1, 2. 1) ¿Tlake pano kema se akajya moatsonpoliuiltia? 2) ¿Tlake tikitasej ipan ni tlamachtili?

 ¿TIKINITSTOK kema motekpanaj miakej pampa moatsonpoliuiltisej? Kema nopa toikni katli tlamachtia kinchiuilia nopa ome tlajtlanili, inijuantij tlanankiliaj ika miak pakilistli. Ininchampoyouaj uan ininuampoyouaj nojkia tlauel yolpakij. Uan kema kisaj ipan atl katli moatsonpoliuiltiaj, ipan ininxayak nesi tlauel yolpakij, uan nochi katli kintlachilijtokej peuaj momatlajtlaxkalouaj. Sejse semana tlauel miakej moatsonpoliuiltiaj. Kema kiampa kichiuaj inijuantij mochiuaj Jehová itlajtoltemakauaj.

² Tlaj tijneki timoatsonpoliuiltis, uajka tijnextia tijneki tijchiuas ipakilis Jehová uan amo tijneki tielis kej sekinok maseualmej (Sal. 14:1, 2). Tlaj ya tiueyi o nojua titelpokatl, ni tlamachtili tlauel mitspaleuis. Maske onka miak tlamantli tlen techpaleuia tijtekipanosej Jehová, ipan ni tlamachtili tikitasej san eyi. ¿Uan kenijkatsa ni tlamachtili techpaleuis katli ya timoatsonpoliuiltijkej? Techpaleuis ma tijnekikaj nochipa tijtekipanosej Jehová.

3. ¿Kenke amo techpaktia kema se akajya istlakati uan kichiua tlen amo xitlauak? (Salmo 119:128, 163).

³ Jehová kinnauatik itekipanojkauaj: “Xijnekikaj tlamantli tlen melauak” (Zac. 8:19). Uan Jesús kiijtok tlauel ipati tlaj tijchiuasej tlen xitlauak (Mat. 5:6). Uajka moneki ika nochi toyolo tijchiuasej tlen xitlauak, tlen kuali uan tlen amo sokiyo iixpa toTeotsij. ¿Mitskualankamaka kema se akajya istlakati uan amo kichiua tlen xitlauak? Uelis kena kiampa mitspano. Yeka amo mitspaktia tiistlakatis, mitspaktia tijchiuas tlen xitlauak uan tijkualankaita tlen amo kuali (xijpoua Salmo 119:128,  163). Katli istlakatij kichiuaj kej Satanás, katli kiyakana Tlaltipaktli (Juan 8:44; 12:31). Satanás amo kineki kuali ma kiitakaj Jehová. Ya pejki kiistlakauia toTeotsij ipan xochimili Edén. Nopaya kiijtok Jehová kitlasojmati tlen kipia, techkajkayaua uan amo kineki ma tijchiuakaj tlen techpaktia (Gén. 3:1, 4, 5). Ika tlen kiijtojtok, kichijtok miakej maseualmej amo kuali ma kiitakaj Jehová. Kema maseualmej amo kinekij kichiuasej tlen Biblia tlamachtia, Satanás kintekiuia ma kichiuakaj tlen amo xitlauak uan tlen tlauel amo kuali (Rom. 1:25-31).

4. ¿Kenijkatsa Jehová kinextijtok nochipa kiijtoua tlen melauak? (Xikita tlaixkopinkayotl).

⁴ Jehová eli temachtli o kiijtoua tlen melauak, yeka kinmachtia tlen melauak itekipanojkauaj (Sal. 31:5). Kiampa kinixtlapoua uan ayokmo kinkajkayaua Diablo. Nojkia, Jehová kinmachtia itekipanojkauaj amo ma istlakatikaj uan ma kichiuakaj tlen xitlauak, yeka inijuantij kuali kiyolmatij uan kipiaj tlaseuilistli (Prov. 13:5, 6). ¿Tikitstok Biblia nojkia kiampa mitspaleuijtok? Uelis ya tikistok san Biblia uelis mitspaleuis kuali ximonejnemilti (Sal. 77:13). Yeka nochipa tijneki tijchiuas tlen Jehová kiijtoua (Mat. 6:33). Uan nojkia tijneki titematiltis tlen melauak uan tijnextis Satanás san kiistlakauia toTeotsij. ¿Kenijkatsa uelis tijchiuas?

5. ¿Kenijkatsa uelis tijnextis tijpatiita tlen melauak uan tijneki tijchiuas tlen xitlauak?

