NOCHI tijnekij ma techitakaj kej maseualmej katli kichiuaj tlen kuali uan tlen xitlauak. Maske tijnekij nopa, nelia tlauel ouij pampa ipan ni tonali miakej maseualmej “kikokolisej nochi tlen kuali” (2 Tim. 3:3). Moyakanaj san kej inijuantij kinekij uan inijuantij kitlapejpeniaj tlake kuali uan tlake amo kuali, uan “kiiljuiaj kuali tlen axkuali, uan tlen axkuali kiiljuiaj kuali” (Is. 5:20). Nochi tijchiuaj kampeka tikilkauasej tlen techpanotok o tlen tijchijkej pampa titlajtlakolejkej uan tijchiuaj kampeka ayokmo titlajtlakolchiuasej. Yeka, kemantika uelis tijyolmatij kej se tosiuaikni katli miak xiuitl kitekipanojtok Jehová, ya kiijtoua: “Nimoiljuia amo kema uelis nielis se kuali maseuali”.

Nochi uelis tijnextisej tijpiaj kuali toyolo. Ni eli se kuali tlamantli tlen toTeotsij itonal techpaleuia ma tijnextikaj, uajka kena uelis tijnextisej ni kuali tlamantli maske tojuantij timoiljuisej amo tiuelisej o maske tikitasej miakej maseualmej amo kiampa kichiuaj. Ma tikitakaj tlake kiijtosneki tijpiasej kuali toyolo uan kenijkatsa nojua tijnextijtosej ipan tonemilis.

Uelis tikijtosej se maseuali kinextia kipia kuali iyolo kema kichiua tlen kuali, tlen xitlauak uan nochipa kuali monejnemiltia. Nojkia, nochipa kitejtemolia kenijkatsa kinpaleuis sekinok uan kiampa kichiua.

Uelis tikinixmatij sekij maseualmej katli nochipa kinekij kinpaleuisej ininchampoyouaj uan ininuampoyouaj. Se maseuali katli toTeotsij kiita kipia kuali iyolo, amo san ya nopa kichiua. Kej tijmatij, amo aka uelis kuali kinextis ni tlamantli pampa Biblia kiijtoua “ipan nochi ni Tlaltipaktli axonka niyon se tlakatl tlen nochipa kichiua tlen kuali uan axkema tlajtlakolchiua” (Ecl. 7:20). Uan apóstol Pablo kiijtok: “Nijmati ipan notlajtlakolchijkayolo, axtleno onka tlen kuali” (Rom. 7:18). Uajka, tlaj tijnekij tijnextisej ni kuali tlamantli, moneki tikitasej kenijkatsa Jehová kinextia kuali iyolo, pampa ya nochipa kinextia nopa kuali tlamantli.

Jehová kiijtoua tlake tlamantli eli kuali. Katli kiijkuilok se salmo kiiljuik: “Ta nelia tikuali uan tijchiua san tlen kuali. Uajka xinechmachti kejatsa ma nijchiua tlen tinechyolmelajtok para nijchiuas” (Sal. 119:68). Ma tikitakaj ome tlamantli tlen ijkuilijtok ipan ni versículo, tlen ika Jehová kinextia kuali iyolo.

Jehová kuali iyolo. Jehová nochipa kinextia nopa kuali tlamantli. Ma tikitakaj tlen panok kema Jehová kiiljuik Moisés: “Na nijchiuas ma panos moixtla nochi tlen kuali tlen na”. Kema panoyaya iueyitilis toTeotsij, nojkia kinextik kuali iyolo, Moisés kikajki ni tlajtoli: “Na niDios, moTeko. Na tlen nitetlasojtla uan nijpia ueyi noyolo ika tlakamej. Ouij para nikualanis, pampa tlauel niteiknelia. Uelis timotemachis ipan na pampa senkistok nitemachtli. Nikinnextilis tlauel onpano miak tlakamej kejatsa nikiniknelia, pampa nikintlapojpoljuia inintlajtlakoljuaj kema nechuejkamajkauaj uan nechixpanoj. Pero intla se akajya tlajtlakolchiua, axnikijtoua para axtleno kichijtok” (Éx. 33:19; 34:6, 7). Yeka, uelis tikijtosej Jehová nochipa kinextia kuali iyolo. Maske kema Jesús itstoya ipan Tlaltipaktli nochipa kinextik kuali iyolo, kiijtok: “San toTeko Dios itstok kuali” (Luc. 18:19).

