1. Kej kiijtoua Mateo 24:9, ¿kenke amo kinamiki timosentlachilisej kema techkualankaitaj?

JEHOVÁ techchijchijki pampa kinekiyaya ma titeiknelikaj uan ma techiknelikaj. Yeka uelis kema se akajya techkualankaita, tlauel timoyolkokouaj. Ma timoiljuikaj tlen kiijtoua se tosiuaikni tlen Europa katli itoka Georgina, ya kiijtoua: “Kema nijpixtoya 14 xiuitl, nonana tlauel nechkualankaitayaya pampa nijtekipanouayaya Jehová. Nijmatiyaya amo nechikneliyayaj. Yeka pejki nimotlatsintokia tlaj nelia amo kuali tlen nijchiuayaya”. * Se toikni katli itoka Danilo kiijtoua: “Kema soldados nechuijuitejkej, nechtlaijiljuijkej uan nechiljuijkej nechmiktiskiaj pampa nijtekipanoua Jehová, tlauel nimomajmatik uan nijmatki kejuak amo nopati”. Maske techyolkokoua kema techkualankaitaj, amo kenijki pampa Jesús kiijtok kiampa panoskia (xijpoua Mateo 24:9).

2, 3. ¿Kenke maseualmej techkualankaitaj?

² Maseualmej techkualankaitaj pampa sanse kej Jesús, tojuantij amo tiiaxkauaj ni Tlaltipaktli (Juan 15:17-19). Yeka, maske tikintlepanitaj tekichiuanij amo tikinueyichiuaj yon tlamantli tlen kitekiuiaj. Tojuantij san tijueyichiuaj Jehová. Tijpaleuiaj toTeotsij pampa san ya kinamiki tlanauatis, uan Satanás uan katli kipaleuiaj inijuantij kikualankaitaj (Gén. 3:1-5; 3:15, TNM). Tikiniljuiaj maseualmej san toTeotsij iTlanauatijkayo uelis kitlamiltis nochi kuesoli tlen kipiaj uan nechka kitsontlamiltis toTeotsij ikualankaitakauaj (Dan. 2:44; Apoc. 19:19-21). Katli amo moueyimatij tlauel kuali kiyolmatij kimatisej tlen nechka panos, uan katli amo kualmej amo kiampa kiyolmatij (Sal. 37:10, 11).

 ³ Nojkia, maseualmej techkualankaitaj pampa tijchiuaj tlen Jehová tlanauatia, uan inijuantij amo kiampa kichiuaj. Se neskayotl, miakej maseualmej amo kenijki kiitaj tlaj monejnemiltiaj kej monejnemiltiyayaj maseualmej tlen Sodoma uan Gomorra, katli toTeotsij kintsontlamiltik (Jud. 7). Miakej maseualmej techpinajtiaj uan kiijtouaj amo tleno tijseliaj pampa tijchiuaj tlen Biblia kiijtoua (1 Ped. 4:3, 4).

4. ¿Tlake kuajkuali tlamantli techpaleuia tikijiyouisej kema techkualankaitaj?

⁴ ¿Tlake kuajkuali tlamantli techpaleuis ma tikijiyouikaj tlaj maseualmej techkualankaitaj uan techtlaijiljuiaj? Moneki kuali titlaneltokasej uan kiampa timotemachisej san Jehová techpaleuis. Totlaneltokilis eli “keja itepostsajka se soldado [tlen] kiseuia nopa lemenkakuatlamintli” tlen Satanás techmajkauilia (Efes. 6:16). Uan maske moneki kuali titlaneltokasej, nojkia moneki titeiknelisej. ¿Kenke? Pampa katli teiknelia “axyolkentsi” uan kiijiyouia nochi tlen kipano (1 Cor. 13:4-7, 13). Ma tikitakaj kenijkatsa pampa tikinikneliaj Jehová, toikniuaj uan tokualankaitakauaj techpaleuia tikijiyouisej kema techkualankaitaj.

5. ¿Kenijkatsa kipaleuik Jesús pampa tlauel kiikneliyaya iTata?

