1. ¿Tlake tlamantli tlauel techpaktia tlen Jesús? Xikixtoma.

JESÚS kinextia miak kuajkuali tlamantli, uan tlauel techpaktia kema tijmatij ya ueli kikuamachilia nochi tlaouijkayotl tlen tikixnamikij. Kema itstoya ipan Tlaltipaktli, ya yolpajki ininuaya katli yolpakiyayaj uan chokak kema sekinok mochokiliyayaj (Rom. 12:15). Kema 70 itokilijkauaj tlauel yolpajkej pampa kintlakakilijkej kampa tlajtolmoyauatoj, Jesús kipixki “miak pakilistli” (Luc. 10:17-21). Uan kema kiitak katli kiikneliyayaj Lázaro mokuesojtoyaj pampa miktoya, “nojkia moyolpitsauilik uan mokueso” (Juan 11:33).

2. ¿Kenke Jesús kikuamachiliyaya tlen maseualmej kiyolmatiyayaj?

² Maske Jesús eliyaya xitlauak, ya kinextik kintlasojtlayaya uan kinikneliyaya maseualmej katli eliyayaj tlajtlakolejkej. ¿Kenke kiampa kichijki? Pampa tlauel teikneliyaya. Kej tikitakej ipan seyok tlamachtili, ya tlauel kinikneliyaya maseualmej (Prov. 8:31). Yeka, kinejki kuali kimatis kenijkatsa moiljuiaj maseualmej. Apóstol Juan kiijtok: “Kuali kimatki tlen eltok ipan ininyolo nochi tlakamej” (Juan 2:25). Jesús kiyolkokouayaya tlen kinpanoyaya maseualmej, uan miakej kiitakej kenijkatsa tlauel kinikneliyaya uan yeka kuali kitlakakilijkej nopa kuali tlamachtili tlen toTeotsij iTlanauatijkayo. Tlaj tijchiuasej kej Jesús, miakej maseualmej nojkia kuali techtlakakilisej (2 Tim. 4:5).

3, 4. 1) Tlaj tijkuamachiliaj tlen maseualmej kiyolmatij, ¿tlake techyololinis ma titlajtolmoyauakaj? 2) ¿Tlake tikitasej ipan ni tlamachtili?

³ Sanse kej apóstol Pablo, tojuantij nojkia tijmatij kinamiki titlajtolmoyauasej (1 Cor. 9:16). Tlaj tijkuamachilisej tlen maseualmej kiyolmatij, amo titlajtolmoyauasej san pampa tijmatij ya nopa kinamiki tijchiuasej. Tijnekij tijnextisej nelia techtekipachoua tlen kinpano maseualmej uan nelia tijnekij tikinpaleuisej.  Tijmatij “más pakilistli kiselia tlen temaka se tlenijki, uan axkeja tlen kiselia” (Hech. 20:35). Tlaj tikilnamiktosej ni tlamantli, tlauel tiyolpakisej kema titlajtolmoyauasej.

⁴ Ipan ni tlamachtili tikitasej kenijkatsa uelis tijnextisej tijkuamachiliaj tlen kiyolmatij maseualmej katli tikinpantiaj ipan tlajtolmoyaualistli. Achtoui tikitasej kenijkatsa Jesús kinitayaya maseualmej uan tlake uelis tijyekosej. Teipa, tikitasej naui tlamantli tlen techpaleuis ma tijchiuakaj kej ya (1 Ped. 2:21).

5, 6. 1) ¿Kema Jesús kinextik kikuamachiliyaya tlen sekinok kiyolmatiyayaj? 2) Kej moijtok ipan Isaías 61:1, 2, ¿kenke Jesús kintlasojtlak maseualmej katli kinmachtik?

⁵ Ma tikitakaj kenijkatsa Jesús kinextik kikuamachiliyaya tlen sekinok kinpanoyaya. Ya uan itokilijkauaj se tonal tlajtolmoyajtoyaj uan amo tlakuajtoyaj, yon se kentsi mosiajketstoyaj. Yeka, Jesús kinuikak kampa tlatsitsikatoya pampa kinekiyaya ma mosiajketsakaj. Uan miakej maseualmej kintokilijtiajkej. ¿Tlake kichijki Jesús kema asito uan kinitak nopaya itstoyaj nopa maseualmej? “Kintlasojtlak * pampa itstoyaj keja borregojmej tlen axkipiayayaj se tlamokuitlauijketl. Uan Jesús pejki kinmachtia miak tlamantli” (Mar. 6:30-34).

