1. ¿Tlake kiniljuijkej judíos ma kichiuakaj kema tlatsintokakej?

MIAKEJ tlakamej uan siuamej mosentilijtoyaj ipan Jerusalén. Inijuantij ualajtoyaj tlen sekinok altepemej uan kamanaltiyayaj sekinok tlajtoli. Ipan nopa tonali panok se tlamantli tlen kichijki ma mosentlachilikaj: se keskij judíos pejkej kamanaltij inintlajtol. Maske kiampa panok, nojua tlauel ipati tlen judíos kiijtojkej uan tlen apóstol Pedro kiijtok. Ya nojkia kiijtok ueliskiaj momanauisej tlaj tlaneltokaskiaj ipan Jesús. Tlen Pedro kiniljuik asik ipan ininyolo, yeka kitlatsintokijkej: “¿Tlake moneki tijchiuasej?”. Uan ya kinnankilik: “Ximoatsonpoliuiltikaj sejse inmojuantij” (Hech. 2:37, 38).

2. ¿Tlake tikitasej ipan ni tlamachtili? (Xikita tlaixkopinkayotl ipan ipantsajka).

² Tlen panok teipa, kichijki nojua ma mosentlachilikaj pampa se 3,000 maseualmej moatsonpoliuiltijkej uan mochijkej Cristo itokilijkauaj. Kiampa pejkej kichiuaj tlen Jesús tlanauatik uan pejkej kinpaleuiaj ma mochiuakaj itokilijkauaj, uan ipan ni tonali nojua kiampa tijchiuaj. Tlaj tijnekij ma moatsonpoliuilti se katli tijmachtiaj, kemantika pano se keski metstli o se keski xiuitl. Yeka, moneki tijchiuasej kampeka, kiampa kichijtokej se keskij toikniuaj kema kinmachtiaj sekinok. Ipan ni tlamachtili tikitasej tlake uelis tijchiuasej uan kiampa uelis tikinpaleuisej ma moatsonpoliuiltikaj katli tikinmachtiaj.

3. Kej kiijtoua Mateo 28:19, 20, ¿tlake achtoui moneki kichiuas katli tijmachtiaj tlaj kineki moatsonpoliuiltis?

³ Tlaj katli tijmachtiaj kineki moatsonpoliuiltis, achtoui moneki kipatlas se keski tlamantli (xijpoua Mateo 28:19,  20, TNM). * Kema kiampa kichiua kinextia eli kej nopa “tlalnamijkatlakatl” katli tlaxajki uejkatla uan kichijchijki ichaj ipan tetl (Mat. 7:24, 25; Luc. 6:47, 48). Ma tikitakaj eyi tlamantli tlen uelis tijchiuasej uan kiampa tijpaleuisej katli tijmachtiaj ma kichiua tlen kiyekojtia.

4. ¿Kenijkatsa uelis tijpaleuisej katli tijmachtiaj ma moatsonpoliuilti? (Xikita recuadro “ Xijpaleui katli tijmachtia ma mosentlali kichiuas se keski tlamantli”).

⁴ Ma tijpaleuikaj katli tijmachtiaj ma kipatla se keski tlamantli. ¿Kenke? Ximoiljui ipan ni neskayotl: Moneki tiikxinejnemis tlauel uejka. Tlaj amo tijneki tikouijmatis uelis timoketstias kampa tlatepak, kiampa amo titlaxikos o tisiauis. Nojkia, kiampa pano kema katli tijmachtiaj achtoui mosentlalia kichiuas se keski tlamantli tlen amo ouij, nopa kipaleuis ma kiita kena uelis moatsonpoliuiltis. Uelis tijtekiuisej nopa amochtli Nochipa xiitsto ipan recuadro “Tlen uelis tijchiuas”, nopa kipaleuis nojua kuali ma tlaneltoka. Kema tijtlamiltisej se tlamachtili ma tikiljuikaj kenijkatsa kipaleuis ika tlen mosentlalia kichiuas. Uan tlaj tijnekij ma mosentlali kichiuas sekinok tlamantli uelis tikijkuilosej kampa kiijtoua “Sekinok tlamantli”. Nochipa kema tijmachtiaj se akajya ma tikilnamikilikaj tlake moneki nima kichiuas uan tlake uelis kichiuas teipa.

