“¡YAUI! ¿Kenijkatsa tiitstok?”

Uelis miakpa tikijtojtok ni, uan uelis nojkia titematlajpaloua o titenajnaua. Maske amo sanse tlen tikijtouaj o tijchiuaj, nochi titetlajpalouaj pampa tijnekij sekinok kuali ma kiyolmatikaj. Miakej maseualmej moiljuiaj se akajya katli amo tetlajpaloua o amo tlanankilia kema kitlajpalouaj, kinextia amo tepatiita o tetlepanita.

Sekij tlauel ouij kimatij tetlajpalosej, uelis pampa pinauaj o amo kimatij tlake kiijtosej, yeka amo tetlajpalouaj. Uan sekinok tlauel ouij kimatij kintlajpalosej katli euaj ipan seyok altepetl, katli amo elij sanse kej inijuantij, katli tlatominpiaj o katli teikneltsitsij. Maske kiampa pano, moneki tikilnamikisej kema se akajya tetlajpaloua, uelis tlauel kinpaleuis sekinok.

Ximotlajtlani: “¿Tlake uelis panos tlaj titetlajpalosej? ¿Tlake kiijtoua Biblia tlen ni tlamantli?”.

“Nelia nijmati toTeko axtechchikoiknelia titlakamej” (Hech. 10:34). Apóstol Pedro kiijtok ni kema Cornelio, katli amo eliyaya judío, mochijki se Cristo itokilijka. Teipa, nojkia kiijtok toTeotsij “kineki nochi ma timoyolpatlakaj” (2 Ped. 3:9). Maske uelis timoiljuiaj ni texto san kinnamiki katli tikinmachtiaj ika Biblia, Pedro nojkia kiijtok ni: “Xikintlepanitakaj nochi tlakamej. Xikiniknelikaj inmoikniuaj ipan Cristo” (1 Ped. 2:17). Uajka, tlauel kuali tlaj tikintlajpalosej nochi maseualmej maske sekij euaj ipan seyok altepetl o amo elij sanse kej tojuantij. Kema tikintlajpalouaj sekinok, tijnextiaj tikintlepanitaj uan tikinikneliaj.

Apóstol Pedro kiniljuik nochi tlaneltokanij: “Uajka ximoselikaj se ika seyok ika yejyektsi keja Cristo nojkia inmechselijtok” (Rom. 15:7). Pablo kinilnamijki ika miak tlaiknelili se keskij toikniuaj katli tlauel kiyolchikajtoyaj. Ipan ni tonali, nelia tlauel moneki ma tikinyolchikauakaj toikniuaj, pampa Satanás tlauel kintlaijiyouiltia toTeotsij itekipanojkauaj (Col. 4:11; Apoc. [Rev.] 12:12, 17).

Biblia kiijtoua titetlajpalosej amo kiijtosneki san kema kuali tijseliaj se akajya, pampa nojkia kinextia seyok tlamantli. Ma tikitakaj se keski neskayotl.

Kema Jehová kipanoltiskia iKone inemilis ipan María iijtiko, achtoui kititlanki se iluikaejketl ma kiiljuiti se keski tlamantli. Kiiljuito: “Xipaki ta tlen toTeko mitskualita”. María amo kikuamachilik kenke nopa iluikaejketl kinojnotsayaya, yeka mosentlachilik. Kema iluikaejketl kiitak nopa, kiiljuik: “Amo ximomajmati María. ToTeko mitstlapejpenijtok para mitsteochiuas tlauel miak”. Teipa kiixtomilik Jehová kinekiyaya ma kitlakatilti Mesías. Nopa kichijki kuali ma kiyolmati, uan ika ni tlajtoli kiijtok kichiuaskia tlen Jehová kinekiyaya: “Na niiaxka toTeko. Nikaj niitstok para nijchiuas nochi tlen nechnauatis ma nijchiua. Ma nochi panos keja tinechiljuijtok” (Luc. 1:26-38).

Nopa iluikaejketl kiitak kej se tlateochiualistli pampa toTeotsij kitlapejpenik ma tematiltiti tlen ya kinekiyaya. Uan amo moiljuik tlauel amo ipati kamanaltiskia iuaya se maseuali. Kema asito, achtoui kitlajpalok María. ¿Tlake techmachtia tlen kichijki? Moneki tikintlajpalosej sekinok uan tikinyolchikauasej. San ika se keski tlajtoli uelis tikinpaleuisej toikniuaj uan tijchiuasej ma kiyolmatikaj Jehová tlauel kinpatiita pampa itstokej ipan itlanechikol.

