1. Kej kiijtoua 1 Pedro 5:2, ¿tlake tekitl kinmakatokej ueuejtlakamej?

 JEHOVÁ kinmakatok ueuejtlakamej se tekitl tlen tlauel ipati: ma kinmokuitlauikaj itekipanojkauaj. Inijuantij tlauel yolpakij kema kinpaleuiaj toikniuaj uan kuali kichiuaj ininteki (Jer. 23:4; xijpoua 1 Pedro 5:2). ¡Tlauel tiyolpakij pampa ipan tlanechikoli itstokej toikniuaj katli kiampa kichiuaj!

2. ¿Tlake tlaouijkayotl kiixnamikij se keskij ueuejtlakamej?

² Kema ueuejtlakamej kichiuaj se keski tekitl ipan tlanechikoli, kiixnamikij miak tlaouijkayotl pampa onka miak tekitl. Ma timoiljuikaj tlen kipanok Tony, se ueuejtlakatl tlen Estados Unidos. Ya kiitak amo ueliskia kiselis nochi tekitl tlen kimakayayaj. Tony kiijtoua: “Kema pejki kokolistli COVID-19 onkayaya miak tekitl, pampa monekiyaya tikitasej kenijkatsa timosentilisej uan titlajtolmoyauasej, uan na nijseliyaya nochi tekitl. Maske nijchiuayaya kampeka nijtlamichiuas, nochipa onkayaya miak tekitl. Nopa kichijki ayokmo ma nijpoua Biblia, ayokmo ma nimomachti noselti yon ma nimomaijto”. Ilir, se ueuejtlakatl tlen Kosovo, kiixnamijki seyok tlamantli. Ya itstoya kampa onkayaya tlauilankayotl uan kimatiyaya ouij kichiuas tlen Jehová itlanechikol kiijtouayaya. Ilir kiijtoua: “Tlauel nimajmajki kema kali Betel nechtlanejki ma nikinpaleuiti toikniuaj katli itstoyaj kampa mochiuayaya tlauilankayotl. Uan nimoiljuiyaya amo kuali kisaskia tlen nechnauatiyayaj”. Uan Tim, se misionero tlen Asia, ouij kimatiyaya kichiuas nochi tekitl tlen kimakatoyaj. Ya kiijtoua: “Kemantika nisiauiyaya uan amo kuali nijyolmatiyaya”. ¿Tlake kinpaleuis ueuejtlakamej kema kiampa kinpanos?

3. ¿Kenke nochi techpaleuia tlen kichijki Gedeón?

³ Ueuejtlakamej nojkia uelis kichiuasej kej kichijki Gedeón (Heb. 6:12; 11:32). Ya kinmokuitlauiyaya uan kinyakanayaya  israeleuanij (Juec. 2:16; 1 Crón. 17:6). Sanse kej Gedeón, ueuejtlakamej moneki kinmokuitlauisej toikniuaj ipan ni tonali tlen tlauel ouij (Hech. 20:28; 2 Tim. 3:1). Tlauel techpaleuis tlaj tikitasej tlen kichijki Gedeón pampa amo moueyimatki, kimatiyaya amo nochi ueli kichiua, tlaneltokak uan kiijiyouik nochi. Nojkia, techpaleuis ma tikinpatiitakaj uan ma tikinpaleuikaj ueuejtlakamej ika nochi toyolo (Heb. 13:17).

4. ¿Kenijkatsa Gedeón kinextik kimatiyaya amo nochi ueli kichiua amo uan moueyimatiyaya?

⁴ Gedeón kimatiyaya amo nochi ueliskia kichiuas uan amo moueyimatki. b Kema se iluikaejketl kiiljuik Jehová kitlapejpenijtoya ma kinmanaui israeleuanij, pampa madiáneuanij tlauel kintlaijiyouiltiyayaj, Gedeón amo moueyimatki uan kiijtok: “Niuala ipan nopa familia tlen más teikneltsi ipan nochi iixuiuaj Manasés. Uan ipan noteixmatkauaj nieli tlen más nipilsiltsi” (Juec. 6:15). Maske ya moiljuiyaya amo ueliskia kichiuas nopa tekitl, Jehová kimatiyaya kena ueliskia. Uan nochi kuali kiski pampa Jehová kipaleuik.

