1. ¿Kenijkatsa tekititok Jehová, uan kenijkatsa tekititokej itekipanojkauaj?

JEHOVÁ achtoui kichijchijki Jesús, uan teipa sansejko tekitikej kema kichijchijkej nochi tlen onka. Yeka Jesús itstoya iuaya Jehová “kej se kuali tekitiketl” (Prov. 8:30, TNM). Jehová itekipanojkauaj nojkia tekititokej sansejko. Kema Noé kinauatijkej ma kichijchiua akali, ya tekitik sansejko ininuaya ichampoyouaj. Teipa, israeleuanij mopaleuijkej kema kichijchijkej tabernáculo, kema kisemanayayaj uan kema kiuikayayaj sejkanok. Uan ipan teokali, israeleuanij sansejko uikayayaj uan tlatsotsonayayaj kema kiueyichiuayayaj Jehová. ToTeotsij itekipanojkauaj uelkej kichijkej nochi ni tlamantli pampa nochipa mosentikapaleuiyayaj kema tekitiyayaj (Gén. 6:14-16, 22; Núm. 4:4-32; 1 Crón. 25:1-8).

2. 1) ¿Tlake kichiuayayaj achtoui Cristo itokilijkauaj? 2) ¿Tlake tlajtlanili tikixtomasej ipan ni tlamachtili?

² Achtoui Cristo itokilijkauaj nojkia mopaleuiyayaj kema kichiuayayaj se tlenijki. Apóstol Pablo kiijtok maske amo ueliyayaj kichiuaj sanse tlamantli uan amo sanse tekitl kichiuayayaj, nochi mosentikapaleuiyayaj  pampa nochi kitokiliyayaj Jesucristo. Pablo kiijtok inijuantij eliyayaj sanse kej itlakayo se maseuali, pampa maske “kipia miak partes”, nochi tekitij sansejko (xijpoua 1 Corintios 12:4-6, 12). Ipan ni tonali, ¿kenijkatsa uelis timosentikapaleuisej kema titlajtolmoyauasej, ipan tlanechikoli uan ika tochampoyouaj? Ni tikixtomasej ipan ni tlamachtili.

3. ¿Tlake kiitak apóstol Juan?

³ Se tonali, Jehová kichijki apóstol Juan ma kinita chikomej iluikaeuanij kipitsayayaj trompetas. Kema “nopa makuilpa ejketl tlapitski”, Juan kiitak “se sitlali uetski tlen iluikaktli hasta Tlaltipaktli”. Uan nopa “sitlali” kitekiuik se llave tlen ika kitlapok se “ostotl tlen tlauel uejkatla hasta axkipia itsintla”. Kema kitlapok, kiski tlauel miak “poktli”, uan “pokijtik kiskej [miakej] chapolimej”. Maske ni chapolimej amo tleno kichiuilijkej kuauitl yon xiuitl, kena kinkokojkej maseualmej “tlen axkipixkej isello toTeko ipan ininkuaixpa” (Apoc. [Rev.] 9:1-4). Juan kimajtoya nopa chapolimej tlauel tlanenpolouaj, kej kichijkej ipan Egipto kema itstoya Moisés (Éx. 10:12-15). Nopa chapolimej katli Juan kinitak kinixnextia katli yasej iluikak. Inijuantij kimoyajtokej tlamachtili tlen kinyolkokoua katli itstokej ipan religiones tlen amo melauak. Uan sekinok maseualmej katli motemachiaj itstosej ipan Tlaltipaktli nojkia kinpaleuiaj. Sansejko tlajtolmoyauaj uan kinpaleuijtokej miakej maseualmej ayokmo ma itstokaj ipan religiones tlen amo melauak, kiampa Satanás ayokmo kinkajkayaua.

4. ¿Tlake moneki kichiuasej Jehová itekipanojkauaj, uan tlake kinpaleuis?

⁴ Jehová technauatijtok ma tijmoyauakaj nopa “kuali tlamachtili” ipan nochi Tlaltipaktli, uan ni tekitl moneki nima tijchiuasej pampa monechkauijtiuala itlamia nochi (Mat. 24:14; 28:19, 20, TNM). Moneki tikiniljuisej “ma ualakaj nochi tlen amikij ipan ininyolo” uan “ma kiikij nopa atl tlen temaka yolistli”, ni kiijtosneki moneki tikinnextilisej tlen Biblia tlamachtia nochi katli kinekij momachtisej (Apoc. 22:17). Yeka, tlaj tijnekij tijchiuasej tlen Jehová technauatijtok, moneki nochipa titekitisej sansejko ininuaya toikniuaj uan timosentikapaleuisej ipan tlanechikoli (Efes. 4:16).

