Notatauaj kistejkej tlen Estonia kema mochiuayaya nopa Ompa Ueyi Tlauilankayotl uan yajkej itstotoj Alemania. Nopaya nitlakatki. Teipa kiijtojkej tiaskiaj Canadá. Tiasitoj nechka Ottawa uan tochaj kichipajtoyaj ika nextli uan nopaya nojkia itstoyaj piyomej. Maske tieliyayaj titeikneltsitsij, mojmostla tijkuayayaj teksistli ika ijnalok.

Se tonali, Jehová itlajtoltemakauaj kipouilijkej nonana Apocalipsis 21:3, 4. Kema kiitak tlen nopaya kiijtoua, tlauel yolpajki uan pejki mochokilia. Notatauaj nima pejkej kuali tlaneltokaj uan teipa moatsonpoliuiltijkej.

Maske notatauaj amo nelkuali kamanaltiyayaj inglés, tlauel kipatiitayayaj tlen momachtiyayaj. Maske notata tlauel tekitiyaya ipan se fábrica kampa kiatiliyayaj níquel ipan Sudbury (Ontario), sejse sábado, Sylvia uan na, techuikayayaj ma titlajtolmoyauatij. Uan sejse chikueyi sansejko timomachtiyayaj pilamochtsi Tlen Tematiltia. Notatauaj nechpaleuijkej tlauel ma nikikneli toTeotsij, yeka nimoatsonpoliuiltik ipan 1956 kema nijpixtoya 10 xiuitl. Kema nimoiljuia kenijkatsa notatauaj tlauel kiikneliaj Jehová, nechpaleuia kuali ma nijtekipano.

Kema nikiski tlen secundaria pejki nimosentlalia ipan sekinok tlamantli. Nimoiljuiyaya tlaj nimochiuaskia precursor, amo kema ueliskia nijpias tomij uan kiampa ueliskia nipaxaloti ipan avión. Teipa pejki nitekiti ipan se estación de radio uan tlauel nechpaktiyaya. Pero pampa nitekitiyaya ika tiotlak, amo niauiyaya tlanechikoli uan nimouikayaya ininuaya katli amo kitekipanouayayaj Jehová. Teipa nikilnamijki tlen nimomachtijtoya ipan Biblia uan nopa nechpaleuik ma nijpatla se keski tlamantli ipan nonemilis.

Niajki niitstoto Oshawa (Ontario). Nopaya nikixmatki Ray Norman, iikni Lesli uan sekinok precursores. Nochi tlauel nechpaleuijkej. Kema nikitak tlauel yolpakiyayaj, kichijki ma nimosentlali nijchiuas se keski tlamantli. Inijuantij nechpaleuijkej ma nitlatekipano kej precursor. Yeka ipan septiembre 1966, pejki kiampa nitlatekipanoua. Maske tlauel niyolpakiyaya, teipa panok se keski tlamantli tlen kipatlak nonemilis.

Kema nojua nimomachtiyaya ipan secundaria, nijtitlanki se solicitud kampa nikijtouayaya nijnekiyaya  nitlatekipanos ipan Betel tlen Toronto (Canadá). Teipa, kema ya nitlatekipanouayaya kej precursor, nechtlanejkej ma nitlatekipano ipan Betel naui xiuitl. Pero tlauel nikixtokayaya Lesli uan nimajmauiyaya, pampa nimoiljuiyaya ayokmo nikitaskia tlaj niaskia Betel. Yeka tlauel nimomaijtok uan nikijtok kena niaskia nitlatekipanoti maske tlauel nimokuesojtoya pampa ayokmo nikitaskia Lesli.

Ipan Betel nitekitik kampa tlachikueniyayaj uan teipa kej secretario. Ipan nopa tonali, Lesli pejki tlatekipanoua kej precursora especial ipan Gatineau (Quebec). Nochipa nimoiljuiyaya tlake kichijtoya Lesli uan nimoiljuiyaya tlaj kuali tlen nitlapejpenijtoya nijchiuas. Teipa panok se tlamantli tlen amo nimoiljuijtoya: kitlanejkej Ray, iikni Lesli ma tlatekipano Betel uan kiiljuijkej mokauaskia ipan nocuarto. Kiampa pejki sampa nimouampojchiua iuaya Lesli, uan timosenkajkej ipan febrero 27, 1971, nopa tonali kema tlanki nitlatekipanoua ipan Betel.