⁵ Ipan nopa tlayoua kema Jesús nechka kimiktiskiaj ikualankaitakauaj, kiniljuik itokilijkauaj: “Nijneki nochi tlakamej ipan ni Tlaltipaktli ma kimachilikaj nikiknelia noTata. Uan tlen noTata nechnauatia, ya nopa nijchiuas” (Juan 14:31). Jesús tlauel kiikneliyaya iTata, nopa kipaleuik ma kiijiyoui tlen kiixnamikiskia. Tlaj nojkia tlauel tikikneliaj Jehová, nojkia techpaleuis tikijiyouisej tlen techpano.

6. Kej kiijtoua Romanos 5:3-5, ¿kenijkatsa tijyolmatij kema maseualmej techkualankaitaj?

⁶ Nochi toTeotsij itekipanojkauaj kiijiyouijtokej kema kintlatsakuiltiaj pampa tlauel kiikneliaj Jehová. Se neskayotl, kema katli itstoyaj ipan nopa ueyi tlasentilistli tlen kinyakanayayaj judíos kiniljuijkej apóstoles ayokmo ma tlajtolmoyauakaj, inijuantij amo kinneltokakej pampa kiikneliyayaj Jehová, yeka kiijtojkej: “Moneki tijneltokilisej toTeko Dios achtoui uan axtlakamej” (Hech. 5:29; 1 Juan 5:3). Nojkia miakej toikniuaj pampa tlauel kiikneliaj Jehová, kinpaleuijtok amo ma kitlauelkauakaj maske tekichiuanij tlauel kintlaijiyouiltiaj. Kema maseualmej techkualankaitaj amo timoyolkokouaj, tojuantij tiyolpakij (Hech. 5:41; xijpoua Romanos 5:3-5).

7. ¿Kenijkatsa kinamiki tikitasej kema tochampoyouaj techtlatsakuiltiaj?

⁷ Uelis tijmatisej ouij tikijiyouisej kema tochampoyouaj techtlaijiyouiltiaj. Kema kiitaj tijnekij tikixmatisej Jehová, se keskij tlen tochampoyouaj uelis moiljuiaj techkajkayajtokej o tiuiuitikej (nojkia xikita Marcos 3:21). Nojkia uelis techchiuilisej tlen amo kuali. Kema kiampa panos amo ma timosentlachilikaj pampa Jesús ipa kiijtojtoya se keskij tochampoyouaj techkualankaitaskiaj (Mat. 10:36). Uan maske uelis amo kuali techitaj, tojuantij amo tikinkualankaitaj. Uan tlaj nojua tlauel tikikneliaj Jehová, techpaleuis nojua tlauel tikiniknelisej sekinok (Mat. 22:37-39). Tijmatij amo kema tijtlauelkauasej Jehová san pampa tijnekij tijyolpakiltisej se akajya.

8, 9. ¿Tlake kipaleuik se tosiuaikni kiijiyouis kema tlauel kitlaijiyouiltijkej?

⁸ Georgina, katli tikijtojkej ipan achtoui párrafo, amo kitlauelkajki Jehová maske inana tlauel kitlaijiyouiltiyaya, ya kiijtoua: “Maske tiomej pejkej timomachtiaj ininuaya Jehová itlajtoltemakauaj, kema panok  chikuasej metstli uan nijnejki nias tlanechikoli, ya kipatlak kej moiljuiyaya. Nikitak monojnotsayaya ininuaya apóstatas uan kitekiuiyaya tlen inijuantij moiljuiaj kema nechkamanaljuiyaya. Nojkia nechtlaijiljuiyaya, nechtsonkaltilanayaya, nechkechpatskayaya uan kitepeuayaya amatlajkuiloli tlen nijtekiuiyaya. Kema nikaxitik 15 xiuitl, nimoatsonpoliuiltik. Uan pampa nonana kinekiyaya ma nijtlauelkaua Jehová, nechchiualtik ma nia ipan se escuela kampa nopaya nimokauayaya. Nopaya itstoyaj telpokamej katli kitekiuiyayaj drogas uan kichiuayayaj tlen amo kuali. Tlauel ouij tijmatis tikijiyouis kema mitstlaijiyouiltia se katli moneki mitsmokuitlauis uan mitsiknelis”.

