1. ¿Tlake techpaleuis nojua tijtekipanojtosej Jehová maske tikixnamikisej tlaouijkayotl?

 BIBLIA kiijtoua ipan ni tonali tiitstokej “nelia fiero” (2 Tim. 3:1). Nochi kiixnamikij tlaouijkayotl, pero katli tijtekipanouaj Jehová nojkia tikijiyouiaj kema techtlatsakuiltiaj uan amo techkauaj ma titlajtolmoyauakaj. ¿Tlake techpaleuis nojua ma tijtekipanojtokaj Jehová? Tlauel techpaleuis tlaj tikilnamikisej Jehová eli Dios katli nelia “itstok” (Jer. 10:10; 2 Tim. 1:12).

2. ¿Kenijkatsa Jehová kinextia ya nelia itstok?

² Jehová nelia itstok, kiita nopa tlaouijkayotl tlen tikixnamikij uan kineki techpaleuis (2 Crón. 16:9; Sal. 23:4). Kema tikilnamikij nopa tlamantli, techmaka chikaualistli para tikijiyouisej tlen ueli tlaouijkayotl. Kiampa kipanok tlanauatijketl David.

3. ¿Tlake kinejki kiijtos David kema kiijtok: “¡Jehová itstok!”?

³ David kuali kiixmatiyaya Jehová uan motemachiyaya ipan ya. Yeka kiiljuik ma kipaleui kema tlanauatijketl Saúl uan isoldados kinekiyayaj kimiktisej (Sal. 18:6). Kema kiitak Jehová kinankilik uan kimakixtik, David kiijtok: “¡Jehová itstok!” (Sal. 18:46, TNM). ¿Tlake kinejki kiijtos David? Se amochtli kiijtoua ika tlen kiijtok, kinextik tlauel motemachiyaya ipan  Jehová uan kiitayaya “kej se Dios katli nelia itstok uan ajachika kinpaleuia itekipanojkauaj”. David kiitak kenijkatsa Jehová kipaleuijtoya, nopa kichijki más ma motemachi Jehová nelia itstok uan kipaleuik nojua ma kitekipano uan ma kiueyichiua (Sal. 18:28, 29, 49).

4. ¿Kenijkatsa techpaleuia tlaj tikitaj Jehová nelia itstok?

⁴ Tlaj timotemachiaj Jehová nelia itstok, techpaleuis ma tijtekipanokaj ika pakilistli. Techmakas chikaualistli para ma tikijiyouikaj tlen ueli tlaouijkayotl uan nojua kuali ma tijtekipanojtokaj. Nojkia techpaleuis ma timosentlalikaj amo kema tijtlauelkauasej.

DIOS KATLI NELIA ITSTOK MITSMAKAS CHIKAUALISTLI

5. ¿Tlake techpaleuia ma tikixnamikikaj tlaouijkayotl? (Filipenses 4:13).

⁵ Uelis tikijiyouisej tlen ueli tlaouijkayotl tlaj tikilnamikij Jehová nelia itstok uan ya nochipa techpaleuis. Tijmatij Jehová ueli kisenkaua tlen ueli kuesoli. Ya kipia miak chikaualistli uan techpaleuis ma tikijiyouikaj tlen techpano (xijpoua Filipenses 4:13). Nopa kichiua ma timotemachikaj ipan Jehová kema tikixnamikij tlaouijkayotl. Kema tikitaj Jehová techpaleuia ika kuesoli tlen amo tlauel ueyi, kichiua ma timotemachikaj ya nojkia techpaleuis kema tikixnamikisej uejueyi tlaouijkayotl.

6. ¿Tlake kipaleuik David más ma motemachi ipan Jehová?

⁶ Ma tikitakaj ome tlamantli tlen kipanok David, tlen kipaleuik más ma motemachi ipan Jehová. Kema eliyaya telpokatl uan kinmokuitlauiyaya borregojmej tlen itata, ualajki se león uan kiuikak se pilborregojtsi uan seyok tonali se oso nojkia kiampa kichijki. Kema kiampa panok, David amo majmajki, kinmiktik nopa león uan nopa oso uan kinmanauik nopa pilborregojtsitsij. Kimatiyaya Jehová kimakatoya nopa chikaualistli uan amo iselti kinmanauijtoya (1 Sam. 17:34-37). David amo kema kiilkajki tlen kipanok. Moyoliljuik ipan nopa tlamantli uan kipaleuik más ma motemachi Dios katli nelia itstok kipaleuiskia teipa.