5. Kej kiijtoua Marcos 10:17-22, ¿tlake kiiljuik Jesús nopa tlakatl katli tlatominpiayaya, uan kenke?

⁵ Ma tijpaleuikaj katli tijmachtiaj ma kipatla se keski tlamantli tlen ouij (xijpoua  Marcos 10:17-22). Jesús kiiljuik se tlakatl katli tlatominpiayaya ma kinamaka nochi tlen kipixtoya maske kimatiyaya uelis ouij kichiuaskia (Mar. 10:23). ¿Kenke kiampa kiiljuik? Pampa kiikneliyaya. Uelis kemantika ouij tijmatij tikiljuisej katli tijmachtiaj ma kichiua tlen momachtia pampa uelis timoiljuiaj ayamo uelis kichiuas. Ma tikilnamikikaj se akajya amo nima kipatla inemilis uan tlen kichiua (Col. 3:9, 10). Yeka, tlaj nima tikiljuiaj tlake moneki kipatlas, kipaleuis nima ma kichiua uan tijnextisej tikikneliaj (Sal. 141:5; Prov. 27:17).

6. ¿Kenke tlauel kipaleuis ma moyoliljui tlaj tijtlatsintokiaj katli tijmachtiaj?

⁶ Tlauel ipati tijtlatsintokisej katli tijmachtiaj kenijkatsa kiita tlen momachtijtok. Tlaj kiampa tijchiuaj techpaleuis tijmatisej tlaj kikuamachilijtia tlen momachtia uan tlake moiljuia, uan uelis tikiljuisej sekinok tlamachtili tlen ouij. Amochtli Nochipa xiitsto kipia miak tlajtlanili tlen uelis kinankilis. Se neskayotl, ipan tlamachtili 4 kiijtoua: “¿Kenijkatsa timoiljuia kiyolmati Jehová kema tijnojnotsa ika itoka?”. Uan ipan tlamachtili 9, uala seyok tlajtlanili: “¿Tlake tlamantli mitspaktiskia tikiljuis Jehová kema timomaijtos?”. Uelis achtoui monekis tijkauasej ma moiljui ipan nopa tlajtlanili. ¿Kenijkatsa tijchiuasej? Uelis tijpaleuisej ma moyoliljui ipan nopa textos uan tlaixkopinkayomej tlen nesi ipan sejse tlamachtili.

7. ¿Kenijkatsa uelis tijtekiuisej tlen kinpanotok sekinok uan kiampa tijpaleuisej katli tijmachtiaj?

⁷ Tlaj katli tijmachtiaj peua kikuamachilia tlake moneki kichiuas, moneki tijnextilisej kenijkatsa kichiuas ipan inemilis ika tlen kinpanotok toikniuaj. Se neskayotl, tlaj kimatij ouij yas tlanechikoli ma tijnextilikaj video Jehová kitekipachoua tlen nechpano tlen nesi ipan tlamachtili 14 kampa kiijtoua “Nojkia xikita ni”. Uan kampa kiijtoua “Nojua ximomachti” o “Nojkia xikita ni” * tlen nopa amochtli Nochipa xiitsto kiijtoua tlen kinpanotok toikniuaj. Katli tijmachtiaj amo kema ma tikiljuikaj: “Tlaj ya ueli tlatekipanoua, nojkia kiampa xijchiua”. Ma tijkauakaj iselti ma kiita tlake moneki kichiuas. Uelis tikiljuisej katli tijmachtiaj kenijkatsa katli nesi ipan video kichijki tlen Biblia tetlajtolmaka, tlake texto kipaleuik uan tlake kichijki. Nochipa ma tijnextilikaj kenijkatsa Jehová kipaleuik nopa maseuali tlen nesi ipan video.