5. ¿Kema uelis kinextisej ueuejtlakamej amo moueyimatij uan amo ueli kichiuaj nochi?

⁵ Ueuejtlakamej kichiuaj kampeka amo moueyimatisej uan kimatij amo nochi ueli kichiuaj (Miq. 6:8; Hech. 20:18, 19). Amo motlepanitaj ika tlen uelij kichiuaj yon kema kuali kisa ininteki. Nojkia amo tlauel moyolkokouaj kema amo kuali kisa tlen kichiuaj. Kemantika uelis ouij kimatisej kinextisej amo moueyimatij. Uelis se ueuejtlakatl kiselis miak tekitl uan teipa kiitas amo ueli kitlamichiua. Ika tlen kichiua, uelis kiiljuisej kuali kiski nopa tekitl tlen kichijki o kiijilnamikisej. Kema kiampa panos, ¿kenijkatsa kinpaleuis ueuejtlakamej tlen Gedeón kichijki?

6. ¿Kenijkatsa ueuejtlakamej uelis amo moueyimatisej kej Gedeón? (Nojkia xikita tlaixkopinkayotl).

⁶ Xikiniljui sekinok ma mitspaleuikaj. Se akajya katli amo moueyimati, kimati amo nochi uelis kichiuas. Gedeón amo moueyimatki, yeka kikajki ma kipaleuikaj (Juec. 6:27, 35; 7:24). Ueuejtlakamej katli kuali kichiuaj ininteki, nojkia kiampa kichiuaj. Tony, katli tikijtojkej ipan párrafo 2, kiijtoua: “Nijseliyaya miak tekitl maske amo ueliyaya nijtlamichiua, pampa kiampa nechmachtijkej ma nijchiua kema  nieliyaya okichpil. Yeka kema nimomachtik iuaya nosiua, tikitakej kenijkatsa uelis tikitasej kej kinamiki se keski tekitl uan nijtlajtlanik tlake ueliskia nijpatlas. Nojkia nijtlachilik ipan jw.org se video tlen itoka Kej Jesús, ma tikinmachtikaj sekinok uan ma timotemachikaj ipan inijuantij”. Tony kiniljuik sekinok ma kipaleuikaj, ya kiijtoua: “Nama ipan tlanechikoli nochi timopaleuiaj. Uan ni tlauel nechpaleuijtok pampa nama ueli nijchiua se keski tlamantli tlen nechpaleuia nojua kuali ma nimouampojchiua iuaya Jehová”.

7. ¿Kenijkatsa ueuejtlakamej uelis kichiuasej kej Gedeón kema kintlaijiljuisej? (Santiago 3:13).

⁷ Amo nima xikualanikaj kema inmechtlaijiljuiaj. Ueuejtlakamej uelis ouij kimatisej kema kinijilnamikisej. Tlauel kinpaleuis tlen Gedeón kichijki pampa ya kimatiyaya nojkia mokuapolouayaya. Kema tlakamej tlen Efraín kitlaijiljuijkej, amo kualanki (Juec. 8:1-3). Ya amo moueyimatki, kuali kintlakakilik uan kinyoltlalik. Ueuejtlakamej katli tlalnamikij, kichiuaj kej Gedeón. Kema se akajya kintlaijiljuia, kuali kitlakakiliaj uan kinankiliaj ika miak tlaiknelili (xijpoua Santiago 3:13). Kema kiampa kichiuaj, tlapaleuiaj ma onka tlaseuilistli ipan tlanechikoli.

8. ¿Tlake moneki kichiuasej ueuejtlakamej kema kinueyichiuaj? Xikijto se neskayotl.