Techiljuijkej ma titlatekipanotij ipan se tlanechikoli kampa kamanaltiyayaj francés ipan Quebec. Kema panok se keski xiuitl, techtlanejkej ma titepaxalokaj chijchikuasej metstli. Nijpixtoya 28 xiuitl, yeka nimoiljuiyaya amo niueliskia nijchiuas nopa tekitl, pero tlauel nechpaleuik tlen kiijtoua Jeremías 1:7, 8. Lesli miakpa kipanotoya tlen amo kuali kema yauiyaya ipan carro, yeka kemantika amo ueliyaya kochi. Nopa kichiuayaya ma nimoiljui amo ueliskia tijchiuasej nopa tekitl. Maske kiampa nimoiljuiyaya, Lesli nechiljuik: “Tlaj Jehová techiljuia ma tijchiuakaj se tlamantli, ma tijchiuakaj kampeka tijchiuasej”. Teipa tikijtojkej kena kiampa titlatekipanoskiaj, uan titepaxalojkej 17 xiuitl.

Kema titepaxalouayayaj chijchikuasej metstli, kemantika amo ueliyaya tlauel nikamanalti iuaya Lesli pampa tlauel nimotekiuijtoya. Teipa nijyekok se tlamantli tlen tlauel ipati. Se lunes ika ijnalok, se akajya kitsilinik timbre ipan tochaj. Kema nikaltlapok, amo aka itstoya, san eltoya nopaya se chikiuitl ika se mantel, fruta, queso, pantsi, vino, copas uan se amatl kampa kiijtouayaya: “Xipaxaloti iuaya mosiua”. Tlauel yejyektsi eltoya tonali, pero monekiyaya nijkualchijchiuas se keski tlamachtili. Yeka nikiljuik Lesli amo ueliskia nias. Maske ya amo tleno kiijtok, kena mokuesok. Kema pejki nijkualchijchiua nopa tlamachtili nechyolkokouayaya notlalnamikilis. Teipa nikilnamijki Efesios 5:25, 28. Uelis Jehová nechilnamikilik monekiyaya nijchiuas kampeka kuali ma kiyolmati nosiua. Nimomaijtok uan teipa nikiljuik Lesli: “Ma tiakaj”. Ya tlauel yolpajki uan tiajkej ipan tocarro nechka se ueyatl. Tijtlalijkej nopa mantel uan tlauel timoyolpakiltijkej nopa tonali. Kema titlakuepilijkej, nojua uelki nijkualchijchiua nopa tlamachtili.

Tikinpaxalojkej toikniuaj ipan miak circuitos,  tiajkej Columbia Británica uan titlankej ipan Terranova, tlauel tiyolpajkej. Uan uelki nipaxalok ipan sekinok altepemej kej nijnekiyaya nijchiuas kema nieliyaya niokichpil. Achtouia nijnekiyaya nias escuela de Galaad. Pero amo nijnekiyaya nitlatekipanos kej misionero ipan seyok altepetl. Nimoiljuiyaya amo nochi ueliskia kiampa tlatekipanosej uan nijmakasiyaya ma nechtitlanikaj ipan África o ipan se altepetl kampa onkaskia miak kokolistli uan tlauilankayotl. Kuali tijyolmatiyayaj kampa tiitstoyaj.

Ipan 1992, sampa kinkajkej ma tlajtolmoyauakaj ipan se keski altepemej kampa tlanauatiyaya Unión Soviética, yeka techtlajtlanijkej tlaj tijnekiyayaj titlatekipanotij Estonia kej misioneros. Tlauel timomaijtojkej pampa amo tijchiayayaj nopa tekitl. Tikijtojkej: “Tlaj Jehová techiljuia ma tijchiuakaj se tlamantli, moneki tijchiuasej kampeka”. Teipa tikijtojkej kena tiaskiaj. Uan nimoiljuik: “Kuali pampa amo techtitlankej África”.

Nima pejki tijyekouaj tlajtoli estonio. Kema panok se keski metstli, techiljuijkej ma titepaxalokaj chijchikuasej metstli ipan nopa altepetl. Tikinpaxaloskiaj toikniuaj ipan se 46 tlanechikoli, ipan eyi altepemej bálticos uan ipan Kaliningrado (Rusia). Yeka nojkia monejki tijyekosej se kentsi tlajtoli letón, lituano uan ruso. Maske ouij tijmatkej, toikniuaj tlauel yolpakiyayaj ika tlen tijchiuayayaj uan tlauel techpaleuijkej. Ipan 1999, ipan Estonia kichijkej se kali Betel uan nechiljuijkej nijkayanaskia iuaya Toomas Edur, Lembit Reile uan Tommi Kauko.