8. ¿Kenijkatsa uelis tijpaleuisej katli tijmachtiaj ma kiikneli Jehová?

⁸ Ma tijpaleuikaj katli tijmachtiaj ma kiikneli Jehová. Ma tijchiuakaj kampeka tikiljuisej katli tijmachtiaj nopa kuajkuali tlamantli tlen Jehová kinextia. Uan ma tijpaleuikaj kiitas Jehová tlauel yolpaki uan nochipa kinpaleuia katli kiikneliaj (1 Tim. 1:11; Heb. 11:6). Nojkia, ma tikiljuikaj kenijkatsa kipaleuis tlaj kichiuas tlen kiyekojtia uan ma tikiljuikaj Jehová tlauel kiiknelia yeka kimachtia (Is. 48:17, 18). Tlaj tlauel kiiknelis Jehová kipaleuis nojua ma kineki kipatlas sekinok tlamantli ipan inemilis (1 Juan 5:3).

9. Kej kiijtoua Marcos 10:29, 30, ¿tlake uelis kipaleuis katli tijmachtiaj tlaj kineki moatsonpoliuiltis?

⁹ Tlaj katli tijmachtiaj kineki moatsonpoliuiltis, moneki kichiuas se keski tlamantli. Kemantika nojkia monekis kichiuasej  kej nopa tlakatl katli tikijtojkej ipan párrafo 5 uan amo mosentlalisej tlapijpiasej. Uelis monekis kikauasej ininteki tlaj kiixpano tlen Biblia kiijtoua. Sekij uelis monekis ayokmo mouikasej ininuaya katli amo kitekipanouaj Jehová. Uan sekij monekis kiijiyouisej kema ininchampoyouaj kinkualankaitaj Jehová itlajtoltemakauaj. Maske Jesús kiijtok sekij kimatiskiaj ouij kichiuasej ni tlamantli, nojkia kiijtok Jehová kinteochiuaskia uan kinpaleuiskia ika sekinok toikniuaj katli eliskiaj kej ininchampoyouaj (xijpoua Marcos 10:29, 30). ¿Kenijkatsa tikinpaleuisej katli tikinmachtiaj ma kipiakaj nopa tlateochiualistli?

10. ¿Tlake tijyekouaj tlen kiijtoua Manuel?

¹⁰ Ma timouampojchiuakaj ininuaya katli tikinmachtiaj. Tlauel ipati tijnextisej techtekipachoua tlen kinpano. ¿Kenke? Ma tikitakaj tlen kiijtok Manuel, katli eua México. Ya kiijtoua tlake kipaleuik kema pejki momachtia Biblia: “Kema ayamo tijpeualtiyayaj timomachtiaj, katli nechmachtiyaya nochipa nechtlatsintokiyaya kenijkatsa niitstok. Nopa nechpaleuik kuali ma nijyolmati uan ueliyaya nikiljuia tlen nechpanoyaya. Tlen kichijki, kinextik nelia motekipachouayaya ika tlen nechpanoyaya”.

11. ¿Kenke moneki tijkixtisej tonali uan kiampa tiitstosej ininuaya katli tikinmachtiaj?

¹¹ Sanse kej Jesús, ma tijchiuakaj kampeka tiitstosej ininuaya katli tikinmachtiaj (Juan 3:22). Tlaj katli tijmachtiaj tikitaj kipatlatiaj inemilis uan tikitaj kinamiki, uajka ma tijtlaneuikaj tochaj ma cafeniti, ma tlakuati o ma kiitati JW Broadcasting. Tlauel kipaleuis tlaj tijtlaneuisej ma yaui tochaj kema maseualmej iljuichiuaj kiampa amo kimatis itstok iselti. Kazibwe, katli eua Uganda, kiijtok: “Kema katli nechmachtiyaya nechtlaneuiyaya ma nia ichaj, nechpaleuiyaya ma nikita miak tlamantli tlen Jehová, kej kema nechmachtiyaya ika Biblia. Nikitak Jehová tlauel kiniknelia itekipanojkauaj  uan tlauel yolpakij. Uan na nojkia kiampa nijnekiyaya nijyolmatis”.

