1. ¿Kenijkatsa Satanás eli kej se tlapejketl?

KATLI tlapeua nochipa kineki kimasiltis o kimiktis se tlapiali uan kitekiuia miak tlamantli, kej kiijtok se katli amo eliyaya iuampo Job (Job 18:8-10). ¿Tlake kichiua se tlapejketl kema kineki kimasiltis se tlapiali? Achtoui kuali kiita tlake kichiua, kenijkatsa mojmolinia, tlake kipaktia uan tlake ueliskia kimajmatis. Satanás nojkia kiampa kichiua. Achtoui kuali kiita tlake tijchiuaj uan tlake techpaktia. Teipa, kitlalia se tlamantli tlen ika techmasiltis, tlen tojuantij amo timoiljuijtoyaj. Yeka, Biblia kiijtoua tlake uelis tijchiuasej uan kiampa amo techmasiltis. Uan tlaj techmasiltis, ¿tlake uelis tijchiuasej?

2. ¿Tlake ome tlamantli kitekiuia Satanás tlen ika kineki techmasiltis?

² Satanás kitekiuia ome tlamantli tlen ika temasiltia: kema se akajya moueyimati uan kema se akajya kineki tlauel tlapijpias. * Uan kiampa kichijtok tlauel miak xiuitl. Satanás eli kej se katli kinmasiltia totomej, kinyoltilana uan teipa kinitskia (Sal. 91:3). Jehová techpaleuijtok tijmatisej tlake kitekiuia Satanás tlen ika temasiltia, yeka amo ma tijkauakaj ma techkajkayaua (2 Cor. 2:11).

3. ¿Kenke Jehová kikajki ma elto ipan Biblia tlen kinpanok katli moueyimatkej uan kinejkej tlapijpiasej?

³ ¿Kenijkatsa Jehová techpaleuia amo timoueyimatisej yon titlapijpiasej? Ya techiljuia tlen kinpanotok sekinok uan  kiampa amo tijchiuasej kej inijuantij. Ipan ni tlamachtili tikitasej kenijkatsa Satanás kinmasiltik toTeotsij itekipanojkauaj, maske miak xiuitl tlatekipanojtoyaj. ¿Kiijtosneki tojuantij nojkia techmasiltis? Amo, pampa Jehová kikajki ma elto ipan Biblia tlen kinpanok sekinok, uan kiampa “techmachtis tlen tiitstokej nama ipan ni tlamia tonali” (1 Cor. 10:11). Ya kimati tlen eltok ipan Biblia uelis techmachtis se keski tlamantli, uan kiampa Satanás amo techmasiltis uan tijmatisej tlake tijchiuasej.

4. ¿Tlake tlamantli ueliskia kichiuas ma timoueyimatikaj?

⁴ Satanás kineki ma timoueyimatikaj. Ya kimati tlaj kiampa tijchiuasej tielisej kej ya uan amo tijpiasej nemilistli tlen axkema tlamis (Prov. 16:18). Yeka, apóstol Pablo kiijtok tlaj se akajya moueyimati, “kiselis se tlatsakuiltili keja yajaya kiselik” (1 Tim. 3:6, 7). Ni tlamantli uelis techpanos maske tijpiaj miak xiuitl tijtekipanojtokej Jehová o amo.

5. Kej kiijtoua Eclesiastés 7:16, 20, ¿tlake kichiua se akajya kema moueyimati?

⁵ Kema se akajya moueyimati amo kitekipachoua tlen sekinok kiyolmatij. Satanás amo kineki ma timotemachikaj ipan Jehová kema tijpiaj kuesoli, ya kineki san ma timosentlalikaj ipan tlen tojuantij timoiljuiaj. Ma timotlatsintokikaj: ¿Techistlakauijtokej ika se tlamantli tlen amo tijchijtokej? ¿Techchiuilijtokej tlen amo xitlauak? Satanás kineki ma tikintlajtlakoltikaj Jehová o toikniuaj ika tlen techpano. Nojkia, kineki ma timoiljuikaj uelis tijsenkauasej se kuesoli toselti uan amo tijchiuasej tlen Jehová techiljuia ipan Biblia (xijpoua Eclesiastés 7:16, 20).

6. ¿Tlake techmachtia tlen kipanok tosiuaikni katli eua ipan Países Bajos?