⁶ ¿Kenke Jesús kintlasojtlak nopa maseualmej? Pampa kinitak eliyayaj “keja borregojmej tlen axkipiayayaj se tlamokuitlauijketl”. Uelis kiitak se keskij tlen nopa maseualmej eliyayaj teikneltsitsij uan monekiyaya tlauel tekitisej uan kiampa kipiasej tlen kikuasej. Nojkia, sekij uelis miktoya se akajya katli tlauel kiikneliyayaj. Kej tikitakej ipan nopa seyok tlamachtili, Jesús nojkia kipanok se keski tlen nopa tlamantli, uan yeka kikuamachilik nochi tlen inijuantij kinpanoyaya. Jesús nelia kinekiyaya kinpaleuis, yeka kinmachtik tlen kinyolchikauaskia (xijpoua Isaías 61:1, 2).

7. ¿Kenijkatsa uelis tijchiuasej kej Jesús?

 ⁷ ¿Kenijkatsa uelis tijchiuasej kej Jesús? Ipan ni tonali maseualmej nojkia kipiaj miak kuesoli uan itstokej ‘keja borregojmej tlen axkipiaj se tlamokuitlauijketlʼ. Tojuantij tijmatij tlake kinpaleuis: nopa kuali tlamachtili tlen toTeotsij iTlanauatijkayo (Apoc. [Rev.] 14:6). Uajka, tijchiuaj sanse kej Jesús uan tikiniljuiaj nopa kuali tlamachtili pampa tikintlasojtlaj “tlen axkipiaj chikaualistli uan tlen teikneltsitsij” (Sal. 72:13). Techyolkokoua tlen kinpano maseualmej uan tijnekij tikinpaleuisej.

8. ¿Tlake techpaleuis ma tijkuamachilikaj tlen kiyolmatij katli tikinpantiaj ipan tlajtolmoyaualistli? Xikijto se neskayotl.

⁸ Tlaj tijnekij tijkuamachilisej tlen kiyolmatij katli tikinpantiaj ipan tlajtolmoyaualistli, moneki tijchiuasej kampeka tijmatisej tlen moiljuiaj uan tlen kimachiliaj, uan tikinchiuilisej tlen techpaktiskia ma techchiuilikaj * (Mat. 7:12). Ma tikitakaj naui tlamantli tlen techpaleuis kiampa ma tijchiuakaj. Se: ma timoiljuikaj tlen kipaleuis sejse maseuali. Tlen tijchiuaj kema titlajtolmoyauaj eli sanse ika tlen kichiua se tepajtijketl. Se kuali tepajtijketl kimati tlake kipano sejse maseuali katli kipajtia. Kichiuilia se keski tlajtlanili uan kuali kitlakakilia kema kiiljuia tlake kipano. Amo nimantsi kiiljuia tlake pajtli moneki kitekiuis, achtoui kuali kiita tlen kipano uan teipa kiiljuia tlake pajtli kipaleuis. Tojuantij nojkia amo tikiniljuiaj sanse tlamantli nochi maseualmej pampa tijmatij amo nochi kinpano sanse tlamantli uan amo sanse kej moiljuiaj.

9. 1) ¿Tlake amo kinamiki timoiljuisej? 2) ¿Tlake kinamiki tijchiuasej?

⁹ Amo moneki timoiljuisej tijmatij nochi tlen kinpano maseualmej katli tikinpantiaj ipan tlajtolmoyaualistli, yon tlen kineltokaj o kenke kineltokaj nopa (Prov. 18:13). Tlaj tijnekij tijmatisej tlake kinpanotok, moneki tikinchiuilisej se keski tlajtlanili ika tlatlepanitakayotl (Prov. 20:5). Tlaj kampa tiitstokej amo kenijki kiitaj, uelis tikintlajtlanisej kenijkatsa itstokej ininchampoyouaj, kanke tekitij, tlake moiljuiaj uan sekinok tlamantli tlen kinpano ipan ininnemilis. Tlaj kiampa tijchiuasej, tijmatisej kenijkatsa kinpaleuis toTeotsij iTlanauatijkayo. Uan nojkia techpaleuis ma tijmatikaj kenijkatsa tikinpaleuisej, sanse kej kichijki Jesús (nojkia xikita 1 Corintios 9:19-23).

10, 11. Kej kiijtoua 2 Corintios 4:7, 8, ¿tlake seyok tlamantli techpaleuis ma tijkuamachilikaj tlen kinpano maseualmej? Xikijto se neskayotl tlen se akajya katli kiampa kichijki.

