1. ¿Tlake tlamantli uelis kinextis kenijkatsa tielij?

 MASKE uelis kipia miak xiuitl timoatsonpoliuiltijkej o amo, nochi tijnekij tijchiuasej tlen Jehová kipaktia. Yeka, moneki tijnauatisej totlalnamikilis. ¿Kenke? Pampa totlalnamikilis uelis kinextis kenijkatsa tielij. Tlaj nochipa timoiljuiaj tlen kineki totlakayo, kichiuas ma tikijtokaj o ma tijchiuakaj tlen amo kuali (Efes. 4:17-19). Uan tlaj timoiljuiaj tlen kuali, techpaleuis ma tikijtokaj uan ma tijchiuakaj tlen toTata Jehová kipaktia (Gál. 5:16).

2. ¿Tlake tlajtlanili tijnankilisej ipan ni tlamachtili?

² Kej tikitakej ipan tlamachtili 10, kemantika eli ouij amo timoiljuisej tlen amo kuali. Maske uelis kiampa techpanos, tojuantij uelis tijtlapejpenisej amo tijchiuasej. Kema ayamo timoatsonpoliuiltiaj moneki tijkauasej tlen Jehová amo kipaktia, kej tikamanaltij uan kej timonejnemiltiaj. Ni eli nopa achtoui tlamantli tlen moneki tijpatlasej ipan tonemilis uan eli tlauel ipati. Nojkia, tlaj tijnekij nelnelia tijyolpakiltisej Jehová, moneki tijchiuasej tlen kiijtoua Colosenses 3:10. Ipan ni tlamachtili tijnankilisej ni tlajtlanili: ¿Tlake kiijtosneki ‘tonemilis tlen yankuik’? ¿Kenijkatsa uelis tijpiasej? Uan ¿tlake techpaleuis nochipa tijpixtosej?

3. 1) Kej kiijtoua Gálatas 5:22, 23, ¿tlake kiijtosneki ‘tonemilis tlen yankuik’? 2) ¿Kenijkatsa tijnextisej?

³ Kema tijpiaj ‘tonemilis tlen yankuik’ timoiljuiaj uan tijchiuaj kej Jehová. ¿Kenijkatsa tijnextiaj? Kema tijkauaj  nopa kuajkuali tlamantli tlen toTeotsij itonal ma kiyakana totlalnamikilis, tlen tijyolmatij uan tlen tijchiuaj (xijpoua Gálatas 5:22, 23). Se neskayotl, kema se akajya kipia inemilis tlen yankuik, kinextia tlauel kiniknelia Jehová uan toikniuaj (Mat. 22:36-39). Yolpaki maske kiixnamiki se kuesoli (Sant. 1:2-4). Kuali mouika ininuaya sekinok (Mat. 5:9). Kipia iyolo uan kuali tenojnotsa (Col. 3:12, 13). Kipatiita tlen kuali, uan kichiua (Luc. 6:35). Ika tlen kichiua, kinextia nelia motemachia ipan Jehová (Sant. 2:18). Amo nima kualani kema kiyolkokouaj, uan amo kichiua tlen kiyoltilana (1 Cor. 9:25, 27; Tito 3:2).

4. ¿Kenke amo uelis sesentsitsij tijnextisej nopa kuajkuali tlamantli tlen kiijtoua Gálatas 5:22, 23?

⁴ Tlaj tijnekij tijpiasej ‘tonemilis tlen yankuik’, moneki tijnextisej nopa kuajkuali tlamantli tlen kiijtoua Gálatas 5:22, 23 uan tlen kiijtoua ipan sekinok textos. * Ni kuajkuali tlamantli nochipa mouika ika sekinok, uan amo eli kej kema timokentijtiauij sesentsitsij toyoyo. Se neskayotl, tlaj nelia tikinikneliaj toikniuaj, tijnextisej tijpiaj toyolo uan kuali tikinnojnotsasej. Uan, tlaj nelnelia tijnekij tijnextisej tlen kuali, moneki amo nima tikualanisej uan timonauatisej.

5. 1) Kej kiijtoua 1 Corintios 2:16, ¿tlake kiijtosneki tijpiasej “itlalnamikilis Cristo”? 2) ¿Kenke moneki timomachtisej Jesús inemilis?