7. ¿Ipan tlake mosentlalik David, uan kenijkatsa nopa kipaleuik amo ma majmaui kema kiteuiskia Goliat?

⁷ Teipa, uelis kema David nojua eliyaya piltelpokatsi, yajki kampa itstoyaj soldados tlen Israel. Kinitak soldados tlauel majmajtoyaj pampa se filisteaejketl katli itoka Goliat, kiniljuiyaya: “Ni tonal niinmechpejpeualtia inisraelitasoldados” (1 Sam. 17:10, 11). Nopa soldados tlauel majmauiyayaj pampa mosentlaliyayaj ipan tlen Goliat kiniljuiyaya uan pampa eliyaya tlauel uejkapantik (1 Sam. 17:24, 25). Pero David amo san mosentlalik ipan nopa tlamantli. Kiitak Goliat amo san kintlaijiljuiyaya israelitasoldados, ya kintlaijiljuijtoya nochi itlateuijkauaj “Dios tlen nelia itstok” (1 Sam. 17:26). David nochipa moiljuiyaya ipan Jehová. Kimatiyaya kipaleuijtoya kema kinmokuitlauiyaya borregojmej uan motemachiyaya nojua kiampa kichiuaskia. Ika itlapaleuil Jehová, David kimiktik Goliat (1 Sam. 17:45-51).

8. ¿Tlake techpaleuis más ma timotemachikaj ipan Jehová kema tikixnamikisej tlaouijkayotl? (Nojkia xikita tlaixkopinkayotl).

⁸ Sanse kej David, uelis tikixnamikisej tlen techpanos tlaj tikilnamikisej Jehová katli nelia itstok kineki techpaleuis (Sal. 118:6). Tlaj timoyoliljuiaj ipan tlen Jehová kichijki uejkajkia, techpaleuis más ma timotemachikaj ipan ya. Uelis tijpouas ipan Biblia, kenijkatsa Jehová kinmanauik itekipanojkauaj (Is. 37:17, 33-37). Nojkia xikita tlamachtili tlen kisa ipan jw.org, kampa kiijtoua kenijkatsa  Jehová kinpaleuijtok toikniuaj ipan ni tonali. Uan xikilnamiki kenijkatsa Jehová mitspaleuijtiualajtok. Amo kenijki ximoiljui tlaj Jehová amo mitspaleuijtok ika se ueyi tlamantli kej tijmiktis se león o se oso. Xikilnamiki Jehová tlauel mitspaleuijtok ipan monemilis. Ya kineki elis mouampo (Juan 6:44). Uan mitspaleuijtok nojua xijtekipanojto. Uelis tikiljuis Jehová ma mitspaleui tikilnamikis kenijkatsa mitsnankilijtok kema timomaijtoua, kenijkatsa mitsmakatok tlen mitspolouayaya uan kenijkatsa mitsmokuitlauijtok kema tikixnamiktok tlen tlauel ouij. Tlaj timoyoliljuia kenijkatsa Jehová mitspaleuijtok, kichiuas más ximotemachi ya nojua kiampa kichijtos.

9. ¿Kenijkatsa moneki tikitasej tlaouijkayotl tlen tikixnamikij? (Proverbios 27:11).

⁹ Kema tijmatij Jehová nelia itstok, techpaleuia amo tlauel ma timotekipachokaj kema tikixnamikij tlaouijkayotl. Satanás kiijtoua kema tikixnamikisej tlaouijkayotl o kuesoli, tijtlauelkauasej Jehová (Job 1:10, 11; xijpoua Proverbios 27:11). Yeka, tlaj amo tijtlauelkauaj tijnextisej tlauel tikikneliaj Jehová uan Satanás san istlakati. ¿Tekichiuanij amo mitskaua xijueyichiua Jehová? ¿Amo tijpia tomij? ¿Amo kinekij mitstlakakilisej kema titlajtolmoyaua? O ¿Tikixnamiki seyok tlamantli? Tlaj tikixnamiktok se tlen ni tlaouijkayotl, uelis tijyolpakiltis Jehová ika tlen tijchiuas. Xikilnamiki, ya amo kikauas tlauel ximotetsopa ika nopa kuesoli (1 Cor. 10:13). Ya mitspaleuis xikijiyoui.

