1. ¿Kenke sekij kinamiki ma tikinpatiitakaj uan ma tikintlepanitakaj, uan tlake tikitasej ipan ni tlamachtili?

¿KENIJKATSA tijnextiaj tijpatiitaj uan tijtlepanitaj se maseuali? Tijnextiaj ika tlen tijchiuaj uan tikijtouaj. Uan tlauel tijnextiaj ni kema se akajya kitekimakatokej o pampa uelis kichiua se tlamantli tlen kuali. Ipan ni tlamachtili tikitasej ajkia inijuantij kinamiki tikinpatiitasej uan tikintlepanitasej, uan nojkia tikitasej kenke kinamiki tijchiuasej.

2, 3. 1) ¿Kenke san Jehová kinamiki tlauel ma tijueyichiuakaj? (Xikita nopa achtoui tlaixkopinkayotl). 2) ¿Ajkia “nopa Pilborregojtsi”, uan kenke moneki tijueyichiuasej?

² Apocalipsis 5:13 kiijtoua katli “moseuia ipan nopa ueyi silla” uan “nopa Pilborregojtsi” kinamiki ma tikinueyichiuakaj. ToTeotsij Jehová yaya katli “moseuia ipan nopa ueyi silla”. Uan Apocalipsis 4 kiijtoua se keskij katli itstokej iluikak kiijtouaj kenke kinamiki tijueyichiuasej Jehová, katli “axkema tlamis”. Inijuantij kiijtouaj: “Ta titoTeko Dios tlen onpano tiueyi. Nochi  chikaualistli tijpia. Kinamiki ma timitsnextilikaj nochi tlatlepanitakayotl. Kinamiki para san ta ma timitsueyichiuakaj. Ta tijchijchijki nochi tlen onka. Kena, nochi tlen onka eltok pampa eltoya mopakilis para ma onka, uan yeka tijchijchijki” (Apoc. 4:9-11).

³ “Nopa Pilborregojtsi” tlen kiijtoua Apocalipsis 5:13 eli Jesucristo. ¿Kenijkatsa tijmatij? Kema itstoya ipan Tlaltipaktli, Jesucristo kitokaxtijkej “ipilborregojtsi toTeko” katli “techkixtilis nochi totlajtlakoljuaj” (Juan 1:29). Yeka, kinamiki ma tijueyichiuakaj. Jesús, katli eli toTlanauatijka, temaktilik inemilis pampa kinekiyaya kinmakixtis katli kinnauatia. ¡Amo aka kiampa kichijtok! Nojkia kinamiki ma tijueyichiuakaj pampa “yajaya nopa Tlanauatijketl tlen más ueyi que nochi tlanauatianij” uan ininTeko nochi katli tekichiuaj (Apoc. 17:14). Tojuantij tijyolmatij kej miakej iluikaeuanij katli uikaj uan kiijtouaj: “Senkistok kuali ni Pilborregojtsi tlen tlakamej kimiktijkej. Uan kinamiki [...] ma kinextilikaj nochi tlatlepanitakayotl, uan ma kiueyichiuakaj uan ma kipakilismakakaj. Yajaya kipia nochi chikaualistli uan nochi tlalnamikistli. Uan kinamiki para nochi tlen ipati elis san iaxka ya” (Apoc. 5:12).

4. ¿Kenke tlauel moneki ma tikinueyichiuakaj Jehová uan Cristo?

⁴ Juan 5:22, 23 kiijtoua Jehová kitekimakatok Cristo ma kintlajtolsenkaua nochi maseualmej, yeka tlauel moneki ma tijueyichiuakaj. Kema kiampa tijchiuaj, nojkia tijueyichiuaj Jehová. Tlaj tikinueyichiuaj Jesús uan iTata, uajka uelis tiitstosej nochipa (xijpoua Salmo 2:11, 12).

5. ¿Kenke nochi maseualmej moneki ma kinpatiitakaj uan ma kintlepanitakaj?

