¿Kuali timomachtijtok tlen kistok ipan pilamochtsi Tlen Tematiltia? Xikita tlaj tiuelis tijnankilis ni tlajtlanili:

¿Tlake naui tlamantli uelis tijchiuasej tlaj tijnekij kuali tiuikasej?

Moneki kuali timoketsasej kema tikitskitosej nopa amochtli tlen ika tiuikaj, kuali titlaijiyotilanasej, kuali tijtlaposej tokamak uan tokechtla, uan chikauak tiuikasej. Kiampa kuali kakistis kema tiuikasej (w17.11, iamayo 5).

¿Tlake tijyekouaj kema tikitaj kanke eltoya nopa altepemej kampa momanauiyayaj uan nopa ojtli tlen nopaya teuikayaya?

Nopa chikuasej altepemej tlen kitlapejpenijtoyaj eltoya kampa se akajya ueliskia nima asiti, uan nopa ojtli nochipa kuali kikualchijchijtoyaj. Yeka, katli temiktijtoya nimantsi ueliskia asiti nopaya uan momanauiskia (w17.11, iamayo 14).

¿Kenke san nopa tlaxtlauili eli nopa tlamantli tlen tlauel kuali katli toTeotsij techmakatok?

Nopa tlaxtlauili kichiua ma timotemachikaj nochipa tiitstosej uan timomakixtisej tlen tlajtlakoli uan mikilistli. Pampa toTeotsij tlauel kiniknelia Adán ikoneuaj, techmaktilik iKone maske titlajtlakolchiuanij (wp17.6, iamayo 6, 7).

¿Kenke tikijtouaj Salmo 118:22 kiijtoua Jesús moyolkuiskia?

Jesús kikualankaitakej uan kimiktijkej. Yeka, monekiyaya moyolkuis uan kiampa eliskia “se ueyi tetl” (w17.12, iamayo 9, 10).

¿Monekiyaya Mesías ualas tlen se achtouiejketl ichampoyouaj?

Maske kemantika Jesús iuejkapantatauaj eliyayaj achtouieuanij, sekinok amo. Judíos kimajtoyaj nopa uan amo kenijki kiitayayaj. Ni tijmatij pampa kimajtoyaj ualaskia tlen David ichampoyouaj, katli eliyaya Isaí o Jesé iteipakone (w17.12, iamayo 14, 15).

¿Kenijkatsa tijmatij Biblia kiijtoua se keski tlamantli tlen techpaleuia amo ma timokokokaj?

Nopa Tlanauatili kiijtouayaya ma kiniyokatlalikaj katli kipiayayaj se keski kokolistli, ma momajtekikaj kema kiitskiskiaj se mijkatsi, uejka yaskiaj baño uan kitlalpachoskiaj. Uan nojkia nopa tlanauatili kiijtouayaya kema panoskia chikueyi tonali kema se okichpil tlakatiskia, monekiskia kichiuilisej nopa circuncisión. Kiampa kichiuayayaj pampa kema pano se keski tonali, pilkonetsitsij inineso nima tetia (wp18.1, iamayo 7).

¿Kenke amo kenijki tlaj se Cristo itokilijka achi kinextis moiknelia?

Moneki tikiniknelisej maseualmej kej tojuantij timoikneliaj (Mar. 12:31). Uan tlakamej moneki kiniknelisej ininsiuajuaj kej inijuantij moikneliaj (Efes. 5:28). Maske timoikneliaj, moneki tikilnamikisej tlaj amo timomokuitlauiaj, uelis ayokmo timoiknelisej kej kinamiki (w18.01, iamayo 23).

¿Tlake moneki tijchiuasej tlaj tijnekij nojua kuali titlaneltokatiasej?

Moneki timomachtisej toTeotsij iTlajtol, timoyoliljuisej ipan tlen tijpouaj uan tijchiuasej tlen tijyekouaj. Moneki tijkauasej toTeotsij itonal ma techyakana, tijkauasej sekinok ma techpaleuikaj uan tikintlaskamatilisej (w18.02, iamayo 26).

¿Kenke amo kinamiki tijtekiuisej astrología yon tiasej ika tlamatinij pampa tijnekij tijmatisej tlake panos teipa?

Maske miak tlamantli kinextia amo kinamiki tijchiuasej, moneki tikilnamikisej amo tijchiuaj pampa Biblia kiijtoua amo kuali tijchiuasej nopa (wp18.2, iamayo 4, 5).

¿Tlake moneki tijchiuasej tlaj tikijtojkej kena tiasej kampa techtlanejkej?

Tlaj tikijtojkej kena tiasej, moneki tijchiuasej tlen tikijtojkej (Sal. 15:4). Amo kinamiki tijpatlasej tlen tikijtojkej san pampa ayokmo tijnekij tiasej. Katli techtlanejki uelis kichijki se ueyi kampeka kichiuas se tlakualistli (w18.03, iamayo 18).

¿Tlake uelis kiyekosej tlen Timoteo toikniuaj katli kintekimakatokej?

Timoteo nochipa kiitayaya kenijkatsa kinpaleuis sekinok uan tlauel kipaktiyaya tlatekipanos. Kichijki ueyi kampeka kitekipanos Jehová uan kichijki tlen kiyekouayaya. Motemachik toTeotsij itonal kiyakanaskia uan nojua kichijki kampeka kuali tlaneltokas. Ueuejtlakamej uan nochi toikniuaj uelis kichiuasej kej Timoteo (w18.04, iamayo 13, 14).