¹⁰ Ome: ma tijchiuakaj kampeka timoiljuisej kenijkatsa eli ininnemilis. Nopa techpaleuis  ma timoiljuikaj kenijkatsa kiyolmatij pampa tojuantij nojkia tikixnamikij nopa kuesoli tlen inijuantij kipiaj (1 Cor. 10:13). Ipan ni tonali tijpiaj miak tlaouijkayotl pampa Satanás tlanauatia uan tijmatij san Jehová techpaleuia ma tikijiyouikaj (xijpoua 2 Corintios 4:7, 8). Ma timoiljuikaj kenijkatsa kipiaj miak kuesoli maseualmej katli amo kitekipanouaj Jehová. Sanse kej Jesús, tikintlasojtlaj uan tijnekij ma kimatikaj teipa kuali tiitstosej (Is. 52:7).

¹¹ Ma timoiljuikaj tlen kipanok se toikni katli itoka Sergey. Kema ayamo kitekipanouayaya Jehová ouij kimatiyaya kamanaltis. Teipa, kinejki ma kimachtikaj ika Biblia. Sergey kiijtoua: “Kema nimomachtik Biblia, nijkuamachilik katli elij Cristo itokilijkauaj moneki tlajtolmoyauasej. Na nimoiljuiyaya amo kema ueliskia nitlajtolmoyauas”. Sergey nochipa moiljuiyaya kenijkatsa itstoyaj katli amo kiixmatiyayaj Jehová yon tlen melauak. Kiijtoua: “Tlen nijyekok, nechpaleuik ma niyolpaki uan ma nijpia tlaseuilistli. Nijmatiyaya sekinok maseualmej nojkia monekiyaya kimatisej tlen melauak”. Kema kikuamachilik ni tlamantli, kipaleuik ayokmo ma majmaui tlajtolmoyauas. Sergey kiijtoua: “Kema pejki nitlajtolmoyaua nechpaleuik ma nimotemachi ipan na uan nojkia nechpaleuik kuali ma nitlaneltoka”. *

12, 13. ¿Kenke moneki tijpiasej toyolo ininuaya katli tikinmachtiaj Biblia? Xikijto se neskayotl.

¹² Eyi: ma tijpiakaj toyolo ininuaya katli tikinmachtiaj Biblia. Maske tojuantij kuali tijmatij tlen Biblia tlamachtia, uelis katli tikinmachtiaj amo kema kikaktoyaj. Uan miakej tlauel kinpaktia tlen kineltokaj uan uelis moiljuiaj nopa kichiua sansejko ma itstokaj ininuaya ininchampoyouaj, ininuaya maseualmej katli euaj ipan ininaltepe uan katli momajtokej sanse kichiuaj. ¿Kenijkatsa uelis tikinpaleuisej?

¹³ Ma timoiljuikaj ipan ni neskayotl. ¿Tlake kichiuaj maseualmej kema se puente ayokmo  kuali eltok? Kichijchiuaj se yankuik puente. Maseualmej nojua kitekiuiaj tlen achtoui eltoya uan kema tlamij kichijchiuaj nopa yankuik, uajka nopa seyok kisosolouaj. Nojkia kiampa pano kema tijnekij tikinpaleuisej maseualmej, amo moneki nimantsi tikiniljuisej ma kikauakaj tlen kineltokaj, achtoui moneki tikinpaleuisej ma kipatiitakaj tlen Biblia tlamachtia. Tlaj tijchiuasej ni, uelis kinpaleuis ayokmo ma kichiuakaj tlen achtouia momajtoyaj. Moneki panos tonali uan kiampa uelis kipatlatiasej tlen kineltokayayaj (Rom. 12:2).

14, 15. Xikijto ika se neskayotl kenijkatsa uelis tikinpaleuisej katli amo kema kikaktokej uelis tiitstosej nochipa ipan se xochimili.

¹⁴ Tlaj tijpiasej toyolo ininuaya maseualmej, amo tijnekisej nimantsi ma kikuamachilikaj o ma kineltokakaj tlen Biblia tlamachtia. Tlaj nelia tijkuamachiliaj tlen kiyolmatij, techyololinis ma tikinpaleuikaj ma kiitakaj nelia tlen Biblia tlamachtia, maske monekis panos miak tonali. Se neskayotl, ipan Biblia kiijtoua uelis tiitstosej nochipa ipan se xochimili ipan ni Tlaltipaktli. Miakej maseualmej amo kema kikaktokej nopa tlamachtili uan sekinok moiljuiaj kema timikij tlami tonemilis. Nojkia, sekij moiljuiaj katli kichijkej tlen kuali yauij iluikak. ¿Kenijkatsa uelis tikinpaleuisej ma kineltokakaj tlen Biblia tlamachtia?