⁹ Georgina kiijtoua tlake kipaleuik kiijiyouis: “Kema nonana pejki tlauel kualani, ipan nopa tonali nitlantoya nijpoua Biblia. Nopa nechpaleuik ma nimotemachi nelia eli melauak tlen nimomachtiyaya uan nijmatiyaya niitstoya Jehová inechka. Nochipa nimomaijtouayaya, uan ya nechtlakakiliyaya. Kema niitstoya kampa nimomachtiyaya, se tosiuaikni nechtlanejki ichaj uan sansejko timomachtiyayaj Biblia. Ipan nopa tonali toikniuaj tlauel nechyolchikauayayaj. Inijuantij nechitayayaj kej se tlen ininchampoyouaj. Nikitak Jehová tlauel kipia chikaualistli, uan amo kej katli techkualankaitaj”.

10. ¿Ipan tlake uelis timotemachisej?

¹⁰ Apóstol Pablo kiijtok amo tleno uelis “techiyokakauas tlen iteiknelijkayo toTeko tlen technextilijtok ipan toueyiTeko Cristo Jesús” (Rom. 8:38, 39). Maske techtlaijiyouiltisej, Jehová amo kema techtlauelkauas. Ya nochipa techyolchikauas uan techpaleuis ma tikijiyouikaj tlen techpanos. Uan kej kichijki ika Georgina, nojkia techpaleuis ika toikniuaj.

11. Xikijto ika se neskayotl kenijkatsa Cristo itokilijkauaj kinpaleuik nopa tlaiknelili tlen kiijtoua Juan 15:12, 13.

¹¹ Ipan nopa youali kema Jesús nechka kimiktiskiaj, kiniljuik itokilijkauaj ma moiknelikaj se ika seyok (xijpoua Juan 15:12, 13). Jesús kimatiyaya tlaj moikneliskiaj, kinpaleuiskia sansejko ma itstokaj uan kiijiyouiskiaj kema kinkualankaitaskiaj. Ma timoiljuikaj ipan toikniuaj tlen Tesalónica. Kema inijuantij pejtoyaj kuali tlaneltokaj, nojkia pejkej kintlatsakuiltiaj. Maske kiampa kinpanok, nochipa moiknelijkej uan kiijiyouijkej  tlen kinchiuilijkej, uan nopa kinpaleuik sekinok (1 Tes. 1:3, 6, 7). Pablo kiniljuik nojua tlauel ma moiknelikaj (1 Tes. 4:9, 10). Nopa tlaiknelili kinpaleuiskia ma kinyolchikauakaj katli mokuesouayayaj uan katli amo kipixtoyaj “tetili” (1 Tes. 5:14). Inijuantij kichijkej tlen kiniljuik. Yeka, kema panotoya se xiuitl Pablo sampa kiniljuik: “Mojmostla más inmoikneliaj” (2 Tes. 1:3-5). Nopa tlaiknelili kinpaleuik ma kiijiyouikaj kuesoli uan nojkia kema kintlatsakuiltijkej.

12. ¿Kenijkatsa toikniuaj kinextijkej moikneliaj kema kiixnamijkej tlauilankayotl ipan ininaltepe?

