1. ¿Tlake kichijtok Jehová ika sejse tlen tojuantij?

JEHOVÁ techyoltilanki sejse tlen tojuantij ma tijtekipanokaj (Juan 6:44). Ma timoiljuikaj tlen kichijki. Kema kinitayaya nochi maseualmej tlen itstokej ipan Tlaltipaktli, kiitak tijpiaj kuali toyolo uan kiitak tijnekij tijtekipanosej (1 Crón. 28:9). Jehová kuali techixmati, kikuamachilia tlen techpano uan tlauel techiknelia. Nopa tlauel techyolchikaua.

2. ¿Tlake neskayotl kitekiuik Jesús uan kiampa kinextik Jehová tlauel techiknelia?

² Jehová tlauel techiknelia uan nojkia kiniknelia nochi toikniuaj. Ika se neskayotl Jesús techpaleuia ma tijkuamachilikaj ni tlamantli. Ya kiijtok: “¿Tlachke kichiuaskia se tlakatl intla kinpixtoya cien borregojmej uan se mokuapoloskia? ¿Axinmoiljuiaj para kinkauaskiaj nopa noventa y nueve kuali tsaktokej uan yas ipan tepetl kitemoti nopa tlen mokuapolojtok? Uan intla kipantis, pakis más ika nopa borrego tlen mokuapolojtoya”. ¿Tlake techmachtia? Jehová, katli eli kejuak se tlapialmokuitlauijketl, kinpatiita sejse itekipanojkauaj. Jesús nojkia kiijtok: “Yajaya axkineki ma mokuapolo niyon se tlen ni konemej” (Mat. 18:12-14).

3. ¿Tlake tikitasej ipan ni tlamachtili?

³ Amo tijnekij tijchiuasej o tikijtosej yon se tlamantli tlen kichiuas ma moyolkokokaj toikniuaj. Ipan ni tlamachtili tijnankilisej ni tlajtlanili: ¿Tlake uelis tijchiuasej tlaj amo tijnekij tikinyolkokosej toikniuaj? Uan, ¿tlake uelis tijchiuasej tlaj se toikni techyolkokos? Achtoui ma tikitakaj tlake kineki kiijtos ipan Mateo capítulo 18 kema kitekiuia nopa tlajtoli “konemej”.

4. Xikijto ajkia inijuantij elij kej “konemej”.

⁴ Nopa “konemej” elij nochi Cristo itokilijkauaj. Maske amo sanse ininxiui, elij kej “konemej” pampa kikauaj Jehová ma kinmachti (Mat. 18:3). Nochi inijuantij kineltokaj Jesús maske kampa ueli euaj, amo momajtokej kichiuaj sanse tlamantli uan amo sanse elij. Uan ya tlauel kiniknelia (Mat. 18:6; Juan 1:12).

5. ¿Tlake kiyolmati Jehová kema se tlen itekipanojka kitlaijiyouiltiaj o kiyolkokouaj?

⁵ Jehová kinpatiita nochi ni “konemej”. Tlaj tijnekij kuali tijkuamachilisej kenijkatsa kinita, ma timoiljuikaj kenijkatsa tikinitaj konemej. Inijuantij amo kipiaj miak chikaualistli uan amo kimatij miak tlamantli kej katli ya uejueyij, yeka tlauel tikinpatiitaj uan tijnekij kuali tikinmokuitlauisej. Tojuantij amo tijnekij yon se maseuali ma kichiuilikaj tlen amo kuali, yeka kema tikitaj se konetl kitlaijiyouiltiaj, kichiua tlauel ma tikualanikaj. Jehová nojkia kiampa kiyolmati, ya kineki kinmokuitlauis nochi itekipanojkauaj. Yeka, kema se itekipanojka kitlaijiyouiltiaj o kiyolkokouaj, ya tlauel kualani (Is. 63:9; Mar. 9:42).

6. Kej kiijtoua 1 Corintios 1:26-29, ¿kenijkatsa kinitaj Jesús itokilijkauaj?

⁶ ¿Kenke nojkia tikijtouaj Jesús itokilijkauaj elij kej “konemej”? Achtoui ma tikitakaj ni tlamantli: maseualmej tlauel kinpatiitaj katli tlatominpiaj, katli tlauel kinixmatij uan katli kipiaj tlanauatili. Uan Jesús itokilijkauaj amo elij kej inijuantij, yeka maseualmej kinitaj kej “konemej”, katli amo tleno ininpati (xijpoua 1 Corintios 1:26-29).

