan amo “toikniuaj austriacos”.

Ipan Rimouski tiitstoyaj ininuaya matlaktli toikniuaj: nopa toikni uan isiua katli yajkej touaya, nauij tosiuaikniuaj katli nopaya tlatekipanouayayaj uan toikni Huberdeau, isiua uan omej iichpokauaj. Toikni Huberdeau uan ichampoyouaj motlanejkej se kali tlen kipiayaya chikome cuartos uan sansejko timopaleuiyayaj tikixtlauasej nopa renta. Nopa kali tikiljuiyayaj “La casa Blanca” pampa eliyaya chipauak uan iixmelak kipiayaya tlaketsali. Kemantika nopaya tiitstoyaj 12 o 14 maseualmej. Randi uan na titlatekipanouayayaj kej precursores especiales, yeka tipeuayayaj titlajtolmoyauaj ijnalok uan titlamiyayaj tlayoua. Tlauel tikintlaskamatiliyayaj toikniuaj pampa tlajtolmoyauayayaj touaya maske tlaseseyayaya uan ya tlayoua.

Pejki kuali timouikaj ininuaya nopa precursores, yeka tikinitakej kej tochampoyouaj. Kemantika timoskouayayaj o tijchiuayayaj pierogis, eli kejuak quesadillas tlen uelis tijtlalilis tlen ta tijnekis. Kemantika, se sábado se toikni tlatsotsonayaya uan tojuantij tiuikayayaj uan timijtotiyayaj.

Ipan altepetl Rimouski miakej maseualmej pejkej momachtiaj Biblia. Ipan makuili xiuitl moatsonpoliuiltijkej miakej uan ipan tlanechikoli timomiakilijkej, tielkej 35 tlajtolmoyauanij. Ni kichijki tlauel ma tiyolpakikaj.

Kema tiitstoyaj Quebec tlauel techpaleuik pampa pejki kuali titlamachtiaj. Tikitakej kenijkatsa Jehová techpaleuik nojua kuali ma tijtekipanokaj uan amo tleno ma techpolo. Nojua kuali tikinixmatkej katli kamanaltiyayaj francés, tlauel techpaktik inintlajtol uan tlen momajtokej kichiuaj. Nopa techpaleuik ma tijpatlakaj tlen timoiljuiyayaj uan ma techpakti tlen sekinok momajtokej kichiuaj (2 Cor. 6:13).

Teipa, kali Betel techiljuik tlaj ueliskia tiasej titlatekipanotij Tracadie, se altepetl tlen mokauayaya ika este tlen Nueva Brunswick. Amo timoiljuijtoyaj tlaj techtitlaniskiaj sejkanok, yeka ya titlaxtlajtoyaj renta pampa timotlanejtoyaj se kali uan na nitekitiyaya se keski tonali ipan se escuela. Nojkia se keskij katli tikinmachtiyayaj pejtoyaj tlajtolmoyauaj uan tijchijchiuayayaj kali kampa timosentiliaj. Yeka tijmatkej ouij tikijtosej tlaj kena o amo tiaskiaj.

Tlauel timomaijtojkej ipan sábado uan domingo.  Tikiljuiyayaj Jehová ma techpaleui. Tiajkej Tracadie uan tikitakej amo eliyaya kej Rimouski. Pero timokajkej pampa tikitakej Jehová kinekiyaya ma titlatekipanokaj nopaya. Timotemachijkej ipan Jehová uan tikitakej kenijkatsa techpaleuik (Mal. 3:10). Amo ouij tijmatkej tiasej sejkanok pampa Randi kuali tlaneltoka, amo kimati ouij yas tlatekipanoti sejkanok uan nochipa yolpaktok.

Ipan Tracadie, san Robert Ross tlatekipanouayaya kej ueuejtlakatl. Ya uan isiua Linda yajkej tlatekipanotoj nopaya kej precursores uan mokajkej maske kipixkej se ininpilkone. Maske tlauel motekiuijtoyaj pampa kiiskaltiyayaj ininpilkone, tlauel techyolchikajkej pampa kinpaktiyaya temakasej tlen kipiaj, kuali tlatekipanouayayaj uan tlajtolmoyauayayaj ika pakilistli.

Kema titlatekipanojtoyaj ome xiuitl kej precursores ipan Tracadie, techiljuijkej ma tikinpaxalokaj toikniuaj chijchikuasej metstli. Chikome xiuitl tikinpaxalojkej toikniuaj katli kamanaltij inglés uan teipa techiljuijkej ma tikinpaxalokaj toikniuaj katli kamanaltij francés ipan Quebec. Nopaya toikni Léonce Crépeault katli kinpaxalouayaya tepaxalouanij, nochipa nechyolchikauayaya uan nechiljuiyaya kuali nitlamachtiyaya. b Pero teipa nechiljuiyaya: “¿Tlake uelis tijchiuas uan kiampa motlamachtil más kinpaleuis sekinok ipan ininnemilis?”. Tlen nechiljuik tlauel nechpaleuik, yeka nojua kuali nitlamachtik uan tlen nikijtouayaya kinpaleuiyaya sekinok.

