1. ¿Tlake uelis tijchiuasej tlaj tijnekij timomanauisej ipan “nopa tonal tlen iaxka Toueyiteko”?

 KEMA ipan Biblia kiijtoua “nopa tonal tlen iaxka Toueyiteko”, kiijtosneki kema toTeotsij kintsontlamiltis ikualankaitakauaj uan kinmanauis itekipanojkauaj. Uejkajkia, Jehová kitlatsakuiltik se keskij altepemej (Is. 13:1, 6; Ezeq. 13:5; Sof. 1:8). “Nopa tonal tlen iaxka Toueyiteko”, nechka asis. Peuas kema kitsontlamiltisej Ueyi Babilonia uan tlamis ipan Armagedón. Tlaj tijnekij timomanauisej ipan nopa tonali, moneki nama timokualchijchiuasej. Jesús kiijtok moneki nochipa timokualtlalijtosej pampa mochiuas se “ueyi tlaijiyouilistli”. Uajka, moneki tijchixtosej nopa tonali (Luc. 12:40; Mat. 24:21).

2. ¿Kenke moneki timomachtisej 1 Tesalonicenses?

² Ipan 1 Tesalonicenses, apóstol Pablo kiijtok se keski neskayotl tlen kinpaleuiskia Cristo itokilijkauaj ma kimatikaj kenijkatsa ueliskiaj momanauisej kema asiskia nopa tonali tlen iaxka Jehová. Pablo kimatiyaya nojua poliuiyaya miak tonali kema asiskia (2 Tes. 2:1-3). Maske kimatiyaya nopa, kiniljuik ma mokualchijchiuakaj uan ma moiljuikaj nopa tonali nechka asiskia. Tojuantij nojkia moneki tijchiuasej tlen Pablo kiijtok. Ipan ni tlamachtili tikitasej 1) kenijkatsa asis nopa tonali tlen iaxka Jehová, 2) ajkia inijuantij amo momanauisej uan 3) kenijkatsa uelis timokualchijchiuasej.

3. ¿Kenke nopa tonali tlen iaxka Jehová asis keja se tlachtejketl ika tlayoua? (Nojkia xikita tlaixkopinkayomej).

³ “Keja se tlaxtejketl kalaki tlalochtli ika tlayoua” (1 Tes.  5:2). Ni eli nopa achtoui neskayotl tlen Pablo kiijtok, tlen ika kinextik kenijkatsa elis nopa tonali tlen iaxka Jehová. Tlachtekinij kalakij ipan se kali ika tlayoua uan kema amo aka kinchia. Nopa tonali tlen iaxka toTeko, nojkia asis kema amo aka kichia. Uelis tojuantij nojkia timosentlachilisej kema tikitasej kenijkatsa nima mochiua tlen Jehová kiijtojtok. Maske kiampa panos, timomanauisej uan kintsontlamiltisej san katli amo kualmej.

4. ¿Kenke nopa tonali tlen iaxka Jehová elis kej kema se siuatl kitlakatiltia ikone?

⁴ “Keja se siuatl kema peua itlakuajkualol para tlatlakatiltis” (1 Tes. 5:3). Maske se siuatl katli tlanemiltia amo kimati kema tlakatis ipilkone, motemachia asis nopa tonali. Uan kema asi nopa tonali, nima peua kuajkualo uan ayokmo ueli kitsakuilia ma tlakati ikone. Maske amo tijmatij kema asis nopa tonali tlen iaxka Jehová, timotemachiaj kena asis. Jehová kintsontlamiltis katli amo kuajkualmej, kema amo aka kichia uan amo momanauisej.

5. ¿Kenke nopa ueyi tlaijiyouilistli eli kej kema tlanesi?

⁵ Kej kema tlanesi. Kema Pablo kiijtoua nopa expa neskayotl, kipatlak kentsi kema kiijtok tlen kichiua nopa tlachtejketl katli tlachteki ika tlayoua. Nama kiijtoua nopa tonali tlen iaxka Jehová, eli kej kema tlanesi (1 Tes. 5:4, TNM). Uelis nopa tlachtejketl tlauel mosentlalijtok ipan tlen kiuikas, uan yeka amo kiita tlaj ya tlanesi uan uelis kipantisej. Kema mochiuas nopa ueyi tlaijiyouilistli, nojkia kiampa panos. Jehová kinpantis katli kichiuaj tlen amo kuali kej nopa tlachtejketl. Tojuantij amo kiampa techpanos pampa tijmatij asis nopa tonali. ¿Kenijkatsa uelis tijnextisej timokualchijchijtokej? Tlaj amo tijchiuaj tlen kiixpano Jehová uan tijchiuaj kampeka kuali timonejnemiltisej uan tikijtosej tlen melauak (Efes. 5:8-12). Teipa, Pablo nojkia kiijtok ome neskayotl tlen  ika kinextik ajkia inijuantij amo momanauisej ipan nopa tonali tlen iaxka Jehová.

