1. ¿Kenke kemantika se keskij toikniuaj kiyolmatij itstokej ininselti?

UELIS kemantika nochi tijyolmajtokej tiitstokej toselti. Maske sekij nima kuali kiyolmatij, sekij uejkaua kiampa kiyolmatij. Se keskij maske itstokej ininuaya miakej, kiyolmatij itstokej ininselti. Sekij amo nima momatij kema asij ipan se yankuik tlanechikoli. Sekinok momajtoyaj nochipa itstosej ininuaya ininchampoyouaj uan yeka kema yauij sejkanok, kimatij itstokej ininselti. Nojkia, sekinok mijki se katli tlauel kiikneliyayaj uan tlauel kitemouaj, yeka nojkia kiyolmatij itstokej ininselti. Uan sekinok toikniuaj katli namanok moatsonpoliuiltijkej kiampa kiyolmatij pampa ininchampoyouaj uan ininuampoyouaj kualanij pampa kitekipanouaj Jehová.

2. ¿Tlake tijnankilisej ipan ni tlamachtili?

² Jehová kuali techixmati uan kikuamachilia tlen techpano. Ya kimati kema tijyolmatij tiitstokej toselti uan kineki techpaleuis. Ipan ni tlamachtili tijnankilisej ni tlajtlanili: ¿Kenijkatsa techpaleuia Jehová kema tijyolmatij tiitstokej toselti? ¿Tlake uelis tijchiuasej tlaj kiampa tijyolmatij? ¿Kenijkatsa uelis tikinpaleuisej toikniuaj katli nojkia kiampa kiyolmatij?

3. ¿Kenijkatsa Jehová kinextik kitekipachouayaya tlen kipanoyaya Elías?

³ Jehová kitekipachoua tlen kinpano itekipanojkauaj uan kineki kuali ma tiitstokaj. Ya itstok tonechka uan kimati kema timokuesouaj (Sal. 145:18, 19). Ma tikitakaj kenijkatsa kipaleuik Elías. Ipan nopa tonali, israeleuanij tlauel ouij  kej itstoyaj pampa ininkualankaitakauaj kintlatsakuiltiyayaj, uan yeka Elías kinekiyayaj kimiktisej (1 Rey. 19:1, 2). Ya tlauel motekipachojtoya pampa moiljuiyaya san ya kitekipanouayaya Jehová kej tlajtolpanextijketl (1 Rey. 19:10). Yeka, Jehová kichijki se tlamantli tlen ika kipaleuik: kititlanki se iluikaejketl uan kiampa kiiljuik amo itstoya iselti pampa nojua itstoyaj sekinok israeleuanij katli amo kitlauelkajtoyaj (1 Rey. 19:5, 18).

4. ¿Kenijkatsa kinextia Marcos 10:29, 30, Jehová motekipachoua ika toikniuaj katli kintlauelkajtokej?

⁴ Jehová kimati tijchijtokej miak tlamantli uan kiampa tijtekipanojtokej. Uelis tochampoyouaj uan touampoyouaj ayokmo techpaleuiaj pampa tijtekipanouaj Jehová. Se tonali kema Pedro motekipachojtoya kiiljuik Jesús: “Xikita, tojuantij tijkajtejtokej nochi tlen tijpixtoyaj para timitstokilisej. Uajka, ¿tlachke tijpiasej?” (Mat. 19:27). Ika tlaiknelili Jesús kiniljuik itokilijkauaj itstoskiaj sekinok toikniuaj katli eliskiaj kej ininchampoyouaj (xijpoua Marcos 10:29, 30). Uan toTata Jehová amo kema kintlauelkauas katli kitekipanouaj (Sal. 9:10). Ma tikitakaj kenijkatsa techpaleuis kema tijmatisej tiitstokej toselti.

5. ¿Kenke tlauel techpaleuia kema timoiljuiaj kenijkatsa Jehová techpaleuia?

⁵ Ma timoiljuikaj kenijkatsa Jehová techpaleuia (Sal. 55:22). Tlaj kiampa tijchiuaj, uelis tikitasej se keski tlamantli kej kinamiki. Carol, * se tosiuaikni katli amo monamiktijtok uan ichampoyouaj amo kitekipanouaj Jehová, kiijtoua: “Kema nijyolmati niitstok noselti, tlauel nechpaleuia kema nimoyoliljuia kenijkatsa Jehová nechpaleuijtok nikixnamikis tlaouijkayotl. Kema kiampa nijchiua, nikita ya amo kema nechtlauelkauas”.

