1. ¿Kenke moneki tijtlakakilisej tlen Jesús kiijtok?

KEMA Jesús tlajtolpanextik tlake panoskia ipan itlamia tonali, kiijtok: “Ximomokuitlauikaj. [...] Ma axniinmechpantiki [...] inmokuatotonijtokej ika tlamantli tlen ni nemilistli nikaj [o kenijkatsa inmopanoltisej]” (Luc. 21:34). ¿Kenke nochi Cristo itokilijkauaj moneki tijtlakakilisej tlen techtlajtolmakak? Pampa ipan ni tonali tojuantij nojkia tijpiaj kuesoli uan tlaijiyouilistli sanse kej sekinok maseualmej.

2. ¿Tlake kuesoli kiixnamikij toikniuaj?

² Kemantika, amo san setsi kuesoli techtekipachoua. Ma tikitakaj se keski neskayotl. Se toikni katli itoka John, * katli kipia esclerosis múltiple, tlauel mokuesok kema isiua kikajki maske 19 xiuitl mosenkajtoyaj. Teipa, omej iichpokauaj kitlauelkajkej Jehová. Toikni Bob uan isiua Linda, kiixnamijkej sekinok tlaouijkayotl. Omej ayokmo kipixkej tekitl uan teipa kinkixtilijkej ininchaj. Nojkia, Linda kiiljuijkej kipixtoya se kokolistli ipan iyolo tlen ueliskia kimiktis, uan nojkia se kokolistli tlen kichiuayaya iomiyouaj ma uejuejkochiui.

3. Kej kiijtoua Filipenses 4:6, 7, ¿ipan tlake moneki timotemachisej?

³ Uelis timotemachisej Jehová, toTata katli techchijchijki uan tlauel techiknelia, kikuamachilia kenijkatsa tijyolmatij kema titlaijiyouiaj. Uan ya tlauel kineki techpaleuis ma tikixnamikikaj nochi kuesoli (xijpoua Filipenses 4:6, 7). Ipan iTlajtol, tijpantiaj miak tlapoualistli kampa kiijtoua kenijkatsa miakej Jehová itekipanojkauaj kinpanok miak tlaouijkayotl  uan kenijkatsa ya kinpaleuik. Ma tikitakaj se keski neskayotl.

4. ¿Tlake kuesoli kipixki Elías, uan kenijkatsa Jehová kipaleuik?

⁴ Elías kitekipanok Jehová kema onkayaya miak tlaouijkayotl uan kiixnamijki miak kuesoli. Acab, se tlanauatijketl katli kiixpanok Jehová, mosiuajtik iuaya Jezabel, se siuatl katli kiueyichiuayaya Baal. Nopa omej kichijkej ipan nochi altepetl Israel nojkia ma kiueyichiuakaj Baal uan kinmiktijkej miakej Jehová itlajtolpanextijkauaj. Elías uelki mochololtik uan amo mijki pampa motemachik ipan Jehová kema miakej maseualmej mayankamijkej (1 Rey. 17:2-4, 14-16). Nojkia motemachik ipan Jehová kema kinijixnamijki Baal itlajtolpanextijkauaj uan nochi katli kiueyichiuayayaj, uan kiniljuik israeleuanij sampa ma kitekipanokaj Jehová, toTeotsij katli melauak (1 Rey. 18:21-24, 36-38). Elías miakpa kiitak kenijkatsa Jehová kimokuitlauijtoya uan kipaleuijtoya ipan nochi kuesoli tlen kipixki.

5, 6. Kej kiijtoua 1 Reyes 19:1-4, ¿kenijkatsa kiyolmatiyaya Elías, uan kenijkatsa Jehová kinextilik kiikneliyaya?