⁵ Ika tlen tijchiuas ipan monemilis uelis tijnextis amo tijneltoka tlen Satanás kiijtoua, tijmanauia tlen melauak, tijneki Jehová ma mitsnauati uan nelia tijneki tijchiuas ika nochi moyolo tlen ya tlanauatia. Tlaj tijneki tijnextis ni tlamantli, moneki timomaijtos uan tikiljuis Jehová san ya nochipa tijtekipanos. Teipa moneki timoatsonpoliuiltis uan kiampa sekinok kiitasej nelia tijmaktilijtok Jehová monemilis. Uajka, kema se akajya kineki kichiuas tlen xitlauak uan kipatiita tlen melauak, kinekis moatsonpoliuiltis.

6. Kej kiijtoua Salmo 45:4, ¿kenke tikikneliaj Jesucristo?

⁶ ¿Kenke tlauel tikikneliaj Jesucristo? Ipan Salmo 45:4 (xijpoua) kiijtoua se keski tlamantli tlen kichiua ma tikiknelikaj. Jesús nochipa tlamachtia tlen  melauak, amo moueyimati uan kichiua tlen xitlauak uan nojkia kinmachtia sekinok kiampa ma kichiuakaj. Uajka, tlaj tijpatiita tlen melauak uan tijchiua tlen xitlauak, nojkia tikiknelia Jesús. Ximoiljui kenijkatsa Jesús amo majmajki kema tlamachtik tlen melauak uan kichijki tlen xitlauak (Juan 18:37). Uan, ¿kenijkatsa kinextia amo moueyimati?

7. ¿Tlake tlauel mitspaktia pampa Jesús amo moueyimati?

⁷ Jesús kinextik amo moueyimati ika tlen kiijtok uan ika tlen kichijki. Se neskayotl, ya nochipa kiueyichijki iTata uan amo kinejki maseualmej ma kiueyichiuakaj (Mar. 10:17, 18; Juan 5:19). ¿Kenijkatsa tikita pampa Jesús amo moueyimati? ¿Mitsyololinia xikikneli uan nojkia ximonejnemilti kej ya? Uelis kena. ¿Kenke Jesús amo moueyimati? Pampa Jehová nojkia amo moueyimati. Jesús kiiknelia itata uan nojkia kineki kichiuas kej ya (Sal. 18:35; Heb. 1:3). Kema tijmatij ni tlamantli, techpaleuia ma tijnechkauikaj Jesús.

8. ¿Kenke tiyolpakij pampa Jesús eli toTlanauatijka?

⁸ Tlauel tiyolpakij pampa Jesús eli toTlanauatijka, ya tlauel kuali tlanauatia. Jehová kimachtik uan kitekimakak kej tlanauatijketl (Is. 50:4, 5). Nojkia ximoiljui kenijkatsa Jesús kinextik tlauel techiknelia (Juan 13:1). Moneki tikiknelisej Jesús pampa ya eli toTlanauatijka. Ya kiijtok iuampoyouaj kiikneliaj uan kichiuaj tlen ya tlanauatik (Juan 14:15; 15:14, 15). ¡Tlauel tiyolpakij pampa tielij iuampoyouaj Jehová iKone!

9. ¿Ipan tlake tlamantli eli sanse kema Jesús moatsonpoliuiltik uan kema moatsonpoliuiltiaj itokilijkauaj?

⁹ Jesús kinnauatik itokilijkauaj ma moatsonpoliuiltikaj (Mat. 28:19, 20, TNM). Uan ya nojkia kiampa kichijki. Maske itokilijkauaj nojkia moatsonpoliuiltiaj, onka se keski tlamantli tlen amo sanse kichiuaj kej Jesús (xikita recuadro “ Kema Jesús moatsonpoliuiltik uan kema moatsonpoliuiltiaj itokilijkauaj”). Se neskayotl, kema Jesús moatsonpoliuiltik kinextik kinekiyaya kichiuas itata ipakilis (Heb. 10:7). Uan itokilijkauaj nojkia kiampa kichiuaj. Kema moatsonpoliuiltiaj, kinextiaj tlamiakapa kimaktilijtokej ininnemilis Jehová. Ipan nopa tonali kinextiaj kinekij kichiuasej ipakilis Jehová uan amo tlen inijuantij kinekij. Kema kiampa kichiuaj kinextiaj nojkia kichiuaj kej Jesús.

10. ¿Tlake kichiua xikikneli Jesús, uan tlake moneki tijchiuas pampa tikiknelia?