¹⁵ Se toikni kiijtoua tlen ya kichiua. Achtoui, kipoua Génesis 1:28 uan teipa tlajtlani kanke uan kenijkatsa kinekiyaya toTeotsij ma itstokaj maseualmej. Miakej maseualmej kiijtouaj ipan Tlaltipaktli uan ika pakilistli. Teipa, nopa toikni kipoua Isaías 55:11 uan tlajtlani tlaj toTeotsij kipatlatok tlen mosentlalijtoya kichiuas. Maseualmej kiijtouaj amo mopatlatok. Uan teipa, kipoua Salmo 37:10, 11 uan tlajtlani: “Kej kiijtoua Biblia, ¿teipa kenijkatsa itstosej maseualmej?”. Pampa kej nopa kichiua, ni toikni kinpaleuijtok miakej maseualmej ma kikuamachilikaj toTeotsij nojua kineki maseualmej katli kuali ininyolo ma itstokaj nochipa ipan se xochimili ipan ni Tlaltipaktli.

16, 17. Kej kiijtoua Proverbios 3:27, ¿kenijkatsa uelis tijnextisej tijkuamachiliaj tlen kinpano maseualmej? Xikijto se neskayotl.

¹⁶ Naui: ma tijnextikaj techtekipachoua tlen kinpano maseualmej. Tlaj kema titlajtolmoyauaj tiasitij ipan se kali kampa se maseuali motekiuijtok, uelis tikiljuisej seyok tonali tipanosej. Uan tlaj tikitasej kichiua se tlamantli, ma tijpaleuikaj o tlaj amo ueli kisa ichaj uan kineki kichiuas se tlenijki ma tikiljuikaj tojuantij uelis tijpaleuisej (xijpoua Proverbios 3:27).

¹⁷ Ma tikitakaj tlake pano kema tijnextiaj tijkuamachiliaj tlen kinpano maseualmej. Kema se tosiuaikni kimatki se siuatl mijki ipilkone kema tlakatki, kichijki se tlamantli tlen amo ouij: kichijchijki se amatlajkuiloli kampa kiijkuilok se keski textos tlen ueliskia kiyolchikauas. ¿Kenijkatsa kiyolmatkej  nopa siuatl uan ichampoyouaj? Nopa tenaj kitlajkuiljuilik nopa tosiuaikni: “Maske yaloua nelia tlauel nimotekipachouayaya, tlauel nechyolchikajki nopa amatlajkuiloli uan nojkia katli itstoyaj nouaya. Nelia tlauel techpaleuik uan amo kema nijkauas nimitstlaskamatilis. Yaloua, se veinte imiakpa nijpojki nopa amatlajkuiloli. Kej tikijkuilok kinextia kenijkatsa kuali moyolo, titeiknelia uan titeyolchikaua. Nelia nimitstlaskamatilia ika nochi noyolo”. Tojuantij nojkia uelis kiampa tikinpaleuisej maseualmej tlaj tijkuamachilisej kenijkatsa tlauel tlaijiyouiaj uan tlaj tijchiuasej tlamantli tlen ika tikinpaleuisej.

18. Kej kiijtoua 1 Corintios 3:6, 7, ¿kenijkatsa kinamiki tikitasej tlen tijchiuaj ipan tlajtolmoyaualistli?

¹⁸ Moneki ma tikitakaj kej kinamiki tlen tijchiuaj ipan tlajtolmoyaualistli. Maske tijchiuaj kampeka tikinpaleuisej maseualmej ma kiixmatikaj Jehová, tlen tojuantij tijchiuaj amo san ya nopa moneki (xijpoua 1 Corintios 3:6, 7). Jehová yaya kiyoltilana se maseuali ma kinechkaui (Juan 6:44). Nojkia, sejse maseuali moneki kitlapejpenis tlaj kitekipanos Jehová o amo, kiampa kinextis tlen eltok ipan iyolo (Mat. 13:4-8). Ma tikilnamikikaj maske Jesús tlauel kuali tlamachtiyaya, miakej amo kinejkej kitlakakilisej, yeka moneki amo timotekipachosej tlaj miakej maseualmej nojkia amo kinekisej techtlakakilisej.

19. Tlaj kema titlajtolmoyauaj tijnextiaj tijkuamachiliaj tlen kinpano maseualmej, ¿tlake tlateochiualistli tijselisej?

¹⁹ Tlaj kema titlajtolmoyauaj tijnextiaj tijkuamachiliaj tlen kinpano maseualmej, tijselisej miak tlateochiualistli: tlauel tiyolpakisej, tijmatisej kenijkatsa kiyolmati katli tepaleuia uan maseualmej katli kuali ininyolo kinekisej kitlakakilisej nopa kuali tlamachtili tlen toTeotsij iTlanauatijkayo (Hech. 13:48). Yeka, “kema noja tiuelij, ma tikinchiuilikaj tlen kuali nochi tlakamej” (Gál. 6:10). Tlaj kiampa tijchiuasej, tlauel tiyolpakisej pampa tijueyichiuasej toTeotsij Jehová (Mat. 5:16).