12. ¿Kenke kema titlamachtiaj moneki tikintlaneuisej sekinok toikniuaj?

¹² Ma tikintlaneuikaj sekinok toikniuaj kema titlamachtiaj. Uelis kemantika tijnekisej toselti titlamachtisej o nochipa tiasej san iuaya se toikni. Maske uelis timoiljuisej kuali tlen tijchiuaj, amo kipaleuis katli tijmachtiaj. Yeka, ma tikintlaneuikaj sekinok. Dimitri, katli eua Moldavia, kiijtoua: “Katli nechmachtiyaya nochipa kintlaneuiyaya sekinok toikniuaj uan amo sanse nechmachtiyayaj. Nopa nechpaleuik ma nijyeko sekinok tlamantli. Yeka, amo nipinajki kema niajki tlanechikoli pampa nikinixmatiyaya miakej toikniuaj”.

13. ¿Kenke moneki tijpaleuisej katli tijmachtiaj ma yaui tlanechikoli?

¹³ Ma tijpaleuikaj katli tijmachtiaj ma yaui tlanechikoli. ¿Kenke? Pampa kema timonechikouaj eli se tlanauatili tlen Jehová techmakatok uan nojkia nopaya tijueyichiuaj (Heb. 10:24, 25). Nojkia toikniuaj katli itstokej nopaya, elij kej tochampoyouaj. Kema tiitstokej ininuaya eli kejuak tiitstoskiaj sansejko ipan se kali uan sansejko titlakuaskiaj. Kema tijpaleuiaj se akajya ma yaui tlanechikoli, tijpaleuiaj ma kichiua se tlen nopa tlamantli tlen kipaleuis ma moatsonpoliuilti. Maske tijnekij kiampa tijchiuasej uelis onkas se tlamantli tlen kitsakuilis amo ma mosentili. ¿Kenijkatsa uelis tijpaleuisej katli tijmachtiaj ika nopa amochtli Nochipa xiitsto?

14. ¿Kenijkatsa uelis tijpaleuisej katli tijmachtiaj ma yaui tlanechikoli?

¹⁴ Uelis tijtekiuisej tlamachtili 10 tlen amochtli Nochipa xiitsto tlaj tijnekij katli tijmachtiaj ma yaui tlanechikoli. Kema ayamo kiijtojtoyaj tlaj eltoya ni amochtli, kiniljuijkej se keskij toikniuaj katli kipiaj miak xiuitl tlatekipanojtokej ma kitekiuikaj ni tlamachtili, uan kena kinpaleuik. Maske ayamo tiasij ipan tlamachtili 10, moneki tikintlaneuisej ma yakaj tlanechikoli. Nima ma tijchiuakaj uan nochipa ma tikiniljuikaj. Ma tikilnamikikaj amo nochi elij sanse uan amo kiixnamikij sanse tlaouijkayotl, yeka ma timoiljuikaj tlake nojua moneki kichiuasej uan kenijkatsa tikinpaleuisej. Amo ma timoyolkokokaj tlaj amo nima yasej tlanechikoli. Ma tijchiuakaj kampeka nochipa tikiniljuisej uan ma tijpiakaj toyolo.

15. ¿Tlake tlamantli uelis kimakasis katli tijmachtiaj?