7. ¿Kenijkatsa kineki Jehová ma tikinitakaj toikniuaj?

⁷ Jehová kiniknelia nochi itekipanojkauaj maske kipiaj miak xiuitl kitekipanojtokej o amo. Tlaj Jehová tlauel kinpatiita toikniuaj, tojuantij nojkia ma tikinpatiitakaj. Yeka, tijnekij tikiniknelisej nochi toikniuaj uan amo san se keskij (1 Ped. 2:17). Tlaj kiampa tijchiuaj, techpaleuis ma tijnekikaj tikinpaleuisej kema monekis uan tikinmokuitlauisej. Tlaj tikitaj tijyolkokojtokej se toikni, amo kema ma timoiljuikaj ya tlauel yolkentsi yeka nima moyolkokoua, uan moneki kiilkauas tlen tijchiuilijkej. ¿Kenke se keskij nima moyolkokouaj? Uelis kej kiniskaltijkej kichiua nima ma moyolkokokaj. Nojkia, uelis pampa namanok pejkej kitekipanouaj Jehová uan ayamo kimatij kenijkatsa mouikasej ininuaya sekinok. Maske amo tijmatij kenke nima moyolkokouaj, moneki tijchiuasej kampeka timoyoltlalisej ininuaya. Uan tlaj se akajya nima moyolkokoua, moneki kichiuas kampeka amo kiampa kiyolmatis. Nopa tlauel kipaleuis uan nojkia kinpaleuis sekinok.

8. ¿Tlake tlamantli kichijki Cristo itokilijkauaj ma moiljuikaj kej sekinok?

⁸ ¿Kenke Jesús kamanaltik tlen “konemej”? Pampa itokilijkauaj kitlatsintokijtoyaj: “¿Ajkeya itstos más ueyi kampa tlanauatis toTeko tlen itstok iluikak?” (Mat. 18:1). Ipan nopa tonali, miakej judíos tlauel kinekiyayaj ma kinixmatikaj uan kinekiyayaj tlauel tlapijpiasej. Se katli tlauel ixtlamati, kiijtok: “Maseualmej tlauel kinekiyayaj ma kintlepanitakaj, ma kinueyichiuakaj, tlauel ma kinixmatikaj uan ma kinuejkapantlalikaj”.

9. ¿Tlake monekiyaya kichiuasej Jesús itokilijkauaj?

⁹ Jesús kimatiyaya itokilijkauaj monekiyaya kichiuasej kampeka amo moiljuisej kej judíos. Yeka kiniljuik: “Aki tlen inmojuantij tlen kineki elis más ueyi, moneki mochiuas keja se tlen más telpokatl tlen nochi. Uan ajkeya kineki elis inmotlayakanka,  ma eli inmotekipanojka” (Luc. 22:26). Tlaj tijnekij tielisej kej “se tlen más telpokatl”, amo moneki timoiljuisej tojuantij tlauel topati (Filip. 2:3). Tlaj tijchiuaj kampeka timoiljuisej kej kinamiki, techpaleuis amo ma tikinyolkokokaj sekinok.

10. ¿Kenke moneki tijchiuasej tlen Pablo kiijtok?

¹⁰ Miakej toikniuaj uan tosiuaikniuaj uelij kichiuaj miak tlamantli tlen uelis tojuantij amo tiuelij. Yeka, tlauel techpaleuis tlaj tikitasej tlen kichiuaj. Ma tijchiuakaj tlen apóstol Pablo kiniljuik toikniuaj tlen Corinto: “¿Ajkeya inmechiljuik para achi más inkimatij keja sekinok? Nochi tlen inkimatij, toTeko inmechmakatok nopa tlalnamikilistli. Nochi tlen inkipiaj inkiselijtokej ipampa ya. Uajka, ¿para tlen inmoueyimatij keja inkipantijtoskiaj nopa tlalnamikilistli ika inmoseltitsitsij?” (1 Cor. 4:7). Yeka, amo ma tijkauakaj tlauel ma techuejkapantlalikaj uan amo ma timoiljuikaj san tojuantij tlauel topati. Tlaj se toikni kuali tlamachtia o se tosiuaikni kinmachtia miakej maseualmej, moneki kiitasej Jehová kinpaleuia uan yeka uelij kichiuaj nopa tekitl.

11. ¿Tlake tijyekouaj tlen kichijki se tlanauatijketl ika itlatekipanojka?

