1. ¿Kenke Jesús kiiljuik Jehová ma kinmokuitlaui itokilijkauaj?

IPAN nopa youali kema Jesús nechka kimiktiskiaj, moiljuik ipan nopa kuesoli tlen kiixnamikiskiaj itokilijkauaj. Jesús tlauel kinikneliyaya itokilijkauaj, yeka kiiljuik iTata ma kinmanaui ika tlen Satanás kinchiuiliskia (Juan 17:14, 15). Ya kimatiyaya kema tlakuepiliskia iluikak, Satanás nojua kintlatsakuiltiskia nochi katli kitekipanoskiaj Jehová. Yeka tijmatij toTeotsij itekipanojkauaj monekiskia ma kinmokuitlauikaj.

2. ¿Kenke timotemachiaj Jehová technankilis kema timomaijtosej?

² Jehová tlauel kiiknelia Jesús, yeka kitlakakilik kema momaijtok. Tlaj tojuantij tijchiuaj kampeka tijchiuasej tlen ya kipaktia, ya nojua techiknelis uan technankilis kema tikiljuisej ma techpaleui uan ma techmokuitlaui. Jehová tlauel tetlasojtla, yeka nochipa kinmokuitlauis itekipanojkauaj. Tlaj amo kiampa kichiuaskia, uajka amo mouikaskia ika tlen kiijtosneki itoka.

3. ¿Kenke moneki Jehová ma techmokuitlaui?

³ Tijmatij Satanás kinauatia ni Tlaltipaktli, yeka tlauel moneki Jehová ma techmokuitlaui (Apoc. 12:12). Satanás kichijtok se keskij maseualmej ma moiljuikaj kema techtlatsakuiltiaj kejuak “kitekipanouaj toTeko” (Juan 16:2). Uan sekij katli amo tlaneltokaj ipan toTeotsij, techtlatsakuiltiaj pampa amo tijchiuaj kej inijuantij. Maske kiampa kichiuaj, Jehová itekipanojkauaj kimatij ya eli ‘temachtli uan yajaya kinmakas tetili uan kinmanauis tlen Axkualtlakatl’ (2 Tes. 3:3). Ma tikitakaj ome tlamantli tlen ika Jehová techmokuitlauia.

4. Kej kiijtoua Efesios 6:13-17, ¿tlake techmaka Jehová uan kiampa techmokuitlauia?

⁴ Jehová techmaka tlen ika timomanauisej uan kiampa nojua kuali titlaneltokatosej, pampa Satanás kejuak nochipa techteuijtok (xijpoua Efesios 6:13-17). Maske tlen Jehová techmaka eli tlauel kuali, san techpaleuis tlaj kuali tijtekiuiaj. Nama tikitasej tlake kiixnextia sejse tlamantli tlen ika techmokuitlauia Jehová.

5. ¿Tlake kineki kiijtos tijpixtosej tlen melauak kej se tlateuijketl itlajkoilpika, uan kenke moneki tijtekiuisej?

⁵ Kema kiijtoua “tlen melauak [...] inmechkualtlalijtos keja se soldado [...] itlajkoilpika”, kiixnextia nochi tlen melauak tlen eltok ipan Biblia. ¿Kenke moneki kejuak kuali timoilpisej totlajkoilpika? Pampa, “nochi istlakayotl peua ika [Satanás]” (Juan 8:44). Ya tlauel miak xiuitl itstlakatitok uan kinkajkayajtok “nochi tlakamej tlen itstokej kampa ueli ipan Tlaltipaktli” (Apoc. 12:9). Maske kiampa kichiua, tlen Biblia tlamachtia tlauel techpaleuijtok uan kiampa amo techkajkayaua. ¿Kenijkatsa kejuak timotlaliliaj totlajkoilpika? Kema tijyekouaj tlen melauak tlen Jehová, tijueyichiuaj kej ya kipaktia uan nochipa tiitstokej xitlauak iixpa (Juan 4:24; Efes. 4:25; Heb. 13:18).

6. ¿Tlake kineki kiijtos nopa tepostli tlen ika moyolixtsakuas, uan kenke moneki tijtekiuisej?