⁵ (Xijpoua 1 Reyes 19:1-4). Kema Jezabel kiijtok kimiktiskia Elías, ya tlauel majmajki. Yeka, mochololtik uan yajki Beerseba. Tlauel mokuesok uan yeka kiiljuik Jehová ya kinekiyaya mikis. ¿Kenke kiampa kiyolmatki? Pampa nojkia eliyaya “se tlakatl keja tojuantij”, eliyaya tlajtlakole (Sant. 5:17). Uelis tlauel mokuesok pampa moyolkokojtoya uan siajtoya. Elías moiljuik san tlapik nochi  tlen kichijtoya pampa kinekiyaya maseualmej sampa ma tlaueyichiuakaj kej kinamiki. Moiljuik israeleuanij amo moyolpatlatoyaj uan san ya iselti mokajtoya katli nojua kiueyichiuayaya Jehová (1 Rey. 18:3, 4, 13; 19:10, 14). Maske uelis timoiljuiaj amo kinamikiyaya kiampa kiyolmatis o moiljuis, Jehová kena kikuamachiliyaya.

⁶ Kema Elías kiijtok tlen kiyolmatiyaya, Jehová amo kiajuak uan kipaleuik sampa kuali ma kiyolmati (1 Rey. 19:5-7). Teipa, kitlalnamiktik ika miak tlaiknelili kema kinextilik san ya kipia tlauel miak chikaualistli. Nojkia, Jehová kiiljuik Elías nojua mokauayayaj 7,000 israeleuanij katli amo kiueyichiuayayaj Baal (1 Rey. 19:11-18). Jehová kinextilik Elías ika miak tlamantli ya tlauel kiikneliyaya.

7. ¿Kenke timoyolchikauaj kema tikitaj kenijkatsa Jehová kipaleuik Elías?

⁷ ¿Nojkia techkuesoua se tlaouijkayotl? Tlauel timoyolchikauaj kema tikitaj kenijkatsa Jehová kikuamachiliyaya tlen Elías kiyolmatiyaya. Uan nojkia kuali tijyolmatij tijmatisej ya techkuamachilia kema timokuesouaj. Kimati tlake tlamantli amo uelis tikijiyouisej, tlake timoiljuiaj uan tlake tijyolmatij (Sal. 103:14; 139:3, 4). Tlaj tijchiuasej kej Elías uan tikiljuisej Jehová tlen tijyolmatij, ya techpaleuis ma tikixnamikikaj nopa tlaouijkayotl tlen tlauel techkuesoua (Sal. 55:22).

8. ¿Kenijkatsa Jehová techpaleuis ma tikixnamikikaj tokuesoljuaj?

⁸ Tlaj tlauel timokuesouaj, uelis kichiuas tlauel ma timotekipachokaj uan ma timoiljuikaj nochipa titlaijiyouijtosej. Tlaj kiampa techpano, ma tikilnamikikaj Jehová techpaleuis. ¿Kenijkatsa kichiuas? Ya techiljuia ma tikiljuikaj tlen techtekipachoua uan kiijtoua temachtli techtlakakilis (Sal. 5:3; 1 Ped. 5:7). Yeka, mojmostla ma tikiljuikaj tlen techtekipachoua. Maske amo technojnotsas kej kichijki ika Elías, kena uelis technojnotsas ika Biblia uan ika itlanechikol. Tlen tijpouasej ipan Biblia techyolchikauas uan techpaleuis ma timotemachikaj ipan tlen tijchiaj. Uan toikniuaj nojkia uelis tlauel techyolchikauasej (Rom. 15:4; Heb. 10:24, 25).

9. ¿Kenijkatsa uelis techpaleuis se kuali touampo?

⁹ Jehová kiiljuik Elías ma kimaka Eliseo se keski tekitl tlen ya kipixtoya. Kiampa, kimakak se iuampo katli kipaleuiskia kema ya tlauel mokuesoskia. Nojkia, tlaj tojuantij tijpiaj se kuali touampo, ya techpaleuis kema titlaijiyouisej (2 Rey. 2:2; Prov. 17:17). ¿Uan tlaj tijyolmatij toselti tiitstokej uan amo aka katli uelis tikiljuisej tokuesoljuaj? Uajka, ma tikiljuikaj Jehová ma techpaleui tijpantisej se toikni katli kuali tlaneltoka uan kuali tlalnamiktok, uan kiampa uelis techyolchikauas kema timokuesosej.

