Se keskij levitas, katli amo eliyayaj sacerdotes, kichiuayayaj se keski tekitl ipan nopa teokali, kej katli tlamokuitlauiyayaj. Kinyakanayaya se tlayakanketl tlen nopa teokali. Nopa ixtlamatketl judío Filón kiijtok tlake tekitl kichiuayayaj: “Se keskij moketsayayaj kaltentipa uan nopaya tlamokuitlauiyayaj; sekinok itstoyaj kalijtik, iixpa teopamitl, uan inijuantij amo kinkauayayaj ma kalakikaj sekinok maseualmej katli amo kinamikiyaya nopaya itstosej; uan sekinok seyoual uan se tonal tlapijpixtinemiyayaj ipan nochi teokali. Nochi kiampa kichiuayayaj kema kinnamikiyaya”.

Nopa Sanedrín kinyakanayaya nochi nopa tlamokuitlauianij. Nopa tlanauatijketl tlen Roma san inijuantij kinkauayaya ma kipiakaj tlen ika tlateuiskiaj.

Nopa ixtlamatketl Joachim Jeremias kiijtoua kema Jesús kiitskiskiaj, inijuantij elkej katli “kiniljuik kenke amo kema kiitskijkej kema tlamachtiyaya ipan itlamapa tlen nopa teokali” (Mat. 26:55). Nojkia, nopa ixtlamatketl kiijtoua kema achtoui kinejkej kiitskisej Jesús, nojkia elkej nopa tlamokuitlauianij tlen nopa teokali (Juan 7:32, 45, 46). Teipa, nopa tlayakanketl uan tlamokuitlauianij kinnauatijkej ma kinuikakaj Jesús itokilijkauaj ininixpa nopa Sanedrín. Uan uelis nojkia elkej nopa tlamokuitlauianij katli kiuauatatskej Pablo kema kikixtijkej tlen nopa teokali (Hech. 4:1-3; 5:17-27; 21:27-30).