¹⁰ Ta tijmati Jesús eli iyojtsi iKone Jehová uan ya kitlapejpenijtok ma eli toTlanauatijka. Tijmati Jesús amo moueyimati uan kinextia nopa kuajkuali tlamantli tlen iTata kinextia. Nojkia tijyekojtok ya kintlamakak katli mayanayayaj, kinyolchikajki katli moyolkokouayayaj uan kinchikajki se keskij kokoyanij (Mat. 14:14-21). Uan tikitstok Jesús kiyakana Jehová itlanechikol ipan ni tonali (Mat. 23:10). Uan tijmati teipa tlauel techteochiuas pampa ya tlanauatia ipan toTeotsij iTlanauatijkayo. ¿Kenijkatsa uelis tijnextis tikiknelia? Tlaj nojkia timonejnemiltis kej ya (Juan 14:21). Yeka tlauel moneki tijmaktilis Jehová monemilis uan timoatsonpoliuiltis.

11. ¿Tlake moneki techyololinis ma timoatsonpoliuiltikaj, uan kenke?

¹¹ Jesús kiijtok moneki techyololinis se tlamantli tlen tlauel ipati. Ya kiijtok ni tlamantli ipan se tlanauatili: “Moneki xikikneli  Toteko Dios ika nochi moyolo uan ika nochi moalma, uan ika nochi motlalnamikilis uan ika nochi mochikaualis” (Mar. 12:30). ¿Nelnelia kiampa tikiknelia toTeotsij?

12. ¿Kenke tikiknelia Jehová? (Xikita tlaixkopinkayomej).

¹² Onka miak tlamantli tlen kichiua ma tikiknelikaj Jehová. Se neskayotl, ta ya tijyekojtok Jehová eli katli techmaka “yolistli nochi tlen tiitstokej” uan nojkia techmaka “nochi tlen yejyektsi uan tlen kuali” (Sal. 36:9; Sant. 1:17). Nochi tlen tijpia mitsmakatok Jehová pampa ya tlauel kipaktia temakas se tlenijki uan tlauel techiknelia.

13. ¿Kenke kema Jehová kiualtitlanki iKone ma techmakixti techmakak se tlamantli tlen tlauel ipati?

¹³ Kema Jehová kititlanki iKone ma techmakixti, techmakak se tlamantli tlen tlauel ipati. ¿Kenke kiampa tikijtouaj? Pampa Jehová uan Jesús tlauel moikneliaj. Jesús kiijtok: “Notata nechiknelia” uan “Nikiknelia notata” (Juan 10:17; 14:31). Kej panotiajki xiuitl, inijuantij nojua tlauel moiknelijtiajkej (Prov. 8:22, 23, 30, TNM). Ximoiljui kenijkatsa Jehová tlauel tlaijiyouik kema kiitak iKone kitlaijiyouiltijkej uan kimiktijkej. Maske Jehová kiampa kiyolmatki, ya kiualtitlanki iKone ma techmakixti, uan kiampa teipa  uelis nochipa tiitstosej (Juan 3:16; Gál. 2:20). Ni tlamantli kichiua tlauel ma tikiknelikaj toTeotsij.

14. ¿Tlake tlamantli tlen tlauel ipati uelis tijtlapejpenis ipan monemilis?

¹⁴ Nama noja tlauel tikiknelia Jehová pampa tijyekojtok sekinok tlamantli tlen ya. Uan amo san nama tijneki timouampojchijtos iuaya, kiampa tijneki tijchiuas nochipa. Ika tlen tikijtoua uan ika tlen tijchiua, uelis tijyolpakiltis Jehová uan ya mitsiljuia ika miak tlaiknelili kiampa xijchiua (Prov. 23:15, 16). Ika tlen tijchiuas ipan monemilis uelis tijnextis tlaj nelnelia tikiknelia Jehová (1 Juan 5:3). Tlauel mitspaleuis tlaj tijtlapejpenis tijtekipanos.

15. ¿Kenijkatsa uelis tijnextis tikiknelia Jehová?

¹⁵ Nojkia tijnextis tikiknelia Jehová tlaj timomaijtos uan tijmaktilis monemilis (Sal. 40:8). Teipa moneki timoatsonpoliuiltis, kiampa sekinok kiitasej nelia tijmaktilik Jehová monemilis. Kej tikitakej kampa peua ni tlamachtili, ipan nopa tonali kema se akajya moatsonpoliuiltia tlauel yolpaki uan kipatla inemilis, pampa ipan nopa tonali peuas kichiuas san tlen Jehová kineki (Rom. 14:8; 1 Ped. 4:1, 2). Maske tlauel mopatlas monemilis, nopa tlamantli nojkia kichiuas tlauel xiyolpaki. Ma tikitakaj kenke.

