1. ¿Tlake kinpaktia miakej kema yauij tlanechikoli? (Xikita tlaixkopinkayotl).

 MA TIMOILJUIKAJ se tlakatl iuaya isiua asij ipan tlanechikoli, tlauel mosentlachiliaj pampa kiitaj toikniuaj kuali kinseliaj uan kinextiaj moikneliaj. Kema tlakuepiliaj ininchaj, nopa siuatl kiiljuia iueue: “Ne maseualmej nesij kuali ininyolo uan nechpaktik niitstos ininuaya”.

2. ¿Kenke sekij kitlauelkajtokej Jehová?

² Cristo itokilijkauaj nelnelia kinextiaj moikneliaj. Maske kiampa kinextiaj, nojkia tlajtlakolejkej (1 Juan 1:8). Yeka kema nojua tikinixmajtiauij toikniuaj, peua tikitaj mokuapolouaj (Rom. 3:23). Ni tlamantli kichijtok sekij ma kitlauelkauakaj Jehová.

3. ¿Kenijkatsa nesiskia ajkia inijuantij elij Cristo itokilijkauaj? (Juan 13:34, 35).

³ Sampa ma tikitakaj nopa texto tlen ika moyakana ni tlamachtili (xijpoua Juan 13:34, 35). ¿Kenijkatsa maseualmej kimatiskiaj ajkia nelia elij Cristo itokilijkauaj? Pampa kinextiskiaj moikneliaj maske nojkia mokuapolouaj. Jesús amo kiijtok: “Inmojuantij inkimachilisej para nelia inelij nomomachtijkauaj”. Jesús kiijtok: “Nochi tlakamej kimachilisej para nelia innomomachtijkauaj”. Jesús kiijtok itokilijkauaj uan sekinok  maseualmej kiitaskiaj ajkia nelnelia elij itokilijkauaj pampa nelnelia moikneliskiaj.

4. ¿Tlake tlamantli motlajtlaniaj sekij?

⁴ Uelis katli amo kitekipanouaj Jehová motlajtlaniaj: “¿Kenke tlaiknelili uelis kinextis ajkia inijuantij nelia elij Cristo itokilijkauaj? ¿Kenijkatsa Jesús kinextik kinikneliyaya itokilijkauaj? Uan, ¿kenijkatsa uelis tijchiuasej kej Jesús?”. Maske ya timoatsonpoliuiltijtokej, tlauel kuali tlaj timotlajtlaniaj ni tlamantli pampa techpaleuis ma titeiknelikaj uan ma tikiknelikaj se akajya maske mokuapolos (Efes. 5:2).

5. ¿Kenijkatsa eliskia nopa tlaiknelili tlen kiijtok Jesús ipan Juan 15:12, 13?

⁵ Jesús kiijtok kenijkatsa eliskia nopa tlaiknelili tlen kinextiskiaj itokilijkauaj (xijpoua Juan 15:12, 13). Ma tikitakaj nopa tlanauatili tlen kinmakak: “Ximoiknelikaj se ika seyok keja na niinmechiknelia”. ¿Kenijkatsa monekiyaya kinextisej nopa tlaiknelili? Jesús kiijtok tlauel moikneliskiaj, uan kimanauiskiaj se ininikni maske mikiskiaj. b

6. ¿Kenijkatsa kinextia Biblia moneki tijnextisej tlaiknelili?

⁶ ToTeotsij iTlajtol kiijtoua tlauel ipati tijnextisej tlaiknelili. Ma tikitakaj se keski textos tlen miakej tlauel kinpaktia: 1 Juan 4:8: “Toteko, yajaya teiknelijkayotl”, Mateo 22:39: “Xikinikneli sekinok keja timoiknelia moselti”, 1 Pedro 4:8: “Se tlen kiiknelia ne seyok kitlapojpoljuia yonke nopa seyok kiixpanok miak uelta” uan 1 Corintios 13:8: “Teiknelijkayotl nochipa eltos uan axkema tlamis”. Ni uan sekinok textos  kinextia tlauel moneki tikiskaltisej uan tijnextisej tlaiknelili.

7. ¿Kenke Satanás amo ueli kichiua maseualmej ma itstokaj sansejko uan ma moiknelikaj?

⁷ Miakej maseualmej motlajtlaniaj: “¿Kenijkatsa uelis nijmatis tlake religión eli melauak? Maske nochi kiijtouaj tlamachtiaj tlen Biblia kiijtoua, amo sanse tlamachtiaj tlen toTeotsij”. Satanás kichijtok ma onka miak religiones tlen amo melauak uan nopa kinkuapoloua miakej maseualmej. Maske kiampa kichijtok, ya amo uelis kichiuas maseualmej tlen kampa ueli euaj ma itstokaj sansejko uan ma moiknelikaj. San Jehová uelis kichiuas ni tlamantli. Ni tijmatij pampa Jehová tlauel teiknelia. San katli ya kinmaka ichikaualis uan katli kinpaleuia, uelis kinextisej nelnelia moikneliaj (1 Juan 4:7). Yeka Jesús kiijtok nopa tlaiknelili kinextiskia ajkia nelnelia elij itokilijkauaj.