6. ¿Kenke tikijtouaj maseualmej kejuak kochtokej? (1 Tesalonicenses 5:6, 7).

⁶ “Tlen kochtokej” (xijpoua 1 Tesalonicenses 5:6, 7). Pablo kiijtok katli amo momanauisej elij kej katli kochtokej. Kema se akajya kuali kochtok, amo kimati tlen pano inechka yon kiita kenijkatsa pano tonali. Uan maske pano tlen amo kuali, amo kichiua tlen moneki. Nojkia kiampa pano ika maseualmej, inijuantij kejuak kochtokej pampa amo kuali tlaneltokaj (Rom. 11:8). Amo kineltokaj tlaj tiitstokej ipan “itlamia tonali” uan tlaj nechka mochiuas nopa ueyi tlaijiyouilistli. Kema pano uejueyi tlamantli ipan Tlaltipaktli, se keskij kejuak isaj o tlachiaj uan kinekij kikakisej nopa kuali tlamachtili. Maske kiampa kichiuaj, teipa kejuak sampa kochij. Uan sekij, maske kimatij se tonali Jehová tetlajtolsenkauas, moiljuiaj poliui miak (2 Ped. 3:3, 4). Tojuantij tijmatij moneki mojmostla kuali titlachixtosej.

7. ¿Kenke katli toTeotsij kitsontlamiltis kejuak iuintitokej?

⁷ “Tlen iuintitokej”. Pablo kiijtok katli Jehová kitsontlamiltis kejuak iuintitokej. Se katli iuintitok, ayokmo kuali tlalnamiki uan amo kuali kitlapejpenia tlen kichiuas. Nojkia kiampa pano ika katli amo kuajkualmej, pampa amo kitlakakiliaj toTeotsij uan kitlapejpeniaj tlen amo kuali, yeka kintsontlamiltisej. Pablo kiniljuik Cristo itokilijkauaj ma kipixtokaj kuali inintlalnamikilis, ma tlachixtokaj uan amo ma itstokaj kej katli moiuintiaj (1 Tes. 5:6). Se tlakatl katli tlauel momachtijtok tlen kiijtoua Biblia, kiijtok nopa tlajtoli amo tiiuintitos kiijtosneki “kuali timoiljuis tlen tijchiuas amo nima tikualanis uan tikitas se tlamantli kej kinamiki”. ¿Kenke moneki kuali timoiljuisej uan kuali tijtlapejpenisej tlen tijchiuasej? Pampa uelis nima timokalakisej ipan política uan timoiljuisej kej maseualmej. Teipa nojua tlauel techtetsopasej ma tijchiuakaj ni tlamantli, pampa monechkauia nopa tonali tlen iaxka Jehová. Maske kiampa panos, amo kinamiki timotekipachosej, pampa ichikaualis toTeotsij techpaleuis kuali ma timoiljuikaj uan kuali ma tijtlapejpenikaj tlen tijchiuasej (Luc. 12:11, 12).

8. Kej kiijtoua 1 Tesalonicenses 5:8, ¿tlake techpaleuis kuali ma titlachixtokaj uan kuali ma timoiljuikaj tlake tijchiuasej? (Nojkia xikita tlaixkopinkayotl).

⁸ Ma timotlalilikaj toyolixtepostsajka uan totepostsontsajka. Pablo kiijtok tielij kej soldados katli kuali tlachixtokej uan motlalilijtokej inintepostsajka (xijpoua 1 Tesalonicenses 5:8). Kema onka tlauilankayotl se tlateuijketl moneki nochipa mokualtlalijtos. Tojuantij nojkia timokualchijchijtokej pampa tijmatij asis nopa tonali tlen iaxka Jehová, yeka kejuak timotlalilijtokej toyolixtsajka pampa kuali titlaneltokaj uan titeikneliaj. Uan nojkia kejuak timotlalilijtokej totepostontsajka pampa timotemachiaj ipan tlen tijselisej. Ni tlamantli tlauel techpaleuia.

9. ¿Kenijkatsa techpaleuia kema kuali titlaneltokaj?

