TLAMACHTILI 25
Nikintemoti notekipanojkauaj
“Nias nikintemoti noborregojuaj uan nikinixmatis” (EZEQ. 34:11).
UIKATL 105 ToTeotsij eli tlaiknelijkayotl
TLEN MOIXTOMAS *
1. ¿Kenke Jehová kiijtok eliyaya kej se tenaj?
KEMA itstoya tlajtolpanextijketl Isaías, Jehová kiniljuik itekipanojkauaj: “¿Uelis se tenantsi ueli kitlauelkauas ipilkone? [...]. Yonke se tenantsi ueliskia kiilkauaskia ikone, na axkema nikilkauas” (Is. 49:15). Maske toTeotsij amo nochipa kiijtoua eli kej se tenaj, ipan ni texto kena kiampa kiijtok. Kema Jehová kiijtok kenijkatsa se tenaj tlauel kiiknelia ikone, kinejki kinextis kenijkatsa tlauel kiniknelia itekipanojkauaj. Miakej siuamej katli kinpiaj ininkoneuaj, nojkia kiyolmatij kej toikni Jasmín, ya kiijtok: “Kema tijchichitis mopilkone, kichiua nochipa tlauel xikikneli”.
2. ¿Kenijkatsa kiyolmati Jehová kema se itekipanojka mouejkatlalia?
2 Jehová kiita kema se itekipanojka ayokmo tlajtolmoyaua yon ayokmo monechikoua. ¿Timoiljuia kenijkatsa kiyolmati Jehová kema kiita sejse xiuitl miakej itekipanojkauaj mouejkatlaliaj? *
3. ¿Tlake kineki Jehová?
3 Miakej tlen ni toikniuaj sampa peuaj monechikouaj uan tojuantij kuali tikinseliaj. Jehová kineki sampa ma kitekipanokaj, uan tojuantij nojkia (1 Ped. 2:25). Achtoui ma tikitakaj kenke se keskij toikniuaj ayokmo yauij tlanechikoli uan ayokmo tlajtolmoyauaj, uan teipa tikitasej kenijkatsa uelis tikinpaleuisej.
¿KENKE SEKIJ MOUEJKATLALIAJ?
4. ¿Tlake uelis kinpanos katli tlauel tekitij?
4 Sekij toikniuaj peuaj tlauel tekitij. Toikni Hung, * katli eua Asia, kiijtok: “Pejki tlauel nitekiti. Nimoiljuik tlaj nijtlaniskia miak tomij, ueliskia nojua tlauel nijtekipanos Jehová. Yeka, pejki nojua tlauel nitekiti uan ayokmo niajki tlanechikoli. Uan teipa nimouejkatlalik. Nochi tlamantli tlen eltok ipan Tlaltipaktli kejuak kichijtokej yolik ma techuejkatlali tlen toTeotsij”.
5. ¿Tlake kipanok se tosiuaikni kema kipixki miak kuesoli?
5 Sekij toikniuaj kiixnamikij kuesoli tlen kichiua tlauel ma motekipachokaj. Ma tikitakaj tlen kipanok Anne katli eua Gran Bretaña uan kinpia makuiltij ikoneuaj. Ya kiijtoua: “Se nokone tlakatki ika miak kokolistli. Teipa, se noichpoka kikixtijkej tlen tlanechikoli uan se notelpoka kipixki se kokolistli ipan itsonteko. Tlauel nimoyolkokok ika tlen nechpanoyaya, yeka ayokmo nitlajtolmoyajki yon ayokmo niajki tlanechikoli, nopa kichijki ma nimouejkatlali”. Tlauel techyolkokoua kema tikitaj toikniuaj kiixnamikij uejueyi kuesoli kej kipanok Anne uan ichampoyouaj.
6. ¿Tlake ueliskia techpanos tlaj amo tijchiuasej tlen kiijtoua Colosenses 3:13?
6 (Xijpoua Colosenses 3:13). Sekij Jehová itekipanojkauaj kemantika kinyolkokoua se toikni. Apóstol Pablo kiijtok kemantika uelis kinamiki tikualanisej iuaya se toikni pampa techchiuilik tlen amo kuali. Tlaj amo timomokuitlauisej uelis tlauel timoyolkokojtosej uan nopa kichiuas ma timouejkatlalikaj tlen Jehová. Ma tikitakaj tlen kipanok toikni Pablo, katli eua Sudamérica. Ya kiistlakauijkej pampa kiijtojkej kichijtoya tlen amo kuali, uan yeka kipolok nopa tekitl tlen kimakatoyaj ipan tlanechikoli. ¿Tlake kichijki? Ya kiijtoua: “Tlauel nikualanki, yeka nimouejkatlalik tlen Jehová itlanechikol”.