6. ¿Kenijkatsa tlen kiijtoua 1 Pedro 5:9, 10, uelis kinpaleuis katli kiyolmatij itstokej ininselti?

⁶ Kema timoiljuiaj kenijkatsa Jehová kinpaleuia sekinok toikniuaj katli kiyolmatij itstokej ininselti (xijpoua 1 Pedro 5:9, 10).  Hiroshi, se toikni katli ya uejkaj san ya kitekipanoua Jehová, kiijtoua: “Ipan tlanechikoli nima tikitas nochi kiixnamikij tlaouijkayotl. Tlauel nechyolchikaua kema nikita nochi kichiuaj kampeka kitekipanosej Jehová maske sekij ininchampoyouaj amo tlaneltokaj”.

7. ¿Kenijkatsa mitspaleuia tlamaijtoli?

⁷ Ma tijchiuakaj kampeka nochipa timomaijtosej, tijpouasej Biblia uan tiasej tlanechikoli. Tlauel ipati kejuak tijtlaposej toyolo uan tikiljuisej Jehová nochi tlen tijyolmatij (1 Ped. 5:7). Ma tikitakaj tlen kiijtoua tosiuaikni Massiel, katli ichampoyouaj kitlauelkajkej pampa pejki kitekipanoua Jehová, ya kiijtoua: “Kema nijyolmatiyaya niitstoya noselti, tlauel nechpaleuik kema nikiljuiyaya Jehová nochi tlen nijyolmatiyaya. Nikitak Jehová nelnelia eli kej noTata. Yeka, mojmostla uan nochipa nimomaijtouayaya uan nikiljuiyaya nochi tlen nijyolmatiyaya”.

8. ¿Kenijkatsa mitspaleuia tijpouas uan timoyoliljuis tlen Biblia kiijtoua?

⁸ Tlauel ipati nochipa tijpouasej Biblia uan timoyoliljuisej kampa kiijtoua Jehová techiknelia. Bianca, se tosiuaikni katli nochipa kichiua kampeka amo kintlakakilis ichampoyouaj pampa kiijtouaj tlen amo kinamiki, kiijtoua: “Tlauel nechpaleuia kema nijpoua uan nimoyoliljuia ipan tlapoualistli tlen uala ipan Biblia uan ipan amatlajkuiloli kampa kiijtoua kenijkatsa toikniuaj nojkia kiixnamiktokej kuesoli kej na”. Se keskij toikniuaj kitsontekontlaliaj se keski textos tlen kinyolchikaua, kej Salmo 27:10 o Isaías 41:10. Nojkia, sekinok kitekiuiaj grabaciones kema momachtiaj tlen moixtomas ipan tlanechikoli o kema kipouaj Biblia. Kiitstokej kema kiampa kichiuaj, kinpaleuia amo kiyolmatisej itstokej ininselti.

9. ¿Kenijkatsa mitspaleuia kema tia tlanechikoli?

⁹ Moneki tijchiuasej kampeka nochipa tiasej tlanechikoli pampa nopaya techyolchikauaj toikniuaj uan techpaleuia nojua ma tikinixmatikaj (Heb. 10:24, 25). Tosiuaikni Massiel, katli tikijtojkej ipan párrafo 7, kiijtoua: “Maske tlauel nipinauayaya, nimosentlalik nochipa nias tlanechikoli uan nitlanankilis, nopa nechpaleuik kuali ma nijyolmati nopaya niitstos”.

10. ¿Kenke tlauel ipati timouampojchiuasej ininuaya toikniuaj katli kuali tlatekipanouaj?

¹⁰ Ma timouampojchiuakaj ininuaya toikniuaj katli kuali tlatekipanouaj. Ma timouampojchiuakaj ininuaya toikniuaj maske amo kipiaj sanse toxiui o sejkanok euaj. Biblia kiijtoua “ueuentsitsij kipiaj tlalnamikistli uan kimachiliaj miak tlamantli” (Job 12:12). Katli uejueyi nojkia uelis kinpaleuis  tlen kichiuaj telpokamej katli kuali tlatekipanoua. Maske David uan Jonatán amo kipixtoyaj sanse ininxiui, kuali mouampojchijkej (1 Sam. 18:1). Inijuantij nochipa mopaleuiyayaj kitekipanosej Jehová maske kiixnamikiyayaj tlaouijkayotl (1 Sam. 23:16-18). Irina, se tosiuaikni katli ipan ni tonali san ya tlatekipanoua, kiijtoua: “Toikniuaj uelis elisej kej totatauaj o kej toikniuaj. Jehová uelis kintekiuis uan kiampa techpaleuisej”.

