1. ¿Kenke Jehová kejuak se kuali chachapalchijketl?

IPAN noviembre 2010, ne Inglaterra kinamakakej se komitl tlen uejkajkia kichijchijkej ipan China, ipati eliyaya nechka 70 millones de dólares. Maske sokitl amo patiyo uan kampa ueli onka, se chachapalchijketl uelis kichiuas se yejyektsi tlamantli ika sokitl uan tlauel patiyo kinamakas. Jehová nojkia kej se kuali chachapalchijketl, uan san ya nelia tlauel kuali kichiua iteki. Biblia kiijtoua toTeotsij “kikuik tlali” uan kichijchijki nopa achtoui tlakatl katli amo eliyaya tlajtlakole (Gén. 2:7). Nopa tlakatl, Adán, eliyaya “ikone toTeko Dios” uan nojkia ueliskia kinextis kuajkuali tlamantli kej toTeotsij (Luc. 3:38).

2, 3. ¿Kenijkatsa uelis tijchiuasej kej israeleuanij?

² Kema Adán tlaixpanok, ayokmo elki ikone toTeotsij. Maske Adán kiampa kichijki, miakej ikoneuaj amo kitlauelkajkej toTeotsij pampa kimajtoyaj san ya kinamiki kinauatis nochi (Heb. 12:1). Inijuantij amo moueyimatkej uan kineltokakej toTeotsij, kiampa kinextijkej kinekiyayaj Jehová  ma kinnauati uan ma eli ininTata uan amo Satanás (Juan 8:44). Kema tikitaj kenijkatsa amo kema kitlauelkajkej toTeotsij, kichiua ma tikilnamikikaj tlen kiijtojkej israeleuanij kema moyolkuepkej: “ToTeko, ta tiitstok titoTata. Tojuantij tiitstokej keja sokitl uan ta se tichachapalchijketl. Ta titechchijchijki nochi tojuantij ika moma” (Is. 64:8).

³ Ipan ni tonali, katli tijtekipanouaj toTeotsij tijchiuaj kampeka nojkia tijchiuasej kej israeleuanij uan amo timoueyimatisej, kiampa nochipa tijneltokasej toTeotsij. Tojuantij nelia tlauel tijpatiitaj tikijtosej Jehová yaya toTata, uan yeka tijnekij yaya ma techiljui kenijkatsa kinamiki timonejnemiltisej. Yeka kinamiki timotlajtlanisej: “¿Niitstok imako toTeotsij kej sokitl tlen ya uelis kitekiuis uan kichijchiuas se tlamantli tlen tlauel ipati? ¿Nijmajtok toTeotsij nojua kinpaleuia toikniuaj ma kipatlatiakaj ininnemilis?”. Ipan ni tlamachtili tikitasej eyi tlamantli tlen techpaleuis tikitasej Jehová kejuak se chachapalchijketl: kenijkatsa kintlapejpenia toTeotsij ajkia kinpaleuis ma kipatlakaj ininnemilis, kenke kineki ma kipatlakaj se keski tlamantli, uan kenijkatsa kinpaleuia.

4. ¿Tlake kiita Jehová kema kintlapejpenia ajkia inijuantij kinpaleuis ma kipatlakaj ininnemilis? Xikixtoma ika se neskayotl.

⁴ Jehová amo kinita maseualmej kej tojuantij tikinitaj, pampa ya kiita nochi tlen eltok ipan ininyolo (xijpoua 1 Samuel 16:7). Kema kintlapejpenik ajkia inijuantij kitekipanoskiaj, ya kintlapejpenik ma elikaj Jesús itokilijkauaj maseualmej katli sekinok moiljuiyayaj amo tleno ininpati (Juan 6:44). Kiampa panok ika Saulo, ya tlauel moueyimatiyaya uan ‘nelia mosisiniyaya’, nojkia ‘kintlaijiyouiltiyaya’ uan kinistlakauiyaya Cristo itokilijkauaj. Maske kiampa eliyaya, Jehová amo kema moiljuik amo moyolpatlaskia (1 Tim. 1:13; Prov. 17:3). Jehová kiitak kipixtoya kuali iyolo, yeka kiijtok: “Nijtlapejpenijtok para nijtekiuis Saulo para kiniljuis tlakamej tlen axisraelitajmej notlajtol. Nojkia kiniljuis uejueyij tlanauatianij uan israelitajmej tlen na” (Hech. 9:15). Jehová nojkia kintlapejpenik sekinok maseualmej uan kinpaleuik ma kipatlakaj ininnemilis. Maske sekij achtouia tlachtekiyayaj, moiuintiyayaj uan momekatiyayaj, kema momachtijkej toTeotsij iTlajtol, kuali tlaneltokakej uan kipatlakej ininnemilis (Rom. 9:21; 1 Cor. 6:9-11).