⁵ Maseualmej kinchijchijkej kej “itlachialis toTeko” (Gén. 1:27). Ni kiijtosneki maseualmej uelij kinextiaj ipan ininnemilis kuajkuali tlamantli kej kinextia toTeotsij. Yeka nojkia teikneliaj, tetlasojtlaj uan kinekij tepaleuisej. Uan nojkia kinmakakej tlalnamikilistli tlen kinpaleuia ma kimatikaj tlake kuali uan tlake amo kuali, tlake xitlauak uan tlake amo xitlauak (Rom. 2:14, 15). Uan uelis nochi tojuantij techpaktia miak tlamantli tlen yejyektsitsij uan tlen amo sokiyo, uan tijnekij tiitstosej ika tlaseuilistli. Kiampa tielij pampa Jehová nojkia kipaktia kuali ma elto o ma nesi se tlenijki, uan ya nojkia kipaktia tlaseuilistli. Nochi tiuelij tijnextiaj miak tlamantli tlen toTeotsij kinextia pampa kiampa techchijchijki. Yeka, nochi maseualmej moneki ma kinpatiitakaj uan ma kintlepanitakaj (Sal. 8:5).

6, 7. ¿Kenke Jehová itlajtoltemakauaj amo sanse kej sekinok maseualmej?

⁶ Maske tijmatij moneki tikinpatiitasej uan tikintlepanitasej sekinok, uelis amo tijmatij kenijkatsa kinamiki tijchiuasej. Ni techpano pampa miakej kichiuaj kej maseualmej katli Satanás kinnauatia. Miakej kinitaj se keskij tlakamej uan siuamej kej teotsitsij uan yeka tlauel kinueyichiuaj uan amo kinpatiitaj uan kintlepanitaj kej Jehová kineki. Sekij moyoyontiaj uan monejnemiltiaj kej nopa maseualmej katli kinueyichiuaj. Uan sekinok kichiuaj kej katli tlayakanaj ipan política o ipan se religión, o kej katli nesij ipan películas o mauiltianij.

⁷ Katli nelia Cristo itokilijkauaj tijmatij amo kinamiki tikinueyichiuasej maseualmej. Ipan nochi nopa xiuitl tlen panotok, san Jesús kinextijtok kenijkatsa kinamiki tikinpatiitasej uan tikintlepanitasej sekinok (1 Ped. 2:21). Moneki tikilnamikisej nochi “tlajtlakolchijtokej”  uan yeka “axaka senkistok kuali keja toTeko” (Rom. 3:23). Yeka yon se maseuali kinamiki ma kiueyichiuakaj. Tlaj se akajya tijueyichiuaskiaj, uajka tikixpanoskiaj toTeotsij.

8, 9. 1) ¿Kenijkatsa kinitaj tekichiuanij Jehová itlajtoltemakauaj? 2) ¿Kema amo tikinneltokaskiaj tekichiuanij?

⁸ Sekij maseualmej kinamiki ma tikinpatiitakaj uan ma tikintlepanitakaj pampa kichiuaj se keski tekitl. Ma timoiljuikaj ipan tekichiuanij. Inijuantij tlauel tekitij pampa kinekij maseualmej kuali ma itstokaj uan kinpaleuiaj ma kipiakaj tlen moneki. Tijseliaj miak tlamantli tlen kuali pampa inijuantij tekitij. Apóstol Pablo kiijtok moneki tikinitasej nopa tlakamej kej tekichiuanij, uan kiijtok moneki tijneltokasej inintlanauatiljuaj. Ya kiijtok: “Xikintlaxtlauikaj tlen tlainamaj impuesto. Xikintlepanitakaj nochi tlen moneki inkintlepanitasej. Uan xikinueyitlalikaj inijuantij tlen kinamiki inkinueyitlalisej” (Rom. 13:1, 7).

⁹ Jehová itlajtoltemakauaj tijchiuaj kampeka tikintlepanitasej tekichiuanij. Uelis miak altepemej amo momajtokej kichiuaj sanse tlamantli. Yeka ipan se altepetl uelis tlanauatiaj se tlenijki tlen ipan seyok altepetl amo tlanauatiaj. Maske kampa ueli tiitstokej, nochi moneki tijchiuasej tlen tlanauatianij kinekij. Uan tlaj techiljuiskiaj ma tijchiuakaj se tlenijki tlen kiixpanoskia toTeotsij, uajka amo tikinneltokaskiaj, pampa tijmatij tlauel moneki tijneltokasej uan tijueyichiuasej Jehová, uan amo tlakamej (xijpoua 1 Pedro 2:13-17).

