TLAMACHTILI 23
UIKATL 28 Ximouampojchiua iuaya Jehová
Eli se ueyi tlateochiualistli pampa Jehová techtlaneui ichaj
“Nimochantis uan niitstos tlatlajko yajuantij, uan na ni elis niininDios” (EZEQ. 37:27).
TLEN MOIXTOMAS
Ni tlamachtili techpaleuis más ma tijpatiitakaj pampa tiitstokej Jehová ichaj. Nojkia tikitasej kenijkatsa techmokuitlauia.
1, 2. ¿Tlake tlateochiualistli kiseliaj nochi Jehová itekipanojkauaj?
TLAJ se akajya mitstlatsintokiskia ¿kenijkatsa tikita Jehová? Uelis ta tijnankiliskia: “Jehová eli nouampo, noTata uan noDios”. O uelis tikijtoskia sekinok tlamantli. Pero ¿tikijtoskia Jehová mitstlanejtok ichaj?
2 Tlanauatijketl David kiijtok Jehová kuali mouampojchijtok ininuaya itekipanojkauaj, eli sanse kej kema se akajya kintlaneui sekinok ma yakaj ichaj uan kuali kinselia. Ya kiijtok: “TOTEKO, ¿ajkeya uelis kalakis ipan mochaj kampa ta timokaua ipan motepe tlen tlatsejtseloltik?” (Sal. 15:1). Tlen kiijtok David, techmachtia Jehová techselia ichaj o kineki mouampojchiuas touaya. ¡Eli se ueyi tlateochiualistli!
JEHOVÁ KINEKI MA TIITSTOKAJ ICHAJ
3. ¿Ajkia achtoui kitlanejki Jehová, uan kenijkatsa kiyolmatiyayaj?
3 Kema Jehová ayamo kichijchiuayaya nochi tlen onka, itstoya iselti. Yeka, katli achtoui kitlanejki ichaj elki iachtouiKone uan Jehová tlauel yolpajki kema kiselik. Biblia kiijtoua Jehová uan ikone tlauel yolpakiyayaj pampa itstoyaj sansejko (Prov. 8:30, TNM).
4. ¿Ajkia sekinok kintlanejki Jehová ipan ichaj?
4 Teipa Jehová kinchijchijki ángeles uan nojkia kintlanejki ichaj. Biblia kiijtoua inijuantij elij ikoneuaj Dios uan tlauel yolpakij pampa itstokej iuaya Jehová (Job 38:7; Dan. 7:10). Ipan miak xiuitl, Jehová san mouampojchijki ininuaya katli itstoyaj iluikak. Pero teipa Jehová kinchijchijki maseualmej uan nojkia kintlanejki ichaj. Se keskij katli kintlanejki elkej Enoc, Noé, Abrahán uan Job. Biblia kiijtoua inijuantij eliyayaj iuampoyouaj Dios pampa nochipa kineltokakej (Gén. 5:24; 6:9; Job 29:4; Is. 41:8).
5. ¿Tlake techmachtia nopa tlajtolpanextili tlen Ezequiel 37:26, 27?
5 Uan kej panotiajtok xiuitl, Jehová nojua kintlanejtok iuampoyouaj ipan ichaj. Ma tikitakaj nopa tlajtolpanextili tlen Ezequiel 37:26, 27 (xijpoua). Ni tlajtolpanextili, kinextia Jehová tlauel kineki mouampojchiuas ininuaya itekipanojkauaj. Jehová kiijtok kichiuaskia “se tlajtolsenkauali ininuaya tlen kiniljuis para temachtli kipiyasej tlaseuilistli”. Tlen kiijtoua ni texto moaxitiskia kema katli kintlapejpenijtokej yasej iluikak uan katli motemachiaj itstosej ipan Tlaltipaktli, kejuak itstoskiaj sansejko ipan Jehová ichaj (Juan 10:16). Uan ipan ni tonali kiampa mochijtok.
JEHOVÁ TECHMOKUITLAUIA MASKE TIITSTOKEJ KAMPA UELI
6. ¿Kema tikalajkej ichaj Jehová, uan kanke eltok?
6 Uejkajkia, se yoyonkali tlapaleuiyaya para nopaya mosiajkauasej kema tlauel tlaauetsiyaya, tlaajakayaya o tlatotoniayaya. Uan kema se akajya kitlaneuiyayaj ma mokaua ipan se yoyonkali, motemachiyaya kuali kiseliskiaj. Uelis tikijtosej tojuantij kejuak tikalakij Jehová ichaj, kema tijmaktiliaj tonemilis (Sal. 61:4). Nopaya tijpiaj tlen techpaleuia kuali ma titlaneltokakaj uan ueli tiitstokej ininuaya sekinok katli Jehová nojkia kintlanejtok. Pero ¿kanke eltok ichaj Jehová? Amo eltok sejkotsi, eltok kampa itstokej katli kuali kitekipanouaj. Kiampa kiitstokej toikniuaj katli yajtokej ipan sekinok altepemej, uelis pampa yajkej ipan Ueyi tlanechikolistli tlen san kemantika mochiua uan kinixmatkej sekinok katli nojkia itstokej ichaj Dios (Apoc. 21:3).
