Kinixnextiaj iluikaeuanij katli tlapaleuijkej kema kitsontlamiltijkej Jerusalén uan katli nojkia tlapaleuisej kema kitsontlamiltisej tlen Satanás kinauatia ipan Armagedón. Ni kipatla kej achtoui tikixtomayayaj. ¿Kenke monejki tijpatlasej?

Nechka xiuitl 607 a.u.J., Jehová kichijki Ezequiel ma kiita ipan se temiktli tlen panoskia kema nechka kitsontlamiltiskiaj Jerusalén. Ezequiel kiitak nopa maseualmej kichiuayayaj tlen tlauel amo kuali. Teipa kinitak chikuasej tlakamej tlen kipixtoyaj ininmako ‘se tepostli tlen ika tlaxoleuaskiaj uan tetsontlamiltiskiaj’. Nojkia kiitak “se tlakatl tlen moyoyontijtoya ika nopa yoyomitl lino” uan kiualikayaya ‘se tlamantli keja tlen ipan kitekaj tinta tlajkuilouanij’ (Ezeq. 8:6-12; 9:2, 3). Jehová kiiljuik nopa tlakatl: “Xinejnemi ipan nochi calles ipan altepetl Jerusalén uan xikintlalili se marca ipan ininkuaixko nochi nopa tlakamej tlen chokaj uan mokuesouaj ipampa nochi tlajtlakoli tlen kiitaj sekinok kichiuaj kampa ueli” (Ezeq. 9:4-7). ¿Tlake techmachtia tlen Ezequiel kiitak? ¿Ajkia kiixnextia nopa tlakatl tlen kiitak?

Ezequiel kiitak ni temiktli ipan xiuitl 612 a.u.J., uan kema panok makuili xiuitl ni tlajtolpanextili achtoui moaxitik. Ipan nopa xiuitl Jehová kintlatsakuiltik itekipanojkauaj pampa amo kineltokakej kema kikajki babiloniaeuanij ma kitsontlamiltikaj Jerusalén (Jer. 25:9, 15-18). ¿Tlake kinpanok katli kena kineltokayayaj Jehová uan mokuesouayayaj pampa ipan Jerusalén kichiuayayaj miak tlamantli tlen amo kuali? Jehová kinmanauik.

 Ezequiel amo aka kitlalilik “se marca” uan ya amo tlapaleuik kema kitsontlamiltijkej Jerusalén. Elkej iluikaeuanij katli kinyakankej katli kitsontlamiltijkej. Tlen Ezequiel kitemijki kinextia tlen pano nepa iluikak. Jehová kiniljuik iluikaeuanij ma tlayakanakaj kema kintlatsakuiltiskiaj katli amo tlaneltokayayaj uan ma kinmanauikaj katli amo kitlauelkajtoyaj Jehová. *

Tlen Ezequiel kitemijki ika ompa moaxitis. ¿Kema uan kenijkatsa moaxitis? Achtouia, ipan amatlajkuiloli tikixtomayayaj nopa tlakatl tlen kipixtoya ‘se tlamantli keja tlen ipan kitekaj tinta tlajkuilouanij’ kinixnextiyaya katli kintlapejpenijtokej yasej iluikak uan nojua itstokej ipan Tlaltipaktli. Nojkia tikixtomayayaj maseualmej kiseliaj kejuak “se marca” kema kuali kitlakakiliaj uan kiseliaj tlen tikinmachtiaj. ¿Kenke tijpatlakej kej tikixtomayayaj? Pampa namanok kuali timomachtijkej tlen kiijtoua Mateo 25:31-33 uan tikitakej elis Jesús katli kintlajtolsenkauas maseualmej ipan nopa ueyi tlaijiyouilistli. Ipan nopa tonali, Jesús kiijtos ajkia inijuantij kejuak pilborregojtsitsij uan ajkia kejuak chivojmej. Katli kejuak pilborregojtsitsij kinmanauis uan katli kejuak chivojmej kintsontlamiltis.

¿Tlake techmachtia tlen Ezequiel kitemijki? Ma tikitakaj makuili tlamantli:

1. Kema nechka kitsontlamiltiskiaj Jerusalén, Jehová kiniljuik Ezequiel, Jeremías uan Isaías ma kiniljuikaj maseualmej tlake kinpanoskia. Ipan ni tonali, Jehová nojkia kintekimakatok se keskij toikniuaj katli kintlapejpenijtok ma kinmachti uan ma kinmatilti itekipanojkauaj uan maseualmej tlake panos kema nechka mochiuas nopa ueyi tlaijiyouilistli. Nochi Cristo itokilijkauaj kinmatiltiaj maseualmej tlen panos teipa (Mat. 24:45-47).

2. Kej Ezequiel amo kintlalilik “se marca” maseualmej katli kinmanauiskiaj, Jehová itekipanojkauaj nojkia amo kiampa kichiuaj. Inijuantij san tlajtolmoyauaj uan kiniljuiaj maseualmej tlake panos teipa. Uan pampa iluikaeuanij kinpaleuiaj, uelij tlajtolmoyauaj ipan nochi Tlaltipaktli (Apoc. [Rev.] 14:6).

3. Kema Ezequiel itstoya, katli momanauijkej amo kipixtoyaj “se marca” ininkuaixpa. Uan kema mochiuas nopa ueyi tlaijiyouilistli, katli momanauisej nojkia amo kipiasej “se marca”. ¿Tlake moneki kichiuasej ipan ni tonali katli kinekij momanauisej? Kema kimatisej tlen toTeotsij kiijtoua, moneki monejnemiltisej kej Cristo kichijki, kimaktilisej toTeotsij ininnemilis uan tlajtolmoyauasej ininuaya katli kintlapejpenijtokej yasej iluikak (Mat. 25:35-40). Kiampa kema mochiuas nopa ueyi tlaijiyouilistli, kejuak kintlalilisej “se marca”, ni kiijtosneki inijuantij uelis momanauisej.

4. Nopa tlakatl tlen kipixtoya ‘se tlamantli keja tlen ipan kitekaj tinta tlajkuilouanij’ kiixnextia Jesús. Kema Jesús tetlajtolsenkauas ipan nopa ueyi tlaijiyouilistli, kintlalilis kejuak “se marca” nopa miakej maseualmej katli momanauisej uan itstosej nochipa ipan Tlaltipaktli (Mat. 25:34, 46). *

5. Ipan ni tonali, nopa ‘chikuasej tlakamej’ kinixnextiaj nopa iluikaeuanij katli Jesús kinyakana. Inijuantij nechka kitsontlamiltisej nochi tlen amo kuali (Ezeq. 10:2, 6, 7; Apoc. 19:11-21).

Ni makuili tlamantli technextilia Jehová amo kintsontlamiltis itekipanojkauaj, ya san kintsontlamiltis maseualmej katli amo kualmej (2 Ped. 2:9; 3:9). Nojkia kinextia tlauel moneki titlajtolmoyauasej, pampa nochi maseualmej moneki kimatisej tlake panos kema toTeotsij kitsontlamiltis nochi tlen amo kuali (Mat. 24:14).