7. ¿Tlake ueliskia techpanos tlaj tlauel timoyolkokosej ika tlen tijchijkej?
7 Katli uejkajkia kichijkej se ueyi tlajtlakoli, uelis amo kuali kiyolmatij uan moiljuiaj amo kinamiki Jehová ma kinikneli. Maske moyolkuepkej uan Jehová ya kintlapojpoljuik, uelis nojua moiljuiaj amo kinamiki itstosej ipan tlanechikoli. Kiampa kiyolmatiyaya toikni Francisco. Ya kiijtoua: “Nechtlalnamiktijkej pampa nimomekatik. Maske achtoui nojua niauiyaya tlanechikoli, teipa pejki nimokuesoua miak tonali uan nimoiljuik amo kinamikiyaya niitstos ipan Jehová itlanechikol. Tlauel nechyolkokouayaya notlalnamikilis uan nimoiljuiyaya Jehová amo nechtlapojpoljuijtoya. Teipa, ayokmo nitlajtolmoyajki uan ayokmo niajki tlanechikoli”. ¿Kenijkatsa tikinitaj toikniuaj katli kinpano ni tlamantli? ¿Tijkuamachiliaj tlen kiyolmatij? Uan, ¿kenijkatsa kinita Jehová?
JEHOVÁ KINIKNELIA ITEKIPANOJKAUAJ
Ipan Israel, tlapialmokuitlauianij tlauel motekipachouayayaj kema poliuiyaya se ininborrego. (Xikita párrafos 8, 9). *
8. ¿Kenijkatsa tijmatij Jehová amo kinilkaua katli kitekipanojkej uan nama mouejkatlalijtokej?
8 Jehová nochipa kinilnamiki itekipanojkauaj katli mouejkatlalijtokej uan amo kiilkaua tlen kichijkej kema kitekipanojkej (Heb. 6:10). Isaías kiijtok kenijkatsa Jehová kinmokuitlauia itekipanojkauaj ika ni tlajtoli: “Kinmokuitlauis itlakauaj keja se tlamokuitlauijketl kinmokuitlauia iborregojuaj. Ipan ima kinuikas nopa pilborregojtsitsij nechka iyolixpa” (Is. 40:11). ¿Kenijkatsa kiyolmati Jehová kema se itekipanojka mouejkatlalia? Jesús kinextik kenijkatsa kiyolmati Jehová kema kintlajtlanik itokilijkauaj: “¿Kenijkatsa inkiitaj? ¿Tlachke kichiuaskia se tlakatl intla kinpixtoya cien borregojmej uan se mokuapoloskia? ¿Axinmoiljuiaj para kinkauaskiaj nopa noventa y nueve kuali tsaktokej uan yas ipan tepetl kitemoti nopa tlen mokuapolojtok? Uan intla kipantis, pakis más ika nopa borrego tlen mokuapolojtoya kej ika nopa noventa y nueve tlen axmokuapolojtokej” (Mat. 18:12, 13).
9. ¿Kenijkatsa se tlapialmokuitlauijketl kuali kinmokuitlauia iborregojuaj? (Xikita tlaixkopinkayotl ipan ipantsajka).
9 ¿Kenke uelis tikijtosej Jehová eli kej se tlapialmokuitlauijketl? Pampa se tlapialmokuitlauijketl kiniknelia iborregojuaj. David kimiktik se león uan se oso kema kinmanauik iborregojuaj (1 Sam. 17:34, 35). Se kuali tlapialmokuitlauijketl kimati kema se ipilborrego mokuapoloua (Juan 10:3, 14). Nopa tlapialmokuitlauijketl kintsakua nopa 99 borregojmej o kiiljuia seyok tlapialmokuitlauijketl ma kinmokuitlaui uan yaui kitemoua nopa pilborregojtsi. Jesús kitekiuik ni neskayotl pampa kineki ma tijmatikaj kenijkatsa eli iTata: “Yajaya axkineki ma mokuapolo niyon se” (Mat. 18:14).
Se israelejketl kimokuitlauia se pilborregojtsi katli mokuapolojtoya. (Xikita párrafo 9).