10. 1) ¿Ipan tlake timotemachiaj kema tikitaj tlen kipanok Elías? 2) ¿Kenijkatsa techpaleuia tlen Jehová techtenkauilijtok ipan Isaías 40:28, 29?

¹⁰ Jehová kipaleuik Elías amo ma mokueso uan ma kitekipanojto miak xiuitl. Tlen kipanok nopa tlajtolpanextijketl tlauel techyolchikaua. Maske uelis kemantika tikixnamikisej miak tlaouijkayotl tlen techsiauiltis uan kichiuas tlauel ma timokuesokaj, tlaj timotemachiaj ipan Jehová, ya techpaleuis ma tikijiyouikaj uan nojua ma tijtekipanojtokaj (xijpoua Isaías 40:28, 29).

11-13. ¿Tlake kinpanok eyij toTeotsij itekipanojkauaj?

¹¹ Biblia kiijtoua sekinok toTeotsij itekipanojkauaj nojkia tlaijiyouijkej miak. Ana tlauel mokuesouayaya pampa amo ueliyaya konepia,  uan iueue Elcana kipixtoya seyok isiua katli tlauel kipinajtiyaya (1 Sam. 1:2, 6). Tlauel mokuesok uan yeka tlauel mochokiliyaya uan ayokmo kinekiyaya tlakuas (1 Sam. 1:7, 10).

¹² Tlanauatijketl David nojkia kipanok miak tlaouijkayotl. Ma tikitakaj se keski. Ya tlauel mokuesok pampa miakpa tlajtlakolchijki (Sal. 40:12). Nojkia ikone Absalón kiijixnamijki, uan teipa mijki (2 Sam. 15:13, 14; 18:33). Uan se katli eliyaya kuali iuampo nojkia kiijixnamijki (2 Sam. 16:23–17:2; Sal. 55:12-14). Maske ipan miak salmos tlen kiijkuilok nesi kenijkatsa mokuesojtoya, nojkia nesi kenijkatsa tlauel motemachiyaya ipan Jehová (Sal. 38:5-10; 94:17-19).

¹³ Nojkia kiampa kipanok katli kiijkuilok se salmo, uelis eliyaya iteipaixui Asaf, katli tlatekipanouayaya ipan teokali. Ya pejki kinkokolia maseualmej katli amo kuali monejnemiltiyayaj, uan yeka tlauel mokuesok uan ayokmo yolpakiyaya. Moiljuik nochi tlateochiualistli tlen kiseliaj toTeotsij itekipanojkauaj amo tlauel ipati eliyaya (Sal. 73:2-5, 7, 12-14, 16, 17, 21).

14, 15. ¿Tlake techmachtia tlen kinpanok nopa eyij toTeotsij itekipanojkauaj?

¹⁴ Nopa eyij toTeotsij itekipanojkauaj kiiljuijkej Jehová ma kinpaleui. Kiijtojkej nochi tlen kiyolmatiyayaj kema momaijtojkej. Uan xitlauak kiiljuijkej kenke tlauel mokuesojtoyaj. Uan nochipa yajkej kampa kiueyichiuayayaj Jehová (1 Sam. 1:9, 10; Sal. 55:22; 73:17; 122:1).

