Tlaj tijnekij Jehová kuali ma techita, moneki titlaneltokasej ipan ya. Pero Biblia kiijtoua “amo nochi tlaneltokaj” (2 Tes. 3:2). Kema apóstol Pablo kiijkuilok nopa tlajtoli, kamanaltiyaya “tlen maseualmej katli amo kualmej uan katli tlauel fiero kichiuaj”, katli kinekiyayaj kichiuilisej tlen amo kuali. Tlen Pablo kiijtok nojkia uelis motekiuis para sekinok maseualmej, kej katli amo tlaneltokaj ipan toTeotsij katli kichijchijki nochi tlen onka (Rom. 1:20). Uan maske sekij kiijtouaj itstok se akajya katli kipia miak chikaualistli, amo kiijtosneki tlaneltokaj. Jehová amo kineki san ma tikijtokaj titlaneltokaj.

Uajka, tlaj tijnekij tijyolpakiltisej Jehová, moneki timotemachisej ya nelia itstok uan tijneltokasej ya “kinteochiua” katli kuali tlaneltokaj (Heb. 11:6). Ichikaualis Dios kichiua ma tijnextikaj kuajkuali tlamantli, uan totlaneltokilis eli se tlen nopa kuajkuali tlamantli. Uan tlaj tijnekij tijpiasej ichikaualis Dios, moneki tijtlajtlanisej kema timomaijtouaj (Luc. 11:9, 10, 13). Nojkia uelis tijselisej ichikaualis tlaj tijpouasej Biblia, pampa kema moijkuilok Dios kitekiuik ichikaualis. Uan teipa timoyoliljuisej ipan tlen tijpojkej uan tijchiuasej ipan tonemilis tlen tijyekojkej. Tlaj kiampa tijchiuasej, ichikaualis Dios techpaleuis kuali ma titlaneltokakaj uan Jehová kipaktis totlaneltokilis.