Pablo kinixmatki miakej toikniuaj katli itstoyaj ipan Asia Menor uan Europa. Ipan nochi amatlajkuiloli tlen kiijkuilok, kintokaxtia miakej maseualmej katli kintlajpaloua. Kiampa nesi ipan Romanos, capítulo 16. Nopaya kitokaxtia Febe, katli kiiljuia “tosiuaikni”, uan kiniljuia toikniuaj: “Xijselikaj ipan toueyiTeko keja kinamiki para tojuantij tlen tiiaxkauaj toTeko  ma timoselikaj”. Uan nojkia kiniljuia ma kipaleuikaj “ika tlen ueli tlamantli tlen kipoloua”. Teipa kiijtoua: “Xikintlajpalokaj Priscila uan Áquila [...]. Uan nikintlaskamati ika tlen kichijkej. Uan nojkia kintlaskamatiliaj nochi teopantinij [o tlanechikoli] tlen tlaneltokanij tlen axisraelitajmej tlen mosentiliaj kampa ueli”. Nojkia kintlajpaloua sekinok katli amo tijmatij ajkia inijuantij elkej. Ika miak tlaiknelili kiilnamiki Epeneto, uan nojkia Trifena uan Trifosa, omej tosiuaikniuaj katli tlauel chikauak tekitiyayaj. Ni kinextia Pablo kipaktiyaya kintlajpalos toikniuaj (Rom. 16:1-16).

Nelia tlauel yolpajkej nopa toikniuaj kema kiitakej Pablo kinilnamikiyaya ika miak tlaiknelili. Nopa kichijki nojua ma kiiknelikaj Pablo uan ma kiniknelikaj sekinok toikniuaj. Uan uelis sekinok toikniuaj nojkia moyolchikajkej kema kikajkej kenijkatsa Pablo kintlajpalouayaya nopa toikniuaj uan kinpaleuik nojua kuali ma tlaneltokatokaj. Uajka, kema tijnextiaj tikinikneliaj katli tikintlajpalouaj uan tikinyolchikauaj, kichiua nojua kuali ma timouikakaj ininuaya uan techpaleuia ma tiitstokaj sansejko.

Kema Pablo asito Puteoli uan yajki Roma, toikniuaj yajkej kinamiki. Kema kinuejkaitak, Pablo “kitlaskamatki toTeko uan inijuantij kimakakej yankuik tetili ipan iyolo” (Hech. 28:13-15). Maske kemantika uelis san tiixuetskasej o san tikolinisej tomax, uelis tijyolchikauasej se akajya katli mokuesojtok o motekipachojtok.

Ma tikitakaj nama tlake kichijki Santiago. Ya chikauak kintlalnamiktik se keskij Cristo itokilijkauaj pampa ayokmo kuali kitekipanouayayaj Jehová uan monejnemiltiyayaj kej sekinok maseualmej (Sant. 4:4). Ma tikitakaj tlake kiijtoua kampa peua iamatlajkuilol:

“Na niSantiago. Na niinintekipanojka toTeko Dios uan toTeko Jesucristo. Niinmechtlajkuiljuilia innoisraelitaikniuaj ipan Cristo tlen initstokej ipan nopa matlaktli uan ome uejueyi familias [...,] niinmejchtlajpaloua” (Sant. 1:1). Ni tlajtoli kichijki toikniuaj kuali ma kiitakaj tlen kintlajtolmakak, pampa Santiago kinextik kinpatiitayaya uan amo moueyimatiyaya. Uajka, kema kuali titetlajpalouaj, nojkia uelis kichiuas kuali ma techtlakakilikaj kema monekis tikintlalnamiktisej sekinok.

Maske amo tiuejkauasej kema titetlajpalosej, tlaj tijnekij kuali ma kiyolmatikaj katli tikintlajpalouaj, moneki tijchiuasej ika nochi toyolo uan tijnextisej titeikneliaj. Nochipa ma tijchiuakaj ni maske timoiljuiskiaj sekinok amo kiitaj (Mat. 22:39). Se tonali, se tosiuaikni katli eua Irlanda, asito ipan kampa mosentiliyaya kema nechka peuaskia tlanechikoli. Nimantsi kalakito, uan se toikni moikantlachilik, kiixuetskilik uan kiiljuik: “¡Yaui! Niyolpaki nimitsitas”. Nopa tosiuaikni amo tleno kiijtok uan moseuik.

Kema panok se keski semanas, nopa tosiuaikni kinechkauik toikni uan kiiljuik panotoya se kuesoli ika ichampoyouaj. Kiiljuik: “Tlauel nimokuesojtoya, yeka ayokmo niualaskia tlanechikoli. Amo nikilnamiki tlake moixtonki, san nikilnamiki tinechtlajpalok. Nijmatki kenijkatsa tlauel kuali tinechselik. Tlaskamati”.

Toikni amo kema moiljuik tlauel kipaleuijtoya tosiuaikni pampa kitlajpalok. Ya kiijtoua: “Kema nechiljuik tlauel kipaleuijtoya maske san nikiljuik se ome tlajtoli, tlauel niyolpajki pampa nijtlajpalok. Nopa kichijki kuali ma nijyolmati”.

Salomón kiijkuilok: “Xitemajmaka miak pampa teipa, ika miak tonali, sampa asiki momako” (Ecl. 11:1). Tlaj tikintlajpalouaj sekinok, uan nojkia toikniuaj, nochi tlauel timoyolchikauasej. Yeka, nochipa ma tikilnamiktokaj kenijkatsa tlauel tikinpaleuiaj sekinok kema tikintlajpalouaj.