⁹ Sanse kej se tlateuijketl kimanauiyaya iyolo ika iyolixtsajka, tojuantij nojkia tijmanauiaj toyolo kema kuali titlaneltokaj uan titeikneliaj. Kema kiampa tijchiuaj, techpaleuia ma tijtekipanojtokaj Jehová uan ma tijchiuakaj kej Jesús. Totlaneltokilis techpaleuia ma timotemachikaj Jehová kinteochiua katli kichiuaj kampeka kitemosej (Heb. 11:6). Nojkia, techpaleuia amo ma tijtlauelkauakaj totlayakanka Jesús maske tikixnamikisej tlaouijkayotl.  Kema tikitaj kenijkatsa toikniuaj amo kitlauelkauaj Jehová maske kintlatsakuiltiaj o amo kipiaj tlen ika mopanoltisej, techpaleuia nojua kuali ma titlaneltokakaj uan ma tikixnamikikaj tlaouijkayotl. Uan kema tikitaj tlen kichiuaj katli mosentlaliaj kitekipanosej toTeotsij uan amo titlapijpiasej, techpaleuia nojkia kiampa ma tijchiuakaj. b

10. ¿Kenijkatsa techpaleuia pampa tikinikneliaj toTeotsij uan maseualmej?

¹⁰ Tlaj tijnekij kuali titlachixtosej uan kuali timoiljuisej tlen tijchiuasej, nojkia moneki titeiknelisej (Mat. 22:37-39). Kema tikikneliaj toTeotsij, techpaleuia nojua ma titlajtolmoyauakaj maske tikixnamikij tlaouijkayotl (2 Tim. 1:7, 8). Uan kema tikinikneliaj maseualmej, tijchiuaj kampeka tikinmachtisej tlen Biblia kiijtoua maske ika teléfono o ika carta. Amo timoiljuiaj amo kema kitekipanosej Jehová. Timotemachiaj se tonali kipatlasej ininnemilis uan kuali monejnemiltisej (Ezeq. 18:27, 28).

11. ¿Kenijkatsa techpaleuia kema tikinikneliaj toikniuaj? (1 Tesalonicenses 5:11).

¹¹ Nojkia tijnextiaj tikinikneliaj toikniuaj kema timoyolchikauaj ininuaya (xijpoua 1 Tesalonicenses 5:11). Maske soldados mosentikapaleuiaj kema tlateuiaj, uelis kikokosej se katli yaui ininuaya maske amo kinekij kiampa kichiuasej. Tojuantij nojkia amo kema tijchiuiliskiaj tlen amo kuali se toikni yon timomakuepaskiaj (1 Tes. 5:13, 15). Kema tikintlepanitaj katli tlayakanaj ipan tlanechikoli, nojkia tijnextiaj tikinikneliaj toikniuaj (1 Tes. 5:12). Kema Pablo kintlajkuiljuilik toikniuaj tlen Tesalónica, nopa tlanechikoli ayamo kipiayaya yon se xiuitl. Maske ueuejtlakamej ayamo kimatiyayaj miak tlamantli uan mokuapolouayayaj, toikniuaj monekiyaya kintlepanitasej. Nechka mochiuas nopa ueyi tlaijiyouilistli, yeka moneki nojua tlauel timotemachisej ipan ueuejtlakamej, pampa uelis teipa ayokmo techyakanasej toikniuaj tlen Betel yon tlen Ueyi kali Betel. Yeka nama tlauel moneki tikiniknelisej uan tikintlepanitasej ueuejtlakamej. Nochipa ma tikitakaj  nopa kuajkuali tlamantli tlen kinextiaj uan ma tikilnamikikaj Jehová kinyakana ika Jesús.

12. ¿Kenijkatsa techpaleuia kema timoiljuiaj ipan tlen tijselisej?

¹² Sanse kej se tlateuijketl kimanauiyaya itsonteko ika itepostsontsajka, tlen tijchiaj tijselisej techpaleuia ma timoiljuikaj kej kinamiki. Tlaj nochipa timoiljuiaj ipan tlen tijselisej, techpaleuis amo ma tijnekikaj tlauel titlapijpiasej (Filip. 3:8). Tlen tijchiaj tijselisej techpaleuia kuali ma timoiljuikaj tlen tijchiuasej uan amo tlauel ma timotekipachokaj. Kiampa kinpanok Wallace uan Laurinda, katli tlatekipanouaj ipan África. San ipan eyi semanas, Laurinda mijki inana uan Wallace mijki itata. Uan pampa momoyajtoya COVID-19, amo uelkej yauij ininchaj. Wallace kiijtok: “Tlauel nechpaleuia kema nimoiljuia Jehová kinyolkuis katli miktokej. Amo nimoiljuia kenijkatsa tlaijiyouijkej, nimoiljuia kenijkatsa tlauel yolpakisej ipan yankuik Tlaltipaktli. Nimotemachia ipan ni tlamantli, yeka ayokmo tlauel nimotekipachoua”.