¹¹ Kema Jesús kiniljuik itokilijkauaj amo ma kinyolkokokaj sekinok, nojkia kinixtomilik ika se tlapoualistli. Ya kiniljuik tlen kichijki se tlanauatijketl ika se itlatekipanojka. Nopa tlanauatijketl amo kiinanki tlen kitlauikiliyaya itekipanojka maske tlauel miak eliyaya. Teipa, nopa tlatekipanojketl amo kinejki kitlapojpoljuis seyok maseuali katli amo miak kitlauikiliyaya. Yeka, nopa tlanauatijketl tlanauatik ma kitsakuakaj nopa tlakatl katli amo tetlapojpoljuik. ¿Tlake tijyekouaj? Jesús kiijtok: “Keja nopa kichiuas noTata tlen itstok nepa iluikak intla inmojuantij ika nochi inmoyolo axinkintlapojpoljuisej sejse inmoikni” (Mat. 18:21-35).

12. Tlaj amo titetlapojpoljuiaj, ¿kenijkatsa uelis tijchiuasej amo kuali ma kiyolmatikaj sekinok?

¹² Tlen kichijki nopa tlatekipanojketl amo san ya tlaijiyouik, nojkia kichijki sekinok ma tlaijiyouikaj. Ya kichiuilik tlen tlauel amo kuali pampa “kiuikak iuampo ipan tlatsaktli uan kitsajki hasta nochi kitlamitlaxtlauiskia”. Nojkia, kintlaijiyouiltik sekinok tlatekipanouanij katli kiitakej tlen kichijki. Jesús kiijtok: “Sekinok itlatekipanojkauaj nopa tlanauatijketl kiitakej [...] tlen kichiuilijtoya iuampo tlen pilkentsi kitlauikiliyaya. Uajka tlauel mokuesojkej”. Tojuantij nojkia uelis tikinyolkokosej sekinok ika tlen tijchiuaj. Tlaj se akajya techyolkokos uan amo tijnekisej tijtlapojpoljuisej, ¿tlake ueliskia panos? Uelis tijyolkokosej, tijnextisej amo tikikneliaj uan uelis amo tijnekisej tikitasej. Nojkia, uelis tijchiuasej sekinok toikniuaj amo kuali ma kiyolmatikaj kema kiitasej amo kuali timouikaj iuaya nopa toikni.

13. ¿Tlake tijyekouaj tlen kipanok se precursora?

¹³ Kema tikintlapojpoljuiaj toikniuaj kichiua kuali ma tijyolmatikaj uan inijuantij nojkia kuali kiyolmatij. Kiampa kipanok se tosiuaikni katli tijtokaxtisej Crystal. Ya kiilnamiki kenijkatsa se tosiuaikni tlauel kiyolkokouayaya. Ya kiijtoua: “Nochi tlen kiijtouayaya tlauel nechyolkokouayaya kej se cuchillo. Kema tiauiyayaj titlajtolmoyauaj, amo nijnekiyaya ma nechiljuikaj ma nia ipan carro kampa ya yauiyaya. Teipa pejki ayokmo niyolpaki kema nitlajtolmoyauayaya”. Maske Crystal moiljuiyaya kinamikiyaya kiampa kiyolmatis, kichijki kampeka amo moyolkokojtos uan amo moteijneltiitas. Ya amo moueyimatki uan kichijki tlen kiijtoua nopa tlamachtili  “Perdonemos de corazón”, tlen kiski ipan La Atalaya octubre 15, 1999. Yeka, kitlapojpoljuik toikni. Ya kiijtoua: “Nama nikita nochi tijchiuaj kampeka ayokmo tijchiuasej kej achtouia tijchiuayayaj uan Jehová nochipa techtlapojpoljuia ika nochi iyolo. Nama, tlauel kuali nijyolmati uan sampa niyolpaki”.

14. 1) Kej kiijtoua Mateo 18:21, 22, ¿tlake kipanoyaya Pedro uan tlake uelis tijyekosej tlen Jesús kiijtok? 2) ¿Tlake uelis techpaleuis tlaj kiampa techpanos?