⁶ Nopa “tepostli tlen [ika] moyolixtsakuas” kiixnextia nochi tlen xitlauak tlen toTeotsij itlanauatiljuaj. ¿Kenke moneki tijtekiuisej? Pampa san se kej nopa tepostli tlen kitekiuiyaya se tlateuijketl kema moyolixtsakuayaya, toTeotsij itlanauatiljuaj kimokuitlauia toyolo uan kiampa amo tijchiuaj tlen momajtokej kichiuaj ipan ni Tlaltipaktli (Prov. 4:23). Jehová kineki ma tikiknelikaj uan ma tijtekipanokaj ika nochi toyolo (Mat. 22:36, 37). Yeka, Satanás nochipa kineki kixelos toyolo, uan kineki ma tikixtokakaj tlen onka ipan Tlaltipaktli (Sant. 4:4; 1 Juan 2:15, 16). Uan tlaj Satanás kiitas amo tikixpanoj Jehová, ya nojua kitemolis kenijkatsa tikixpanosej.

7. ¿Kenijkatsa kejuak timotlaliliaj nopa tepostli tlen ika timoyolixtsakuaj?

⁷ Tojuantij kejuak timotlaliliaj nopa ‘tepostli tlen ika timoyolixtsakuaj’ kema tikitaj se keski tlamantli kej Jehová kiita (Sal. 97:10). Miakej maseualmej moiljuiaj toTeotsij itlanauatiljuaj kejuak techilpitok uan amo ueli tijchiuaj miak tlamantli. Tijmatij tlaj ayokmo tijneltokasej tlen toTeotsij itlanauatiljuaj kiijtoua, uajka tijchijtosej kej se tlateuijketl katli mokixtilia nopa tepostli tlen ika moyolixtsakua pampa uelis moiljuia tlauel etik. ¡Tlauel amo kuali tlaj kiampa tijchiuasej! Katli kiikneliaj Jehová amo kiitaj itlanauatiljuaj kej se tlamantli tlen tlauel ouij kichiuasej, inijuantij kiitaj kej se tlamantli tlen kinmanauia (1 Juan 5:3).

8. ¿Tlake kiijtosneki kuali timotlalilisej totekak uan tijmoyauasej nopa kuali tlamachtili?

⁸ Pablo nojkia kiijtok kejuak timotlaliliaj totekak kema tiauij tijmoyauaj nopa kuali tlamachtili tlen temaka tlaseuilistli. Ni kiijtosneki moneki kuali timokualchijchiuasej uan kiampa tikinkamanaljuisej sekinok nopa kuali tlajtoli. Kema tikinkamanaljuiaj maseualmej tlen Biblia tlamachtia, techpaleuia nojua kuali ma titlaneltokakaj. Tlauel techyolchikaua tikitasej toikniuaj ipan nochi Tlaltipaktli kichiuaj kampeka kiitasej kenijkatsa kimoyauasej nopa kuali tlamachtili. Yeka tlajtolmoyauaj kampa tekitij, kampa momachtiaj, kampa tlanamakaj, kajkalpa, kema tlakouaj, kema kinpaxalouaj ininchampoyouaj katli amo kitekipanouaj Jehová, kema kinkamanaljuiaj sekinok maseualmej uan nojkia tlajtolmoyauaj kema  amo uelij kisaj ininchaj. Tlauel amo kuali eliskia tlaj pampa timajmauij, ayokmo titlajtolmoyauaskiaj. Techpanoskia kej se tlateuijketl katli mokixtilia itekak kema yaui tlateuiti: nima moikxikokoskia, amo ueliskia kuali momokuitlauis uan amo ueliskia kichiuas tlen kinauatiaj.

9. ¿Kenke moneki kejuak timotlalilisej ‘totepostsajka’?

⁹ Totlaneltokilis eli “keja itepostsajka” se tlateuijketl. Timotemachiaj Jehová kichiuas nochi tlen kiijtojtok. Totlaneltokilis techpaleuia kejuak ma tijseuikaj nopa ‘lemenkuatlamintli’ tlen Satanás techmajkauilia. Moneki kejuak timotlalilisej totepostsajka, kiampa amo tijneltokasej tlen apóstatas tlamachtiaj yon techyolkokosej kema techpinajtiaj o techtlaijiljuiaj. Tlaj amo kuali titlaneltokaj, amo uelis tijchiuasej tlen Jehová technauatia kema sekinok techtetsopasej ma tikixpanokaj itlanauatiljuaj. Yeka, tlaj tijmanauiaj tlen tijneltokaj kampa titekitij o kampa timomachtiaj, techpaleuis nojua kuali ma titlaneltokakaj (1 Ped. 3:15). Nojkia techpaleuia kema amo tijseliaj se tekitl kampa kuali techtlaxtlauiskiaj tlen kichiuaskia ayokmo kuali ma tijtekipanokaj Jehová (Heb. 13:5, 6). Uan totlaneltokilis nojkia techpaleuia  amo ma tijtlauelkauakaj Jehová maske sekinok techtlatsakuiltiaj (1 Tes. 2:2).

