1. ¿Tlake tlaouijkayotl tikixnamikij?

¿TIKIXNAMIKTOK se tlaouijkayotl? Uelis se toikni tlen totlanechikol techyolkokok (Sant. 3:2), uelis katli ininuaya timomachtiaj o katli ininuaya titekitij techpinajtiaj pampa tijtekipanouaj Jehová (1 Ped. 4:3, 4), nojkia uelis se tlen tochampoyouaj ayokmo kineki ma tiakaj tlanechikoli yon ma titlajtolmoyauakaj (Mat. 10:35, 36). Tlaj tlauel techtlaijiyouiltia tlen tikixnamiktokej, uelis timoiljuisej ayokmo tijtekipanosej Jehová. Maske uelis kiampa techpanos, moneki timotemachisej Jehová techmakas tlalnamikilistli uan techpaleuis ma tikijiyouikaj tlen tikixnamikisej.

2. Kej kiijtoua Romanos 15:4, ¿kenijkatsa techpaleuis tlaj tijpouaj Biblia?

² Ipan Biblia Jehová kiijtoua kenijkatsa maseualmej kiixnamijkej uejueyi tlaouijkayotl. Kiampa kichijki pampa kinejki ma tijyekokaj se keski tlamantli, kej kiijtok apóstol Pablo ipan Romanos 15:4 (xijpoua). Tlen tijpouaj techyolchikaua uan techpaleuia ma timotemachikaj ipan tlen tijselisej. Yeka, amo san ma tijpouakaj Biblia, moneki tijchiuasej kampeka ma asi ipan toyolo uan ma kipatla tlen timoiljuiaj. Tlaj amo tijmatij kenijkatsa tikixnamikisej tlaouijkayotl, uelis tijchiuasej ni tlamantli: 1) timomaijtosej, 2) timonejneuilisej, 3) timoyoliljuisej uan 4) tijchiuasej tlen timomachtiaj. Nama, ma tikitakaj tlake kineki kiijtos sejse tlen ni tlamantli. * Nojkia ika ni naui tlamantli tikitasej tlen kinpanok tlanauatijketl David uan apóstol Pablo.

3. ¿Tlake moneki tijchiuasej kema tijpouasej Biblia uan kenke?

 ³ 1) Timomaijtosej. Kema tijpouasej Biblia ma tikiljuikaj Jehová ma techpaleui tikitasej kenijkatsa techpaleuis tlen tijpouasej. Tlaj tijnekij tijmatisej tlake uelis tijchiuasej kema tijpiaj kuesoli, ma tikiljuikaj ma techpaleui tijpantisej tlen Biblia tetlajtolmaka (Filip. 4:6, 7; Sant. 1:5).

4. ¿Tlake techpaleuis kema tijpouasej se tlapoualistli ipan Biblia?

⁴ 2) Timonejneuilisej. Jehová kichijki maseualmej ma monejneuilikaj. Kema tijpouaj Biblia uan tijnekij ma techpaleui, moneki timonejneuilisej uan timoiljuisej kejuak nopaya tiitstokej. Nojkia, ma tijchiuakaj kampeka tikitasej tlen kiitak katli nopaya itstoya uan tijyolmatisej tlen kiyolmatki.

5. ¿Tlake kineki kiijtos timoyoliljuisej uan kenijkatsa uelis tijchiuasej?

⁵ 3) Timoyoliljuisej. Timoyoliljuisej kineki kiijtos timoiljuisej ipan tlen tijpouaj uan ipan tlen techmachtijtia. Tlaj kiampa tijchiuaj, techpaleuis nojua tijmatisej tlen ya tijmatij uan nojua kuali tijkuamachilisej se tlamachtili. Tlaj tijpouaj Biblia uan amo timoyoliljuiaj, eli sanse kej kema se akajya kipixtok miak tlamantli tlen ika kiajuiyaltia tlakualistli. Tlaj kineki ajuiyak ma mokaua, moneki kitemilis tlen kiajuiyajmakas. Yeka, kema timoyoliljuiaj tlen tijpouaj, kejuak tijtlaliaj tlen kiajuiyajmaka tlakualistli. Uelis techpaleuis timoyoliljuisej tlaj timotlatsintokiaj ni tlajtlanili: ¿Tlake kipaleuik ma kiixnamiki kuesoli? ¿Kenijkatsa Jehová kipaleuik? ¿Kenijkatsa uelis nijtekiuis tlen nimomachtijtok uan kiampa nikijiyouis tlen nechpano?

6. ¿Kenke moneki tijchiuasej tlen timomachtiaj?