Tikinixmatkej miakej toikniuaj katli kinuikatoyaj Siberia. Maske tlauel tlaijiyouiyayaj kampa kintsaktoyaj uan uejka itstoyaj tlen ininchampoyouaj, inijuantij nojua yolpakiyayaj. Nochipa mosentlalijkej kinkamanaljuisej sekinok tlen Biblia uan kichiuayayaj ika pakilistli. Nopa kichijki ma tikitakaj nojua ueliskia tiyolpakisej maske tikixnamikiskiaj tlaouijkayotl.

Kema panok se keski xiuitl, Lesli pejki tlauel siaui pampa amo tlauel timosiajketsayayaj. Teipa tijmatkej kipixtoya fibromialgia, yeka pejki timoiljuiaj titlakuepiliskiaj Canadá. Uan kema techiljuijkej ma timomachtitij Kampa kinmachtiaj Katli kiyakanaj Betel uan ininsiuajuaj, ipan Patterson (Nueva York), timoiljuijkej amo ueliskia tiasej. Miakpa timomaijtojkej uan teipa tikijtojkej kena tiaskiaj. Uan Jehová kiteochijki tlen tijtlapejpenijkej pampa kema timomachtiyayaj, uelki kipajtiaj Lesli. Nopa kichijki nojua senkistok ma titlatekipanokaj.

Ipan 2008, se tonali ika tlayoua, kema sampa tiitstoyaj ipan Estonia technojnotskej tlen Ueyi kali Betel uan techiljuijkej tlaj ueliskia titlatekipanotij ipan República Democrática del Congo. Amo nijmatiyaya tlake nikijtos pampa kinekiyayaj ualmostla ma tikinnankilikaj. Amo tleno nikiljuik Lesli pampa nijnekiyaya kuali ma kochi. Pero na amo uelki nikochi pampa nikiljuiyaya Jehová tlen nechtekipachouayaya tlaj tiaskiaj África.

 Ualmostla, kema nikiljuik Lesli, tikijtojkej: “Jehová techiljuijtok ma tiakaj África. Amo uelis tikijtosej amo tiyolpakisej nopaya pampa ayamo tiauij”. Kema ya tijuikayayaj 16 xiuitl ipan Estonia tiajkej Kinsasa, capital tlen África. Ipan nopa kali Betel onkayaya miak xochitl uan nochi kuali mouikayayaj. Kema tiasitoj kampa timokauaskiaj Lesli kitlalik se tarjeta tlen kiijtouayaya: “Xiyolpaki kampa mitstitlanisej”. Tlauel tiyolpajkej kema tikinixmatkej toikniuaj, kema tikinmachtijkej maseualmej uan pampa titlatekipanojkej kej misioneros. Teipa techiljuijkej ma tijpaxalokaj sekinok kali Betel ipan 13 altepemej tlen África. Nopa kichijki ma tikitakaj itstokej miakej maseualmej katli amo sanse uan onka miak altepemej tlen tlauel yejyektsitsij. Teipa ayokmo nimajmajki uan tijtlaskamatilijkej Jehová pampa techtitlantoyaj África.

Ipan Congo-Kinsasa, toikniuaj techmakayayaj tlakualistli tlen amo kema tijkuajtoyaj, kej sayolimej uan sekinok piltlapialtsitsij. Pero kema tikitakej tlauel kinpaktiyaya toikniuaj, nojkia tijkuajkej uan tlauel techpaktik.

Teipa tikinuikilijkej se keski tlamantli tlen moneki uan tikinyolchikauatoj toikniuaj ipan altepemej ika este, kampa maseualmej moteuiyayaj uan kintlaijiyouiltiyayaj siuamej uan konemej. Nopaya toikniuaj amo kipiayayaj miak tlamantli. Tlauel timosentlachilijkej pampa inijuantij tlauel kiikneliaj Jehová, motemachiaj kinyolkuis katli miktokej uan pampa nochipa kichiuaj tlen Jehová itlanechikol techiljuia. Tlen kichiuaj toikniuaj, techpaleuik nojua kuali ma titlaneltokakaj. Se keskij toikniuaj ayokmo kipixtoyaj ininchaj yon tlen kitoktoyaj. Nopa kichijki ma nimoiljui kenijkatsa nima uelis tijpolosej tlen tijpiaj uan moneki tijchiuasej kampeka kuali titlaneltokasej. Maske toikniuaj kiixnamikiyayaj miak tlaouijkayotl, amo kema nijkajki tlaj tlauel mokuesouayayaj. Kema tikitayayaj kenijkatsa kiixnamikiyayaj tlaouijkayotl, techpaleuik nojkia kiampa ma tijchiuakaj.

