“Kema nimokualanik iuaya nomachikni, nijkechpatskak pampa nijnekiyaya nijmiktis” (Paul).

“Nimantsi nikualaniyaya ika nochampoyouaj maske amo kinamikiyaya kiampa nijchiuas. Nijxoleuayaya tlen tijpixtoyaj tochaj, ajauili o tlamantli tlen nopaya eltoya” (Marco).

Maske amo tijchiuasej kej kichiuayayaj Paul uan Marco, uelis kena nochi ouij tijmatij timonauatisej. ¿Kenke? Pampa Adán techpanoltilik tlajtlakoli uan yeka nochi titlajtlakolchiuaj (Rom. 5:12). Kej Paul uan Marco, sekij kimatij tlauel ouij monauatisej. Nojkia, sekinok kichiuaj kampeka amo majmauisej uan amo moiljuisej ipan tlamantli tlen kichiuas ayokmo ma yolpakikaj. Nojkia, amo momekatisej, tlaisej o kitekiuisej drogas.

Katli amo kinauatiaj tlen moiljuiaj, tlen kinyoltilana uan tlen kinekij kichiuasej, kichiuas amo kuali ma itstokaj. ¿Tlake uelis tijchiuasej uan kiampa amo techpanos nopa tlamantli? Moneki tijyekosej kenijkatsa timonauatisej. Ma tikitakaj eyi tlajtlanili tlen techpaleuis timonauatisej: 1) ¿Tlake kiijtosneki timonauatis? 2) ¿Kenke tlauel moneki? 3) ¿Tlake techpaleuis tijnextisej ni kuali tlamantli? (Gál. 5:22, 23). Nojkia, tikitasej tlake tijchiuasej tlaj kemantika tijmatij ouij timonauatisej.

Se akajya katli kimati monauatis amo kichiua tlen kiyolmati. Ya kimati tlake amo kinamiki kichiuas o kiijtos, uan kiampa amo kiyolkokos toTeotsij.

Ika tlen Jesús kichijki kinextik kenijkatsa uelis timonauatisej. Biblia kiijtoua: “Kema tlakamej kitlaijiyouiltiyayaj Cristo, axtleno kinnankiliyaya. Kema yajaya tlaijiyouiyaya, axtemajmatiyaya ika tlen kinkuepiliskia teipa. [...] Kinkajki tlen fiero kichiuiliyayaj imako toTeko tlen tetlajtolsenkaua xitlauak” (1 Ped. 2:23). Jesús kinextik ni kuali tlamantli kema kikuapilojtoyaj uan kema ikualankaitakauaj kitlaijiljuiyayaj (Mat. 27:39-44). Nojkia, kinextik kema nopa judíos katli tlayakanayayaj ipan religión kinekiyayaj “ma kiijto se tlajtoli axkuali para uelis kiteiljuisej” (Mat. 22:15-22). Tlauel kuali tlen Jesús kichijki kema judíos kualantoyaj uan kitetemiskiaj o kitepachoskiaj, pampa amo momakuepki uan “ixtlakakistejki ipan nopa ueyi teopamitl” (Juan 8:57-59).

¿Uelis tijchiuasej kej Jesús? Kena, maske uelis amo sanse kej ya kichijki. Apóstol Pedro kiijkuilok: “Cristo tlaijiyouiko inmopampa inmojuantij uan inmechnextilijtok kej moneki para xijpiakaj inmoyolo kema intlaijiyouiaj pampa kej nopa kichijki ya” (1 Ped. 2:21). Maske titlajtlakolchiuanij, uelis tijchiuasej kampeka tijnextisej kej Jesús. ¿Kenke tlauel moneki?

Tlaj tijnekij tijyolpakiltisej Jehová, moneki timonauatisej. Uelis maske miak xiuitl amo tijtlauelkajtokej Jehová, ika tlen tikijtosej o tlen tijchiuasej, kichiuas ayokmo kuali ma timouampojchiuakaj iuaya.

Ma tikitakaj tlen kipanok Moisés, se “tlakatl tlen achi más moiknonekiyaya uan axkeja nochi sekinok tlakamej ipan Tlaltipaktli” (Núm. 12:3). Ipan miak xiuitl, Moisés kipixki ueyi iyolo kema israeleuanij tlaijixnamikiyayaj. Maske kinextik ni kuali tlamantli, kema israeleuanij kualankej pampa amo kipixtoyaj atl uan pejkej tlaijixnamikij, Moisés tlauel kualanki uan amo kinextik monauatiyaya. Yeka, kinkualankanojnotski: “¡Xitlakakikaj inmosisinijkatlakamej! ¿Uelis moneki tojuantij ma timechkixtilikaj atl ipan ni ueyi tepexitl para timechamakasej?” (Núm. 20:2-11).