JEHOVÁ KINTEMOUA ITEKIPANOJKAUAJ
10. Kej kiijtoua Ezequiel 34:11-16, ¿kenijkatsa Jehová kinpaleuiskia katli mouejkatlalijtokej?
10 Jehová tlauel techiknelia sejse tlen tojuantij, uan nojkia katli mouejkatlalijtokej tlen tlanechikoli. Ika tlajtolpanextijketl Ezequiel, Jehová kiijtok kintemoskia katli mouejkatlalijtokej uan kinpaleuiskia nojua kuali ma tlaneltokakaj. Uan nojkia kiijtok kenijkatsa kichiuaskia sampa ma tlakuepilikaj. Kichiuaskia tlen kichiua se tlapialmokuitlauijketl kema kitemoua se ipilborrego (xijpoua Ezequiel 34:11-16). Nopa tlapialmokuitlauijketl achtoui kitemoskia iborrego, maske amo nima kipantiskia uan siauiskia. Teipa, kema kipantiskia sampa kiuikaskia kampa itstokej nopa sekinok borregojmej. Uan tlaj ipilborrego mokokojtok o mayana, ika miak tlaiknelili kipaleuiskia, kinauaskia, kitlamakaskia uan kipajtiskia kampa mokokojtok. Nojkia, ueuejtlakamej kinmokuitlauiaj katli itstokej ipan tlanechikoli, yeka nojkia moneki kichiuasej kej se tlapialmokuitlauijketl kema kinpaleuiaj toikniuaj katli mouejkatlalijtokej (1 Ped. 5:2, 3). Ueuejtlakamej kintemouaj toikniuaj katli mouejkatlalijtokej, kinpaleuiaj sampa ma tlakuepilikaj ipan tlanechikoli uan ika miak tlaiknelili kinpaleuiaj sampa kuali ma tlaneltokakaj. *
11. ¿Tlake kimatiyaya se kuali tlapialmokuitlauijketl?
11 Se kuali tlapialmokuitlauijketl kimatiyaya iborregojuaj ueliskiaj mokuapolosej. Kema kiampa panoyaya, ya amo kualaniyaya. Ma tikitakej tlake kichijki Jehová kema se keskij itekipanojkauaj amo kichijkej tlen kiniljuik.
12. ¿Kenijkatsa Jehová kipaleuik Jonás?
12 Maske tlajtolpanextijketl Jonás cholok pampa amo kinejki kichiuas tlen Jehová kinauatik, Jehová amo moiljuik ayokmo kitekimakaskia. Kej kichiuaskia se kuali tlapialmokuitlauijketl, Jehová kimanauik uan kipaleuik ma kichiua tlen kinauatijtoya (Jon. 2:7; 3:1, 2). Teipa, kitekiuik se ayojtli imakuayo pampa kinejki ma kikuamachili ininnemilis maseualmej eli tlauel ipati (Jon. 4:10, 11). ¿Tlake techmachtia? Ueuejtlakamej moneki amo nima moiljuisej ayokmo sampa kitekipanosej Jehová katli mouejkatlalijtokej. Inijuantij moneki kichiuasej kampeka kikuamachilisej kenke mouejkatlalijkej. Uan kema sampa tlakuepilisej ipan tlanechikoli, ueuejtlakamej moneki nojua kinnextilisej tlauel kinikneliaj uan kintekipachoua tlen kinpano.
13. ¿Tlake kichijki Jehová ika katli kiijkuilok Salmo 73, uan tlake techmachtia?
13 Katli kiijkuilok Salmo 73 moyolkokok kema kinitak kuali itstoyaj katli amo kualmej. Yeka, moiljuik san tlapik kitekipanouayaya Jehová (Sal. 73:12, 13, 16). ¿Tlake kichijki Jehová? Amo kualanki iuaya. Uan tlen kiijtok, kichijki ma moijkuilo ipan Biblia. Teipa, katli kiijkuilok nopa Salmo kikuamachilik tlauel ipati kema se akajya mouampojchiua iuaya Jehová (Sal. 73:23, 24, 26, 28). ¿Tlake techmachtia? Ueuejtlakamej amo moneki nima kualanisej kema se toikni kiniljuis san tlapik kitekipanoua Jehová. Moneki kikuamachilisej kenke kiampa kiijtoua uan kenke kichiua se keski tlamantli. Uan kema ya kimatisej tlen kipano, uelis kipaleuisej ika Biblia.
14. ¿Kenke monekiyaya ma kipaleuikaj Elías, uan kenijkatsa kipaleuik Jehová?
14 Tlajtolpanextijketl Elías cholok pampa kimatki Jezabel kinekiyaya kimiktis (1 Rey. 19:1-3). Moiljuik ayokmo itstoyaj sekinok itlajtolpanextijkauaj Jehová uan san tlapik kitekipanouayaya. Tlauel motekipachok, yeka ayokmo kinekiyaya itstos (1 Rey. 19:4, 10). Jehová amo kualanki ika Elías, kiiljuik amo itstoya iselti uan kimakaskia chikaualistli. Uan nojkia kiiljuik monekiyaya kichiuas sekinok tlamantli. Kema Elías kiiljuik Jehová nochi tlen kiyolmatiyaya, ya kuali kitlakakilik uan nojua kitekimakak (1 Rey. 19:11-16, 18). ¿Tlake techmachtia? Nochi tojuantij uan ueuejtlakamej, moneki tijnextisej tlauel tikinikneliaj toikniuaj. Tlaj se toikni tlauel moyolkokoua o moiljuia amo kinamiki kitekipanos Jehová, ueuejtlakamej moneki kuali kitlakakilisej kema kiniljuis tlen kiyolmati. Teipa, moneki kiiljuisej Jehová tlauel kipatiita.