Jehová kichiua tlen kuali. Nochi tlen Jehová kichiua  kinextia kuali iyolo. Biblia kiijtoua: “ToTeko ta kuali moyolo ika nochi tlakamej uan moteiknelijkayo monextia ipan sejse tlamantli tlen tijsenkajtok” (Sal. 145:9). Jehová kinextia kuali iyolo pampa amo techikoiknelia, kinchijchijki maseualmej uan kinmaka nochi tlamantli tlen kinpaleuia ma yoltokaj (Hech. 14:17). Nojkia kiampa kinextia kema techtlapojpoljuia. Katli kiijkuilok se salmo kiijtok: “ToTeko, ta nelia tikuali uan timoketstok timokualtlalijtok para titetlapojpoljuis” (Sal. 86:5). Uelis timotemachisej nochi katli kuali monejnemiltiaj Jehová kinmakas nochi tlamantli tlen inijuantij kinekij (Sal. 84:11).

Jehová techchijchijki kej itlachialis, yeka uelis tijnextisej kuali toyolo uan tijchiuasej tlen kuali (Gén. 1:27). Maske kena uelis tijchiuasej nopa, Biblia kiijtoua: “Ximomachtikaj inkichiuasej tlen kuali” (Is. 1:17). Ma tikitakaj eyi tlamantli tlen techpaleuis ma tijnextikaj nopa kuali tlamantli.

Se: ma tijtlajtlanikaj toTeotsij ma techmaka itonal, kiampa kiitas tijpiaj kuali toyolo (Gál. 5:22). ToTeotsij itonal techpaleuis tijchiuasej tlen kuali uan tijkualankaitasej tlen amo kuali (Rom. 12:9). Biblia kiijtoua Jehová uelis techpaleuis ma tikijtokaj uan ma tijchiuakaj nochi tlen kuali (2 Tes. 2:16, 17).

Ome: moneki tijpouasej toTeotsij iTlajtol. Kema tijpouaj Biblia, Jehová techmachtia “kejatsa uelis tijtlapejpenis[ej] nopa ojtli tlen más kuali” uan nojkia techiljuia kenijkatsa “uelis tijchiuasej nochi tlen kuali” (Prov. 2:9; 2 Tim. 3:17). Kema tijpouaj uan timoyoliljuiaj ipan tlen Biblia kiijtoua, techpaleuia ma elto ipan toyolo kuajkuali tlamantli tlen toTeotsij uan tlen mosentlalijtok kichiuas. Tlen tijyekouaj eli se tlamantli tlen tlauel ipati tlen techpaleuis kema tlauel monekis (Luc. 6:45; Efes. 5:9).

Eyi: moneki tijchiuasej kampeka tijtokilisej “tlen kuali” (3 Juan 11). Ipan Biblia uelis tikitasej kenijkatsa se keskij kinextijkej ni kuali tlamantli uan kenijkatsa uelis tijchiuasej kej inijuantij. Maske san Jehová uan Jesús kuali kinextiaj nopa tlamantli, nojkia uelis tijyekosej tlen kichijkej sekinok itekipanojkauaj, kej Tabita uan Bernabé (Hech. 9:36; 11:22-24). Uelis timomachtis ipan Biblia tlen kichijkej uan kenijkatsa kinpaleuijkej sekinok. Kema timomachtisej, ma timoiljuikaj kenijkatsa uelis tikinpaleuisej tochampoyouaj o se toikni tlen tlanechikoli. Nojkia, ma timoiljuikaj ipan nopa tlateochiualistli tlen kiselijkej Tabita uan Bernabe, pampa tojuantij nojkia uelis tijselisej nopa tlateochiualistli.

Nojkia, uelis timoiljuisej kenijkatsa ipan ni tonali sekij toikniuaj kichiuaj kampeka kinpaleuisej sekinok. Ma timoiljuikaj tlen kichiuaj ueuejtlakamej, inijuantij tlauel tekitij uan kinpaktia kichiuasej tlen kuali. Uan amo ma tikilkauakaj tlen kichiuaj  tosiuaikniuaj, inijuantij kinmachtiaj sekinok kenijkatsa “kichiuasej tlen kuali” uan tlamachtiaj ika tlen kiijtouaj uan ika tlen kichiuaj (Tito 1:8; 2:3). Se tosiuaikni katli itoka Roslyn, kiijtoua: “Nijpia se nouampo katli nochipa kichiua kampeka kinpaleuis uan kinyolchikauas toikniuaj tlen tlanechikoli. Moiljuia tlake tlamantli kinpano ipan ininnemilis uan momajtok kinmakas se tlenijki maske amo tlauel patiyo o kinpaleuis ipan sekinok tlamantli. Na nijmati ya nelia kipia kuali iyolo”.