5, 6. 1) ¿Kenijkatsa kinamiki tikinitasej maseualmej kema titlajtolmoyauaj? 2) ¿Kenijkatsa kinamiki tikinitasej toikniuaj?

⁵ Tojuantij timotemachiaj Jehová kuali kintlapejpenia ajkia inijuantij kinpaleuis ma kipatlakaj ininnemilis. Yeka amo kinamiki tikijtosej se toikni amo kinamiki kitekipanos toTeotsij yon timoiljuisej maseualmej amo kema kipatlasej ininnemilis.  Ma tikitakaj tlen kipanok Michael, ya kiijtoua: “Kema Jehová itlajtoltemakauaj panoyayaj nochaj, nikaltsakuayaya uan nijchiuayaya kejuak amo nikinitayaya pampa amo nijnekiyaya nikintlakakilis. Teipa, nikinixmatki se keskij maseualmej uan nikitak tlauel kuali monejnemiltiyayaj, kema nijmatki eliyayaj Jehová itlajtoltemakauaj, pejki nimoiljuia kenke amo nijnekiyaya nikinitas, nikitak amo kuali nikinixmatiyaya uan san nijneltokatoya tlen sekinok nechiljuijtoyaj”. Michael kinejki kuali kinixmatis Jehová itlajtoltemakauaj, yeka pejki momachtia Biblia. Teipa moatsonpoliuiltik uan pejki tlauel kuali kitekipanoua Jehová.

⁶ Tlaj nochipa tikilnamikij Jehová yaya katli techpaleuia ma tijpatlakaj tonemilis, uajka tikinitasej toikniuaj kej Jehová kinita. Uan nochipa tikilnamiktosej ya nojua kinpaleuia ma kipatlatiakaj ininnemilis, kejuak eliskiaj sokitl katli nojua kikualchijchijtia. Jehová kiita tlake eltok ipan ininyolo uan kimati amo nochipa mokuapolojtosej. Ya kimati kena uelis kipatlasej ininnemilis (Sal. 130:3). ¿Kenijkatsa uelis tijchiuasej kej Jehová? Moneki tikinitasej toikniuaj kej Jehová kinita. Tojuantij nojkia uelis tikinpaleuisej nojua ma kipatlatiakaj se keski tlamantli ipan ininnemilis, kiampa kejuak titekitisej iuaya Jehová (1 Tes. 5:14, 15). Tlaj ueuejtlakamej kiampa kichiuaj, toikniuaj nojkia kichiuasej kej inijuantij (Efes. 4:8, 11-13).

7. ¿Kenke moneki tijtlaskamatilisej Jehová pampa techtlalnamiktia?

⁷ Sekij kiijtouaj kema se akajya nojkia kinpia ikoneuaj, peua tlauel kipatiita tlen itatauaj kichijkej kema kitlalnamiktijkej. Uan kema titlalnamiktiauij, nojua tlauel tijpatiitaj, pampa tijmatij totatauaj techtlalnamiktijkej pampa techikneliyayaj (xijpoua Hebreos 12:5, 6, 11). Jehová tlauel techiknelia kej tiikoneuaj, yeka techtlalnamiktia uan kipia iyolo kema techpaleuia ma tijpatlatiakaj tonemilis. Kineki kuali ma tijtlapejpenikaj tlen tijchiuasej, ma tiyolpakikaj uan ma tikiknelikaj kej toTata (Prov. 23:15). Amo kineki ma titlaijiyouikaj, ya kineki ma timoyolpatlakaj uan kiampa uelis tiitstosej nochipa (Efes. 2:2, 3).