⁵ (Xijpoua 1 Corintios 2:16). Tlaj tijnekij tijpiasej ‘tonemilis tlen yankuik’, moneki tijpiasej “itlalnamikilis Cristo”, ni kiijtosneki moneki tijyekosej kenijkatsa moiljuia Jesús uan tijchiuasej kej ya. Jesús tlauel kuali kinextia nopa kuajkuali tlamantli. Sanse kej se teskatl, ya kinextia nochi nopa kuajkuali tlamantli kej iTata (Heb. 1:3). Tlaj tijchiuaj kampeka tijpiasej totlalnamikilis kej Jesús, techpaleuis ma timonejnemiltikaj kej ya uan tijnextisej nopa kuajkuali tlamantli tlen kinextia (Filip. 2:5).

6. ¿Tlake moneki tikilnamikisej kema tijchiuaj kampeka tijpiasej ‘tonemilis tlen yankuik’?

⁶ ¿Nelia uelis timonejnemiltisej kej Jesús? Uelis timoiljuia: “¡Amo kema uelis kiampa nijchiuas, pampa Jesús eli  xitlauak!”. Tlaj kiampa timoiljuia, xikilnamiki ni eyi tlamantli: Se. Jehová uan Jesús techchijchijkej kej inintlachialis. Yeka, uelis tijchiuas kej inijuantij, maske amo sanse (Gén. 1:26). Ome. ToTeotsij itonal uelis mitspaleuis tijchiuas miak tlamantli tlen amo ueliskia tijchiuas moselti, pampa kipia miak chikaualistli. Eyi. Jehová amo mitsiljuia xijnexti nochi nopa kuajkuali tlamantli sanse kej ya. Ya kimati titlajtlakolejkej, yeka ipan nopa Mil Xiuitl, techpaleuis ma tijpatlakaj tonemilis, uan kiampa tielisej tixitlauakej (Apoc. 20:1-3). Ipan ni tonali, Jehová san kineki ma tijchiuakaj kampeka tijnextisej nopa kuajkuali tlamantli uan ma timotemachikaj ya nochipa techpaleuis.

7. ¿Tlake tikitasej nama?

⁷ ¿Ipan tlake tlamantli uelis tijchiuasej kej Jesús? Tikitasej naui kuajkuali tlamantli tlen toTeotsij itonal kinextia. Tikitasej kenijkatsa Jesús kinextik ni kuajkuali tlamantli uan tlake uelis tijyekosej. Nojkia, tijnankilisej se keski tlajtlanili tlen techpaleuis tikitasej tlaj nojua monekis tijpatlasej se keski tlamantli ipan tonemilis.

8. ¿Kenijkatsa Jesús kinextik tlauel teiknelia?

⁸ Jesús tlauel kiiknelia Jehová, nopa kiyololinik tlauel kuali ma kitekipano uan nojkia techpaleuik (Juan 14:31; 15:13). Uan kej monejnemiltik kema itstoya ipan Tlaltipaktli kinextik tlauel kinikneliyaya maseualmej. Nochipa kintlasojtlak uan kiniknelik, maske sekij kikualankaitayayaj. Uan kinextik nojua tlauel kinikneliyaya kema kinpouilik tlen kichiuas toTeotsij iTlanauatijkayo (Luc. 4:43, 44). Nojkia, kinextik tlauel kiniknelia Jehová uan maseualmej kema motemaktilik uan mijki, maske kitlaijiyouiltijkej. Ika tlen Jesús kichijki, nama uelis tijpiasej nopa nemilistli tlen axkema tlamis.

9. ¿Kenijkatsa uelis tijnextisej titeikneliaj kej Jesús kichijki?

⁹ Tijmaktilijkej tonemilis Jehová uan timoatsonpoliuiltijkej, pampa tikikneliaj. Yeka sanse kej Jesús, nojkia ma tikiniknelikaj maseualmej. Apóstol Juan kiijtok: “Aki axkiiknelia se iikni tlen kiitstok, axuelis kiiknelis toTeko tlen axkiitstok” (1 Juan 4:20). Ma timotlasintokikaj: “¿Tlauel niteiknelia? ¿Nitetlasojtla, maske nechkualankanojnotsaj? ¿Nijtekiuia tonali uan notomij, uan kiampa nikinkamanaljuia maseualmej tlen Jehová pampa nelia niteiknelia? ¿Nijchiua maske miakej amo kipatiitaj o nechkualankaitaj? ¿Uelis nijkixtis tonali uan kiampa nojua tlauel nitlajtolmoyauas?” (Efes. 5:15, 16).

10. ¿Tlake kichijki Jesús uan kiampa kinpaleuik sekinok kuali ma mouikakaj?

