1, 2. 1) ¿Kenke tlauel ipati timoatsonpoliuiltis? 2) ¿Tlake uelis tijchiuas tlaj tijneki timoatsonpoliuiltis?

¿TIJNEKI timoatsonpoliuiltis maske nojua titelpokatl o tiichpokatl? Nelia se ueyi tlateochiualistli tlaj timoatsonpoliuiltis. Uan kej tikitakej ipan tlamachtili tlen panok, tlauel ipati timoatsonpoliuiltis, pampa kiampa tikinnextilis sekinok tijmaktilijtok Jehová monemilis. Ni kiijtosneki tikiljuijtok tijneki nochipa tijtekipanos uan san ya nopa tlauel tijpatiitas. Yeka, tlaj tijneki timoatsonpoliuiltis, achtoui kinamiki tikitas tlaj kuali titlalnamiktok, tlaj nelia tijneki tijtekipanos Jehová ika nochi moyolo uan tlaj tijkuamachilia tlake kiijtosneki tijmaktilis Jehová monemilis.

² Uelis ta timoiljuia ayamo kinamiki timoatsonpoliuiltis. O uelis maske tijneki timoatsonpoliuiltis, motatauaj mitsiljuiaj nojua ximochia pampa nojua titelpokatl uan kinekij kuali xitlalnamikto. ¿Tlake uelis tijchiuas? Amo ximokueso. Ximosentlali tijchiuas tlen nojua mitspoloua, kiampa nima uelis timoatsonpoliuiltis. Ipan ni tlamachtili tikitasej eyi tlamantli tlen uelis nojua mitspoloua tijchiuas: tlen tijneltoka, tlen tijchiua, uan tlen tijyolmati.

3, 4. ¿Kenijkatsa telpokamej uelis kichiuasej kej Timoteo?

³ Ximotlajtlani: “¿Kenke nijneltoka itstok toTeotsij? ¿Kenke temachtli nijmati Biblia nelia toTeotsij iTlajtol? ¿Kenke nimonejnemiltia kej toTeotsij kineki uan amo kej maseualmej monejnemiltiaj?”. Tijnankilis ni tlajtlanili mitspaleuis tijchiuas tlen apóstol Pablo tetlajtolmakak: “Keja nopa inkimatisej tlake ipakilis toTeko. Uan inkiitasej para inmechpaktis tlen yajaya kineki xijchiuakaj, uan kisas kuali uan yejyektsi uan tlen senkistok kinamiki para inmojuantij” (Rom. 12:2). Ni kiijtosneki moneki moselti tijmatis uan tikitas kenke tlauel kuali tlaj tijchiuas tlen toTeotsij kineki. ¿Kenke moneki moselti tijmatis?

⁴ Ximoiljui ipan tlen kichijki Timoteo. Maske ya kuali kiixmatiyaya tlen Biblia tlamachtia pampa inana uan iueyinana kimachtijtoyaj, Pablo kiiljuik: “Xijtokilijtinemi tlen timomachtijtok uan tlen tijmati para melauak” (2 Tim. 3:14, 15). Kema Pablo kiiljuik Timoteo “tlen tijmati”, nopa tlajtoli tlen kitekiuik nojkia kiijtosneki Timoteo temachtli kimajtoya melauak tlen Biblia tlamachtia. ¿Kimatki nopa san pampa inana uan iueyinana kimachtijkej? Amo. Timoteo kimatki nelia eliyaya melauak pampa iselti moyoliljuik ipan tlen momachtijtoya (xijpoua Hebreos 5:14). Telpokamej nojkia uelis kichiuasej kej Timoteo.

5, 6. ¿Kenke tlauel moneki tijmatis kenijkatsa kuali ‘tijtekiuis motlalnamikilis’?

⁵ Uelis ta nojkia ya uejkajtok timomachtia Biblia, yeka uelis timosentlalis timoyoliljuis kenke tijneltoka tlen timomachtijtok. Nopa mitspaleuis tikitas tlen tijneltoka nelia melauak uan nojua kuali titlaneltokas. Nojkia mitspaleuis amo tijchiuas tlen amo kuali, maske mitsyoltilanas tlen onka ipan Tlaltipaktli. Uan tlaj katli ininuaya timomachtia kinekisej ximonejnemilti kej inijuantij, amo tijchiuas.

