Ipan Gálatas 5:22, 23 nesi chiknaui tlen nopa kuajkuali tlamantli tlen moneki tijnextisej. Nopaya kiijtoua: “Titeikneliaj, tipakij, tijpiaj tlaseuilistli ipan toyolo, tijpiaj toyolo ininuaya sekinok, titetlasojtlaj, tikinchiuiliaj sekinok tlen kuali, tiitstokej titemachmej, timoiknonekij uan timonauatiaj”. Amo san ni kuajkuali tlamantli moneki tijnextisej, toTeotsij itonal nojkia techpaleuia tijnextisej sekinok.

Ma tikitakaj tlen apóstol Pablo kiijkuilok ipan nopa achtoui versículos tlen Gálatas, kiijtoua: “Tlen tlakamej kichiuaj kema kitokiliaj tlen kineki inintlakayo. Momekatiaj [...]. Moiljuiaj miak tlamantli tlen axkuali. Kichiuaj tlen fiero pampa ya nopa tlauel kinekij kichiuasej. Kiueyichiuaj tlen tlakamej kichijtokej [...]. Tetlajchiuiaj, tekokoliaj, mosisiniaj, uan techikoitaj. Nojkia tlakamej kualankatlauejchiuaj, monajnankiliaj, motlajkoxelouaj, uan tlamachtiaj tlen axxitlauak. [...] Uan miak más tlamantli tlen axkuali” (Gál. 5:19-21). Nojkia, Pablo ueltoskia kiijtos sekinok tlamantli tlen kineki kichiuas totlakayo, kej kiijtok ipan Colosenses 3:5. Kiampa pano ika nopa chiknaui kuajkuali tlamantli tlen kiijtoua Gálatas 5:22, 23. Nopaya Pablo amo kiijtoua nochi nopa kuajkuali tlamantli tlen toTeotsij itonal techpaleuia tijnextisej.

Ika tlen Pablo kintlajkuiljuilik toikniuaj tlen Éfeso, techpaleuia tikitasej nopa kuajkuali tlamantli amo nochi uala ipan Gálatas. Nopaya kiijtoua: “Kema toTeko kitlauilia itlalnamikilis se tlakatl, yajaya itstok kuali, nejnemi xitlauak, uan kiijtoua tlen melauak” (Efes. 5:8, 9). Kej tikitaj, tijpiasej kuali toyolo, tijchiuasej tlen xitlauak uan tlen melauak, nojkia elij tlen nopa kuali tlamantli. Yeka, maske Pablo amo kiijtok ipan Gálatas 5:22, 23, ueltoskia kichiuas.

Pablo kiiljuik Timoteo ma kinexti ni chikuasej kuajkuali tlamantli: “Xijtokili tlen xitlauak. Mojmostla xiitsto más keja toTeko. Más xijneltoka ya uan más xikinikneli mouampoyouaj. Mojmostla xijsentokili moteki uan xijpia moyolo ika nochi tlakamej” (1 Tim. 6:11). San tlaneltokili, tlaiknelili uan tiyolyamanikej, nesi ipan Gálatas 5:22, 23. ToTeotsij itonal nojkia monekiyaya kipaleuis Timoteo, kiampa kinextis sekinok kuajkuali tlamantli tlen Pablo kiijtok, kej: kichiuas tlen xitlauak, san Jehová kiueyichiuas ika nochi iyolo uan nochi kiijiyouis (nojkia xikita Colosenses 3:12; 2 Pedro 1:5-7).

Kej tikitaj, Gálatas 5:22, 23 amo nochi kiijtoua nopa kuajkuali tlamantli tlen moneki tijnextisej. ToTeotsij itonal techpaleuis ma tijnextikaj nopa chiknaui kuajkuali tlamantli. Nojkia, onka sekinok kuajkuali tlamantli tlen moneki tijnextisej, kiampa kuali titlaneltokasej uan ‘tijpiasej tonemilis yankuik pampa toTeko techchijtok se yankuik tlakatl [...]. Uan ama uelis tijchijtinemisej tlen xitlauak uan tlen tlatsejtseloltik’ (Efes. 4:24).