Haykanush itstok iuaya iueue ipan altepetl Armenia. Inijuantij nojkia tlajtolmoyauaj maske ayamo moatsonpoliuiltiaj. Se tonali, nechka ichaj, ya kipantik se pasaporte, miak tomij uan tarjetas tlen kitekiuiaj ipan banco. Teipa, kiiljuik iueue tlen kipantijtoya.

Maske toikniuaj amo kipixtoyaj miak tomij uan monekiyaya tlaxtlauasej tlen tlauikiliyayaj, inijuantij amo mokauijkej nopa tomij. Inijuantij kitemojkej ipan nopa amatl kanke ichaj katli eliyaya iaxka nopa pasaporte uan yajkej kimakatoj. Katli eliyaya iaxka uan ichampoyouaj amo kikuamachiliyayaj kenke amo mokauijkej. Toikni Haykanush iuaya iueue kiniljuijkej inijuantij momachtiyayaj Biblia uan yeka kichiuayayaj tlen xitlauak. Nojkia kiniljuijkej ajkia inijuantij eliyayaj Jehová itlajtoltemakauaj uan kinkauilijtejkej amatlajkuiloli.

Maske nopa maseualmej kinekiyayaj kimakasej tomij toikni Haykanush, ya amo kiselik. Ualmostla, nopa siuatl yajki kipaxaloua. Uan pampa tlauel kitlaskamatiliyaya Haykanush, kimakak se anillo tlen kipixtoya diamantes.

Kej nopa maseualmej, miakej nojkia amo kikuamachilijtoskiaj kenke Haykanush uan iueue kikuepkej tlen kipantijtoyaj. Uan Jehová, ¿nojkia amo kikuamachilia? ¿Kenijkatsa kiita Jehová kema se akajya kichiua tlen xitlauak? ¿Kinpaleuik Haykanush uan iueue pampa kichijkej tlen xitlauak?

Amo ouij tijnankilisej ni tlajtlanili, pampa tojuantij tijmatij Jehová tlauel kipatiita kema tijnextiaj kuajkuali tlamantli kej ya. Jehová tlauel kipatiita tlen tojuantij tijnextiaj uan amo tlen maseualmej kipatiitaj kej oro, diamantes o sekinok tlamantli tlen patiyo (Is. 55:8, 9). Ya tlauel kinpatiita itekipanojkauaj kema kiita kichiuaj kampeka kinextisej nopa kuajkuali tlamantli tlen ya kinextia.

Ma tikitakaj tlake kiijtoua Biblia tlen nopa tlalnamikilistli. Proverbios 3:13-15 kiijtoua: “Ueyi pakilistli kipia se tlakatl tlen kipantia tlalnamikilistli uan mochiua tlalnamiki. Pampa tlalnamikilistli tepaleuia miak. Más ipati que plata uan oro tlen nelia kuali. Tlalnamiki[li]stli más ipati que nopa piltetsitsij tlen tlauel pajpatiyo. Niyon se tlamantli tlen tijnekiskia axueli kiaxilis para keja ipati tlalnamikilistli”. Ni kinextia Jehová tlauel kipatiita ni kuajkuali tlamantli uan amo tlen maseualmej kipatiitaj.

¿Kenke moneki tijchiuasej tlen xitlauak?

Jehová nochipa kichiua tlen xitlauak. Biblia kiijtoua toTeotsij “axueli istlakati” (Tito 1:2). ToTeotsij kiiljuik Pablo ma kintlajkuiljuili sekij toikniuaj: “Ximomaijtokaj ika toTeko topampa tojuantij. Tijmatij ipan toyolo para tinemij xitlauak iixpa uan keja nopa tijnekiskiaj tijchiuasej nochipa” (Heb. 13:18).

Jesús nojkia nochipa kichijki tlen xitlauak. Se tonali nopa sumo sacerdote Caifás kiiljuik: “Nimitsnauatia xijtestigojketsa toTeko Dios tlen itstok. Uan xitechiljui tlaj tiikone toTeko uan tlaj tiCristo tlen toTeko kiijtok techtitlaniliskia”. Jesús amo kinkajkayajki uan xitlauak kiiljuik yaya eliyaya Mesías o Cristo. Maske kimatiyaya ueliskia kiistlakauisej pampa kiijtoskiaj kiixpanotoya toTeotsij uan kimiktiskiaj, Jesús nochipa kiijtok tlen melauak uan amo kema istlakatki (Mat. 26:63-67).

¿Uan tojuantij? ¿Tlake tijchiuaskiaj tlaj tikitaskiaj techpaleuis tlaj tiistlakatisej  se kentsi o titekajkayauasej? ¿Nojua tijchiuaskiaj tlen xitlauak?

Ipan ni tonali, miakej maseualmej san inijuantij ‘moikneliaj’ uan tlauel kinekij kipiasej “miak tomij”, yeka kimatij tlauel ouij kichiuasej tlen xitlauak (2 Tim. 3:2). Kema amo kipiaj tomij o kema amo kipantiaj tekitl, miakej moiljuiaj amo kenijki tlaj tlachtekisej, tekajkayauasej o tlaj amo kichiuasej tlen xitlauak. Uan miakej kiijtouaj tlaj kinekij kipiasej se tlamantli moneki tekajkayauasej. Sekij toikniuaj nojkia kiampa moiljuijtokej, yeka ipan tlanechikoli toikniuaj ayokmo kuali kinitaj pampa kichiuaj tlen amo xitlauak (1 Tim. 3:8; Tito 1:7).