Jehová kiniljuia itekipanojkauaj: “Xijtemokaj tlen kuali uan xijchiuakaj” (Amós 5:14). Tlaj kiampa tijchiuasej, amo san tijpatiitasej itlanauatiljuaj, nojkia timosentlalisej tijchiuasej tlamantli tlen kipaktia.

Amo ma timoiljuikaj moneki tijchiuasej miak tlamantli o tlen tlauel ouij uan kiampa tikinpaleuisej sekinok. Ma timoiljuikaj ipan ni neskayotl. Tlaj tijnekij se xochitl ma moskalti, amo moneki sampatsi tijtekilisej miak atl, moneki miakpa uan pilkentsi atl tijtekilijtiasej. Tojuantij nojkia uelis tijnextisej kuali toyolo tlaj tijchiuasej miak tlamantli tlen amo ouij uan kiampa tikinpaleuisej sekinok.

Biblia kiijtoua nochi moneki timokualchijchiuasej uan timosentlalisej tijchiuasej “nochi kuali tekitl” (2 Tim. 2:21; Tito 3:1). Tlaj nochipa tikitasej tlake kinpano sekinok maseualmej, uajka tijmatisej kenijkatsa uelis tikinpaleuisej uan kiampa “más kipiasej chikaualistli para kineltokasej toTeko” (Rom. 15:2). Kemantika uelis monekis tikinmakasej tlen tijpiaj (Prov. 3:27). Uelis tijtlaneuisej se akajya ma tlakuati tochaj o kema tijchiuasej sekinok tlamantli. ¿Tikixmatij se akajya katli mokokoua? Uelis tijtitlanilisej se amatlajkuiloli, tiasej tipaxalotij o tijnojnotsasej ika teléfono. Kej ya tikitakej, kena uelis tikijtosej “tlamantli tlen kuali tlen kinyolchikauas uan kinualikilis tlateochiuali [katli] kikakisej” (Efes. 4:29).

Tojuantij tijnekij tijchiuasej kej Jehová uan tikinchiuilisej tlen kuali nochi maseualmej, yeka amo tikinchikoitaj, kiampa tijchiuaj kema tikinmachtiaj tlen toTeotsij iTlanauatijkayo. Sanse kej Jesús, tikinchiuiliaj tlen kuali nochi maseualmej maske sekij techkualankaitaj (Luc. 6:27). Tlauel kuali tlaj nochipa tikinnojnotsaj uan tikinchiuiliaj tlen kuali, pampa katli “kichiuaj ni kuali tlamantli axmoneki se tlanauatili” (Gál. 5:22, 23). Maske techtlaijiyouiltisej o tijpiasej miak kuesoli, tlaj nochipa tijchiuasej tlen kuali, uelis kinyoltilanas sekinok maseualmej ma kinekikaj kimatisej tlen melauak uan tijueyichiuasej Jehová (1 Ped. 3:16, 17).

Biblia kiijtoua katli “kichiua se kuali tlakatl kitemitia iyolo ika pakilistli” (Prov. 14:14). ¿Kenijkatsa pano nopa tlamantli? Uelis maseualmej nojkia techchiuilisej tlen kuali (Prov. 14:22). Uan maske amo kiampa panos, tlaj tijpiasej kuali toyolo, uelis kinyoltlalis uan ayokmo tlauel techkualankaitasej (Rom. 12:20).

Miakej uelis kiijtosej kenijkatsa tlauel kinpaleuijtok pampa ayokmo kichiuaj tlen amo kuali. Ma tikitakaj tlen kipanok Nancy, ya kiijtoua: “Achtouia amo nijchiuayaya tlen kinamikiyaya nijchiuas, niauilnemiyaya uan amo nitlatlepanitayaya. Uan kema pejki nijchiua ipan nonemilis tlen toTeotsij itlanauatiljuaj kiijtoua, pejki tlauel niyolpaki. Nama nelia nimopatiita”.

Tojuantij tlauel tijnekij tijnextisej tijpiaj kuali toyolo pampa tijmatij kiampa uelis tijyolpakiltisej Jehová. Ya nochipa kiita tlen tijchiuaj maske sekinok amo kiitaj. Nojkia kiita tlen tijchiuaj uan kema timoiljuiaj tlamantli tlen kuali (Efes. 6:7, 8). Nopa tlauel techpaleuia pampa “toTeko kikualita se tlakatl tlen kuali [iyolo]” (Prov. 12:2). Yeka, nojua ma tijchiuakaj kampeka tijnextisej tijpiaj kuali toyolo. Jehová kiijtoua “kinueyitlalis uan kinmakas tlatlepanitakayotl uan tlaseuilistli nochi tlakamej tlen kichiuaj tlen kuali” (Rom. 2:10).