7. ¿Kenke tikijtouaj Jehová itekipanojkauaj katli amo kitlauelkajkej uan ya mijkej nojua itstokej ipan ichaj? (Nojkia xikita tlaixkopinkayotl).
7 ¿Uan tlake kinpanos katli kuali kitekipanojkej Jehová uan ya mijkej? ¿Nojua itstokej ipan ichaj? Kena, kiampa tikijtouaj pampa Biblia kinextia inijuantij kejuak nojua yoltokej pampa Jehová amo kinilkajtok. Jesús kiijtok: “Moyolkuisej katli miktokej, pampa hasta Moisés kiampa kinextik ipan tlapoualistli tlen nopa xiuitl tlen uitstso, kema kiijtok Jehová eli ‘iDios Abrahán, iDios Isaac uan iDios Jacob’. Ya amo eli ininDios katli miktokej, eli ininDios katli yoltokej, pampa ya kinita nochi inijuantij yoltokej” (Luc. 20:37, 38).
Dios itekipanojkauaj katli ya mijkej uan amo kitlauelkajkej, nojua itstokej Jehová ichaj. (Xikita párrafo 7).
TLEN TIJSELIAJ UAN TLEN MONEKI TIJCHIUASEJ
8. ¿Kenijkatsa techpaleuia pampa tiitstokej ichaj Jehová?
8 Sanse kej se yoyonkali tepaleuia kema tlaauetsi, tlaajaka, tlatotonia uan kipaleuia kema se akajya kineki mosiajketsas. Ichaj Jehová nojkia techpaleuia kuali ma titlaneltokakaj uan ma timotemachikaj teipa kuali tiitstosej. Kema timonechkauiaj ika Jehová, Satanás amo uelis kichiuas se tlamantli tlen nochipa techtlaijiyouiltijtos (Sal. 31:23; 1 Juan 3:8). Ipan yankuik Tlaltipaktli Jehová kinpaleuis iuampoyouaj nojua kuali ma tlaneltokakaj uan nojkia kichiuas ayokmo ma mikikaj (Apoc. 21:4).
9. ¿Tlake moneki kichiuasej katli kinekij itstosej ichaj Jehová?
9 Eli se ueyi tlateochiualistli pampa Jehová techkaua ma tiitstokaj ichaj uan ma timouampojchiuakaj iuaya. ¿Pero tlake moneki tijchiuasej tlaj tijnekij nojua tiitstosej ichaj? Tlaj se akajya techtlaneuiskia ichaj, techpaktiskia tijmatisej tlake kineki ma tijchiuakaj, uelis kinekiskia ma tijpojpouakaj tozapatos pampa tijualikaj sokitl uan tijchiuaskia ika pakilistli. Katli tiitstokej ichaj Jehová, nojkia tijnekij tijmatisej tlake kineki ma tijchiuakaj uan kiampa nojua tiitstosej ichaj. Tlauel tikikneliaj, yeka tijchiuaj kampeka nochipa tijyolpakiltisej (Col. 1:10). Jehová eli touampo pero nojkia eli toDios uan toTata, yeka moneki ma tijtlepanitakaj (Sal. 25:14). Nochipa ma tikilnamikikaj ajkia eli ya. Tlaj tijmakasij tikixpanosej Jehová, techpaleuis amo ma tijchiuakaj tlen amo kuali uan kuali ma timonejnemiltikaj iixpa (Miq. 6:8).
JEHOVÁ AMO TECHIKOITA
10, 11. ¿Tlake neskayotl kinextia Jehová amo kinchikoita itekipanojkauaj?
10 Jehová amo kema kinchikoita itekipanojkauaj (Rom. 2:11). Ma tikilnamikikaj kenijkatsa kinpaleuik israeleuanij kema itstoyaj ipan uaktok tlali tlen sinaí.
11 Kema Jehová ya kinkixtijtoya israeleuanij tlen Egipto, kintekimakak se keskij tlakamej para ma tlapaleuikaj ipan tabernáculo kej sacerdotes. Nojkia kiniljuik levitajmej ma tlapaleuikaj ika sekinok tekitl. ¿Kiijtosneki Jehová tlauel kinmokuitlauiyaya katli tekitiyayaj ipan tabernáculo o katli itstoyaj nechka? Amo, Jehová nochi kinmokuitlauiyaya sanse.
12. ¿Kenijkatsa Jehová amo kinchikoitak israeleuanij kema itstoyaj ipan uaktok tlali? (Éxodo 40:38; nojkia xikita tlaixkopinkayomej).