10. ¿Kenijkatsa techpaleuia tlen kichijkej Jehová itekipanojkauaj katli itstoyaj uejkajkia?

¹⁰ Uelis tijyekosej miak tlamantli tlen kichijkej Jehová itekipanojkauaj katli itstoyaj uejkajkia, inijuantij kinextijkej kinpatiitayayaj uan kintlepanitayayaj tekichiuanij. Ma tikitakaj tlen kichijkej José uan María. Kema tekichiuanij kinejkej kimatisej keskij maseualmej itstoyaj kampa tlanauatiyayaj, inijuantij yajkej Belén uan moijkuilotoj, maske María nechka konepiaskia (Luc. 2:1-5). Pablo nojkia kintlepanitak tekichiuanij. Kema kiteljuijkej, ya momanauik ika tlatlepanitakayotl iixpa tlanauatijketl Herodes Agripa uan iixpa Festo, katli tlanauatiyaya ipan Judea (Hech. 25:1-12; 26:1-3).

11, 12. 1) ¿Kenke amo kinamiki tikinuejkapantlalisej katli tlayakanaj ipan religiones? 2) ¿Tlake panok pampa se toikni kitlepanitak se tekichijketl?

¹¹ ¿Uan kenijkatsa kinamiki tikinitasej katli tlayakanaj ipan religiones? Moneki tikintlepanitasej kej nochi maseualmej. Maske inijuantij kinekij ma tikinuejkapantlalikaj, amo kuali tlaj kiampa tijchiuaskiaj, pampa inijuantij amo tlamachtiaj tlen melauak tlen toTeotsij uan amo kiixtomaj tlen Biblia tlamachtia. Jesús kiijtok amo kuali tlen kichiuayayaj katli tlamachtiyayaj, pampa amo kuali kinyakanayayaj maseualmej uan kiniljuik san tlakajkayauayayaj (Mat. 23:23, 24). ¿Uan kenijkatsa kinamiki tikinitasej tekichiuanij? Amo kenijki tlaj tijnextisej tlauel tikintlepanitaj uan tikinpatiitaj, pampa kemantika inijuantij techpaleuijtokej pampa kiitaj tikintlepanitaj.

¹² Heinrich Gleissner, se abogado uan político katli eua Austria, kinpaleuik Jehová itekipanojkauaj. Kema mochijtoya nopa Ompa Ueyi Tlauilankayotl, nazis kiitskijkej uan ipan se tren kiuikakej ipan se campo de concentración. Ipan nopa tren kiixmatki Leopold Engleitner, se toikni katli euayaya Austria uan katli tlauel kipaktiyaya tlajtolmoyauas. Toikni ika miak tlatlepanitakayotl kiixtomilik Gleissner tlake tijneltokaj uan ya tlauel kuali  kitlakakilik. Kema tlanki nopa tlauilankayotl, nopa tekichijketl miakpa kinpaleuik Jehová itlajtoltemakauaj tlen altepetl Austria. Uelis tojuantij tikitstokej kenijkatsa tekichiuanij techpaleuijtokej pampa tikintlepanitstokej.

13. ¿Ajkia inijuantij kinamiki tlauel tikinpatiitasej uan tikintlepanitasej, uan kenke?