⁶ Ma tikitakaj tlen kipanok se tosiuaikni katli eua ipan Países Bajos. Ya kiijtoua tlauel kikualankamakayaya kema toikniuaj mokuapolouayayaj, yeka ayokmo kinekiyaya itstos ininuaya. Ya kiijtoua: “Pejki nijyolmati niitstok noselti uan ayokmo nikinitak toikniuaj kej kinamiki. Yeka, nikiljuik  noueue ma tiakaj ipan seyok tlanechikoli”. Tosiuaikni kiitaj JW Broadcasting^® tlen marzo, 2016. Nopaya kiijtojkej se keski tlamantli tlen techpaleuia kuali tikinitasej kema sekinok mokuapolouaj. Tosiuaikni nojkia kiijtoua: “Nikitak amo kinamikiyaya nimoueyimatis uan nikilnamikis na nojkia nimokuapoloua. Nojkia, amo kinamikiyaya nimoiljuis toikniuaj monekiyaya kipatlasej se keski tlamantli. Nopa tlamachtili nechpaleuik ma nimosentlali ipan Jehová uan nikilnamikis san ya kinamiki tlanauatis”. Kema tijpiaj se kuesoli, ma tikiljuikaj Jehová ika nochi toyolo ma techpaleui tikinitasej toikniuaj kej ya kinita. Maske Jehová kiita kema mokuapolouaj, ya nochipa kintlapojpoljuia, yeka kineki nojkia kiampa ma tijchiuakaj (1 Juan 4:20).

7. ¿Tlake kipanok Uzías?

⁷ Uzías katli tlanauatiyaya ipan Judá, tlauel moueyimatiyaya. Yeka amo kinejki kichiuas tlen sekinok kitlajtolmakakej, uan kichijki se tlamantli tlen amo kinamikiyaya kichiuas. Uzías ueliyaya kichiua miak tlamantli, yeka uelki kinsentilik tlateuianij, kichijchijki miak kali uan nojkia tlatojtojki. Jehová “nelia kiteochiuayaya uan kipaleuik para ma kisa kuali ipan nochi tlamantli tlen kichijki” (2 Crón. 26:3-7, 10). Teipa, Biblia kiijtoua kema kipixki “miak chikaualistli, pejki tlauel moueyimati uan yeka uetski”. Jehová kiijtojtoya san ueliskiaj temakasej tlakajkaualistli katli eliyayaj sacerdotes. Maske Uzías kimatiyaya nopa, ya tlauel moueyimatki, yeka kichijki tlen amo kinamikiyaya kichiuas. Jehová kichijki ma kipia lepra, uan mijki ika nopa kokolistli (2 Crón. 26:16-21).

8. ¿Kenijkatsa techpaleuia 1 Corintios 4:6, 7, amo timoueyimatisej?

⁸ Tlaj tlauel timoueyimatij uelis titlajtlakolchiuasej kej kipanok Uzías. Ma tikitakaj tlen kipanok toikni José. Ya tlauel kuali tlanamakayaya uan eliyaya se ueuejtlakatl katli nochi kitlepanitayayaj. Tlamachtiyaya ipan uejueyi tlanechikolistli uan toikniuaj katli tepaxalouaj chijchikuasej metstli kiiljuiyayaj ma kinpaleui. José kiijtoua: “Ayokmo nimotemachik ipan Jehová, san nimotemachik ipan tlen ueliyaya nijchiua pampa miak xiuitl nitlatekipanojtoya. Nimoiljuik kuali nitlaneltokayaya, yeka amo nijchijki tlen Jehová nechtlajtolmakayaya”. Teipa, José tlajtlakolchijki uan kikixtijkej tlen tlanechikoli. Kema panok se keski xiuitl, sampa elki se Jehová itlajtoltemajka. Nama  kiijtoua: “Jehová nechpaleuik ma nikita moneki nochipa tijchiuasej tlen ya techiljuia, uan amo san pampa tijpiaj se tekitl ipan tlanechikoli”. Nochipa ma tikilnamiktokaj nopa tekitl tlen tijpiaj ipan tlanechikoli uan tlen tiuelij tijchiuaj, Jehová techmakatok uan san ya techpaleuia (xijpoua 1 Corintios 4:6, 7). Ma tikilnamikikaj, tlaj timoueyimatij Jehová amo techtekiuis ipan itlanechikol.

9. ¿Tlake kichijkej Satanás uan Eva pampa kinekiyayaj kipiasej miak tlamantli?

⁹ Kema tikijtouaj se akajya kineki tlapijpias, uelis nima kichiua ma timoiljuikaj ipan Satanás. Kema eliyaya se iluikaejketl Jehová kimakak se keski tekitl. Maske ya kipixtoya, nojua kinekiyaya kipias sekinok tlamantli. Yeka, nojkia kinejki ma kiueyichiuakaj kej Jehová. Satanás kineki ma tijchiuakaj kej ya, yeka amo kineki ma tiyolpakikaj san ika tlen tijpiaj. Kiampa kichijki ika Eva. Jehová kinkajki ya uan Adán ma kikuakaj nochi kuatlajkayotl tlen eltoya ipan Xochimili, san amo monekiyaya kikuasej se tlen nopa kuatlajkayotl (Gén. 2:16). Satanás kikajkayajki Eva uan kichijki ma moiljui monekiyaya kikuas nopa kuatlajkayotl tlen kiniljuijtoyaj amo ma kikuakaj. Ya amo kitlaskamatki tlen Jehová kinmakatoya, yeka nojua kinekiyaya sekinok tlamantli. Teipa, tlajtlakolchijki uan mijki (Gén. 3:6, 19).