¹⁵ Kema tikilnamikij kenijkatsa pejki timomachtiaj Biblia, uelis tijmakasiyayaj tijtekipanosej Jehová. Uelis timoiljuiyayaj amo kema tiueliskiaj titlajtolmoyauasej kajkalpa. Nojkia, uelis tijmakasiyayaj ma techkualankaitakaj tochampoyouaj uan touampoyouaj. Tlaj kiampa techpanok uelis tijkuamachilisej tlen kiyolmati katli tijmachtiaj. Maske Jesús kiijtok se keskij maseualmej kimakasiskiaj elisej itokilijkauaj, ya kiniljuik amo ma majmauikaj uan nojua ma tlatekipanokaj (Mat. 10:16, 17, 27, 28). ¿Kenijkatsa kinpaleuik amo ma majmauikaj? Uan, ¿kenijkatsa uelis tijchiuasej?

16. ¿Kenijkatsa uelis tijpaleuisej katli tijmachtiaj ma kiniljui sekinok tlen momachtia?

¹⁶ Ma tijpaleuikaj katli tijmachtiaj ma kiniljui sekinok tlen momachtia. Uelis Cristo itokilijkauaj nojkia momajmatijkej kema kintitlanki ma tlajtolmoyauatij. Maske kiampa kinpanok, Jesús kinpaleuik kema kiniljuik ajkia inijuantij ueliskiaj kinkamanaljuisej uan tlake kiijtoskiaj (Mat. 10:5-7). ¿Kenijkatsa ueliskia tijchiuasej kej ya? Uelis tijpaleuisej katli tijmachtiaj kema tikiljuisej  ajkia inijuantij ueliskia kinkamanaljuis. Ma tijtlatsintokikaj tlaj kiixmati se akajya katli kineki momachtis Biblia. Teipa, uelis tijpaleuisej ma kiixtomili se tlamachtili tlen amo ouij. Uan kema kinamiki, uelis tikitasej amochtli Nochipa xiitsto ipan tlamachtili “Tlen sekinok kiijtouaj”. Ipan ni tlaxeloli uelis tijmachtisej kuali ma kitekiui Biblia uan ma kichiua ika tlatlepanitakayotl.

17. ¿Kenijkatsa uelis tijtekiuisej Mateo 10:19, 20, 29-31, tlaj tijnekij katli tijmachtiaj ma motemachi ipan Jehová?

¹⁷ Ma tijpaleuikaj katli tijmachtiaj ma motemachi ipan Jehová. Jesús kiniljuik itokilijkauaj Jehová tlauel kinikneliyaya uan yeka kinpaleuiskia (xijpoua Mateo 10:19, 20, 29-31). Nojkia, ma tikiljuikaj katli tijmachtiaj Jehová amo kema kitlauelkauas. Ma tijmachtikaj motemachis ipan Jehová uan ma kiiljui tlen kinekiskia kichiuas. Franciszek, katli itstok Polonia, kiijtoua: “Katli nechmachtiyaya kema momaijtouayaya nochipa kiiljuiyaya Jehová tlen nijnekiyaya nijchiuas. Kema nikitayaya kenijkatsa Jehová kinankiliyaya, nechpaleuik nojkia kiampa ma nijchiua. Nojkia, nikitak kenijkatsa Jehová nechpaleuik kema kampa namanok pejtoya nitekiti nikiniljuik amo nitekitiskia pampa niaskia ipan tlanechikoli uan ipan ueyi tlanechikolistli”.

18. ¿Kenijkatsa kiita Jehová nochi tlen kichiuaj toikniuaj katli tlamachtiaj?

¹⁸ Tlaj amo tijmachtiaj yon se maseuali, nojkia uelis tijpaleuisej se akajya ma moatsonpoliuilti. ¿Kenijkatsa uelis tijchiuasej? Kema tijpaleuisej se toikni kema tlamachtia. Kej tikitstokej, Jehová nelia tlauel kiniknelia katli tikinmachtiaj Biblia. Nojkia, tlauel kipatiita tlen tijchiuaj kema tikinpaleuiaj sekinok ma kiixmatikaj uan ma kiiknelikaj (Is. 52:7).