Tlauel niyolpaki kema nikilnamiki nopa ueyi tlanechikolistli kampa yauij tlen miak altepemej, tlen motokaxtik “Fe Victoriosa” uan mochijki ipan Montreal, ipan 1978. Na nitlapaleuiyaya kampa kiitaj kenijkatsa tetlamakasej ipan nopa ueyi tlanechikolistli. Uan tijmajtoyaj monechikoskiaj 80,000 maseualmej. Ipan nopa tonali mopatlatoya kej titlakualchiuayayaj uan nojkia kipatlatoyaj nopa máquinas tlen tijtekiuiyayaj. Maske tijpixtoyaj 20 uejueyi refrigeradores kampa tikajokuiyayaj tlakualistli, kemantika amo kuali tlaseseltiyaya. Nojkia, ipan nopa tonali amo uelki nima tikalajkej ipan nopa estadio pampa kitekiuijtoyaj katli mauiltiyayaj. Tikalajkej kema ya eliyaya tlajkoyoual, uan monekiyaya tijtlatisej nopa hornos kema nojua tlatlayoua pampa tikintlamakaskiaj toikniuaj ijnaltsi. Maske tlauel tisiajtoyaj, nijyekok miak tlamantli pampa toikniuaj katli ininuaya nitekitiyaya kuali tekitiyayaj, kuali tlaneltokayayaj uan yolpakiyayaj. Tlen techpanok techpaleuik kuali  ma timouampojchiuakaj ininuaya toikniuaj uan se keskij nojua elij nouampoyouaj. Ipan xiuitl 1940 uan tlanki ipan 1959, tokualankaitakauaj tlauel techtlatsakuiltijkej ipan Quebec, yeka tlauel tiyolpajkej kema tijpixkej nopa ueyi tlanechikolistli nopaya.

Tlauel nechpaleuik tlen kichiuayayaj toikniuaj katli kiyakanayayaj uejueyi tlanechikolistli ipan Montreal. Se tonali David Splane, katli nama eli se tlen Katli kinyakanaj Jehová itlajtoltemakauaj, kiyakanki nopa tekitl tlen mochiua ipan uejueyi tlanechikolistli. Teipa, ipan nopa seyok ueyi tlanechikolistli nechiljuijkej na ma nijchiua nopa tekitl uan David tlauel nechpaleuik.

Tikinpaxalojkej toikniuaj chijchikuasej metstli 36 xiuitl, uan ipan 2011 nechtlanejkej ma nitlamachti Kampa kinmachtiaj ueuejtlakamej. San ipan ome xiuitl Randi uan na tikochkej ipan 75 camas. Maske tijmatkej ouij tlen tijchijkej, tlauel techpaleuik. Kema panoyaya se semana, ueuejtlakamej tlauel yolpakiyayaj pampa kiitayayaj kenijkatsa Katli kinyakanaj Jehová itlajtoltemakauaj kinekiyayaj nojua kuali ma kitekipanojtokaj Jehová.

Teipa, nechiljuijkej ma nitlamachti Kampa kinmachtiaj katli senkistok tlatekipanouaj. Kemantika katli momachtiyayaj, motetsopayayaj pampa monekiyaya momachtisej siete horas ipan se tonali, kichiuayayaj tareas eyi horas uan nojkia kipanoltiyayaj naui o makuili tlamachtili ipan se semana. Na uan nopa seyok toikni katli tlamachtiyaya, tikiniljuiyayaj san ueliskia kichiuasej nochi ni pampa Jehová kinpaleuiskia. Nochipa nikilnamiki kenijkatsa ni toikniuaj tlauel yolpakiyayaj kema kiitayayaj kena ueliyayaj kichiuaj ni uan sekinok tlamantli.

Nonana teikneliyaya uan kitekipachouayaya tlen kinpanoyaya sekinok, yeka kinpaleuik katli kinmachtiyaya ma kitekipanokaj Jehová uan nojkia kipaleuik notata ma kipatla kej kinitayaya Jehová itlajtoltemakauaj. Kema panotoya eyi tonali ika miktoya nonana, notata yajki ipan kali kampa timosentiliaj, nopa kichijki tlauel ma tiyolpakikaj uan nojua yajki tlanechikoli se 26 xiuitl. Maske amo kema moatsonpoliuiltik, ueuejtlakamej nechiljuijkej nochipa kualka asiyaya ipan tlanechikoli.

Tlen kichijki nonana tlauel techpaleuijtok na uan eyij nosiuaikniuaj. Inijuantij uan ininueuejuaj kuali kitekipanouaj Jehová. Omej nosiuaikniuaj tlatekipanouaj ipan Betel: se ipan Portugal uan seyok ipan Haití.

Ipan ni tonali, Randi uan na titlatekipanouaj kej precursores especiales ipan Hamilton (Ontario). Kema titepaxalouayayaj chijchikuasej metstli, techpaktiyaya tiasej ininuaya toikniuaj kema kinpaxalouayayaj katli kinmachtiyayaj. Uan nama tlauel tiyolpakij pampa tikinmachtiaj se keskij maseualmej uan tikitaj kenijkatsa peuaj kuali kitekipanouaj Jehová. Kuali tikinixmatij toikniuaj tlen totlanechikol uan tlauel techyolchikaua kema tikitaj kenijkatsa Jehová nochipa kinmokuitlauia.

Kema tikilnamikij kenijkatsa techpaleuijkej toikniuaj, tlauel tiyolpakij uan tijchiuaj kampeka nojkia tikinpaleuisej sekinok kuali ma kitekipanokaj Jehová (2 Cor. 7:6, 7). Isiua se toikni uan omej ikoneuaj, tlatekipanouayayaj kej precursores. Nijtlajtlanik nopa toikni tlaj nojkia kinekiyaya elis precursor. Nechiljuik amo ueliskia pampa kinpaleuiyaya isiua uan ikoneuaj. Nikiljuik Jehová ueliskia kinmokuitlauis ichampoyouaj uan ya nojkia ueliskia tlatekipanos kej precursor. Teipa, kema panok chikuasej metstli, nojkia pejki kiampa tlatekipanoua.

Randi uan na nojua tikinpouilisej sekinok maseualmej “nopa uejueyi tlamantli” tlen Jehová kichijtok. Tijnekiskiaj inijuantij nojkia ma kitekipanokaj Jehová uan ma yolpakikaj kej tojuantij (Sal. 71:17, 18).