16. Kej kiijtoua Salmo 41:12, ¿tlake tlamantli kinmakas Jehová katli kitekipanouaj?

¹⁶ Jehová tlauel kipaktia temakas tlen kipia. Maske amo tijmakas Jehová miak tlamantli, ya mitskuepilis nojua tlauel miak (Mar. 10:29, 30). Maske tiitstokej ipan itlamia tonali, ya techpaleuia kuali ma tijyolmatikaj uan teipa kichiuas nojua tlauel ma tiyolpakikaj. Kema timoatsonpoliuiltia, peua tijtekipanoua Jehová uan uelis kiampa tijchijtos nochipa. Nopa tlaiknelili tlen tijpialia Jehová uelis moskaltis uan teipa uelis tiitstos nochipa sanse kej ya (xijpoua Salmo 41:12).

17. ¿Tlake tlamantli kena uelis tijmakas Jehová?

¹⁷ Kema tijmaktilia Jehová monemilis uan timoatsonpoliuiltia, tijmaka se tlamantli  tlen tlauel ipati. Sejse tlamantli tlen tijpixtok uan kichijtok xiyolpaki, Jehová mitsmakatok. Maske nochi tlen onka eli iaxka Jehová, ta nojkia uelis tijmakas se tlamantli: tijtekipanos ika nochi moyolo uan amo kema tijtlauelkauas (Job 1:8; 41:11; Prov. 27:11). San nopa tlamantli uelis kichiuas tlauel kuali xiitsto. Tlaj tlauel tikiknelia Jehová, mitsyololinis ximoatsonpoliuilti.

18. ¿Tlake uelis timotlatsintokis?

¹⁸ Ika nochi tlen tikitstokej, ¿kena uelis timoatsonpoliuiltis? Nopa san ta tijmati. Tlauel mitspaleuis tlaj timotlatsintokis: “¿Ya uelis nimoatsonpoliuiltis?” (Hech. 8:36). Xikilnamiki nopa eyi tlamantli tlen mitspaleuis ximoatsonpoliuilti. Se, xijpatiita tlen melauak uan xijchiua tlen xitlauak. Ximotlatsintoki: “¿Nechpaktiskia ma asi nopa tonali kema ayokmo aka istlakatis uan nochi kichiuasej tlen xitlauak?”. Ome, tlauel xikikneli Jesucristo. Ximotlatsintoki: “¿Nijneki Jesucristo ma nechnauati uan nimonejnemiltis kej ya?”. Uan eyi, tlauel xikikneli Jehová. Ximotlatsintoki: “¿Nijneki nijtekipanos Jehová uan nijyolpakiltis?”. Tlaj kema timotlatsintokik ni tlamantli tikijtok kena tijneki, uajka ¿kenke amo timoatsonpoliuiltia? ¿Tlake mitstsakuilia? (Hech. 16:33).

19. ¿Kenke moneki timosemakas timoatsonpoliuiltis? Xikijto se neskayotl (Juan 4:34).

¹⁹ Tlaj ayamo tijmati tlaj kena uelis timoatsonpoliuiltis, uajka ximoiljui ipan tlen kiijtok Jesús (xijpoua Juan 4:34). Jesús kiijtok kema kichiua ipakilis itata, eli kejuak tlakualistli. ¿Kenke kiampa kiijtok? Pampa tlakualistli tlauel techpaleuia. Jesús kimatiyaya nochi tlen iTata technauatia tlauel techpaleuia. Yeka, Jehová kineki ximoatsonpoliuilti (Hech. 2:38, TNM). Uajka, tlaj tijchiuas tlen Jehová mitsnauatia tlauel mitspaleuis. Tlaj mitstekiliskiaj se tlakualistli tlen tlauel ajuiyak, uelis nima tijkuaskia. Uajka nojkia ximosemaka timoatsonpoliuiltis.

20. ¿Tlake tikitasej ipan tlamachtili 11?

²⁰ ¿Kenke sekij amo moatsonpoliuiltiaj? Uelis moiljuiaj nojua kinpolouaj se keski tlamantli. Tijmatij tlauel ipati kema timotemaktilis uan timoatsonpoliuiltis. Yeka maske panos se keski tonali, moneki kuali timoiljuis uan xijchiua kampeka tijchiuas tlen nojua mitspoloua. Uan tlaj ya tijneki timoatsonpoliuiltis, ¿tlake mitspaleuis kiampa tijchiuas? Ya nopa tikitasej ipan tlamachtili 11.