¹⁰ Jesús amo mokualaniyaya ininuaya sekinok uan amo momakuepayaya. Ya nochipa kiitayaya kenijkatsa kuali mouikas ininuaya sekinok uan kiniljuiyaya ma kisenkauakaj ininkuesoljuaj. Se neskayotl, itokilijkauaj kinmachtik tlaj kinekiyayaj ma kiseli Jehová tlen kichiuayayaj, monekiyaya nima kisenkauasej ininkuesol (Mat. 5:9, 23, 24). Uan miakpa kiniljuik iapóstoles amo san ma kiitakaj “ajkeya eliskia más ueyi iixtla” (Luc. 9:46-48; 22:24-27).

11. ¿Kenijkatsa uelis tikinpaleuis sekinok kuali ma mouikakaj?

¹¹ Tlaj tijnekij tiitstosej ika tlaseuilistli, amo san moneki tijchiuasej kampeka amo timokualanisej ininuaya sekinok, nojkia moneki timoyoltlalisej ininuaya uan nojkia tikinpaleuisej toikniuaj ma kisenkauakaj ininkuesol (Filip. 4:2, 3;  Sant. 3:17, 18). Uelis timotlatsintokisej: “¿Nelia nijneki nijsenkauas se kuesoli? ¿Amo nima nikilkaua kema se toikni nechyolkokoua? ¿Nijneki ma kisenkaua nopa kuesoli katli iuaya nimoyolkokok? ¿O na nijsenkaua maske nijmati ya kipeualtik nopa kualantli? Kema nikita kinamiki, ¿nikinpaleuia sekinok ma moyoltlalikaj?”.

12. ¿Kenijkatsa Jesús kinextik tetlasojtlayaya?

¹² Jesús nochipa tetlasojtlak (Mat. 11:28; 11:29, 30, TNM). Maske kemantika kiixnamikiyaya se tlamantli, ya nochipa kiampa kichijki uan amo kintetsopayaya sekinok. Se neskayotl, kema se siuatl katli eua Canaán kiiljuik ma kichikaua isiuapil, ya amo kiajuak. Maske amo nima kichijki, kema kiitak nelnelia kuali tlaneltokayaya, kichikajki isiuapil (Mat. 15:22-28). Maske kiampa kichiuayaya pampa tlauel tetlasojtlayaya, kemantika nojkia xitlauak tetlajtolmakak. Se neskayotl, kema Pedro kiiljuik Jesús amo kinekiyaya ma kitlatsakuiltikaj, ya kiajuak ininixpa itokilijkauaj (Mar. 8:32, 33). Kichijki nopa pampa kinekiyaya kinmachtis itokilijkauaj monekiyaya kipaleuisej uan kikauasej ma kichiua tlen Jehová kinauatijtoya, uan amo san pampa kinekiyaya kipinaualtis Pedro. Tlen Jesús kichijki tlauel kipaleuik Pedro, maske ixpinajki.

13. ¿Kenke kemantika moneki tijnextisej nojua tlauel titeikneliaj?

¹³ Tlaj tijnekij nochipa tijnextisej titeikneliaj, kemantika monekis xitlauak tikamanaltisej ininuaya sekinok. Kema kiampa tijchiuasej, ma tijchiuakaj kej Jesús uan ma tijtekiuikaj Biblia. Kuali ma tikinnojnotsakaj. Ma timotemachikaj inijuantij kiselisej tlen tikiniljuiaj, pampa inijuantij kiikneliaj Jehová uan nojkia techikneliaj. Ma timotlatsintokikaj: “¿Nijpaleuia se akajya kema nikita amo kuali tlen kichiua? ¿Kenijkatsa nijchiua? ¿Nijchiua ika tlaiknelili o ika kualantli? ¿Kenke nitetlajtolmaka? ¿Nijchiua pampa nikualantok iuaya, o pampa nelia nijneki nijpaleuis?”.

14. ¿Kenijkatsa Jesús kinextik teikneliyaya?

¹⁴ Jesús amo san kimati tlen kuali, ya nochipa kichiua. Ya tlauel kiiknelia iTata, yeka nochipa kichiua tlen kuali uan kichiua ika nochi iyolo. Se akajya katli teiknelia nochipa kiita kenijkatsa uelis tepaleuis, uan kichiua. Yeka, amo moneki san tijmatisej tlen kuali, moneki tijchiuasej, uan ma tijchiuakaj ika nochi toyolo. Se akajya ueliskia motlatsintokis: “¿Uelis nijchiuas se tlamantli maske amo nijchiuas ika nochi noyolo?”. Kena. Se neskayotl, Jesús kiijtok kema se keskij maseualmej kinpaleuiyayaj teikneltsitsij, nochipa kinekiyayaj sekinok ma kimatikaj tlen inijuantij kichiuayayaj. Maske nesiyaya kichiuayayaj tlen kuali, Jehová amo kipaktiyaya (Mat. 6:1-4).