10. ¿Tlake kiijtosneki kema tikijtouaj itepostsontsajka se tlateuijketl, uan kenke moneki timotlalilisej?

¹⁰ Tlen tijchiaj tijselisej eli “keja itepostsontsajka” se tlateuijketl tlen techpaleuia timotemachisej Jehová kitlamiltis mikilistli uan kinteochiuas katli kichiuaj ipakilis (1 Tes. 5:8; 1 Tim. 4:10; Tito 1:1, 2). Kej “itepostsontsajka” se tlateuijketl kimokuitlauiyaya itsonteko, tlen tijchiaj tijselisej nojkia kimokuitlauia totlalnamikilis. ¿Kenijkatsa techpaleuia? Tlen tijchiaj techpaleuia ma timosentlalikaj ipan tlen Jehová kitenkajtok techmakas uan ma tikitakaj tokuesoljuaj kej kinamiki. ¿Kenijkatsa kejuak timotlaliliaj totepostsontsajka? Kema tijchiuaj kampeka timoiljuisej sanse kej Jehová. Yeka, amo timotemachiaj ipan tomij, san timotemachiaj ipan tlen Jehová techtenkauilijtok (Sal. 26:2; 104:34; 1 Tim. 6:17).

11. ¿Tlake eli nopa espada tlen “itonal toTeko techmakatok” uan kenke moneki tijtekiuisej?

¹¹ Biblia eli kejuak se espada “tlen itonal toTeko techmakatok”. Ni espada kinextia tlen melauak uan nojkia kinpaleuia maseualmej ayokmo ma kineltokakaj tlen amo melauak uan kuali ma monejnemiltikaj (2 Cor. 10:4, 5; 2 Tim. 3:16, 17; Heb. 4:12). ¿Tlake techpaleuia kuali ma tijtekiuikaj? Kema timomachtiaj toselti uan kema toTeotsij itlanechikol techmachtia (2 Tim. 2:15). Nama, ma tikitakaj seyok tlamantli tlen Jehová techmaka tlen nojkia techpaleuia timomanauisej.

12. ¿Ajkia inijuantij nojkia uelis techpaleuisej, uan kenke?

¹² Se kuali tlateuijketl kimati moneki kipaleuisej sekinok uan kiampa kintlanis ikualankaitakauaj. Nojkia, toselti amo uelis tikintlanisej Satanás uan katli kipaleuiaj, moneki ma techpaleuikaj toikniuaj. Jehová techmakatok tlauel miakej toikniuaj katli uelis techpaleuisej (1 Ped. 2:17).

13. Kej kiijtoua Hebreos 10:24, 25, ¿kenijkatsa techpaleuia tlanechikoli?

¹³ Moneki tiasej tlanechikoli tlaj tijnekij ma techpaleuikaj toikniuaj (xijpoua Hebreos 10:24, 25). Maske uelis kemantika timoyolkuesouaj, kema tiauij tlanechikoli tlauel techpaleuia. ¿Kenijkatsa? Pampa kema tlanankiliaj, kema kiixtomaj se tlamachtili uan kema timotlajpalouaj, techyolchikauaj uan techpaleuia nojua ma tijtekipanokaj Jehová (1 Tes. 5:14). Nojkia, tlauel tiyolpakij kema ipan tlanechikoli tikinpaleuiaj sekinok (Hech. 20:35; Rom. 1:11, 12). Uan nopaya techpaleuia kuali titlajtolmoyauasej, kuali titlamachtisej, kuali tijtekiuisej videos uan amatlajkuiloli tlen tlauel tijtekiuiaj. Yeka, ma timokualchijchiuakaj kema tiauij tlanechikoli, ma titlakaktokaj uan ma tijchiuakaj tlen nopaya techmachtiaj. Tlaj kiampa tijchiuaj, techpaleuis kuali ma timokualchijchijtokaj uan tielisej se “kuali soldado tlen Jesucristo” (2 Tim. 2:3).