⁶ 4) Tijchiuasej tlen timomachtiaj. Jesús kiijtok tlaj amo tijchiuasej tlen timomachtiaj, tieliskiaj kej nopa maseuali katli kichijchiua ichaj xalixko. Nochi tlen kichijki eli san tlapik. ¿Kenke? Pampa kema tlauel uetsis atl, nopa kali amo kiijiyouis uan uelonis (Mat. 7:24-27). Yeka, tlaj amo tijchiuaj tlen timomachtiaj, san tlapik eliskia tlaj timomaijtouaj, timonejneuiliaj uan timoyoliljuiaj. Uan kema tikixnamikisej se tlaouijkayotl, totlaneltokilis amo techpaleuis. Yeka, tlaj timomachtiaj uan tijchiuaj tlen tijyekouaj, kuali tijtlapejpenisej tlen tijchiuasej, tijpiasej tlaseuilistli uan kuali titlaneltokasej (Is. 48:17, 18). Ma tijchiuakaj ni naui tlamantli uan ma tikitakaj kenijkatsa techpaleuia tlen kipanok David.

7. ¿Tlake tlapoualistli tikitasej?

⁷ ¿Tlake techpaleuis tlaj techyolkokojtok se touampo o se tlen tochampoyouaj? Uelis tikitasej tlake kichijki Absalón, ikone David, katli kiyolkokok itata uan kinejki kitekikixtilis (2 Sam. 15:5-14, 31; 18:6-14).

8. ¿Tlake uelis tijchiuasej uan kiampa techpaleuis Jehová?

⁸ 1) Timomaijtosej. Achtoui ma tikiljuikaj Jehová kenijkatsa tijyolmatij pampa techchiuilijkej tlen amo kuali uan teipa ma tijpouakaj nopa tlapoualistli (Sal. 6:6-9). Teipa, ma tikiljuikaj ma techpaleui tijpantisej tlen Biblia tetlajtolmaka uan kiampa tijmatisej tlake tijchiuasej.

9. ¿Kenijkatsa tikixtomaskia tlen kinpanok David uan Absalón ika san se keski tlajtoli?

⁹ 2) Timonejneuilisej. Ma timonejneuilikaj ipan ni tlapoualistli uan ma tikitakaj kenijkatsa kiyolkokok David. Ipan miak xiuitl, ikone Absalón kitemolik kenijkatsa kichiuaskia maseualmej ma kipaleuikaj  (2 Sam. 15:7). Kema kiitak ueliskia kichiuas tlen moiljuijtoya, kintitlanki se keski tlakamej ma kiniljuitij maseualmej ma kipaleuikaj. Nojkia kiiljuik Ahitofel ma kipaleui, katli eliyaya ineluampo David uan katli kitlajtolmakayaya. Absalón kiijtok eliyaya se tlanauatijketl uan tlanauatik ma kiitskikaj uan ma kimiktikaj David. Uelis ipan nopa tonali, David tlauel mokokouayaya (Sal. 41:1-9). Kema David kimatki nochi tlen panotoya, yajki ipan seyok altepetl. Teipa, itlateuijkauaj Absalón moteuijkej ininuaya David itlateuijkauaj. Ipan nopa tonali kintlankej, uan Absalón kimiktijkej.

10. ¿Tlake ueltoskia kichiuas David?

¹⁰ Nama ma timoiljuikaj kenijkatsa kiyolmatki David. Maske David tlauel kiikneliyaya Absalón uan motemachiyaya ipan Ahitofel, nopa omej kitlauelkajkej, tlauel kiyolkokojkej uan kinejkej kimiktisej. David ueltoskia moiljuis nopa sekinok iuampoyouaj nojkia kipaleuiyayaj Absalón uan ayokmo motemachiskia ipan inijuantij. Ueltoskia san mosentlalis ipan tlen moyoliljuiyaya uan yaskia ipan seyok altepetl. O moiljuiskia ayokmo tleno ueliskia kichiuas. Ya amo kiampa kichijki, ¿tlake kipaleuik David ma kiijiyoui tlen kipanok?

11. ¿Tlake kipaleuik David ma kiixnamiki nopa ueyi tlaouijkayotl?

¹¹ 3) Timoyoliljuisej. ¿Tlake uelis tijyekosej tlen ni tlapoualistli? Ma timotlatsintokikaj: “¿Tlake kichijki David?”. Amo mosentlalik ipan nopa kuesoli, nojkia kuali moiljuik tlen kitlapejpeniskia. David kiiljuik Jehová tlen kipanoyaya uan kiiljuik ma kipaleui, nojkia kiniljuik iuampoyouaj ma kipaleuikaj. Uan kema kitlapejpeniyaya kichiuas se tlenijki, nima kichiuayaya. Maske kiyolkokojtoyaj, amo san kualantoya uan nojua motemachik ipan sekinok. Motemachik Ipan Jehová uan ipan iuampoyouaj.