⁶ Maske nojua titelpokatl, tlauel moneki tijmatis kenijkatsa kuali ‘tijtekiuis motlalnamikilis’. Tlaj kiampa tijchiuas, kuali titlanankilis kema mitstlajtlanisej ni: “¿Kenijkatsa tijmati nelia itstok toTeotsij? Tlaj toTeotsij  techiknelia, ¿kenke kikaua ma titlaijiyouikaj? Tlaj toTeotsij kichijchijki nochi, ¿ajkia kichijchijki toTeotsij?”. Tlaj tijmatis kenijkatsa kuali ‘tijtekiuis motlalnamikilis’, kema mitstlajtlanisej ni tlamantli amo timoiljuis tlen tijneltoka amo melauak. Mitspaleuis nojua tijnekis kuali timomachtis Biblia.

7-9. Xikixtoma kenijkatsa tlen eltok ipan jw.org uelis mitspaleuis kuali titlaneltokas.

⁷ Tlaj kuali timomachtis Biblia, uelis kuali titlanankilis kema monekis, tijkuamachilis tlen amo tijmajtoya uan tikitas tlaj nelia melauak tlen tijneltoka (Hech. 17:11). Jehová itlajtoltemakauaj tijpixtokej miak tlamantli tlen tlauel techpaleuia. Ipan jw.org eltok miak amochtli, videos, pilamochtsitsij uan sekinok tlamantli tlen mitspaleuis tikitas tlen tijneltoka nelia melauak uan nojkia mitspaleuis nojua kuali xitlaneltoka.

⁸ Maske timomachtijtok Biblia uan uelis kuali titlanankilia kema mitstlatsintokiaj se tlenijki, ¿tijmati nelia melauak tlen titlanankilia? Nochi tlen eltok ipan jw.org mitspaleuis tijkuamachilis tlen Biblia kiijtoua ipan se keski textos, uan nojkia mitspaleuis tijmatis kenijkatsa tikinixtomilis sekinok tlen tijneltoka. Tlaj uelis tikitas jw.org, ximomachti tlen nopaya eltok uan kiampa nojua timotemachis nelia melauak tlen timomachtijtok ipan Biblia.

⁹ Tlauel moneki moselti tikitas tlaj nelia melauak tlen timomachtijtok ipan Biblia. Nopa mitspaleuis ximoatsonpoliuilti. Se ichpokatl kiijtok: “Kema ayamo nimoatsonpoliuiltiyaya, tlauel miakpa nimomachtik Biblia uan kiampa nikitak nelia niitstok ipan religión tlen melauak. Mojmostla nikita amo nimokuapolok”.

10. ¿Tlake moneki kichiuas katli ya moatsonpoliuiltijtok uan kuali tlaneltoka?

¹⁰ Biblia kiijtoua tlaj se akajya “axkichijtinemi tlamantli tlen kuali, axtleno ipati itlaneltokilis pampa miktok” (Sant. 2:17). Yeka, tlaj kuali titlaneltoka uan temachtli tijmati nelia melauak tlen timomachtijtok, uajka tijnextis ika tlen tijchiua. Tijchiuas kej Biblia kiijtoua: “Xiitstokaj intlatsejtseloltikej uan xijchiuakaj tlen senkistok kuali para más tiitstiasej keja toTeko” (xijpoua 2 Pedro 3:11).

11. ¿Tlake kiijtosneki “xiitstokaj intlatsejtseloltikej”?

¹¹ Nopa tlajtoli “xiitstokaj intlatsejtseloltikej” kiijtosneki kuali timonejnemiltisej uan amo tijsokiuisej tonemilis. Ximoiljui tlen tijchijtok ipan chikuasej metstli tlen panotok. Kema tijtlapejpenik tlake tijchiuaskia, ¿tijmatki tlake kuali uan tlake amo kuali? (Heb. 5:14). ¿Tikilnamiki tlake tijchijki kema mitsyoltilanki tijchiuas tlen amo kuali o kema sekinok telpokamej kinejkej xijchiua tlen amo kuali? ¿Kiitaj kuali timonejnemiltia katli ininuaya timomachtia? ¿Tijchiua tlen Jehová kineki, o tijchiua tlen sekinok kiijtouaj pampa amo tijneki ma mitspinajtikaj? (1 Ped. 4:3, 4). Xikilnamiki nochi titlajtlakolejkej, yeka kemantika katli uejkajtok kitekipanojtokej Jehová nojkia pinauaj kiijtosej elij Jehová itlajtoltemakauaj. Maske sekij kiampa kinpano, se akajya katli kimaktilia Jehová inemilis tlauel kuali kiyolmati pampa kitekipanoua, uan ni kinextia kema kuali monejnemiltia.