¹³ Nochi toikniuaj, siuamej uan tlakamej, moneki tikinnextilisej tikinpatiitaj uan tikintlepanitaj. Uan tlauel moneki tikinpatiitasej uan tikintlepanitasej katli tlayakanaj ipan tlanechikoli, kej ueuejtlakamej, katli tepaxalouaj chijchikuasej metstli, toikniuaj katli kiyakanaj kali Betel uan toikniuaj Katli kinyakanaj Jehová itlajtoltemakauaj (xijpoua 1 Timoteo 5:17). Nochi inijuantij kinmokuitlauiaj toTeotsij itekipanojkauaj, uan yeka Biblia kiijtoua inijuantij kejuak eliskiaj se “regalo” tlen kinmakatokej toikniuaj (Efes. 4:8). Yeka kinamiki ma tikintlepanitakaj maske ualauij tlen sekinok altepemej, maske sekij amo tlauel momachtijtokej kej sekinok o maske sekij amo tlauel tlatominpiaj. Tlen kichijkej achtoui Cristo itokilijkauaj tlauel techpaleuia. Inijuantij kinpatiitakej uan kintlepanitakej katli kinyakanayayaj, uan tojuantij nojkia uelis kiampa tijchiuasej. Maske kiampa tijchiuaj, amo tikinitaj kejuak eliskiaj iluikaeuanij, tojuantij tikinpatiitaj uan tikintlepanitaj pampa chikauak tekitij uan pampa amo moueyimatij (xijpoua 2 Corintios 1:24; Apocalipsis 19:10).

14, 15. ¿Tlake tlamantli kinextia ueuejtlakamej amo sanse kej katli tlayakanaj ipan religiones?

¹⁴ Nopa ueuejtlakamej elij kej nopa tlapialmokuitlauianij. Inijuantij amo kinekij ma kinueyichiuakaj, uan amo kichiuaj kej sekinok katli tlayakanaj ipan religiones. Nojkia amo kichiuaj kej katli tlayakanayayaj kema  itstoya Jesús. Se tonali ya kiijtok: “Kinekij moseuisej ipan nopa sillas kampa achtoui kintekilisej tlakuali ipan se tlakualistli. Uan kinekij moseuisej ipan nopa sillas tlen más kuali ipan teopamitl. Kinpaktia kema tlakamej kintlajpalouaj ika kuali ipan tianguis” (Mat. 23:6, 7).

¹⁵ Toikniuaj ueuejtlakamej kineltokaj tlen Jesús kiijtok: “Amo xijnekikaj para inmoueyichiuasej uan para sekinok ma inmechnotsakaj ‘Rabí’ o ‘Tlamachtijketl’ pampa san na niCristo niinmotlamachtijka, uan nochi inmojuantij sansejko initstokej keja iniknimej. Uan axaka ipan ni Tlaltipaktli xijueyimatikaj uan xijtokaxtikaj ‘totata’ pampa iyojtsi itstok inmoTata uan yajaya toTata Dios tlen itstok iluikak. Uajka amo xijkauilikaj sekinok ma inmechnotsakaj ‘tlayakanketl’ pampa san na niCristo tlen toTeko nechtitlanki ipan Tlaltipaktli niinmotlayakanka. Uan ajkeya tlen inmojuantij kineki mochiuas tlen más ueyi, ma mochiua inmotekipanojka. Pampa nochi tlen moueyimatij nama, teipa toTeko kinpinaualtis, pero nochi tlen nama moiknonekij, teipa toTeko kinueyimatis” (Mat. 23:8-12). Kema ueuejtlakamej katli itstokej ipan nochi Tlaltipaktli amo moueyimatij uan kichiuaj tlen Jesús kiijtok, uajka nochi toikniuaj kinikneliaj uan kintlepanitaj.

16. ¿Kenke moneki nojua tijchijtosej kampeka tijnextisej tikinpatiitaj uan tikintlepanitaj sekinok?

¹⁶ Uelis amo nima tijmatisej kenijkatsa tijnextisej tikinpatiitaj uan tikintlepanitaj sekinok kej kinamiki. Nopa achtoui Cristo itokilijkauaj nojkia kiampa kinpanok (Hech. 10:22-26; 3 Juan 9, 10). Yeka moneki nojua tijchijtosej kampeka, pampa tlauel techpaleuis tlaj tikinpatiitasej uan tikintlepanitasej sekinok kej Jehová kineki.