DIOS KATLI NELIA ITSTOK MITSTEOCHIUAS

10. ¿Tlake tlateochiualistli kiseliaj katli kiueyichiuaj Jehová?

¹⁰ Jehová kinteochiua katli kiueyichiuaj (Heb. 11:6). Ipan ni tonali kichiua kuali ma tiitstokaj, ma tiyolpakikaj uan teipa kichiuas nochipa ma tiitstokaj. Timotemachiaj ya kineki techteochiuas uan kipia nopa chikaualistli para kichiuas. Nopa techpaleuia nojua kuali ma tijtekipanojtokaj Jehová kej  kichijkej itekipanojkauaj uejkajkia. Ma tikitakaj tlen kichijki Timoteo (Heb. 6:10-12).

11. ¿Tlake kipaleuik Timoteo kuali ma tlatekipano ipan tlanechikoli? (1 Timoteo 4:10).

¹¹ (Xijpoua 1 Timoteo 4:10). Timoteo motemachik ipan Dios. Ya kimatiyaya Jehová kiteochiuaskia, yeka kuali kitekipanok uan kinpaleuik toikniuaj. ¿Kenijkatsa kichijki? Apóstol Pablo kiiljuik Timoteo, monekiyaya kuali tlamachtis uan kuali monejnemiltis pampa kiampa kinpaleuiskia telpokamej uan katli ya uejueyij nojkia ma kichiuakaj. Kimakakej se keski tekitl tlen ouij, kej kintlajtolmakas toikniuaj ika tlaiknelijkayotl (1 Tim. 4:11-16; 2 Tim. 4:1-5). Timoteo motemachiyaya maske sekinok amo kipatiitaskiaj tlen kichiuayaya, Jehová kiteochiuaskia (Rom. 2:6, 7).

12. ¿Tlake kinpaleuis ueuejtlakamej kuali ma kichiuakaj ininteki? (Nojkia xikita tlaixkopinkayotl).

¹² Sanse kej Timoteo, ueuejtlakamej uelis motemachisej Jehová kiita uan kipatiita tlen kichiuaj. Inijuantij kinmokuitlauiaj toikniuaj, tlamachtiaj, tlajtolmoyauaj, miakej tlapaleuiaj kema kichijchiuaj kali kampa titlaueyichiuaj uan kinpaleuiaj toikniuaj kema kintlasojsoljuilia se tlenijki. Sekij toikniuaj kinpaxalouaj kokoyanij ipan hospitales o kamanaltij ininuaya tepajtianij. Ueuejtlakamej kimatij eli Jehová katli kiyakana tlanechikoli uan amo maseualmej. Yeka, kichiuaj ininteki ika nochi ininyolo uan motemachiaj Dios kinteochiuas (Col. 3:23, 24).

13. ¿Tlake kiyolmati Jehová kema kiita tijchiuaj kampeka tijtekipanosej?

¹³ Maske amo nochi uelis titlatekipanosej kej ueuejtlakamej, kena uelis tijmakasej Jehová se keski tlamantli. Ya kipatiita kema tijchiuaj kampeka tijtekipanosej ika nochi toyolo. Kipatiita nopa tomij tlen titemaka para titlapaleuis ma momoyaua nopa kuali tlamachtili, maske amo ueli titemaka miak. Tlauel yolpaki kema kiita tijchiua kampeka titlanankilis ipan tlanechikoli  maske ouij tijmati uan kema tijtlapojpoljuia katli mitsyolkokok. Maske timoiljuia amo ueli tijtekipanoua Jehová kej ta mitspaktiskia, xikilnamiki ya kipatiita tlen kena ueli tijchiua. Jehová tlauel mitsiknelia uan mitsteochiuas (Luc. 21:1-4).

NOCHIPA MA TIITSTOKAJ INECHKA DIOS KATLI NELIA ITSTOK

14. ¿Kenke tikijtouaj tlaj kuali timouampojchiuasej iuaya Jehová techpaleuis amo ma tijtlauelkauakaj? (Nojkia xikita tlaixkopinkayotl).