11. ¿Tlake moneki tijchiuasej tlaj tijnekij tikinpiasej touampoyouaj?

¹¹ Sekij uelis amo nima mouampojchiuaj ininuaya sekinok pampa tlauel pinauaj. Ma tikitakaj tlen kiijtok tosiuaikni Ratna, katli tlauel pinauayaya uan ichampoyouaj tlauel kitlaijiyouiltijkej pampa pejki momachtia Biblia. Ya kiijtoua: “Maske tlauel nipinauayaya, nikinkajki toikniuaj ma nechpaleuikaj”. Maske uelis ouij tijmatij tikiljuisej se akajya nochi tlen tijyolmatij, nopa techpaleuis kuali ma timouampojchiuakaj iuaya. Touampoyouaj kinekij techpaleuisej uan techyolchikauasej, yeka ma tikiniljuikaj kenijkatsa uelis techpaleuisej.

12. ¿Kenijkatsa kema titlajtolmoyauaj techpaleuia tikinpiasej kuali touampoyouaj?

¹² Kema titlajtolmoyauaj ininuaya toikniuaj, techpaleuia timouampojchiuasej ininuaya. Tosiuaikni Carol, katli tikijtojkej ipan párrafo 5, kiijtoua: “Tlauel nechpaleuijtok nimouampojchiuas ininuaya toikniuaj kema sansejko titlajtolmoyauaj uan kema tijchiuaj sekinok tlamantli ipan tlanechikoli. Ipan miak xiuitl tlen panotok, Jehová nechpaleuijtok ika nouampoyouaj”. Yeka, tlauel techpaleuis tlaj tijchiuasej kampeka timouampojchiuasej ininuaya toikniuaj katli kuali tlatekipanouaj. Jehová kintekiuia ni toikniuaj kema tijyolmatij toselti tiitstokej (Prov. 17:17).

13. ¿Tlake uelis tijchiuasej sejse tlen tojuantij ipan tlanechikoli?

¹³ Nochi moneki tijchiuasej kampeka ma onka tlaseuilistli uan tlaiknelili ipan tlanechikoli. Tlaj kiampa tijchiuaj, amo aka kiyolmatis itstok iselti (Juan 13:35). Tlen tikijtosej uan tlen tijchiuasej uelis kinpaleuis toikniuaj. Se tosiuaikni kiijtoua: “Kema pejki nimomachtia Biblia, toikniuaj elkej kej nochampoyouaj. Tlaj amo nechpaleuijtoskiaj, uelis nama amo nijtekipanoskia Jehová”. ¿Tlake uelis tijchiuasej uan kiampa katli ininselti tlatekipanouaj kuali kiyolmatisej ipan tlanechikoli?

14. ¿Tlake techpaleuis kuali timouampojchiuasej ininuaya katli namanok yauij tlanechikoli?

¹⁴ Ma tijchiuakaj kampeka achtoui tojuantij timouampojchiuasej ininuaya sekinok. Achtoui kuali ma tikinselikaj katli namanok yauij tlanechikoli (Rom. 15:7). Amo san ma tikintlajpalokaj, moneki tijchiuasej kampeka kuali timouampojchiuasej ininuaya. Yeka, kuali ma tikinselikaj uan ma tijnextikaj techtekipachoua tlen kinpano. Nojkia, ma tijchiuakaj kampeka tijkuamachilisej tlen kiixnamikij. Maske kiampa tijchiuasej, amo kinamiki tikintlatsintokisej tlen amo kinekij kiijtosej. Sekij ouij kimatij kiijtosej nochi tlen kiyolmatij, yeka amo kinamiki tikinchiualtisej ma kamanaltikaj. Uan kema tikintlatsintokisej ma tijchiuakaj ika miak tlatlepanitakayotl uan kuali ma tikintlakakilikaj. Uelis tikintlatsintokisej kenijkatsa pejkej momachtiaj Biblia.

15. ¿Kenijkatsa toikniuaj katli kuali tlaneltokaj uelis kinpaleuisej sekinok ipan tlanechikoli?