8, 9. 1) ¿Tlake techmachtia Jehová ipan ni tonali? 2) ¿Tlake nojua kichiuas toTeotsij kema tiitstosej ipan Xochimili?

⁸ Maske kema ayamo tikixmatiyayaj Jehová uelis tijchiuayayaj miak tlamantli tlen ya amo kipaktia, ya techpaleuik ma timoyolpatlakaj uan nama tijnextiaj kuajkuali tlamantli ipan tonemilis (Is. 11:6-8; Col. 3:9, 10). Ipan ni tonali, Jehová techmachtia kenijkatsa tiitstosej ika tlaseuilistli uan kuali timouikasej ininuaya toikniuaj. Kema tiitstokej ininuaya, Jehová techpaleuia ma tijpatlatiakaj se keski tlamantli ipan tonemilis. Uan maske maseualmej tlauel amo kuali ininyolo, tojuantij tlauel kuali tijyolmatij kema tiitstokej ininuaya toikniuaj. Maske  sekij amo kiniknelijkej kema moskaltijkej, nama toikniuaj tlauel kinikneliaj (Juan 13:35). Nochi tijchiuaj kampeka tijnextisej titeikneliaj maske amo timomajtoyaj tijchiuaj. Nelia tlauel tijpatiitaj tikixmatisej Jehová uan tijmatisej ya tlauel techiknelia (Sant. 4:8).

⁹ Kema tiitstosej ipan Xochimili nojua tlauel kuali timouikasej ininuaya toikniuaj. Nojkia tiyolpakisej, pampa kema toTeotsij iTlanauatijkayo tekichiuas, ni Tlaltipaktli elis se xochimili. Ipan nopa tonali, Jehová nojua techmachtijtias uan techpaleuijtias kuali ma timonejnemiltikaj (Is. 11:9). ToTeotsij kichiuas ma tijpiakaj kuali totlalnamikilis uan totlakayo, kiampa ayokmo tielisej titlajtlakolejkej. Yeka ayokmo ouij tijmatisej tijneltokasej Jehová uan tlauel kuali tikixmatisej. Uajka, nojua ma tijkauakaj Jehová ma techpaleuijto tijpatlatiasej tonemilis, kiampa tijnextisej tijtlaskamatiliaj pampa tlauel techiknelia (Prov. 3:11, 12).

10. ¿Kenijkatsa Jesús kinextik toTeotsij kuali techpaleuia ma tijpatlakaj tonemilis o totlalnamikilis?

¹⁰ Kej se chachapalchijketl kimati kenijkatsa eli nopa sokitl tlen kitekiuia, Jehová nojkia kuali techixmati. Ya kimati tlake nojua techpoloua tijpatlasej ipan tonemilis, tlake tiyajatij tijchiuaj uan tlake tijpatlatokej ipan tonemilis. Yeka, san ya uelis kuali techpaleuis (xijpoua Salmo 103:10-14). Tlaj tijnekij tijmatisej kenijkatsa techita Jehová, moneki tikitasej tlake kichijki Jesús kema itokilijkauaj mokuapolojkej. Kemantika inijuantij mokualaniyayaj pampa kinekiyayaj kimatisej ajkia tlen inijuantij tlauel pankisayaya. Tlaj tojuantij tikinitstoskiaj kema mokualaniyayaj, ¿timoiljuijtoskiaj amo kema kipatlaskiaj inintlalnamikilis? Jesús amo kiampa moiljuik, ya kimajtoya tlaj kinpaleuiskia, ueliskiaj kipatlasej inintlalnamikilis. Kimatiyaya ueliskia kinpaleuis tlaj ya kinextiskia amo moueyimati, tlaj kipiaskia iyolo ininuaya uan tlaj kintlajtolmakaskia ika tlaiknelili (Mar. 9:33-37; 10:37, 41-45; Luc. 22:24-27). Teipa, kema Jesús moyolkuitoya, itokilijkauaj kiselijkej toTeotsij itonal uan ayokmo moueyimatkej. Uan san mosentlalijkej kichiuasej tlen Jesús kinnauatijtoya (Hech. 5:42).