12 Nochi katli itstoyaj nopaya ueliyayaj mouampojchiuaj iuaya Jehová, maske itstoyaj uejka, nechka o amo kichiuayayaj se tekitl ipan tabernáculo. Jehová kichijki nochi israeleuanij ma kiitakaj nopa mixtli uan nopa tlitl tlen motlaliyaya ipan itsonpa nopa tabernáculo (xijpoua Éxodo 40:38). Yeka kema nopa mixtli moijkueniyaya sejkanok, nochi ueliyayaj kiitaj maske sekij itstoyaj uejka tlen nopa tabernáculo, kiajokuiyayaj nochi tlen kipiayayaj, ininyoyonkaljuaj uan sansejko kisteuayayaj (Núm. 9:15-23). Nojkia, nochi kikakiyaya kema monekiyaya yasej sejkanok pampa chikauak kipitsayayaj ome tlapitsali tlen kichijchijtoyaj ika plata (Núm. 10:2). Uajka katli itstoyaj nechka tlen tabernáculo, amo kiijtosneki inijuantij más kuali mouampojchijtoyaj iuaya Jehová. Nochi katli nopaya itstoyaj ueliyayaj kejuak itstosej ichaj Jehová, kikauayayaj ma kinyakana ika pakilistli uan kinmokuitlauiyaya. Ipan ni tonali nojkia kiampa pano, maske tiitstokej kampa ueli, Jehová techiknelia uan techmokuitlauia.
Nopa tabernáculo mokauayaya tlatlajko kampa mokauayayaj israeleuanij, nopa kinextiyaya Jehová amo techikoita. (Xikita párrafo 12).
NAMA JEHOVÁ NOJKIA KINEXTIA AMO TECHIKOITA
13. ¿Kenijkatsa Jehová kinextia amo techikoita ipan ni tonali?
13 Se keskij toikniuaj mochantijtokej nechka kali Betel o tlen Ueyi Kali Betel. Toikniuaj katli tlapaleuiaj nopaya ika se keski tekitl tlen mochiua, ueli kinixmatij sekinok toikniuaj katli kiyakanaj se keski tekitl. Nojkia se keskij tepaxalouaj chijchikuasej metstli o senkistok kitekipanouaj Jehová. Pero amo nochi toikniuaj kiampa tlatekipanouaj. Tlaj ta amo ueli senkistok tijtekipanoua Jehová, xikilnamiki ya tlauel mitsiknelia, kineki xiitsto ichaj uan mitsmokuitlauia (1 Ped. 5:7). Dios mitsmakas tlen mitspaleuis kuali xitlaneltoka, mitsyakanas uan mitsmokuitlauis sanse kej kichiua ika nochi itekipanojkauaj.
14. ¿Ika tlake seyok tlamantli Jehová kinextia amo techikoita?
14 Jehová nojkia kinextijtok amo techikoita pampa kichijtok maseualmej tlen nochi Tlaltipaktli ma kipiakaj Biblia uan ma kiixmatikaj. Biblia kiijkuilojkej ika eyi tlajtoli: hebreo, arameo uan griego. Katli uelij kipouaj Biblia ipan se tlen ni tlajtoli, ¿más kuali mouampojchijtokej iuaya Jehová? Amo, amo kiampa pano (Mat. 11:25).
15. Xikijto tlake seyok tlamantli kinextia Jehová amo techikoita (nojkia xikita tlaixkopinkayomej).
15 Jehová kuali techita. Amo san pampa kuali timomachtijtokej o tijyekouaj nopa tlajtoli tlen ika moijkuilok Biblia. Jehová amo san kinmaka tlalnamikilistli katli tlauel ixtlamatij, ya kinmaka nochi maske amo tlauel momachtijtokej. Biblia motlajtolkueptok ipan miak tlajtoli. Yeka maseualmej katli kampa ueli euaj, ueli kiyekouaj tlen Biblia tlamachtia uan mouampojchiuasej iuaya Dios (2 Tim. 3:16, 17).
Biblia kitlajtolkueptokej ipan miak tlajtoli, nopa kinextia Jehová amo techikoita. (Xikita párrafo 15).
NOJUA MA TIITSTOKAJ ICHAJ JEHOVÁ
16. ¿Ajkia inijuantij kinselia Jehová ichaj? (Hechos 10:34, 35).
16 Eli se ueyi tlateochiualistli tiitstosej Jehová ichaj. Ya kipia kuali iyolo, techiknelia uan kuali techselia. Amo techchikoita maske amo tieuaj ipan sanse altepetl, amo sanse tijchiuaj se keskij tlamantli, amo sanse timomachtijtokej, amo sanse toxiui, maske tlakamej o siuamej. Ya san kineki ma tijtlepanitakaj itlanauatiljuaj (xijpoua Hechos 10:34, 35).
17. ¿Tlake tikitasej ipan nopa seyok tlamachtili?
17 Ipan Salmo 15:1, David kichijki ni tlajtlanili: “TOTEKO, ¿ajkia uelis kalakis ipan mochaj kampa ta timokaua ipan motepe tlen tlatsejtseloltik? ¿Ajkia uelis mokauas nepa para tijmokuitlauis?”. Uan teipa ika ichikaualis Jehová, kinankilik nopa tlajtlanili. Ipan tlamachtili 24 tikitasej se keski tlamantli tlen techpaleuis nojua ma tiitstokaj Jehová ichaj.
Uikatl 32 ¡Xiitsto inechka Jehová!
