Ipan 2012, se keskij arqueólogos kipantijkej miak tepalkatl tlen eliyaya se xarro uan kipia se 3,000 xiuitl ika kichijchijkej. Tlen kipantijkej tlauel kinpaktik. ¿Kenke? Tlauel kinpaktik pampa ipan nopa tepalkatl ijkuilijtoya se keski tlamantli.

Kema nopa arqueólogos kimojmotskiltijkej nopa tepalkatl, uelkej kipojkej tlen kiijkuilojtoyaj ipan canaáneuanij inintlajtol. Kiijtouayaya: “Esbaal ben Bedá”, tlen kiijtosneki “Esbaal, ikone Bedá”. Amo kema kipantijtoyaj se tokajyotl ipan se tlamantli tlen tlauel uejkajkia kichijchijkej.

Biblia nojkia kiijtoua se tlakatl motokaxtiyaya Esbaal, eliyaya se tlen tlanauatijketl Saúl ikoneuaj (1 Crón. 8:33; 9:39). Tlamachtijketl Yosef Garfinkel, se tlen nopa arqueólogos katli kipantijkej nopa xarro, kiijtok: “Tlauel kuali tijmatisej nopa tokajyotl katli san nesiyaya ipan Biblia, kema itstoya tlanauatijketl David, nama nojkia nesi ipan se tlamantli tlen tijpantijtokej”. Ni tlamantli tlen kipantijkej nojkia kinextia nelia panok tlen Biblia kiijtoua.

Ipan Biblia, Esbaal nojkia kiiljuiaj Is-bóset (2 Sam. 2:10). ¿Kenke kipatlaj “baal” ika “bóset” ipan ni tokajyotl? Katli tlauel momachtiaj kiijtouaj uelis katli kiijkuilok Segundo de Samuel amo kitekiuik nopa tokajyotl Esbaal pampa israeleuanij kiilnamikiyayaj Baal, katli eliyaya canaáneuanij ininteotsij, tlen moiljuiyayaj kichiuayaya ma uetsi atl. Uan ipan Primero de la Crónicas nojua nesi nopa tokajyotl Esbaal.