12. ¿Kenijkatsa Jehová kipaleuik David?

¹² Tlaj nojua tijtemouaj sekinok tlamachtili, tikitasej kenijkatsa Jehová kimakak David chikaualistli uan kiampa uelki kiijiyouik tlen kipanok (Sal. 3:1-8; tlen kiijtoua kampa peua). Jehová kiteochijki tlen kitlapejpenik David, uan kinpaleuik iuampoyouaj kema tlateuiyayaj uan kimanauiyayaj David.

13. Kej kiijtoua Mateo 18:15-17, ¿kenijkatsa uelis tijchiuasej kej David kema se akajya techyolkokoua?

¹³ 4) Tijchiuasej tlen timomachtiaj. Ma timotlatsintokikaj: “¿Kenijkatsa uelis nijchiuas kej David?”. Moneki nima tijsenkauasej se kuesoli. Maske amo sanse kuesoli techpano, uelis nima tijchiuasej tlen Jesús tetlajtolmakak ipan Mateo capítulo 18 (xijpoua Mateo 18:15-17). Ma tikilnamikikaj, amo kinamiki tijchiuasej san tlen tojuantij timoiljuiaj o nima tijtlapejpenisej se tlamantli. Ma tikiljuikaj Jehová ma techmaka tlaseuilistli uan tlalnamikilistli, kiampa kuali tijmatisej tlake tijchiuasej. Nochipa ma timotemachikaj ipan touampoyouaj uan ma tijkauakaj ma techpaleuikaj (Prov. 17:17). Uan tlauel ipati tijchiuasej tlen Jehová tetlajtolmaka ipan Biblia (Prov. 3:5, 6).

14. ¿Kenijkatsa uelis techpaleuis tlen kiijtoua 2 Timoteo 1:12-16; 4:6-11, 17-22?

¹⁴ Tlaj ipan tochampoyouaj itstok se akajya katli amo kineki ma tijtekipanokaj Jehová o tiitstokej kampa amo techkauaj ma titlaueyichiuakaj, tlauel techpaleuis  tlaj tijpouasej tlen kiijtoua 2 Timoteo 1:12-16; 4:6-11, 17-22. * Pablo kiijkuilok tlen kiijtoua ni textos kema tsaktoya.

15. ¿Tlake uelis tikiljuisej Jehová?

¹⁵ 1) Timomaijtosej. Kema tijpouasej ni textos ma tikiljuikaj Jehová nopa kuesoli tlen tijpiaj uan kenijkatsa tijyolmatij. Ma tikiljuikaj tlake nelnelia techtekipachoua. Nojkia ma techpaleui tijpantisej tlamachtili tlen Pablo kipanok katli ueliskia techpaleuis ipan tonemilis.

16. ¿Tlake tlamantli kiixnamikiyaya Pablo?

¹⁶ 2) Timonejneuilisej. Ma timoiljuikaj techtsaktokej ipan Roma sanse kej Pablo. Maske ipa kitsaktoyaj, nama kimati kena kimiktisej, kitlauelkajtokej se keskij iuampoyouaj uan tlauel siajtok (2 Tim. 1:15).

17. ¿Tlake ueltoskia kichiuas Pablo?

¹⁷ Pablo ueltoskia mosentlalis ipan tlen uejkajkia kichijki uan ueltoskia moiljuis tlaj kitlapejpenijtoskia seyok tlamantli amo kitsaktoskiaj. Ueltoskia kinkualankaitas nopa tlakamej tlen Asia katli kitlauelkajtoyaj uan ayokmo motemachiskia ipan sekinok iuampoyouaj. Ya amo kiampa kichijki. ¿Kenke nojua motemachik ipan Jehová uan ipan iuampoyouaj?

18. ¿Ipan tlake mosentlalik Pablo?

¹⁸ 3) Timoyoliljuisej. Ma timotlatsintokikaj: “¿Tlake kichijki Pablo?”. Maske kimatiyaya nechka kimiktiskiaj, mosentlalik kiueyichiuas Jehová. Nojkia, kitemoliyaya kenijkatsa kinyolchikauas sekinok uan momaijtouayaya ika nochi iyolo (2 Tim. 1:3). Pablo amo mosentlalik san kiilnamiktos tlen kichiuilijkej sekinok. Ya kichijki kampeka kiniknelis uan kinpaleuis iuampoyouaj katli amo kitlauelkajtoyaj. Nojkia, nojua momachtiyaya toTeotsij iTlajtol (2 Tim. 3:16, 17; 4:13). Uan nochipa motemachiyaya Jehová uan Jesús kiikneliyayaj uan kimatiyaya amo kitlauelkajtoyaj uan kiteochiuaskiaj pampa kuali tlatekipanojtoya.