14. ¿Tlake tlapaleuili tijpiaj?

¹⁴ Nojkia, techpaleuiaj uan techmokuitlauiaj tlauel miakej iluikaeuanij. Yeka, tlaj ya tijmatij tlake uelis kichiuas san se iluikaejketl, ma timoiljuikaj tlake kichiuaskiaj nopa tlauel miakej iluikaeuanij (Is. 37:36). Yeka, yon maseualmej uan amo kuali ajakamej amo uelis kintlanisej. Uelis kemantika timoiljuisej tiitstokej toselti, kema kiampa timoiljuisej ma tikilnamikikaj Jehová uan iluikaeuanij itstokej touaya uan techpaleuisej (Juec. 6:16). Yeka, nochipa ma tikilnamiktokaj kema se tlen katli iuaya titekitij, se katli iuaya timomachtiaj o se tlen tochampoyouaj katli amo kitekipanoua Jehová kiijtoua o kichiua se tlamantli tlen techyolkokoua, ma tikilnamikikaj amo tiitstokej  toselti pampa Jehová nochipa techpaleuia.

15. Kej kiijtoua Isaías 54:15, 17, ¿kenke amo aka uelis kichiuas ayokmo ma titlajtolmoyauakaj?

¹⁵ Tijmatij maseualmej katli kinnauatia Satanás, tlauel techkualankaitaj. ¿Kenke? Pampa amo timokalakiaj ipan política uan amo titlapaleuiaj kampa mochiua tlauilankayotl. Nojkia, pampa titematiltiaj toTeotsij itoka, tikiniljuiaj maseualmej san toTeotsij iTlanauatijkayo kichiuas ma onka tlaseuilistli uan pampa tijchiuaj tlen toTeotsij tlanauatia. Tikiniljuiaj maseualmej Satanás, katli kinauatia ni Tlaltipaktli, eli se istlakatiketl uan se temiktijketl (Juan 8:44). Uan titematiltiaj nechka tlamis nochi tlen amo kuali. Maske Satanás uan katli kipaleuiaj kinekiskiaj kichiuasej ayokmo ma titlajtolmoyauakaj, amo kema uelis kiampa kichiuasej. Tojuantij nochipa tijtemolisej kenijkatsa tijueyichiuasej Jehová. Maske Satanás kipia chikaualistli, amo kichijtok maseualmej ayokmo ma kitlakakilikaj tlen toTeotsij tlamachtia. ¿Kenke? Pampa Jehová nochipa techmokuitlauijtok (xijpoua Isaías 54:15, 17).

16. ¿Kenijkatsa techmanauis Jehová kema mochijtos nopa ueyi tlaijiyouilistli?

¹⁶ ¿Tlake panos teipa? Kema mochijtos nopa ueyi tlaijiyouilistli, Jehová techmanauis kej amo kema timoiljuijtokej. Se, Jehová kinmanauis nochi itekipanojkauaj katli amo kitlauelkauasej kema kichiuas “nochi tlanauatianij ipan Tlaltipaktli” ma kitsontlamiltikaj ueyi Babilonia o nochi religiones tlen amo melauak (Apoc. 17:16-18; 18:2, 4). Ome, kinmanauis itekipanojkauaj kema kitsontlamiltis nochi tlen amo kuali ipan Armagedón (Apoc. 7:9, 10; 16:14, 16).

17. ¿Kenijkatsa techpaleuia pampa tiitstokej inechka Jehová?

¹⁷ Satanás amo uelis techchiuilis se tlamantli tlen tlauel amo kuali tlaj tiitstosej inechka Jehová. Tijmatij Satanás kitsontlamiltisej uan ayokmo kema sampa itstos (Rom. 16:20). Yeka, nochipa ma timotlalilijtokaj tlen ika timomanauiaj uan amo kema ma timokixtilikaj. Nojkia amo kejuak ma titlateuikaj toselti, ma tikinpaleuikaj toikniuaj uan ma tijchiuakaj tlen Jehová techiljuia. Tlaj kiampa tijchiuaj, Jehová nochipa techpaleuis uan techmokuitlauis (Is. 41:10).