¹⁴ Tlaj tikitaj Jehová nelia itstok, amo tijtlauelkauasej. José kiampa kichijki, kema amo kinejki momekatis. Ya kimatiyaya Dios nelia itstok uan amo kinekiyaya kiixpanos (Gén. 39:9). Tlaj tijnekij más kuali timouampojchiuasej iuaya Jehová, moneki tijkixtisej tonali para timomaijtosej uan timomachtisej Biblia. Sanse kej José, tlaj kuali timouampojchiuasej iuaya Jehová, amo tijnekisej tijchiuasej tlen ya amo kipaktia (Sant. 4:8).

15. ¿Tlake techmachtia tlen kichijkej israeleuanij katli itstoyaj ipan uaktok tlali? (Hebreos 3:12).

¹⁵ Katli ayokmo motemachiaj ipan Jehová, nima uelis mouejkatlalisej tlen ya. Ma timoiljuikaj tlen kinpanok israeleuanij kema itstoyaj ipan uaktok tlali. Inijuantij kimatiyayaj Jehová nelia itstok, pero moiljuijkej Jehová amo ueliskia kinmakas tlen kinpolouayaya. Yeka tlatsintokakej: “¿Itstok TOTEKO touaya o axaka?” (Éx. 17:2, 7). Uan teipa, kiijixnamijkej Dios. Tojuantij amo tijnekij tijchiuasej kej inijuantij (xijpoua Hebreos 3:12).

16. ¿Tlake ueliskia kichiuas ayokmo kuali ma titlaneltokakaj?

¹⁶ Ipan ni tonali eli ouij tiitstosej inechka Jehová. Miakej maseualmej kiijtouaj Dios amo itstok. Uan katli amo kitekipanouaj Jehová, nesi kejuak kuali itstokej. Ni tlamantli uelis kichiuas ayokmo kuali ma titlaneltokakaj. Maske tijmatisej ya nelia itstok, uelis ayokmo timotemachisej ya kena techpaleuis. Kiampa kipanok katli kiijkuilok  Salmo 73, ya kiitak katli amo kitlepanitayayaj iTlanauatiljuaj Dios, yolpakiyayaj uan amo tleno kinpanoyaya. Nopa kichijki ma moiljui tlaj nelia eliyaya ipati kitekipanos Jehová o amo (Sal. 73:11-13).

17. ¿Tlake techpaleuis nochipa tiitstosej inechka Jehová?

¹⁷ ¿Tlake kipaleuik katli kiijkuilok nopa Salmo ma kipatla kej moiljuiyaya? Moyoliljuik ipan tlen kinpanoskia katli kitlauelkauaskiaj Jehová (Sal. 73:18, 19, 27). Nojkia moyoliljuik ipan tlateochiualistli tlen kiseliskia tlaj kuali kitekipanoskia (Sal. 73:24). Tojuantij nojkia uelis timoyoliljuisej ipan nopa tlateochiualistli tlen Jehová techmakatok uan timoiljuisej kenijkatsa tiitstoskiaj tlaj amo tijtekipanoskiaj. Tlaj kiampa tijchiuaj, techpaleuis amo kema ma tijtlauelkauakaj Jehová uan tikijtosej kej katli kiijkuilok nopa salmo: “Más nimonechkauis kampa Toteko Dios pampa ya nopa tlen más kuali para na” (Sal. 73:28).

18. ¿Kenke timotemachiaj teipa kuali tiitstosej?

¹⁸ Ipan ni tonali uelis tikixnamikisej tlen ueli tlaouijkayotl, pampa tijtekipanouaj “Toteko tlen itstok uan tlen temachtli” (1 Tes. 1:9). Ya nelia itstok, kitekipachoua tlen techpano uan nochipa techpaleuis. Kiampa kichijki ika itekipanojkauaj uejkajkia uan nojua kiampa kichijtos ipan ni tonali. Nechka peuas nopa ueyi tlaijiyouilistli, pero amo tiitstosej toselti (Is. 41:10). “Uajka ika miak pakilistli sejse tojuantij ueli kiijtos: ‘Toteko nechpaleuia. Axnikimakasis tlen tlakamej uelisej nechchiuilisej’” (Heb. 13:5, 6).