12. ¿Tlake kiijtosneki “xijchiuakaj tlen senkistok kuali”, uan kenijkatsa kinamiki tikitasej?

¹² ¿Tlake kiijtosneki “xijchiuakaj tlen senkistok kuali”? Kiijtosneki nochi tlen tijchiua ininuaya toikniuaj, kej kema titlajtolmoyaua uan timonechikoua. Nojkia kiijtosneki nochi tlen tijchiua moselti, kej kema timomaijtoua uan timomachtia Biblia. Se katli kimaktilijtok Jehová inemilis tlauel kipaktia kichiuas ni tlamantli uan amo kimati ouij. Kiyolmati kej tlanauatijketl David:  “¡NoTeko Dios! Nechpaktia nijchiuas mopakilis, uan motlamachtil nijuika ipan noyolo” (Sal. 40:8).

13, 14. ¿Tlake uelis mitspaleuis tijchiuas tlen timosentlalijtok, uan kenijkatsa kinpaleuijtok sekij telpokamej amochtli Los jóvenes preguntan?

¹³ Tlen uala ipan amochtli Los jóvenes preguntan, volumen 2, iamayo 308 uan 309, uelis mitspaleuis tijchiuas tlen timosentlalijtok. Nopaya uelis tijnankilis ni tlajtlanili: “¿Tikiljuia Jehová tlen tijyolmati, uan tijnextia tikiknelia ika tlen tikiljuia? ¿Tlake timomachtia kema timomachtia moselti? ¿Tia titlajtolmoyaua maske motatauaj amo yauij?”. Nopaya nojkia uelis tikijkuilos tlake uelis tijchiuas uan kiampa nojua kuali timomaijtos, kuali timomachtis Biblia uan kuali titlajtolmoyauas.

¹⁴ Miakej telpokamej katli kinekij moatsonpoliuiltisej kiijtouaj tlauel kinpaleuijtok nopa tlamachtili. Se ichpokatl katli itoka Tilda kiijtoua kenijkatsa kipaleuik: “Yolik nijchijtiajki tlen nopaya kiijtoua, uan kema panok se xiuitl uelki nimoatsonpoliuiltik”. Se telpokatl katli itoka Patrick nojkia kiampa kiijtoua: “Nimosentlalijtoya nijchiuas se keski tlamantli, uan kema nikijkuilok, nechpaleuik ma nijchiua kampeka nijchiuas tlen nikijkuilojtoya”.

15. Xikixtoma kenke kinamiki ta tijtlapejpenis tlaj tijtekipanos Jehová.

¹⁵ Seyok tlajtlanili tlen uala ipan amochtli Los jóvenes preguntan kiijtoua: “Tlaj motatauaj o mouampoyouaj ayokmo kitekipanoskiaj Jehová, ¿nojua tijtekipanoskia?”. Kema tijmaktilis Jehová monemilis uan timoatsonpoliuiltis, peuas timouampojchiuas iuaya. Yeka, san ta uelis tijtlapejpenis tlaj nojua tijtekipanos Jehová, maske motatauaj o sekinok ayokmo kitekipanosej. Tlaj nama kuali timonejnemiltia uan tijchiua tlen senkistok kuali maske ayamo timoatsonpoliuiltia, tijnextia tijmati nelia melauak tlen timomachtijtok uan tijneki tijchiuas tlen Jehová technauatia. Kiampa nesis timokualchijchijtok uan uelis timoatsonpoliuiltis.

16, 17. 1) ¿Tlake moneki kiyolmatis katli kineki moatsonpoliuiltis uan mochiuas Jesús itokilijka? 2) ¿Kenke moneki timoyoliljuisej ipan tlen Jehová uan Jesús techmakakej? Xikixtoma ika se neskayotl.