¹² Ma tikitakaj tlen kinpanok Danilo iuaya isiua, katli tikijtojkej ipan achtoui párrafo. Kema ipan nopa altepetl kampa itstoyaj pejki onka tlauilankayotl, inijuantij nojua yauiyayaj tlanechikoli, kichiuayayaj kampeka tlajtolmoyauasej uan kinmakayayaj toikniuaj tlen kipixtoyaj. Se tonali, se keskij soldados asitoj ichaj Danilo. Ya kiijtoua: “Nechiljuijkej ayokmo ma nijtekipano Jehová, uan nechmakilijkej pampa amo nijchijki tlen kiijtojkej. Nojkia, tlachijkej kejuak nechtoponiskiaj. Kema tlatoponijkej, san panok nokuaixko. Kema nechka kisteuaskiaj, kiijtojkej sampa tlakuepiliskiaj uan kipinaualtiskiaj nosiua. Toikniuaj nimantsi techtitlankej ipan seyok altepetl. Nochipa nikilnamiki kenijkatsa toikniuaj kinextijkej tlauel techikneliaj. Kema tiasitoj ipan nopa seyok altepetl, toikniuaj nima techmakakej tlen tijkuaskiaj, nechpaleuijkej nijpantis tekitl uan nojkia kampa tiitstosej. Ika tlen toikniuaj kichijkej, techpaleuik nojkia kiampa ma tijchiuakaj ika sekinok toikniuaj kema cholojtoyaj pampa onkayaya tlauilankayotl ipan ininaltepe”. Ika tlen kinpanok toikniuaj kinextia kema tlauel timoikneliaj, techpaleuia ma tikijiyouikaj kema maseualmej techkualankaitaj.

13. ¿Kenijkatsa techpaleuia toTeotsij itonal nojua ma tijtekipanokaj Jehová maske techkualankaitaj?

¹³ Jesús kiijtok moneki tikiniknelisej tokualankaitakauaj (Mat. 5:44, 45). Maske kemantika ouij, toTeotsij itonal techpaleuia kiampa ma tijchiuakaj. Toteotsij itonal techpaleuia ma titeiknelikaj, ma tijpiakaj toyolo, ma titetlasojtlakaj, amo nima ma tikualanikaj uan ma timonauatikaj (Gál. 5:22, 23). Miakej katli techkualankaitayayaj kipatlatokej kej eliyayaj pampa uelis ininsiua, ininueue, ininkone o se tlen  ininkalnechka kinextijtok ni kuajkuali tlamantli. Miakej tlen inijuantij nojkia kitekipanojtokej Jehová. Yeka, tlaj tijmatij ouij tikiniknelisej katli techkualankaitaj san pampa titlaueyichiuaj, moneki tikiljuisej Jehová ma techmaka itonal (Luc. 11:13). Ma tikilnamiktokaj, tlauel kuali tlaj tijchiuaj tlen Jehová kiijtoua (Prov. 3:5-7).

14, 15. ¿Kenijkatsa se tosiuaikni kipaleuik tlen kiijtoua Romanos 12:17-21 ma kiikneli iueue maske tlauel kitlaijiyouiltiyaya?

¹⁴ Ma tikitakaj tlen kipanok Yasmín, katli itstok ipan Oriente Medio. Kema elki se Jehová itlajtoltemajka, iueue moiljuik san kikajkayajtoyaj, yeka kinejki kichiuas ayokmo ma tlatekipano. Pejki kitlaijiljuia uan kiniljuik ichampoyouaj, se katli tlayakana ipan religión uan se tetlajchiuijketl ma kitlateljuikaj uan ma kiijtokaj kinxeloua ichampoyouaj. Nojkia yajki ipan se tlanechikoli uan pejki kintlaijiljuia toikniuaj. Miakpa Yasmín mochokiliyaya pampa iueue tlauel kitlaijiyouiltiyaya.

¹⁵ Toikniuaj tlen itlanechikol kipaleuiyayaj uan kiyolchikauayayaj. Ueuejtlakamej kiiljuijkej ueliskia kichiuas tlen kiijtoua Romanos 12:17-21 (xijpoua). Yasmín kiijtoua: “Nijmatki ouij nijchiuas tlen Biblia kiijtoua. Yeka, nikiljuik Jehová ma nechpaleui uan nijchijki kampeka nijchiuas tlen nopaya kiijtoua. Uan kema noueue san tlasokiuiyaya kampa nitlakualchiuayaya; na nitlapojpouayaya, kema nechtlaijiljuiyaya; na kuali nijnojnotsayaya, uan kema mokokouayaya; na nijmokuitlauiyaya”.

16, 17. ¿Tlake tijyekouaj tlen kichijki Yasmín?