17. Xikijto kenijkatsa techpaleuia kema tikintlepanitaj tekichiuanij uan sekinok maseualmej.

¹⁷ Kema tikinpatiitaj uan tikintlepanitaj katli tekichiuaj kampa tiitstokej, inijuantij uelis kinekisej techpaleuisej kema sekinok amo techkauasej ma titlajtolmoyauakaj. Uan uelis sekinok kuali kiitasej tlen tijchiuaj. Ipan Alemania, se precursora tlen itoka Birgit yajki kema isiuapil kiski ipan escuela. Nopa siuamej katli kimachtiyayaj kiiljuijkej Birgit tlauel kinpaktik kinmachtisej konemej katli elij Jehová itlajtoltemakauaj. Nojkia kiiljuijkej inijuantij kichiuayayaj sekinok nojkia kuali ma monejnemiltikaj. Birgit kinixtomilik Jehová itlajtoltemakauaj kinmachtiaj ininkoneuaj ma monejnemiltikaj kej toTeotsij kineki, uan yeka moneki kinpatiitasej uan kintlepanitasej inintlamachtijkauaj. Nopa tlamachtianij kuali kinitayayaj konemej katli eliyayaj Jehová itlajtoltemakauaj, uan teipa, se tlamachtijketl yajki ipan se ueyi tlanechikolistli.

18, 19. ¿Tlake moneki tikilnamikisej kema tijnextisej tikinpatiitaj uan tikintlepanitaj ueuejtlakamej?

¹⁸ Tlen Biblia tetlajtolmaka uelis techpaleuis ma tijmatikaj kenijkatsa kinamiki tijnextisej tikinpatiitaj uan tikintlepanitaj ueuejtlakamej  (xijpoua Hebreos 13:7, 17). Tojuantij uelis tikiniljuisej tlauel kuali nochi tlen kichiuaj, uan ni nochipa kinamiki ma tikiniljuikaj. Nojkia moneki tijchiuasej tlen inijuantij techiljuiaj, kiampa tlatekipanosej ika miak pakilistli. Uan Biblia kiijtoua moneki kuali titlaneltokasej kej inijuantij. Ni amo kiijtosneki moneki timoyoyontisej, tikamanaltisej uan titlamachtisej kej se ueuejtlakatl katli tlauel kiixmatij. Tlaj tijchiuaskiaj, uajka tijnextiskiaj tijtokiliaj se tlakatl uan amo Cristo. Moneki tikilnamikisej ueuejtlakamej nojkia tlajtlakolejkej kej tojuantij.

¹⁹ Tlaj tikinpatiitasej uan tikintlepanitasej ueuejtlakamej uan amo tikinitasej kejuak san inijuantij tlauel ininpati, nojkia tlauel tikinpaleuisej, pampa amo moueyimatisej uan amo moiljuisej san inijuantij tlauel ininpati o amo kema mokuapolouaj.

20. ¿Kenijkatsa techpaleuia kema tikinpatiitaj uan tikintlepanitaj sekinok?

²⁰ Kema tikinpatiitaj uan tikintlepanitaj sekinok nojkia techpaleuia tojuantij amo ma timoueyimatikaj, maske sekinok uelis kinextisej tlauel techpatiitaj uan techtlepanitaj. Uan nojkia kejuak techmanauia, pampa techpaleuia amo ma tijtlauelkauakaj Jehová kema se akajya katli tijtlepanitaj techyolkokoua. Uan techpaleuia nochi Jehová itekipanojkauaj ma timosentikapaleuikaj. Ipan Jehová itlanechikol amo tijueyichiuaj yon se maseuali.

21. ¿Kenke tlauel kuali tijyolmatij pampa tikinpatiitaj uan tikintlepanitaj sekinok?

²¹ Uan tlauel kuali tijyolmatij pampa tijmatij Jehová tlauel yolpaki. Kema tikinpatiitaj uan tikintlepanitaj sekinok, tijnextiaj tijneltokaj Jehová uan amo tijtlauelkauaj. Kiampa Jehová uelis kinextis Satanás san istlakatki kema kiijtok yon se maseuali kineltokaskia (Prov. 27:11). Miakej maseualmej amo kimatij kenijkatsa kinextisej kinpatiitaj uan kintlepanitaj sekinok kej kinamiki. Yeka, ¡moneki tlauel tijtlaskamatilisej Jehová pampa tojuantij technextilijtok kenijkatsa kinamiki tijchiuasej!