Maske sekij toikniuaj kiampa kichiuaj, miakej Cristo itokilijkauaj kichiuaj tlen xitlauak kej Jesús kichijki. Inijuantij kimatij tlauel moneki kinextisej kuajkuali tlamantli uan amo kipiasej miak tomij o seyok tlamantli. Yeka toikniuaj katli momachtiaj amo kinkajkayauaj inintlamachtijka (Prov. 20:23). Maske uelis amo nochipa techmakasej se tlenijki  pampa tijchiuaj tlen xitlauak kej kipanok Haykanush, toTeotsij kineki kiampa ma tijchiuakaj, uan nopa techpaleuia ma tijpiakaj kuali totlalnamikilis.

Tlen kipanok Gagik nojkia kinextia tlauel kuali tijchiuasej tlen xitlauak. Ya kiijtoua: “Kema ayamo nijtekipanouayaya Jehová, nitekitiyaya ipan se ueyi empresa. Katli nechtekimakatoya amo kinekiyaya kiixtlauas nochi impuestos, yeka amo kiijtouayaya nochi tlen kitlaniyaya. Pampa na nijyakanayaya nopa tekitl, monekiyaya nijmakas se kentsi tomij katli tlainamayaya impuestos uan kiampa amo tleno kiijtoskia. Pampa kiampa nijchiuayaya, miakej kiijtouayayaj san nitlakajkayauayaya. Kema pejki nimomachtia, ayokmo nijnejki nijchiuas nopa maske kuali nechtlaxtlauiyayaj. Teipa, nijpeualtik seyok tekitl uan nikamatlalik nochi tlen monekiyaya, uan nojkia nikixtlaua nochi impuestos” (2 Cor. 8:21).

Gagik nojua kiijtoua: “Ayokmo miak nijtlaniyaya, yeka nijmatiyaya ouij nikinpanoltis nochampoyouaj. Maske nijmatki ouij, nama tlauel niyolpaktok uan nijmati kuali niitstok iixpa Jehová. Pampa nijchiua tlen xitlauak, ueli nikinmachtia nokoneuaj tlen kuali, uan nojkia techpaleuijtok pampa nechtekimakatokej ipan tlanechikoli. Nojkia, katli nechinamaj impuestos uan katli ininuaya nitekiti kuali nechitaj pampa nijchiua tlen xitlauak”.

Jehová tlauel kiniknelia katli kichiuaj tlen xitlauak uan kinextiaj kuajkuali tlamantli tlen ya kinextia (Tito 2:10). Nojkia ya kiijtojtok techpaleuis tlaj tijchiuaj kampeka kiampa tijchiuasej. Jehová kichijki David ma kiijkuilo: “Na nojkia nitelpokatixtoya uan ama ya niueuentsi, pero axkema nikitak toTeko kitlauelkaua se tlakatl tlen itstok xitlauak iixpa. Niyon ikoneuaj se kuali tlakatl axnikinitstok intla motlaejeuiaj para ika panosej” (Sal. 37:25).

Tlen kipanok Rut kinextia nelia tlen kiijtok David. Rut amo kema kitlauelkajki iyexna, uan yajki iuaya ipan Israel, kampa ueliskia kiueyichiuas toTeotsij katli melauak (Rut 1:16, 17). Uan nojkia nochipa kichijki tlen xitlauak, uan yeka kichijki tlen Moisés itlanauatil kiijtouayaya, pampa tekitik chikauak kampa kinamikiyaya kej kiijtouayaya nopa tlanauatili. Jehová nochipa kimokuitlauik Rut uan Noemí, kej nojkia kimokuitlauik David (Rut 2:2-18). Jehová amo san kimokuitlauik Rut, nojkia kichijki David uan Mesías ma tlakatikaj tlen ichampoyouaj (Rut 4:13-17; Mat. 1:5, 16).

Ipan ni tonali, maske miakej toikniuaj amo kipiaj miak tomij tlen ika mopanoltisej, inijuantij nochipa kichiuaj tlen xitlauak uan amo tlakajkayauaj. Inijuantij kichiuaj kampeka chikauak tekitisej. Kiampa kinextiaj tlauel kipatiitaj kinextisej nopa kuajkuali tlamantli uan amo tlatominpiasej o kipiasej tlamantli tlen pajpatiyo (Prov. 12:24; Efes. 4:28).

Kej Rut, Cristo itokilijkauaj motemachiaj toTeotsij nochipa kinmokuitlauis. Kimatij toTeotsij temachtli kichiuas tlen kiijtojtok: “Axkema niinmechkajteuas, nochipa niitstos inmouaya” (Heb. 13:5). Jehová nochipa kinextijtok uelis kinpaleuis katli kichiuaj tlen xitlauak. Amo kema kintlauelkaua itekipanojkauaj uan nochipa kinmaka tlen moneki (Mat. 6:33).

Maseualmej kipatiitaj diamantes uan sekinok tlamantli. ToTeotsij Jehová amo kej maseualmej, pampa ya tlauel kipatiita kema tijchiuaj tlen xitlauak uan kema tijnextiaj sekinok kuajkuali tlamantli.