Moisés amo monauatik, uan amo kiueyichijki Jehová pampa kichijtoya nopa ueyi tlamantli kema israeleuanij kinmakak atl (Sal. 106:32, 33). Yeka, Jehová amo kikajki ma itsto ipan nopa tlali tlen kintenkauilijtoya kinmakas (Núm. 20:12). Pampa Moisés amo monauatik, nochipa moyolkokok (Deut. 3:23-27).

¿Tlake techmachtia? Maske uelis miak xiuitl tijtekipanojtokej Jehová, moneki kuali titenojnotsasej kema techkualankamakaj o kema tikiniljuisej tlen kinamiki kichiuasej (Efes. 4:32; Col. 3:12). Moneki tikilnamikisej tlen kipanok Moisés, pampa kema ya tiuejueyij uelis kemantika amo tijpiasej ueyi toyolo. Amo tijnekij ma mosokiui nochi tlen tijchijtokej ipan Jehová itlanechikol san pampa amo kuali timonauatijkej. Uajka, ¿kenijkatsa uelis tijnextisej ni kuali tlamantli?

Ma tijtlajtlanikaj toTeotsij itonal. ¿Kenke moneki tijchiuasej? Pampa kuali timonauatis eli se tlamantli tlen toTeotsij itonal, uan Jehová kinmaka katli kitlajtlaniaj (Luc. 11:13). ToTeotsij itonal techpaleuia tijnextisej ni kuali tlamantli (2 Cor. 4:7). Nojkia, techpaleuis tijnextisej sekinok kuajkuali tlamantli, kej tlaiknelili, tlen techpaleuis nojua kuali ma timonauatikaj (1 Cor. 13:5).

Amo tijchiuasej tlamantli tlen kichiuas amo timonauatisej. Moneki tijchiuasej kampeka amo tikitasej tlen nesi ipan Internet o timoyolpakiltisej ika tlamantli tlen kichiuas  amo kuali ma timonejnemiltikaj (Efes. 5:3, 4). Amo ma tijchiuakaj se tlamantli tlen kichiuas ma titlajtlakolchiuakaj (Prov. 22:3; 1 Cor. 6:12). Tlaj se akajya kichiua kampeka amo momekatis, moneki amo kipouas amochtli o kiitas películas tlen kichiuas ma momekati.

Maske uelis ouij tijmatisej tijchiuasej tlen tikitakej, tlaj tijchiuaj kampeka, Jehová techpaleuis amo tijchiuasej tlen techyoltilana (2 Ped. 1:5-8). Ya techpaleuis ma tijnauatikaj tlen timoiljuiaj, tlen tikijtouaj uan tlen tijchiuaj. Kiampa kichijki ika Paul uan Marco, tlen tikijtojkej kampa pejki ni tlamachtili. Ma timoiljuikaj tlen kipanoyaya se toikni, ya nimantsi kualaniyaya kema yauiyaya ipan icarro uan mokualaniyaya ininuaya sekinok. ¿Tlake kipaleuik ayokmo tlauel kualanis? Ya kiijtoua: “Mojmostla nimomaijtouayaya, nimomachtiyaya tlamachtili kampa kiijtouayaya kenijkatsa uelis nimonauatis uan nijtsontekontlaliyaya textos tlen nechpaleuiskia. Maske kiampa nijchijtok miak xiuitl, nojua nijchiua kampeka nimonauatis uan amo nima nikualanis. Yeka, nima nikisteua kema nia kanajya, kiampa amo tlauel nimoisiuiltia”.

Uelis kemantika ouij timonauatisej. Nopa kichiuas ma timoiljuikaj amo kinamiki timomaijtosej. Amo kiampa ma timoiljuikaj, moneki nima ma timomaijtokaj. Ma tikiljuikaj Jehová ma techtlapojpoljui, ma techpaleui uan timosentlalisej ayokmo sampa tijchiuasej tlen amo kuali (Sal. 51:9-11). Tlaj tikiljuiaj Jehová ika nochi toyolo ma techtlapojpoljui, ya techtlakakilis uan techtlasojtlas (Sal. 102:17). Apóstol Juan techilnamikilia “iKone toTeko, techyolpajpaktinemis tlen nochi tlajtlakoli” (1 Juan 1:7; 2:1; Sal. 86:5). Moneki tikilnamikisej Jehová techiljuia ma titetlapojpoljuikaj, yeka uelis timotemachisej ya nojkia techtlapojpoljuis (Mat. 18:21, 22; Col. 3:13).

Jehová amo kuali kiitak kema Moisés amo monauatik. Maske mokuapolok, Jehová kitlapojpoljuik. Biblia kiijtoua Moisés kuali tlaneltokak, yeka uelis tijchiuasej kej ya (Deut. 34:10; Heb. 11:24-28). Maske Jehová amo kikajki ma itsto ipan nopa tlali tlen kitenkauilijtoya, teipa itstos ipan Xochimili uan amo kema mikis. Tojuantij nojkia tiitstosej ipan Xochimili tlaj tijchiuaj kampeka kuali timonauatisej (1 Cor. 9:25).