¹⁵ ToTeotsij Jehová, katli tlauel teiknelia, kinpaleuik nochi inijuantij. Ana moyolseuik uan ayokmo kema mokuesok (1 Sam. 1:18). David kiijkuilok: “Se tlakatl tlen itstok  xitlauak iixpa toTeko kipia miak kuesoli, pero toTeko kimanauia ika nochi tlen ipanti” (Sal. 34:19). Uan katli kiijkuilok se salmo kimatki kenijkatsa Jehová kejuak kiitskik ipan imanejmak uan kiyakanki ika tlen kitlajtolmakak. Ya uikak: “Na achi más nimonechkauis kampa toTeko Dios, pampa ya nopa tlen más kuali para na. San ipan toTeko nimotemachijtok pampa yajaya noTeko” (Sal. 73:23, 24, 28). ¿Tlake techmachtia? Maske kemantika tlauel timokuesosej pampa tijpiasej kuesoli, uelis tikixnamikisej tokuesoljuaj tlaj timoyoliljuisej kenijkatsa Jehová kinpaleuijtok sekinok, tlaj timomaijtosej uan tlaj tijchiuasej nochi tlen technauatia (Sal. 143:1, 4-8).

16, 17. 1) ¿Kenke amo kinamiki timouejkatlalisej? 2) ¿Tlake tlamantli uelis techyolchikauas?

¹⁶ Tlen kinpanok nopa eyij toTeotsij itekipanojkauaj nojkia technextilia seyok tlamantli tlen tlauel ipati: amo kinamiki tijtlalkauisej Jehová yon toikniuaj (Prov. 18:1). Nancy tlauel tlaijiyouik kema iueue kikajki, ya kiijtoua: “Miak tonali amo aka nijnejki nikitas yon nikamanaltis iuaya se akajya. Pampa nimouejkatlaliyaya, kichijki nojua tlauel ma nimokueso”. Pejki kuali kiyolmati kema kitemolik kenijkatsa kinpaleuiskia sekinok katli kipixtoyaj kuesoli. Ya kiijtoua: “Kema nechiljuiyayaj  tlen kiyolmatiyayaj, na kuali nikintlakakiliyaya. Nopa nechpaleuik ma nikita kema nijchiuayaya kampeka nijyolmatis tlen kintekipachouayaya, ayokmo tlauel nechyolkokouayaya tlen na nechkuesouayaya”.

¹⁷ Nojkia uelis kuali tijyolmatisej tlaj tiasej tlanechikoli. Kema tiauij, Jehová nojua uelis kitekiuis miak tlamantli tlen ika techpaleuis uan techyolchikauas (Sal. 86:17). Nopaya, techyolchikaua ika itonal, ika iTlajtol uan ika toikniuaj. Uan nojkia amo san tojuantij techyolchikauaj, tojuantij nojkia uelis tikinyolchikauasej sekinok (Rom. 1:11, 12). Se tosiuaikni katli itoka Sofía, kiijtok: “Jehová uan toikniuaj nechpaleuijkej ma nikijiyoui nokuesoljuaj. Tlauel nijpatiitayaya nias tlanechikoli. Nikitstok kenijkatsa pampa tlauel nitlajtolmoyaua uan nitlatekipanoua ipan tlanechikoli, nechpaleuia ma nikixnamiki nokuesoljuaj uan tlen nechtekipachoua”.

18. ¿Tlake uelis techmakas Jehová kema timokuesojtosej?

¹⁸ Kema tlauel timokuesojtosej, ma tikilnamikikaj Jehová kitenkajtok kitlamiltis nochi tlaijiyouilistli, uan nojkia kitenkajtok nochipa techpaleuis. Ya techmaka chikaualistli uan techpaleuia ayokmo ma timokuesojtokaj yon ma timotekipachojtokaj (Filip. 2:13).

19. ¿Kenke techyolchikaua tlen kiijtoua Romanos 8:37-39?

¹⁹ (Xijpoua Romanos 8:37-39). Apóstol Pablo temachtli kiijtoua yon se tlamantli uelis kitsakuilis Jehová itlaiknelijkayo o kichiuas ayokmo ma techikneli. Uan tlaj sekij toikniuaj tlauel motekipachouaj, ¿kenijkatsa uelis tikinpaleuisej? Ipan nopa seyok tlamachtili tikitasej kenijkatsa uelis tikinpaleuisej uan tijnextisej tikintlasojtlaj, sanse kej Jehová kichiua.