5, 6. ¿Tlake tlamantli kichiua ma timosentikapaleuikaj?

⁵ Tlaj tijnekij tikinkamanaljuisej miakej maseualmej kema titlajtolmoyauasej, moneki timosentikapaleuisej. Yeka tlen techiljuiaj ipan tlanechikoli tlauel techpaleuia. Nojkia tlauel techpaleuia tlen techiljuiaj ipan nopa tlanechikoli tlen mochiua kema tiauij titlajtolmoyauaj. Nochi ni techpaleuia kuali ma titlajtolmoyauakaj ipan nochi Tlaltipaktli uan ma tikinmakakaj maseualmej miak amatlajkuiloli tlen mokixtijtok ipan Biblia. Kemantika techiljuiaj sentik ika nochi toikniuaj ma titemakakaj pilamatsitsij ipan nochi Tlaltipaktli san ipan se metstli o se keski tonali. Kema tijchiuaj ni, timopaleuiaj ininuaya toikniuaj kema tijmoyauaj sanse tlamachtili ipan nochi Tlaltipaktli. Nojkia titekitij ininuaya iluikaeuanij pampa inijuantij techpaleuiaj kema titlajtolmoyauaj (Apoc. 14:6).

⁶ ¡Nelia tlauel tiyolpakij kema sejse xiuitl tikitaj ipan Anuario nochi tlen kichiuaj toikniuaj kema tlajtolmoyauaj! Nopa uejueyi tlanechikolistli nojkia tlauel techpaleuia ma timosentikapaleuikaj. Kema ayamo mochiua, nochi tikintlaneuij maseualmej ma yakaj ipan nopa tlanechikolistli. Uan kema tiitstokej nopaya, nochi tijtlakakiliaj sanse tlamachtili, kej kema tikitaj tlanextilili tlen mokixtijtok ipan Biblia uan kema toikniuaj panoj. Nochi ni techpaleuia kuali ma tijtekipanokaj Jehová. Kema tikilnamikij Cristo imikilis sejse xiuitl nojkia techpaleuia (1 Cor. 11:23-26). Achtoui tikintlaneuij nochi maseualmej ma mosentilikaj touaya ipan nopa  tonali. Teipa, kema asi nopa tonali, ipan nochi Tlaltipaktli nochi timosentiliaj kema ya kalaki Tonati. Kiampa tijneltokaj tlen Jesús tlanauatik uan tijnextiaj tlauel tijtlaskamatiliaj Jehová.

7. ¿Tlake ueli tijchiuaj pampa timosentikapaleuiaj?

⁷ Chapolimej amo kema nemij ininselti, nochipa nemij miakej. Sanse kej inijuantij, tojuantij amo ueliskia titlajtolmoyauasej toseltsitsij. Yeka, pampa timosentikapaleuiaj ueli tikinmachtiaj miakej maseualmej ajkia Jehová uan tikinpaleuiaj ma kiueyichiuakaj.

8, 9. 1) Kej kiijtoua Efesios 4:15, 16, ¿kenijkatsa Pablo kiixnextik tlauel moneki ma timosentikapaleuikaj ipan tlanechikoli? 2) ¿Tlake uelis tijchiuasej tlaj tijnekij kuali tiitstosej ipan tlanechikoli?

⁸ Pablo kiniljuik toikniuaj katli itstoyaj Éfeso kenijkatsa kinamikiyaya mosentikapaleuisej ipan tlanechikoli uan kiniljuik monekiyaya nojua ‘moskaltijtiasej’ (xijpoua Efesios 4:15, 16). Pablo kiijtok se tlanechikoli sanse kej itlakayo se maseuali, pampa nochi uelis timopaleuisej uan sansejko tijtokilisej “Cristo, yajaya tlen totsonteko, uan tlen technauatia nochi titlaneltokanij keja totsonteko kinauatia totlakayo”. Nojkia kiijtok “ipan itlakayo se tlakatl nochi partes monechikouaj uan tekitij sansejko”, uan tlaj kampa mosajsalojtok iomiyouaj amo kuali eltok, uajka nochi itlakayo kikokoua. Ipan tlanechikoli nojkia kiampa pano, tlaj toikniuaj amo kinpaleuiaj ueuejtlakamej, nochi toikniuaj amo kuali itstokej. ¿Tlake uelis tijchiuasej tlaj amo tijnekij kiampa ma pano ipan tlanechikoli?