 ¹⁵ Kema toikniuaj katli kuali tlatekipanouaj, kej ueuejtlakamej, kintekipachoua tlen kinpano toikniuaj, kinpaleuia nojua kuali ma tlaneltokakaj. Melissa, katli san inana momachtia Biblia, kiijtoua: “Tlauel nikintlaskamatilia toikniuaj pampa elij kej notatauaj. Nochipa kema nijneki nikamanaltis iuaya se akajya, inijuantij nechtlakakiliaj”. Nama, ma tikitakaj tlen kiijtoua Mauricio. Ya kiijtoua: “Kema nieliyaya nitelpokatl, katli nechmachtiyaya mouejkatlalik tlen Jehová. Tlauel nechpaleuik pampa nikitak ueuejtlakamej kintekipachouayaya tlen nechpanoyaya. Nochipa kichiuayayaj kampeka kamanaltisej nouaya, sansejko titlajtolmoyauasej, nechiljuisej se tlamachtili tlen kipantijkej kema momachtijkej uan nojkia mauiltiyayaj nouaya”. Ipan ni tonali, Melissa uan Mauricio senkistok kitekipanouaj Jehová.

16, 17. ¿Kenijkatsa uelis tikinpaleuisej se keskij toikniuaj?

¹⁶ Ma tikinpaleuikaj sekinok (Gál. 6:10). Leo, se misionero katli uejka tlatekipanoua, kiijtoua: “Kemantika ika tlen kichiuaj sekinok, tlauel mitspaleuis. Nikilnamiki se tonali kema niauiyaya ipan nocarro nechpanok tlen amo kuali. Kema niasito nochaj tlauel nimomajmatijtoya. Teipa, se toikni iuaya isiua nechtlanejkej ma nitlakuati ininchaj. Maske amo nikilnamiki tlake nijkuajki, nochipa nikilnamiki kenijkatsa tlauel kuali nechtlakakilijkej. Nopa kichijki tlauel kuali ma nijyolmati”.

¹⁷ Tlauel tiyolpakij kema tiauij ipan uejueyi tlanechikolistli pampa nopaya tiitstokej ininuaya toikniuaj uan tikamanaltij tlen nopa tlamachtili. Ma tikitakaj tlake kiijtoua Carol, katli tikijtojkej ipan párrafo 5, ya kiijtoua: “Tlauel ouij nijmati nias ipan uejueyi tlanechikolistli pampa maske itstokej tlauel miakej toikniuaj, miakej itstokej ininuaya ininchampoyouaj. Yeka, nijyolmati kejuak noselti niitstok”. Sekij toikniuaj tlauel ouij kimatij yasej ipan uejueyi tlanechikolistli kema namanok mijki ininnamik. ¿Tikixmatij se akajya katli kipanotok ni tlamantli? Tlaj kena, ma tijtlaneuikaj itstos touaya ipan ueyi tlanechikolistli.

18. Kej kiijtoua 2 Corintios 6:11-13, ¿kenijkatsa uelis tijpaleuisej se akajya?

 ¹⁸ Ma tiitstokaj sansejko. Kema timoyolpakiltiaj, ma tijchiuakaj kampeka tikintlaneuisej toikniuaj uan tosiuaikniuaj katli kiyolmatij itstokej ininselti. Ma tijnextikaj nelia tikinikneliaj ika nochi toyolo (xijpoua 2 Corintios 6:11-13). Melissa, katli tikijtojkej ipan párrafo 15, kiijtoua: “Tlauel techpaktiyaya kema toikniuaj techtlaneuiyayaj ininchaj uan kema sansejko tiauiyayaj tipaxalouaj”. ¿Itstok se akajya ipan totlanechikol katli ueliskia tijpaleuisej?

19. ¿Kema monekis tiitstosej ininuaya se keskij toikniuaj?

¹⁹ Toikniuaj tlauel kitlaskamatisej tlaj tiitstosej ininuaya kema iljuichiuaj ininchampoyouaj katli amo kitekipanouaj Jehová. Nojkia, uelis tiitstosej ininuaya toikniuaj kema ipa nopa tonali kiaxitia se keski xiuitl kema mijki se tlen katli tlauel kiikneliaj. Kema tijkixtiaj tonali uan tiitstokej ininuaya, tijnextiaj techtekipachoua tlen kiyolmatij (Filip. 2:20).

20. ¿Kenijkatsa Mateo 12:48-50, uelis techpaleuis kema tijyolmatij tiitstokej toselti?

²⁰ Maske onka miak tlamantli tlen uelis kichiuas ma tijyolmatikaj tiitstokej toselti, nochipa ma tikilnamikikaj Jehová kuali kimati kenijkatsa timomachiliaj. Ya nochipa kintekiuia toikniuaj uan kiampa techpaleuia (xijpoua Mateo 12:48-50). Yeka ma tikinpaleuikaj toikniuaj, kiampa tijnextisej tijtlaskamatij tlen Jehová kichiua. Tlaj kemantika amo kuali tijyolmatij, ma tikilnamikikaj amo kema tiitstokej toselti pampa Jehová nochipa itstok touaya.