11. ¿Kenijkatsa kinextik David kikauayaya toTeotsij iTlajtol ma kipaleui uan kenijkatsa uelis tijchiuasej kej ya?

¹¹ Ipan ni tonali, Jehová techpaleuia ma tijpatlatiakaj tonemilis ika iTlajtol, itonal uan toikniuaj. Tlaj tijnekij iTlajtol ma techpaleui, moneki tijpouasej uan timoyoliljuisej ipan tlen tijpouaj. Nojkia moneki tikiljuisej toTeotsij ma techpaleui tijchiuasej tlen timomachtiaj. Tlanauatijketl David kiijtok: “Nochi youali kema nimoteka ipan notlapech uan axueli nikochi, nimoiljuia tlen ta. Kena, nimoyoliljuia tlen ta sejse hora” (Sal. 63:6). Nojkia kiijkuilok: “Nimitsueyichiuas, toTeko, pampa tinechconsejomaka. Tlajkoyoual tinechmaka motlalnamikilis uan tinechnextilia ipan noyolo tlachke moneki nijchiuas” (Sal. 16:7). Ni kinextia David kinejki Jehová ma kipaleui kipatlatias inemilis. Ya moyoliljuiyaya ipan toTeotsij iTlajtol, uan kichiuayaya tlen Jehová kitlajtolmakayaya (2 Sam. 12:1-13). Tojuantij nojkia tijnekij tijchiuasej kej David, ya amo moueyimatki uan kineltokak toTeotsij. Yeka ma timotlajtlanikaj: “Kema nijpoua Biblia, ¿nimoyoliljuia ipan tlen nijpoua uan  nijkaua ma nechpaleui nojua nijpatlas notlalnamikilis uan tlen nijyolmati? ¿Nojua moneki tlauel kuali nimoyoliljuis ipan toTeotsij iTlajtol?” (Sal. 1:2, 3).

12, 13. ¿Kenijkatsa Jehová techpaleuia ma tijpatlatiakaj tonemilis ika itonal uan toikniuaj?

¹² ToTeotsij itonal nojkia uelis techpaleuis tijpatlatiasej tonemilis. Uelis techpaleuis ma tijchiuakaj sanse kej Jesús kichijki uan ma tijnextikaj kuajkuali tlamantli ipan tonemilis (Gál. 5:22, 23). Tlaiknelili eli se tlen nopa kuajkuali tlamantli tlen uelis tijnextisej. Pampa tlauel tikikneliaj toTeotsij, tijnekij tijchiuasej tlen technauatia, uan tijmatij nochi tlen technauatia techpaleuia kuali ma tiitstokaj. Nojkia, toTeotsij itonal techpaleuia amo ma timonejnemiltikaj kej maseualmej katli amo kineltokaj toTeotsij (Efes. 2:2). Ma timoiljuikaj ipan apóstol Pablo. Kema eliyaya telpokatl kimachtijkej katli tlayakanayayaj ipan religión judía, katli tlauel moueyimatiyayaj. Maske kiampa eliyaya, toTeotsij itonal kipaleuik ma kipatla inemilis. Yeka teipa kiijkuilok: “Nochi niueli nijchiua ika nopa chikaualistli tlen Cristo nechmaka” (Filip. 4:13). Tojuantij nojkia moneki tikiljuisej Jehová ma techmaka itonal, uan ya nelia techmakas (Sal. 10:17).

¹³ Jehová nojkia techpaleuia tijpatlasej tonemilis ika toikniuaj uan ika ueuejtlakamej. Kema timokuapolouaj, ueuejtlakamej techpaleuiaj, uan kema techtlajtolmakaj amo techiljuiaj san tlen inijuantij moiljuiaj (Gál. 6:1). Inijuantij amo moueyimatij, yeka kiiljuiaj Jehová ma kinmaka tlalnamikilistli. Nojkia, kuali momachtiaj Biblia uan amatlajkuiloli pampa kinekij kuali tetlajtolmakasej. Yeka, kema ueuejtlakamej techtlajtolmakasej kenijkatsa kinamiki timoyoyontisej o tlake kinamiki tijchiuasej, ma tikilnamikikaj toTeotsij kiampa kinextia techiknelia. Tlaj tijchiuasej tlen  techtlajtolmakaj, tijnextisej tijnekij Jehová ma techpaleui pampa tijmatij nopa techpaleuis kuali ma tiitstokaj.