⁸ Xijueyichiuakaj Jehová ika nochi tlen inkichiuaj. Kema kiueyichijkej Gedeón pampa kintlanki madianeuanij, ya kiueyichijki Jehová (Juec. 8:22, 23). Ueuejtlakamej nojkia uelis kiueyichiuasej Jehová kema kuali kisas se tekitl (1 Cor. 4:6, 7). Kema se ueuejtlakatl kiiljuisej tlauel kuali tlamachtik, uelis kiijtos: “Nochi tlen nikijtok nijkixtik ipan Biblia uan nochi uelis tijyekosej miak tlamantli pampa Jehová itlanechikol techpaleuia”. Ueuejtlakamej uelis moiljuisej tlaj kiuejkapantlaliaj Jehová kema tlamachtiaj o inijuantij mouejkapantlaliaj. Ma timoiljuikaj tlen kipanok toikni Timothy. Kema kitekimakakej kej ueuejtlakatl, kipaktiyaya kiixtomas tlamachtili, ya kiijtoua: “Kema nijpeualtiyaya nitlamachtia, nikijtouayaya miak tlamantli tlen teyoltilanayaya, yeka toikniuaj nechiljuiyayaj san na kuali nitlamachtiyaya. Nikitak toikniuaj mosentlaliyayaj san ipan na uan amo ipan Jehová yon ipan Biblia”. Timothy kiitak monekiyaya kipatlas kej tlamachtiyaya uan kiampa amo mosentlaliskiaj ipan ya (Prov. 27:21). ¿Kenijkatsa kipaleuik? Ya kiijtoua: “Nama toikniuaj nechiljuiaj notlamachtil kinpaleuik ma kiixnamikikaj se kuesoli, ma kiijiyouikaj se tlaouijkayotl uan ma monechkauikaj ika Jehová. Nama tlauel niyolpaki ika tlen nechiljuiaj uan amo kej achtouia”.

9. ¿Kenijkatsa kinextik Gedeón kuali tlaneltokayaya uan amo majmauiyaya? (Xikita tlaixkopinkayotl ipan ipantsajka).

⁹ Kema Jehová kikajki Gedeón ma tetlajtolsenkaua, monejki kinextis tlaneltoka uan amo majmaui. Jehová kinauatik ma kixoleua nopa tlaixpamitl kampa itata kiueyichiuayaya Baal (Juec. 6:25, 26). Seyok tonali, Gedeón kinsentilik miakej itlateuijkauaj uan Jehová ompa kiiljuik san ma kintlapejpeni se keskij (Juec. 7:2-7). Uan teipa Jehová kinauatik ma kinteuiti ikualankaitakauaj tlajkoyoual (Juec. 7:9-11).

10. ¿Kema ueuejtlakamej ouij kimatisej tlaneltokasej?

¹⁰ Ueuejtlakamej moneki “nima tlaneltokasej” (Sant. 3:17). Kema se ueuejtlakatl kuali tlaneltoka, moyakana ika Biblia uan kichiua tlen toTeotsij itlanechikol kiiljuia, uelis kinpaleuis sekinok nojkia kiampa ma kichiuakaj. Maske kiampa kinamiki kichiuasej, kemantika uelis ouij kimatisej tlaneltokasej. Uelis ouij kimatisej momachtisej nopa  yajyankuik tlanauatili kampa kiijtoua kenijkatsa moneki kichiuasej ininteki. O motlajtlanisej tlaj nelia kinpaleuis uan kuali kisas tlen kiniljuia toTeotsij itlanechikol. O kimatisej ouij kichiuasej se tlamantli tlen ueliskia kichiuas ma kintsakuakaj. Kema kiampa panos, ¿kenijkatsa ueuejtlakamej uelis tlaneltokasej kej Gedeón?

11. ¿Tlake uelis kinpaleuis ueuejtlakamej ma tlaneltokakaj?

¹¹ Kuali ximomachtikaj tlanauatili uan xijchiuakaj. ToTeotsij kiiljuik Gedeón kenijkatsa kixoleuas tlaixpamitl kampa itata tlaueyichiuayaya, kanke kichijchiuaskia se yankuik tlaixpamitl kampa kiueyichiuaskia Jehová uan tlake tlapiali ueliskia temakas kej tlakajkaualistli. Uan Gedeón nima kichijki. Ipan ni tonali ueuejtlakamej kimatij tlake kichiuasej pampa Jehová itlanechikol kintitlanilia amatlajkuiloli, videos uan sekinok tlamantli. Nochi ni techpaleuia kuali ma tiitstokaj uan kuali ma titlaneltokakaj. Tlauel tikinikneliaj ueuejtlakamej pampa kichiuaj tlen toTeotsij itlanechikol kiniljuia. Kuali tiitstokej ipan tlanechikoli pampa kichiuaj nochi tlen kinnauatiaj (Sal. 119:112).