¹⁶ Se tonali, se tlakatl katli kuali kiixmatiyaya tlanauatili tlen toTeotsij kimakatoya Moisés, kitlajtlanik Jesús: “¿Tlachke tlanauatili [...] achi más moneki tijchiuasej?”. Jesús kinankilik: “Xikikneli toTeko Dios ika nochi moyolo, uan ika nochi moalma, uan ika nochi motlalnamikilis” (Mat. 22:35-37). Yeka, se akajya moneki moatsonpoliuiltis uan mochiuas Jesús itokilijka pampa tlauel kiiknelia Jehová. Tlaj ta timoyoliljuis kenijkatsa Jehová techmakixtik kema temaktilik iKone Jesús, mitspaleuis nojua tlauel xikikneli (xijpoua 2 Corintios 5:14, 15; 1 Juan 4:9, 19). Kema timoyoliljuis ipan nopa tlamantli, nojkia mitspaleuis tlauel xijtlaskamatili.

¹⁷ Ximoiljui ni: ¿Tlake tijchiuaskia tlaj se akajya mitsmanauiskia kema timisauia? ¿Nima tiaskia mochaj uan amo tijtlaskamatiliskia katli mitsmanauik? Amo. Nochipa tijtlaskamatiliskia uan amo kema tikilkauaskia. Jehová uan Jesús nojkia techmakixtijtokej, uan kinamiki tikintlaskamatilisej. Pampa tlauel techikneliaj, techmakixtijkej tlen tlajtlakoli uan mikilistli, yeka nama timotemachiaj uelis tiitstosej nochipa ipan Xochimili.

18, 19. 1) ¿Kenke amo kinamiki timajmauis tijmaktilis Jehová monemilis? 2) ¿Kenijkatsa mitspaleuis tlaj timoatsonpoliuiltis?

¹⁸ ¿Tijtlaskamatilia tlen Jehová mitsmakatok? Uelis tijnextis tijtlaskamatilia kema tijmaktilis monemilis uan timoatsonpoliuiltis.  Kej tikitstokej, tijmaktilis Jehová monemilis kiijtosneki tikiljuis tijneki nochipa tijchiuas san tlen ya kineki. Amo ximajmaui tijmaktilis monemilis, pampa Jehová kineki kuali xiitsto uan kiijtojtok kinteochiuas katli kitekipanouaj (Heb. 11:6). ¡Tlauel kuali tiitstos kema tijmaktilis Jehová monemilis uan timoatsonpoliuiltis! Se toikni katli kipia 24 xiuitl uan moatsonpoliuiltik kema eliyaya telpokatl, kiijtoua: “Tlaj amo nima nimoatsonpoliuiltijtoskia, uelis teipa kuali nijkuamachilijtoskia tlake kiijtosneki. Maske nima nimoatsonpoliuiltik, tlauel nechpaleuik amo nijchiuas tlen kichiuaj maseualmej katli amo kitekipanouaj Jehová”.

¹⁹ Kej tikitakej, Jehová kineki kuali xiitsto. Uan Satanás amo kitekipachoua tlen uelis mitspanos, pampa ya amo mitsiknelia. Ya amo kema mitsmakas se tlamantli tlen kuali maske tijchiuas tlen ya kineki. Satanás amo kinpaleuia maseualmej yon kinmaka tlen kuali. Ya amo uelis mitspaleuis, pampa Biblia kiijtoua teipa kitsontlamiltisej (Apoc. [Rev.] 20:10).

20. ¿Tlake uelis tijchiuas uan kiampa uelis timoatsonpoliuiltis? (Nojkia xikita nopa recuadro “Tlen mitspaleuis kuali ximouampojchiua iuaya toTeotsij”).

²⁰ Tlauel kuali tlaj tijmaktilis Jehová monemilis uan timoatsonpoliuiltis. ¿Uelis timoatsonpoliuiltis? Amo ximajmaui pampa kena uelis tijchiuas. Uan tlaj timoiljuia nojua mitspoloua, xijchiua tlen tikitakej ipan ni tlamachtili. Pablo kiniljuik toikniuaj tlen Filipos monekiyaya nojua kuali kitekipanosej toTeotsij (Filip. 3:16). Tlaj ta tijchiuas tlen Pablo kiijtok, nima uelis tijmaktilis Jehová monemilis uan timoatsonpoliuiltis.