14. ¿Kenijkatsa kinextia Jehová techkaua ma tijtlapejpenikaj tlake tijchiuasej?

¹⁴ Tlaj tijkuamachiliaj kenijkatsa Jehová techpaleuia ma tijpatlakaj tonemilis, techpaleuis kuali ma timouikakaj ininuaya toikniuaj. Nojkia tijpiasej toyolo ika maseualmej kema titlajtolmoyauaj uan ika katli tikinmachtiaj ika Biblia. Kema se chachapalchijketl kineki kichiuas se komitl, achtoui kiyejyektia nopa sokitl uan kikixtilia piltetsitsij. Kema Jehová techpaleuia ma tijpatlakaj tonemilis, techkaua ma tijtlapejpenikaj tlake tijchiuasej uan amo techchiualtia ma timoyolpatlakaj. Yolik techmachtijtia tlake kineki ma tijchiuakaj uan kikaua tojuantij ma tijtlapejpenikaj tlaj tijnekij tijpatlasej tonemilis.

15, 16. ¿Kenijkatsa kinextiaj kinekij Jehová ma kinpaleui katli momachtiaj Biblia? Xikixtoma ika se neskayotl.

¹⁵ Ma tikitakaj tlen kipanok se tosiuaikni tlen itoka Tessie, katli itstok Australia. Toikni katli kimachtik kiijtoua: “Maske Tessie nima kikuamachiliyaya tlen momachtiyaya, amo kipatlayaya inemilis uan amo yauiyaya tlanechikoli. Yeka, kuali nimoyoliljuik tlake nijchiuaskia uan nikiljuik Jehová ma nechpaleui. Teipa nimoiljuik niaskia san sampatsi nijmachtiti uan teipa ayokmo nijmachtiskia. Maske kiampa nimoiljuijtoya, kema nijmachtijtoya pejki nechiljuia tlen kiyolmati. Kiijtok tlauel kipaktiyaya mauiltis ika tomij, yeka amo kuali kiyolmatiyaya. Nojkia kiijtok mosentlalijtoya ayokmo kichiuas nopa”.

¹⁶ Teipa, Tessie pejki yaui tlanechikoli uan pejki kinextia kuajkuali tlamantli ipan inemilis, kiampa kichijki maske katli eliyayaj iuampoyouaj kipinajtiyayaj. Tessie moatsonpoliuiltik uan teipa tlatekipanok kej precursora maske kinpixtoya ipilkoneuaj. Ni kinextia kema se akajya katli momachtia Biblia peua kipatla inemilis, Jehová kinechkauia uan kipaleuia kuali ma monejnemilti. Kipaleuia ma eli kejuak se komitl tlen tlauel ipati.

17. 1) ¿Kenke tijpatiita pampa Jehová mitspaleuia xijpatla monemilis? 2) ¿Tlake tikitasej ipan seyok tlamachtili?

¹⁷ Ipan miak altepemej, nojua itstokej katli kimachijchiuaj yejyektsitsij komitl ika sokitl. Sanse kej inijuantij, Jehová nojkia kipia iyolo kema techpaleuia ma tijpatlakaj tonemilis, techtlajtolmaka uan kuali kiita tlaj tijkauaj ma techyakana (xijpoua Salmo 32:8). ¿Tikitaj kenijkatsa Jehová nelia techiknelia? ¿Tikitaj kenijkatsa yolik techpaleuijtia ma tijpatlakaj tonemilis? ¿Tlake techpaleuis tijkauasej Jehová nojua ma techpaleui? ¿Tlake amo kinamiki tijchiuasej tlaj tijnekij Jehová nojua ma techpaleui? ¿Uan kenijkatsa tetajmej uelis mopaleuisej iuaya Jehová kema kinpaleuiaj ininkoneuaj? Ni tikitasej ipan seyok tlamachtili.