12. ¿Kenijkatsa uelis kichiuasej ueuejtlakamej tlen kiijtoua Hebreos 13:17, kema mopatla se keski tlamantli ipan Jehová itlanechikol?

¹² Xijchiuakaj tlen moneki kema mopatla se keski tlamantli. Ma tikilnamikikaj Jehová kiiljuik Gedeón ma kintlapejpeni san se keskij itlateuijkauaj (Juec. 7:8). Yeka uelis moiljuik: “¿Nelnelia moneki kiampa nijchiuas? ¿Kuali kisas tlen nijchiuas?”. Maske uelis kiampa moiljuik, ya tlaneltokak. ¿Kenijkatsa ueuejtlakamej kichiuaj kej Gedeón? Kichiuaj tlen toTeotsij itlanechikol kiniljuia kema mopatla se keski tlamantli (xijpoua Hebreos 13:17). Ipan xiuitl 2014, Katli kinyakanaj Jehová itlajtoltemakauaj kipatlakej kej motekiuia tomij tlen ika kichijchiuaj kali kampa titlaueyichiuaj (2 Cor. 8:12-14). Achtouia, toikniuaj katli kinchijchiuiliyayaj kali kampa tlaueyichiuaj kikuepayayaj nopa tomij tlen kintlanejtiyayaj. Uan ipan ni tonali, ayokmo kiampa mochiua pampa nama motekiuia tomij tlen temakaj toikniuaj ipan nochi Tlaltipaktli. Kema José, se ueuejtlakatl, kimatki ni tlamantli, kiijtok: “Nopa uelis tlapaleuis sejkanok, nikaj amo. Kiampa amo uelis kichijchiuasej yon se kali kampa titlaueyichiuaj”. Maske kiampa kiijtok, ni toikni tlaneltokak. ¿Kenke? Ya kiijtoua: “Nikilnamijki Proverbios 3:5, 6 kampa kiijtoua moneki nimotemachis ipan Jehová. ¡Tlen kichijtok Jehová itlanechikol nochipa kuali kistok! Nama mochijchijtok miak kali kampa titlaueyichiuaj, uan nojkia techpaleuijtok ma titlapaleuikaj ika nochi toyolo”.

13. 1) ¿Ipan tlake motemachiyaya Gedeón? 2) ¿Kenijkatsa ueuejtlakamej uelis kichiuasej kej ya? (Nojkia xikita tlaixkopinkayotl).

¹³ Amo ximajmauikaj kema inkichiuasej tlen  Jehová kipaktia. Maske Gedeón majmauiyaya uan ueliskia kipanos tlen amo kuali, nochipa kineltokak Jehová (Juec. 9:17). Kema Jehová kiiljuik Gedeón kenijkatsa kipaleuiskia, ya nojua motemachik Jehová amo kitlauelkauaskia kema kinmakixtiskia israeleuanij. Ueuejtlakamej katli itstokej kampa amo techkauaj ma titlaueyichiuakaj elij kej Gedeón. Maske uelis kintsakuasej, kipolosej initeki uan kintlaijiyouiltisej, amo majmauij uan kiitaj kenijkatsa mochiuas tlanechikoli uan kiyakanaj tlajtolmoyaualistli. c Ipan nopa ueyi tlaijiyouilistli, ueuejtlakamej monekis amo majmauisej uan kichiuasej tlen kinnauatisej maske ueliskia kinpanos tlen tlauel amo kuali. Uelis kiampa monekis kichiuasej kema kiniljuisej kenijkatsa techyakanasej uan tikiniljuisej maseualmej kintsontlamiltisej, tlen elis kejuak uejueyi tesiuitl. O kema techmatiltisej tlake monekis tijchiuasej kema Gog tlen Magog techteuis (Ezeq. 38:18; Apoc. 16:21).