Se tonali techiljuijkej tlen amo timoiljuijtoyaj. Techiljuijkej ma tiakaj ipan kali Betel tlen Hong Kong. Amo kema timoiljuijtoyaj tlaj tiitstoskiaj ipan  Oriente. Pero pampa Jehová nochipa techpaleuijtoya kema techtitlantoyaj sejkanok, nima tikijtojkej kena tiaskiaj. Ipan 2013 timochokilijkej pampa tikinkajtejkej touampoyouaj uan nopa yejyektsitsij tlamantli tlen onka ipan África uan amo tijmatiyayaj tlake panoskia teipa.

Tlauel ouij tijmatkej tiitstosej ipan Hong Kong pampa eli se ueyi altepetl uan itstokej maseualmej katli kampa ueli euaj. Uan nojua tlauel ouij tijmatkej tijyekosej tlajtoli chino cantonés. Pero toikniuaj kuali techselijkej uan tlauel techpaktik nopa tlakualistli tlen nopaya kichijchiuaj. Miakej peuayayaj kitekipanouaj Jehová uan pejki tlauel tlapatiyoua ipan nopa altepetl, yeka katli kinyakanaj Jehová itlajtoltemakauaj kiijtojkej kitlaliskiaj Kali Betel ipan seyok altepetl uan kinamakaskiaj nopa tlali tlen kipixtoyaj. Teipa, ipan 2015 tiajkej tiitstotoj ipan Corea del Sur kampa nojua titlatekipanouaj. Maske tlauel ouij nopa tlajtoli tlen nikaj tijtekiuiaj, toikniuaj techyolchikauaj uan techiljuiaj kuali tikamanaltij ipan nopa tlajtoli.

Kemantika ouij tijmatis timouampojchiuas ininuaya sekinok. Pero tikitakej tlaj tikiniljuiaj toikniuaj ma techpaxalokaj, techpaleuia nima ma timouampojchiuakaj ininuaya. Nochi toikniuaj kipiaj kuali ininyolo. Uan pampa Jehová tlauel kuali techchijchijtok, ueli kuali timouikaj ininuaya uan tikinikneliaj (2 Cor. 6:11).

Tikitstokej moneki tikinitasej sekinok kej Jehová kinita uan tijchiuasej kampeka tikitasej kenijkatsa Jehová techiknelia uan techyakana. Kema amo kuali tijyolmatiyayaj o timoiljuiyayaj sekinok amo kuali techitayayaj, sampa tijpouayayaj nopa tarjetas tlen techmakatoyaj touampoyouaj. Nochipa tikitaj kenijkatsa Jehová technankilia kema timomaijtouaj uan techyolchikaua.

Kej panotiajtok tonali, Lesli uan na tikitstokej moneki tijchiuasej kampeka tiitstosej sansejko maske kemantika tlauel timotekiuijtokej. Nojkia tikitstokej kema tijyekoua se yankuik tlajtoli, moneki tiyolpakisej. Uan sejse youali timoiljuiaj ipan se tlamantli tlen techpaktik uan tijtlaskamatiliaj Jehová.

Amo kema nimoiljuik tlaj nitlatekipanoskia kej misionero o niaskia niitstoti ipan sekinok altepemej. Pero nikitstok kema Jehová techpaleuia, nochi ueli tijchiuaj uan nopa kichiua tlauel ma niyolpaki. Nojkia nimoiljuia kej Jeremías kema kiijtok: “Tinechchiualtik ma nieli nimoteokamanalojka” (Jer. 20:7). Jehová techteochijtok ika tlen amo timoiljuijtoyaj. Nojkia kichijtok ma nitlejko ipan se avión. Kema nieliyaya niokichpil amo kema nimoiljuik tlaj tiaskiaj ipan miak altepemej. Tiajtokej ipan Kali Betel ipan makuili continentes. Uan tlauel nijtlaskamatilia Lesli pampa tlauel nechpaleuia kampa nechtitlanij uan kichiua ika pakilistli.

Nochipa timoiljuiaj tijchiuaj kampeka pampa tijnekij tijtekipanosej Jehová. Nochi nopa tlateochiualistli tlen tijselijtokej kinextia tlen tijselisej ipan nopa yankuik Tlaltipaktli kema Jehová kinteochiuas “nochi tlen yoltokej” (Sal. 145:16).