¹⁶ Yasmín kiijtoua tlauel kuali tlen kichijki pampa kinextik kiiknelik iueue. Ya kiijtoua: “Kimati na amo niistlakati, yeka pejki motemachia ipan na. Kema nijpouiliyaya tlen nimomachtiyaya, kuali nechtlakakiliyaya, uan kiijtok ayokmo tlauel mosisinis. Nama nechiljuia moneki nias tlanechikoli. Nojkia, nama tlauel kuali timouikaj uan tijpiaj tlaseuilistli. Nimotemachia teipa nojkia peuas momachtis uan sansejko tijtekipanosej Jehová”.

¹⁷ Tlen kipanok Yasmín kinextia se tlen teiknelia kipia iyolo ininuaya sekinok uan kinchiuilia tlen kuali (1 Cor. 13:4, 7). Katli teiknelia uelis kichiuas miak tlamantli uan amo kej katli tekualankaitaj. Kema titeikneliaj uelis tijchiuasej ma kipatlakaj ininnemilis sekinok uan amo kej katli tekualankaitaj pampa inijuantij san teyolkokouaj. Kema tijnextiaj titeikneliaj, tijyolpakiltiaj Jehová. Yeka, maske tokualankaitakauaj nojua  tlauel techkualankaitasej, tojuantij nojua tlauel tiyolpakisej. Ma tikitakaj kenijkatsa tijchiuasej.

18. ¿Kenke uelis tiyolpakisej maske techkualankaitaj?

¹⁸ Jesús kiijtok: “Xipakikaj kema tlakamej inmechkokoliaj” (Luc. 6:22). Tojuantij amo tijnekij ma techkualankaitakaj o ma techtlaijiyouiltikaj. Uajka, ¿kenke tiyolpakij maske techkualankaitaj? Ma tikitakaj eyi tlamantli. Se. kema tikijiyouiaj kichiua kuali ma techita Jehová (1 Ped. 4:13, 14). Ome. Pampa techpaleuia nojua kuali titlaneltokasej (1 Ped. 1:7). Eyi. Tijselisej nemilistli tlen axkema tlamis (Rom. 2:6, 7).

19. ¿Kenke Cristo itokilijkauaj yolpaktoyaj maske kinuijuitejkej?

¹⁹ Kema panotoya se keski tonali Jesús moyolkuitoya, itokilijkauaj kiitakej nelia eliyaya melauak tlen ya kiniljuijtoya. Maske kinuijuitejkej uan kiniljuijkej ayokmo ma tlajtolmoyauakaj, inijuantij tlauel yolpakiyayaj “pampa toTeko kinkauilijtoya tlaijiyouisej ipampa kineltokaj itekiuejkayo Jesús” (Hech. 5:40-42). Tlauel kiikneliyayaj Jesús, yeka amo kimakasiyayaj tlen ininkualankaitakauaj kinchiuiliskiaj uan nochipa tlajtolmoyauayayaj. Ipan ni tonali, nojkia miakej toikniuaj nojua kitekipanouaj Jehová maske kipiaj tlaouijkayotl. Inijuantij kimatij ya amo kema kiilkaua ‘nopa tekitl tlen kichijtokej pampa kiikneliaj’ (Heb. 6:10).

20. ¿Tlake tikitasej ipan seyok tlamachtili?

²⁰ Tijmatij ipan ni tonali nojua onka tlen amo kuali, yeka maseualmej nojua tlauel techkualankaitasej (Juan 15:19). Maske kiampa pano, amo kinamiki timajmauisej. Kej tikitasej ipan tlamachtili 13, Jehová nochipa kinpaleuia uan kinyolchikaua itekipanojkauaj (2 Tes. 3:3). Yeka, nojua tlauel ma tikiniknelikaj Jehová, toikniuaj uan nojkia katli techkualankaitaj. Tlaj kiampa tijchiuasej, techpaleuis nojua ma tiitstokaj sansejko, kuali titlaneltokasej, tijueyichiuasej Jehová uan tijnextisej tlauel kuali kema titeikneliaj uan amo kej kema se akajya tekualankaita.