10. ¿Kenijkatsa David tlajtlakolchijki pampa kinejki kipias tlen amo kinamiki?

¹⁰ Ma tikitakaj tlen kipanok tlanauatijketl David. Jehová kimakak miak tlamantli: kichijki ma kipia miak tomij, ma eli se tlanauatijketl uan ma kintlani ikualankaitakauaj. David tlauel kitlaskamatki tlen Jehová kimakatoya uan kiijtok tlauel miak tlen kiselijtoya (Sal. 40:5). Teipa, David pejki tlapijpia uan kiilkajki nochi tlen Jehová kichijtoya uan nojua kinekiyaya kipias miak tlamantli. Maske kinpixtoya miakej isiuajuaj, pejki kiixtoka seyok siuatl katli kipixtoya iueue, uan ni tlamantli Jehová amo kuali kiitayaya. Nopa siuatl itoka eliyaya Betsabé uan iueue Urías. David motejki iuaya Betsabé uan kipixkej se ininkone. Uan nojkia kichijki ma kimiktikaj Urías (2 Sam. 11:2-15). David moiljuiyaya Jehová amo kiitayaya tlen kichiuayaya. Maske miak xiuitl kitekipanok Jehová, kipanok tlen tlauel amo kuali pampa kinejki kipias tlen amo kinamiki. Teipa kiijtok tlen kichijtoya uan  moyolkuepki. ¡Tlauel kitlaskamatki pampa Jehová kitlapojpoljuik! (2 Sam. 12:7-13).

11. Kej kiijtoua Efesios 5:3, 4, ¿tlake techpaleuis amo tijnekisej tlauel titlapijpiasej?

¹¹ ¿Tlake tijyekouaj tlen kipanok David? Tlauel techpaleuis tlaj amo tijnekisej tlauel titlapijpiasej, kiampa nochipa tijtlaskamatisej tlen Jehová techmakatok (xijpoua Efesios 5:3, 4). Moneki tiyolpakisej san ika tlen tijpiaj. Nojkia, ma tikinpaleuikaj katli tikinmachtiaj ma moiljuikaj ipan se kuali tlamantli tlen Jehová kinmakatok uan ma kitlaskamatikaj. Tlaj mojmostla kichiuaj, uajka ipan se semana kiiljuisej Jehová miak tlamantli (1 Tes. 5:18). ¿Nojkia kiampa tijchiuaj? Tlaj timoyoliljuiaj ipan nochi tlamantli tlen Jehová techmakatok, techpaleuis nochipa ma tijtlaskamatikaj uan tiyolpaktosej ika tlen tijpiaj. Nojkia, tlaj amo tijnekisej titlapijpiasej techpaleuis amo timasisej ipan nopa tlaketstli tlen Satanás kitekiuia.

12. ¿Tlake kichijki Judas Iscariote pampa kinejki tlauel tlapijpias?

¹² Nama ma tikitakaj tlen kichijki Judas Iscariote. Maske achtouia kipiayaya kuali iyolo, ya kitemaktilik Jesús (Luc. 6:13, 16). Jesús kitlapejpenik Judas ma eli se itokilijka uan motemachiyaya ipan ya, yeka kikajki ma kiajokui tomij tlen kitekiuiyayaj kema tlajtolmoyauayayaj. Uelis tikijtosej nopa tomij eliyaya kej tlen titemakaj tlen motekiuia ipan tlajtolmoyaualistli. Jesús nochipa kiniljuik itokilijkauaj amo ma kinekikaj tlauel tlapijpiasej (Mar. 7:22, 23; Luc. 11:39; 12:15). Maske Jesús kiampa kiniljuijtoya, Judas amo kitlakakilik uan yeka pejki tlachteki.

13. ¿Kema kinextik Judas kinekiyaya tlauel tlapijpias?

¹³ Kema Jesús nechka kimiktiskiaj, Judas kinextik tlauel kinekiyaya tlapijpias. Se tonali, Simón katli kipiayaya lepra kintlanejki Jesús, itokilijkauaj, María uan Marta ma tlakuatij ichaj. Kema tlakuayayaj, María moketski uan pejki kitlalilia Jesús se tlaajuiyajkayotl tlen tlauel patiyo. Judas uan nopa sekinok apóstoles tlauel kualankej pampa moiljuiyayaj nopa tomij ueltoskia kitekiuisej kema tlajtolmoyauaskiaj. Judas kualanki pampa kinekiyaya kiichtekis nopa tomij. Teipa kinejki tlauel tlapijpias, yeka kinamakak Jesús kej se tlatekipanojketl (Juan 12:2-6; Mat. 26:6-16; Luc. 22:3-6).