⁹ Jesús kintlalijtok ueuejtlakamej ma techyakanakaj ipan tlanechikoli uan kineki ma tikintlepanitakaj uan ma tijchiuakaj tlen techiljuiaj (Heb. 13:7, 17). Maske kemantika ouij, tlaj tikiljuiaj Jehová ma techpaleui, ya techmakas itonal uan kiampa tikinneltokasej. Uelis kuali tiitstosej ipan tlanechikoli tlaj amo timoueyimatisej uan tlaj tikinpaleuisej ueuejtlakamej. Kiampa nochi timosentikapaleuisej uan nojua timoiknelijtiasej.

10. ¿Kenijkatsa tlapaleuianij kichiuaj kuali ma itstokaj toikniuaj ipan tlanechikoli? (Xikita nopa achtoui tlaixkopinkayotl).

¹⁰ Tlapaleuianij nojkia uelis kichiuasej toikniuaj kuali ma itstokaj ipan tlanechikoli. Inijuantij tlauel kinpaleuiaj ueuejtlakamej, uan tojuantij tikintlaskamatiliaj pampa tlauel tekitij, kej kema kiitaj nochipa ma onka amatlajkuiloli tlen ika titlajtolmoyauasej, kema kuali kinseliaj katli asij ipan tlanechikoli uan kema tlapaleuiaj kema kipajpakaj uan kikualchijchiuaj kali kampa timosentiliaj. Kema tikinpaleuiaj tlapaleuianij, tijchiuaj nochi ma timosentikapaleuikaj kema tijtekipanouaj Jehová (nojkia xikita tlen kiijtoua Hechos 6:3-6).

11. ¿Kenijkatsa telpokamej uelis kichiuasej kuali ma itstokaj ipan tlanechikoli?

¹¹ Sekij ueuejtlakamej tlatekipanojtokej ipan tlanechikoli miak xiuitl. Uelis pampa ya ueuejtixtokej ayokmo uelij tlatekipanouaj kej achtouia. Katli telpokamej uelis kinpaleuisej. Tlaj kuali kinnextilisej kenijkatsa kichiuasej se tekitl, kuali tlapaleuisej ipan tlanechikoli. Uan pampa tlapaleuianij tlauel tekitij, teipa uelis tlatekipanosej kej ueuejtlakamej (1 Tim. 3:1, 10). Se keskij ueuejtlakamej katli nojua telpokamej tlauel kuali tlatekipanojtokej uan yeka nama kiniljuijtokej ma tepaxalokaj chijchikuasej metstli, uan nojkia kinpaleuiaj telpokamej uan ichpokamej ipan miak tlanechikoli. Tlauel tikintlaskamatiliaj telpokamej pampa kinekij kinpaleuisej toikniuaj (xijpoua Salmo 110:3; Eclesiastés 12:1).

12, 13. ¿Tlake uelis tijchiuasej uan kiampa nochi kuali tiitstosej ika tochampoyouaj?

¹² Tlaj sejse chikueyi timomachtisej ika tochampoyouaj, tlauel techpaleuis kuali ma tiitstokaj ininuaya. Kema tetajmej uan ininkoneuaj  sansejko momachtiaj uan kiixmatij Jehová, kinpaleuia nojua tlauel ma moiknelikaj. Kema momachtisej uelis kiompauisej tlake kiijtosej kema tlajtolmoyauasej uan kiampa kuali kichiuasej. Kema tikitaj kenijkatsa tochampoyouaj kiikneliaj Jehová, kinekij kiyolpakiltisej uan tijkakij kenijkatsa kiyolmatij pampa kitekipanouaj, kichiua nojua tlauel ma timoiknelikaj.

¹³ Jehová kineki se tlakatl ika isiua ma moiknelikaj uan ma mopaleuikaj (Mat. 19:6). Tlaj inijuantij kiikneliaj Jehová uan sansejko kitekipanouaj, kuali itstosej uan yolpaktosej. Tlauel moneki moiknelisej uan kuali mouikasej, kej kichijkej Abraham uan Sara, Isaac uan Rebeca uan Elqaná uan Ana (Gén. 26:8; 1 Sam. 1:5, 8; 1 Ped. 3:5, 6). Kiampa kuali itstosej uan mouampojchijtosej iuaya Jehová (xijpoua Eclesiastés 4:12).

14. ¿Tlake mitspaleuis kuali tiitstos iuaya mosiua o moueue tlaj amo kitekipanoua Jehová?