¹⁴ Maske nochi moneki titetlapojpoljuisej, uelis kemantika tijmatij ouij tijchiuasej. Uelis apóstol Pedro kemantika nojkia kiampa kipanok (xijpoua Mateo 18:21, 22). ¿Tlake uelis techpaleuis? Se. Tlaj timoiljuisej kenijkatsa Jehová techtlapojpoljuijtok (Mat. 18:32, 33). Maske amo kinamiki kiampa kichiuas, ya techtlapojpoljuia ika nochi iyolo (Sal. 103:8-10). Uan “intla toTeko techiknelijtok keja nopa, uajka moneki ma timoiknelikaj”. Yeka, titetlapojpoljuisej eli se tlamantli tlen moneki tijchiuasej (1 Juan 4:11). Ome. Uelis timoiljuisej tlake pano kema ya titetlapojpoljuijtosej: tijpaleuiaj katli techyolkokok, ipan tlanechikoli titlapaleuiaj sansejko ma itstokaj, techpaleuia nojua kuali ma timouikaj iuaya Jehová uan kuali tijyolmatij (2 Cor. 2:7; Col. 3:14). Eyi. Moneki timomaijtosej ika Jehová, ya kineki ma tikintlapojpoljuikaj sekinok. Amo ma tijkauakaj Satanás ma kichiua ayokmo kuali ma timouikakaj ininuaya toikniuaj (Efes. 4:26, 27). Yeka, ma tijkauakaj Jehová ma techpaleui, kiampa amo tijchiuasej tlen Satanás kineki.

15. Kej kiijtoua Colosenses 3:13, ¿tlake uelis tijchiuasej tlaj se toikni techyolkokoua?

¹⁵ Tlaj se toikni kichiua se tlamantli tlen tlauel techyolkokoua, moneki tijchiuasej kampeka nojua kuali timouikasej iuaya. Ma timomaijtokaj ika Jehová  uan ma tikiljuikaj tlen tijyolmatij. Ma tikilnamikikaj Jehová kiita nopa kuajkuali tlamantli tlen toikni kinextia uan tlauel kipatiita. Yeka, ma tikiljuikaj ma kiteochiua katli techyolkokok uan ma techpaleui tikitasej kej ya kiita (Luc. 6:28). Tlaj amo ueli tikilkauaj tlen kichijki, ma tikitakaj kenijkatsa tikamanaltisej iuaya. Nochipa ma timoiljuikaj ya amo kinejki techyolkokos (Mat. 5:23, 24; 1 Cor. 13:7). Kema tikamanaltisej iuaya, ma tikiljuikaj tojuantij timokuapolojkej. Uan, ¿tlake tijchiuasej tlaj amo kinekis kisenkauas nopa kuesoli? Biblia kiijtoua: “Uajka xijpiakaj inmoyolo ika tlen inmechchiuiliaj”. Yeka, amo ma tikijtokaj ayokmo tleno uelis tijchiuasej (xijpoua Colosenses 3:13). Uan amo ma tijkualankaitakaj pampa nopa kichiuas ayokmo kuali ma timouikakaj iuaya Jehová. Amo ma tijkauakaj yon se tlamantli ma kichiua ayokmo kuali titlatekipanosej. Tlaj kiampa tijchiuaj, tijnextisej san Jehová tlauel tikikneliaj (Sal. 119:165).

16. ¿Tlake moneki tijchiuasej sejse tlen tojuantij?

¹⁶ ¡Tlauel tiyolpakij pampa sansejko tijtekipanouaj Jehová uan Jesús techyakana! (Juan 10:16). Nopa amochtli Organizados para hacer la voluntad de Jehová ipan iamayo 165, kiijtoua: “Nochi moneki tijchiuasej kampeka kuali timouikasej ininuaya toikniuaj”. Uan nojkia kiijtoua: “Nochipa kuali timouikasej ininuaya toikniuaj tlaj tikinitaj kej Jehová kinita”. Ya techita kej “konemej” uan tlauel techpatiita. Yeka, nojkia kiampa moneki tikinitasej toikniuaj. Ya kiita uan tlauel kipatiita kema tijchiuaj kampeka tikiniknelisej uan tikinmokuitlauisej (Mat. 10:42).

17. ¿Tlake timosentlalijtokej tijchiuasej?

¹⁷ Tlauel tikinikneliaj nochi toikniuaj. Yeka, tijchiuaj kampeka “axtijchiuasej tlen kimajkauas o kiyoltilanas ma tlajtlakolchiua seyok toikni” (Rom. 14:13). Nochipa ma tikilnamikikaj tojuantij amo tiuelij tijchiuaj miak tlamantli uan ma tikintlapojpoljuikaj ika nochi toyolo. Amo ma tijkauakaj sekinok ma kichiuakaj ayokmo kuali ma titlatekipanokaj. Biblia techiljuia “ma tijchiuakaj senkistok nochi tlen moneki para tiitstosej ika yejyektsi ika sekinok” (Rom. 14:19).