14. ¿Kenijkatsa se toikni iuaya isiua kichijkej tlen kiijtoua Lucas 16:13?

¹⁴ Jesús kinilnamikilik itokilijkauaj ni tlamantli: “Axuelis inkitekipanosej toTeko Dios uan tomij” (xijpoua Lucas 16:13). Uan ipan ni tonali nojua tlauel techpaleuia. Ma tikitakaj tlen kinpanok se toikni iuaya isiua katli euaj Rumania. Kintenkauilijkej se tekitl kampa tekitiskiaj san se keski metstli ipan se altepetl kampa tlauel tlatominpiaj. Inijuantij kiijtouaj: “Monekiyaya titlaxtlauasej miak tomij ipan banco. Yeka tikitakej nopa tekitl kej se tlateochiualistli tlen Jehová techmakayaya”. Maske kiampa kiitayayaj, nopa tekitl kichiuaskia ayokmo kuali ma kitekipanokaj Jehová. Kema kipojkej nopa tlamachtili “Mantengámonos leales con un corazón unificado” tlen kiski ipan La Atalaya, agosto 15, 2008, kinpaleuik kuali ma kitlapejpenikaj tlen kichiuaskiaj. Inijuantij kiijtouaj: “Tlaj tijseliskiaj nopa tekitl ipan seyok altepetl san pampa tijnekiskiaj tijpiasej miak tomij, tijnextiskiaj amo tikachtouitlaliaj tijtekipanosej Jehová. Nopa kichiuaskia ayokmo kuali ma titlaneltokakaj”. Yeka amo kiselijkej nopa tekitl. Teipa toikni kipantik seyok tekitl ipan nopa altepetl kampa itstoyaj uan ika nopa mopanoltiyayaj. Tosiuaikni kiijtoua: “Jehová nochipa techmaka tlen moneki”. Toikniuaj tlauel yolpakij pampa kitekipanouaj Jehová uan amo kiachtouitlaliaj tlapijpiasej.

15. ¿Kenke timotemachiaj Satanás amo uelis techmasiltis?

¹⁵ Tlaj tikitaj timoueyimatij uan tijnekij titlapijpiasej, ¿tlake uelis tijchiuasej? Pablo kiijtok tlaj Satanás techmasiltijtok, nojua uelis tijchiuasej se tlamantli uan kiampa techmajkaualtis (2 Tim. 2:26). Ya nopa kichijki David: kitlakakilik tlen Natán kiiljuik, moyolkuepki uan sampa pejki mouampojchiua iuaya Jehová. Ma tikilnamikikaj Jehová kipia miak chikaualistli uan Satanás amo. Tlaj tijkauaj ma techpaleui Jehová, Satanás amo techmasiltis ika yon se tlaketstli.

16. ¿Tlake techpaleuis amo ma techmasilti Satanás?

¹⁶ Yeka, amo ma timoueyimatikaj yon ma tijnekikaj titlapijpiasej, kiampa Satanás amo techmasiltis. Maske tijmatij san Jehová uelis techpaleuis, amo ma timotemachikaj san ipan tojuantij. ¿Kenke? Pampa se keskij Jehová itekipanojkauaj katli tlauel miak xiuitl tlatekipanojtokej, kinejkej tlauel tlapijpiasej uan pejkej tlauel moueyimatij. Yeka, mojmostla ma tikiljuikaj Jehová ma techpaleui tikitasej tlaj timoueyimatij o tijnekij titlapijpiasej (Sal. 139:23, 24). Amo kema ma tijkauakaj Satanás ma techmasilti.

17. ¿Tlake kipanos Satanás?

¹⁷ Ipan miak xiuitl tlen panotok, Satanás kinmasiltijtok miakej maseualmej. Maske kiampa kichijtok, nechka kiilpisej ‘ika teposcadenas uan kitsakuasej para se Mil xiuitl’, uan teipa kitsontlamiltisej (Apoc. 20:1-3, 10). ¡Tijnekiskiaj nima ma kitsontlamiltikaj! Yeka, ma tijchiuakaj kampeka amo ma techmasilti. Nojkia ma tijchiuakaj kampeka amo timoueyimatisej uan amo tijnekisej tlauel titlapijpiasej. Ma timosentlalikaj tijchiuasej tlen Biblia techtlajtolmaka: “Ximoketsakaj keja intemachmej iixpa Axkualtlakatl uan amo xijchiuakaj tlen kineki xijchiuakaj, uan yajaya inmechtlalkauis” (Sant. 4:7).