15. ¿Tlake techpaleuis tijchiuasej tlen kuali?

¹⁵ Tlaj tijnekij tijchiuasej tlen kuali moneki timoiljuisej kenijkatsa kipaleuis se akajya, uan amo san pampa tijnekij kuali ma techitakaj. Ueliskia timotlatsintokisej: “¿Nijchiua se keski tlamantli tlen kinpaleuia sekinok, uan amo san nijmati tlen moneki nijchiuas? ¿Kenke nijchiua tlen kuali?”.

16. ¿Tlake moneki tijchiuasej mojmostla, uan kenke?

¹⁶ Amo kema ma timoiljuikaj pampa ya timoatsonpoliuiltijkej, ayokmo moneki  tijchiuasej kampeka tijpatlasej tonemilis. Kema tijpiaj tonemilis tlen yankuik, eli kej se yoyomitl tlen moneki tijchiuasej kampeka kuali ma elto. Yeka, mojmostla moneki tikitasej tlake uelis tijchiuasej uan kiampa tijnextisej nopa kuajkuali tlamantli. ¿Kenke? Pampa Jehová nochipa kichiua se tlenijki, uan itonal nochipa tekiti (Gén. 1:2). Ni kineki kiijtos sejse tlen nopa kuajkuali tlamantli tlen toTeotsij itonal, uelis techpaleuis ma tijnekikaj tijchiuasej se keski tlamantli. Se neskayotl, Santiago kiijtok: “Se tlakatl tlen kiijtoua kineltoka toTeko, pero axkichiua tlamantli tlen kuali, ya miktok itlaneltokilis” (Sant. 2:26). Uan nojkia kiampa pano ika nopa sekinok kuajkuali tlamantli. Kema tijnextiaj, nesi kenijkatsa toTeotsij itonal techpaleuijtok.

17. ¿Tlake uelis tijchiuasej kema tikitaj amo tijnextiaj nopa kuajkuali tlamantli kej kinamiki?

¹⁷ Kemantika maske tijpiaj miak xiuitl timoatsonpoliuiltijtokej, uelis ayamo kuali tijnextiaj nopa kuajkuali tlamantli kej kinamiki. Tlaj kiampa techpano, nojua ma tijchiuakaj kampeka. Se neskayotl, uelis tijpixtokej se yoyomitl tlen tlauel techpaktia. ¿Tlake tijchiuaskiaj tlaj tsayaniskia se kentsi? Uelis nima tikijtsomaskiaj, uan amo tijnekiskiaj sampa ma tsayani. Nojkia uelis kiampa tijchiuasej kema tikitaj amo tlauel kuali titenojnotsaj, amo tijpiaj toyolo o amo titeikneliaj. Tlaj kiampa techpano, moneki tijchiuasej kampeka tikiljuisej katli tijyolkokojkej ma techtlapojpoljui uan kiampa nojua kuali timouikasej iuaya. Uan nochipa ma tijchijtokaj kampeka ayokmo kiampa tijchiuasej.

18. ¿Ipan tlake tlamantli uelis timotemachisej?

¹⁸ ¡Tlauel tijtlaskamatij pampa Jesús eli se kuali neskayotl! Kema tijchiuaj kampeka tijpiasej “itlalnamikilis Cristo”, techpaleuia ma tijchiuakaj kej ya kichijki, uan kiampa uelis tijpiasej ‘tonemilis tlen yankuik’. Ipan ni tlamachtili san tikitakej nopa naui kuajkuali tlamantli, yeka tlauel techpaleuis tlaj nojua timomachtiaj nopa sekinok uan tlaj tikitaj kenijkatsa uelis tijnextisej. Ipan pilamochtsi Tlen ika momachtiaj Jehová itlajtoltemakauaj, tlaxeloli “Kej monejnemiltiaj Cristo itokilijkauaj” uan teipa “ToTeotsij itonal techpaleuia ma tijnextikaj kuajkuali tlamantli”, tijpantisej sekinok tlamachtili tlen tlauel techpaleuis. Yeka, uelis timotemachisej Jehová nochipa techpaleuis tlaj kiitas tijchiuaj kampeka tijpiasej ‘tonemilis tlen yankuik’ uan tlaj amo kema tijkauaj.