19. ¿Kenijkatsa Jehová kipaleuik Pablo?

¹⁹ Jehová ipa kiiljuijtoya Pablo kitlaijiyouiltiskiaj pampa eliyaya Cristo itokilijka (Hech. 21:11-13). ¿Kenijkatsa Jehová kipaleuik Pablo? Kema kinankiliyaya tlen kiiljuiyaya uan kema kimakayaya chikaualistli (2 Tim. 4:17). Nojkia, Jehová kiiljuik Pablo temachtli kiseliskia tlen kitenkauilijtoya. Uan kichijki ma kiyolchikauakaj iuampoyouaj.

20. Kej kiijtoua Romanos 8:38, 39, ¿kenijkatsa uelis tijnextisej kuali titlaneltokaj kej kichijki Pablo?

²⁰ 4) Tijchiuasej tlen timomachtiaj. Ma timotlatsintokikaj: “¿Kenijkatsa uelis nijchiuas kej Pablo?”. Sanse kej Pablo, tijmatij techtlaijiyouiltisej pampa tijtekipanouaj Jehová (Mar. 10:29, 30). Tlaj amo tijnekij tijtlauelkauasej Jehová, moneki timomaijtosej ika nochi toyolo uan tijchiuasej kampeka timomachtisej. Nochipa ma tikilnamiktokaj tlauel ipati tijuejkapantlalisej Jehová itoka. Nojkia, timotemachiaj Jehová amo kema techtlauelkauas uan amo aka uelis kichiuas ayokmo ma techikneli (xijpoua Romanos 8:38, 39; Heb. 13:5, 6).

21. ¿Tlake kinpaleuik Aya uan Hector ma kiixnamikikaj tlen kinpanoyaya?

²¹ Maske amo sanse tlen techpano, nochi uelis techpaleuis tlen kinpanok toTeotsij itekipanojkauaj katli uejkajkia itstoyaj. Se neskayotl, se precursora tlen Japón katli itoka Aya, kiijtoua tlauel kipaleuik  tlen kipanok Jonás uan ayokmo majmajki tlajtolmoyauas kampa nemij miakej. Hector, se toikni tlen Indonesia katli itatauaj amo kitekipanouaj Jehová, kiijtoua tlen Rut kipanok kipaleuia nojua ma kineki kimatis sekinok tlamantli tlen Jehová uan kitekipanos.

22. ¿Tlake uelis tijchiuasej tlaj tijnekij ma techpaleui videos, tlapoualistli tlen mokixtijtok ipan Biblia uan amochtli “Tlen nechmachtia Biblia”?

²² ¿Kanke uelis tijpantisej tlen kinpanok toTeotsij itekipanojkauaj tlen uelis techpaleuis? Ipan videos, ipan tlapoualistli tlen mokixtijtok ipan Biblia uan ipan amochtli “Tlen nechmachtia Biblia” kiijtoua tlen kinpanotok toTeotsij itekipanojkauaj. * Kema tikitasej, tijtlakakilisej o tijpouasej nopa tlamachtili, ma tikiljuikaj Jehová ma techpaleui tikitasej kenijkatsa uelis tijchiuasej ipan tonemilis. Ma timonejneuilikaj kejuak nopaya tiitstokej, ma timoyoliljuikaj ipan tlen kichijki katli nopaya itstoya uan ma tikitakaj kenijkatsa Jehová kipaleuik kiixnamikis tlen kipanok. Teipa, ma tijchiuakaj ipan tonemilis tlen timomachtijkej uan ma tijtlaskamatikaj Jehová ika nochi tlamantli tlen techmakatok, uan nojkia ma tikinyolchikauakaj uan ma tikinpaleuikaj sekinok kiampa tijnextisej tijtlaskamatij.

23. ¿Tlake techtenkauilia Jehová ipan Isaías 41:10, 13?

²³ Pampa ipan ni tonali Satanás kinauatia ni Tlaltipaktli, uelis tijpiasej tlaouijkayotl uan amo tijmatisej tlake tijchiuasej (2 Tim. 3:1). Maske tlauel ouij kej tiitstokej, amo kinamiki timajmauisej o tlauel timotekipachosej. Jehová kimati tlake techpano, yeka techtenkauilia: “Niinmechpaleuis uan niinmechmaitskitos ika nonejmatl tlen ika nitlatlani” (xijpoua Isaías 41:10, 13). Timotemachiaj Jehová nochipa techpaleuis, uan Biblia nojkia techpaleuis ma tikixnamikikaj tlaouijkayotl.