¹⁴ Biblia xitlauak kiijtoua amo kinamiki timosenkauasej ika se akajya katli amo kitekipanoua Jehová (2 Cor. 6:14). Sekij toikniuaj ininsiua o ininueue amo kitekipanouaj Jehová. Uelis kema mochijkej se tlen Jehová itlajtoltemakauaj ipa ya mosenkajtoyaj. Uan sekinok uelis mosenkajkej iuaya se Jehová itekipanojka uan teipa ayokmo kinejki elis se tlen Jehová itlajtoltemakauaj. Tlaj mosiua o moueue amo kitekipanoua toTeotsij, tlauel mitspaleuis kuali tiitstos iuaya tlaj tijchiuas tlen Biblia tetlajtolmaka maske kemantika ouij. Ximoiljui ipan tlen kipanok toikni Mary. Ya uan iueue David kitekipanouayayaj Jehová. Maske teipa David ayokmo kitekipanok, Mary kichijki kampeka kuali itstos iuaya iueue uan kinextis kuajkuali tlamantli. Kinmachtik chikuasej ikoneuaj uan nochipa yajki tlanechikoli uan ipan uejueyi tlanechikolistli. Kema moskaltijkej, ikoneuaj sejkanok mochantitoj. Mary amo kema kitlauelkajki Jehová maske kimatki ouij iselti kitekipanos. Ya kikauayaya pilamochtsitsij kampa iueue kiitaskia, uan se tonali iueue pejki kipoua. Teipa sampa pejki yaui ipan tlanechikoli. Se iixui katli kipixtoya chikuasej xiuitl nochipa kitlapejpeniyaya se silla kampa ueliskia moseuis, uan kema David amo yauiyaya, iixui kiiljuiyaya: “Tlauel nijnekiyaya nimitsitas ipan tlanechikoli”. Kema panok 25 xiuitl, David sampa pejki kitekipanoua Jehová, uan ipan ni tonali ya iuaya isiua tlauel yolpaktokej pampa sentik kiueyichiuaj toTeotsij.

15. ¿Kenijkatsa katli ya uejkaj mosenkajtokej uelis kinpaleuisej katli namanok mosenkajkej?

 ¹⁵ Satanás kineki amo kuali ma tiitstokaj ika tochampoyouaj. Yeka katli mosenkajtokej tlauel moneki kuali mouikasej uan mopaleuisej. Tlaj namanok timosenkajki o amo, moneki tikitas tlake nojua uelis tijchiuas uan kiampa kuali tiitstos iuaya mosiua o moueue. Katli ya uejkaj mosenkajkej uelis kinpaleuisej katli namanok mosenkajkej. Uelis kintlaneuisej kema inijuantij momachtiaj, kiampa katli namanok mosenkajkej kiitasej kena uelis sansejko itstosej uan nochipa moiknelisej maske panos miak xiuitl (Tito 2:3-7).

16, 17. ¿Kenijkatsa tiitstosej teipa tlaj nochipa timosentikapaleuisej?

¹⁶ Kema israeleuanij yauiyayaj iljuichiuaj ipan Jerusalén, sentik kikualchijchiuayayaj nochi tlen kiuikaskiaj, sansejko yauiyayaj uan mopaleuiyayaj. Kema asiyayaj ipan teokali, sansejko uikayayaj uan kiueyichiuayayaj Jehová (Luc. 2:41-44). Tojuantij nechka tiitstosej ipan Xochimili, yeka tlauel moneki nochi kuali timouikasej uan timosentikapaleuisej. ¿Tlake sekinok tlamantli nojua uelis tijchiuasej?

¹⁷ Maseualmej tlauel mokualaniaj uan amo mopaleuiaj. Uan tojuantij tijpiaj tlaseuilistli uan tijkuamachiliaj tlen Biblia tlamachtia pampa Jehová techpaleuia. Yeka, ¡tlauel tijtlaskamatiliaj Jehová! Ipan nochi Tlaltipaktli, katli tijtekipanouaj toTeotsij tijueyichiuaj kej ya kineki. Uan tlauel timosentikapaleuiaj ipan itlamia tonali. Kej kiijtojkej Isaías uan Miqueas, sansejko “[titlejkoj] ipan itepe toTeko” Jehová (Is. 2:2-4; xijpoua Miqueas 4:2-4). ¡Nelia tlauel tiyolpakisej kema nochi tiitstosej sansejko uan sentik tijueyichiuasej toTeotsij Jehová! Uelis kiampa tiitstosej tlaj nochipa timosentikapaleuisej.