13. ¿Tlake uelis tijchiuasej tlaj tijnekij Jehová ma techmaka ichikaualis o itonal?

¹³ “Amo xijkotonilikaj iteki Itonal Toteko” (1 Tes. 5:19). Pablo kiijtok toTeotsij itonal o ichikaualis tlauel techpaleuia. Kema tijkauaj ma techpaleui, tijnekij kuali tijtekipanosej toTeotsij uan tijchiuasej tlen kipaktia (Rom. 12:11). Tlaj tijnekij Jehová ma techmaka itonal, moneki tijtlajtlanilisej, timomachtisej iTlajtol uan amo tijtlauelkauasej itlanechikol. Tlaj kiampa tijchiuaj, tijnextisej nopa kuajkuali tlamantli tlen toTeotsij itonal techpaleuia ma tijnextikaj (Gál. 5:22, 23).

14. ¿Tlake amo kinamiki tijchiuasej tlaj tijnekij Jehová nojua ma techmaka ichikaualis? (Nojkia xikita tlaixkopinkayomej).

¹⁴ Maske Jehová techmaka ichikaualis, moneki kuali timonejnemiltisej pampa tlaj peua timoiljuiaj tlen amo kinamiki uan titlajtlakolchiuaj, ayokmo techmakas itonal (1 Tes. 4:7, 8). Nojkia, moneki tijchiuasej tlen Pablo kiijtok: “Amo xijtlaijiljuikaj itlajtol se iteokamanalojka Toteko” (1 Tes. 5:20). Ni texto kiijtosneki nochi tlen Jehová kiijtojtok kichiuas uan  nojkia tlen panos ipan tonali tlen iaxka. Tojuantij amo timoiljuiaj amo nima asis o amo tikitasej kema peuas Armagedón. Timotemachiaj nechka asis nopa tonali, yeka tijchiuaj kampeka kuali timonejnemiltisej uan mojmostla tijchiuasej “tlen senkistok kuali” (2 Ped. 3:11, 12).

15. ¿Tlake moneki tijchiuasej tlaj tijnekij amo aka ma techkajkayaua? (1 Tesalonicenses 5:21).

¹⁵ Ikualankaitakauaj toTeotsij nechka kiijtosej “ya onka tlaseuilistli uan ya itstokej ika kuali” (1 Tes. 5:3). Ipan nopa tonali, amo kuali ajakamej kichiuasej ma momoyaua istlakatili uan kinkajkayauasej maseualmej (Apoc. 16:13, 14). Tojuantij amo techkajkayauasej tlaj tikitaj “tlaj melauak nochi tlamantli” (xijpoua 1 Tesalonicenses 5:21 c). Nopa tlajtoli ika griego “xikitakaj” kitekiuiyayaj kema maseualmej kinekiyayaj kiitasej tlaj plata o oro nelia eliyayaj senkistok kuali. Tojuantij nojkia moneki kiampa tijchiuasej uan tikitasej tlaj nelia melauak tlen tijkakij o tlen tijpouaj. Toikniuaj tlen Tesalónica monekiyaya kiampa kichiuasej, uan tojuantij nojua tlauel moneki kiampa tijchiuasej pampa monechkauijtiuala nopa ueyi tlaijiyouilistli. Tojuantij amo nima tijneltokaj tlen tijpouaj o tlen tijkakij pampa achtoui tikitaj tlaj nelia melauak ika tlen Biblia kiijtoua uan Jehová itlanechikol. Kiampa amo techkajkayauasej amo kuali ajakamej (Prov. 14:15; 1 Tim. 4:1).

16. ¿Tlake tlamantli tijchiaj tijselisej uan tlake moneki tijchiuasej nama?

¹⁶ Maske tijmatij Jehová itlajtoltemakauaj momanauisej kema onkas nopa ueyi tlaijiyouilistli, amo tijmatij tlake uelis techpanos sejse tlen tojuantij nama (Sant. 4:14). Tlaj amo tijtlauelkauaj Jehová, ya techmakas nemilistli tlen axkema tlamis maske tipanosej ipan nopa ueyi tlaijiyouilistli o timikisej kema ayamo peua. Katli tlanauatisej iuaya Jesús, itstosej iluikak uan nopa sekinok maseualmej, itstosej ipan Tlaltipaktli kema elis se Xochimili. Yeka, ma timosentlalikaj ipan tlen tijselisej teipa uan ma tijchixtokaj kema asis nopa tonali tlen iaxka Jehová.