14. ¿Tlake kichijki Gedeón maske tlauel siajtoya?

¹⁴ Gedeón tlauel siajki kema kinyakanki israeleuanij. Ya kintepotstokak madiáneuanij kema mochololtijkej ika tlayoua, pejki kintokilia ipan tlali Jezreel uan asito ipan ueyatl Jordán, uelis kampa panotiajki onkayaya miak kuapipitstli uan uitstli (Juec. 7:22). ¡Nochi ni tlamantli amo kitsakuilik! Maske ya uan nopa 300 itlateuijkauaj tlauel siajtoyaj, nojua kintokilijtiajkej madiáneuanij. Uan kema kinasitoj, kinmiktijkej (Juec. 8:4-12).

15. ¿Kenke ueuejtlakamej uelis tlauel siauisej?

¹⁵ Toikniuaj ueuejtlakamej uelis tlauel siauisej pampa moneki kinmokuitlauisej ininchampoyouaj uan toikniuaj. ¿Kenijkatsa ueuejtlakamej uelis kichiuasej kej Gedeón kema siauisej?

16, 17. 1) ¿Tlake kipaleuik Gedeón ma kichiua tlen Jehová kinauatijtoya? 2) ¿Ipan tlake uelis motemachisej ueuejtlakamej? (Isaías 40:28-31; nojkia xikita tlaixkopinkayotl).

¹⁶ Ximotemachikaj Jehová inmechpaleuis. Jehová kipaleuik Gedeón pampa motemachik ipan ya (Juec. 6:14, 34). Se tonali, Gedeón uan  itlateuijkauaj motlalojtiajkej uan kintepotstokatiajkej omej tlanauatianij tlen tlali Madián, katli yauiyayaj ipan inincamellos (Juec. 8:12, 21). Jehová kinpaleuik, yeka kinasitoj uan kinmiktijkej. Ipan ni tonali, ueuejtlakamej nojkia uelis motemachisej ipan Jehová, katli “axkema tlami ichikaualis, niyon axkema tlaxikoua”. Jehová kinmakas chikaualistli kema monekis (xijpoua Isaías 40:28-31).

¹⁷ Ma tikitakaj tlen kipanok Matthew, ya eli se Katli kamanaltij ininuaya tepajtianij. ¿Tlake kipaleuijtok nojua ma kinpaleui toikniuaj? Ya kiijtoua: “Tlauel nechpaleuijtok tlen kiijtoua Filipenses 4:13. Kema tlauel nisiaui, nikiljuia Jehová ma nechpaleui, ma nechmaka chikaualistli uan kiampa uelis nikinpaleuis toikniuaj. Ipan nopa tlalochtli nijmachilia Jehová nechmaka chikaualistli uan kiampa nojua kuali nitlapaleuia”. Sanse kej Gedeón, ueuejtlakamej kichiuaj kampeka kinpaleuisej toikniuaj ika tlaiknelili maske kiixnamikij tlaouijkayotl. Maske ueuejtlakamej amo uelis kichiuasej nochi, uelis motemachisej Jehová kintlakakilis uan kinpaleuis nojua ma kichijtokaj ininteki (Sal. 116:1; Filip. 2:13).

18. Kej tikitakej ipan ni tlamachtili, ¿kenijkatsa ueuejtlakamej uelis kichiuasej kej Gedeón?

¹⁸ Kej tikitstokej, ueuejtlakamej uelis kiyekosej miak tlamantli ika tlen kichijki Gedeón. Moneki kiilnamiktosej amo uelis kichiuasej nochi tekitl ipan tlanechikoli. Moneki amo moueyimatisej kema kiniljuisej kuali kichijkej ininteki uan amo nima moyolkokosej o kualanisej kema kinijilnamikisej. Uan pampa tiitstokej ipan itlamia tonali, moneki kikauasej ma kinyakana Jehová itlanechikol, amo majmauisej uan motemachisej Jehová kinpaleuis maske kiixnamikisej tlaouijkayotl. Tlauel tikintlepanitaj uan tikinpatiitaj ueuejtlakamej pampa kichiuaj se kuali tekitl ipan tlanechikoli (Filip. 2:29).