¿KENIJKATSA MONEKI TIKINITASEJ KATLI MOUEJKATLALIJTOKEJ?
15. Kej kiijtoua Juan 6:39, ¿kenijkatsa Jesús kinitayaya Jehová itekipanojkauaj?
15 ¿Kenijkatsa kineki Jehová ma tikinitakaj katli mouejkatlalijtokej? Jesús technextilik kenijkatsa moneki tikinitasej. Ya kimatiyaya Jehová tlauel kinpatiitayaya sejse itekipanojkauaj. Yeka, Jesús kiijtok: “ToTeko nechtitlantok ma nikinpaleui israelitajmej pampa itstokej keja borregojmej tlen mokuapolojtokej” (Mat. 15:24; Luc. 19:9, 10). Jesús nochipa kuali kinmokuitlauik Jehová itekipanojkauaj pampa amo kinekiyaya ma mouejkatlalikaj, yeka eli kej se kuali tlapialmokuitlauijketl (xijpoua Juan 6:39).
16, 17. ¿Kenijkatsa ueuejtlakamej moneki kinitasej katli mouejkatlalijtokej? (Xikita nopa recuadro “ ¿Kenijkatsa kiyolmati katli mouejkatlalijtok?”).
16 Pablo kiniljuik ueuejtlakamej katli itstoyaj ipan Éfeso ma kichiuakaj kej Jesús. Kiniljuik: “Moneki titekitisej chikauak [...] para tikinpaleuisej tlen axtleno kipiaj. Xikilnamikikaj tlen toueyiTeko Jesucristo kiijtok: ‘Más pakilistli kiselia tlen temaka se tlenijki, uan axkeja tlen kiselia’” (Hech. 20:17, 35). Nochi ueuejtlakamej kipiaj se ueyi tekitl. Salvador, se ueuejtlakatl katli eua España, kiijtoua: “Kema nimonejneuilia kenijkatsa Jehová kiniknelia itekipanojkauaj katli mouejkatlalijtokej, nechpaleuia nojua ma nijchiua kampeka nikinpaleuis. Nikita Jehová kineki kuali ma nikinmokuitlaui”.
17 Ipan ni tlamachtili tikitakej kenijkatsa toikniuaj kinpaleuijkej uan sampa kitekipanojkej Jehová. Ipan ni tonali nojua itstokej miakej toikniuaj katli mouejkatlalijtokej uan sampa kinekij kitekipanosej Jehová. ¿Kenijkatsa uelis tikinpaleuisej? Ipan seyok tlamachtili tikitasej kenijkatsa uelis tijchiuasej.
UIKATL 139 Nimoita ipan yankuik Tlaltipaktli
^ párr. 5 ¿Kenke se keskij toikniuaj katli miak xiuitl kitekipanojkej Jehová teipa ayokmo kitekipanojkej? ¿Kenijkatsa kinita toTeotsij? Ipan ni tlamachtili tijnankilisej ni tlajtlanili. Nojkia tikitasej kenijkatsa uejkajkia Jehová kinpaleuik se keskij itekipanojkauaj kema mouejkatlalijkej uan tikitasej tlake techmachtia.
^ párr. 2 TLEN TLAUEL IPATI: Se toikni katli mouejkatlalia eli katli ayokmo tlajtolmoyaua ipan chikuasej metstli o kipano, uan nojkia ayokmo kinpaleuia sekinok ma mochiuakaj Cristo itokilijkauaj. Katli mouejkatlaliaj nojua elij toikniuaj uan tikinikneliaj.
^ párr. 4 Ipan ni tlamachtili kinpatilijtokej inintoka.
^ párr. 10 Ipan tlamachtili 26 tikitasej sejse tlamantli tlen moneki kichiuasej ueuejtlakamej uan kiampa kinpaleuisej sampa ma tlakuepilikaj katli mouejkatlalijtokej.
^ párr. 60 TLEN NESI IPAN TLAIXKOPINKAYOTL: Se tlapialmokuitlauijketl kitemoua ipilborrego katli kipolojtoya uan kiuika kampa itstokej sekinok iborregojuaj. Ipan ni tonali, ueuejtlakamej katli tlauel teikneliaj nojkia kiampa kichiuaj.
^ párr. 64 TLEN NESI IPAN TLAIXKOPINKAYOTL: Se toikni katli mouejkatlalijtok itstok ipan autobús uan kinita omej toikniuaj tlajtolmoyauaj ika pakilistli.