8, 9. ¿Kenijkatsa kinpaleuijtok miakej pampa kiitstokej kenijkatsa moikneliaj Jehová itlajtoltemakauaj?

⁸ Kej kiijtok Jesús, miakej maseualmej kiitstokej ajkia nelnelia elij itokilijkauaj pampa moikneliaj. Toikni Ian kiilnamiki kema achtoui yajki ipan se ueyi tlanechikolistli tlen mochijki nechka ichaj. Ipa yajtoya ipan nopa estadio pampa kinitato katli mauiltiaj, ya kiijtoua: “Amo eliyayaj sanse kej kampa achtouia niajtoya pampa toikniuaj teikneliyayaj, kuali moyoyontijtoyaj uan ininkoneuaj tlatlepanitayayaj”. Nojkia kiijtok: “Tlauel nechpaktik pampa nikitak yolpakiyayaj uan itstoyaj ika tlaseuilistli, ya nopa nijnekiyaya nikitas. Maske amo nikilnamiki tlake tlamachtili kipanoltijkej. Kena nikilnamiki tlen kichijkej toikniuaj ipan nopa tonali”. c Toikni kiitak kuali mouikayayaj katli nopaya itstoyaj pampa moikneliyayaj. Tlauel tikinikneliaj toikniuaj, yeka kuali tikinseliaj uan tikintlepanitaj.

⁹ Toikni John tlauel kipaktik kema achtoui yajki ipan tlanechikoli. Tlauel kipaktik pampa toikniuaj kuali kiselijkej uan kuali monejnemiltiyayaj. Ya kiijtok: “Inijuantij tlauel moikneliyayaj, nopa nechpaleuik ma nikita inijuantij itstokej ipan religión tlen melauak”. d Itstokej miakej katli nojkia kiitstokej Jehová itlajtoltemakauaj nelia elij Cristo itokilijkauaj.

10. ¿Kema monekis tijnextisej nelnelia tikinikneliaj toikniuaj? (Xikita nota).

¹⁰ Kej tikijtojkej kampa peua ni tlamachtili, nochi titlajtlakolejkej, yeka kemantika toikniuaj uelis kichiuasej o kiijtosej se tlamantli tlen techyolkokos (Sant. 3:2). e Kema kiampa panos, monekis tijnextisej tlaj nelnelia tikinikneliaj. ¿Tlake techpaleuis tijchiuasej tlen kinamiki kema kiampa panos? Ma tikitakaj tlen Jesús kichijki (Juan 13:15).

11. ¿Tlake kinextijkej Santiago uan Juan se tonali? (Xikita tlaixkopinkayomej).

¹¹ Jesús kimatiyaya itokilijkauaj mokuapolouayayaj, yeka kinpaleuik ika miak tlaiknelili ma kipatlakaj se keski  tlamantli pampa kinekiyaya Jehová kuali ma kinita. Se tonali, Santiago uan Juan kiiljuijkej ininnana ma kiiljui Jesús ma kintekimaka kampa tlanauatiskia (Mat. 20:20, 21). Nopa omej apóstoles kinextijkej tlauel moueyimatiyayaj uan kinekiyayaj tlapijpiasej (Prov. 16:18).

12. ¿Kenke tijmatij nopa sekinok apóstoles nojkia kichijkej kej Santiago uan Juan?

¹² Nopa sekinok apóstoles, nojkia tlauel kualankej kema kimatkej tlen kichijtoyaj Santiago uan Juan (Mat. 20:24). Uelis tlauel mokualanijkej ipan nopa tonali uan nopa sekinok apóstoles kiniljuijkej Santiago uan Juan: “¿Inmoiljuiaj tlauel inmopati, yeka inkiiljuiaj Jesús ma inmechtekimaka kampa tlanauatis? Tojuantij nojkia tlauel tijpaleuijtokej Jesús, uajka nojkia kinamiki ma techtekimaka”. Ipan nopa tonali amo kinextijkej moikneliaj.

13. ¿Tlake kichijki Jesús maske iapóstoles miakpa mokuapolojkej? (Mateo 20:25-28).

¹³ ¿Tlake kichijki Jesús? Amo kualanki, amo kiijtok kintemoskia sekinok iapóstoles katli amo moueyimatij uan moikneliaj, ya amo kiampa kichijki. Jesús kinpaleuik itokilijkauaj ika miak tlaiknelili pampa kimatiyaya kipiayayaj kuali ininyolo (xijpoua Mateo 20:25-28). Maske miakpa mokualanijkej  pampa kinekiyayaj tlauel pankisasej, Jesús nochipa kinpaleuik ika miak tlaiknelili (Mar. 9:34; Luc. 22:24).

14. ¿Kenijkatsa eliyayaj maseualmej kampa moskaltijkej Jesús iapóstoles?

¹⁴ Jesús kimatiyaya kenijkatsa eliyayaj maseualmej kampa moskaltijkej iapóstoles (Juan 2:24, 25). Ipan nopa tonali, katli tlayakanayayaj ipan religiones tlauel kinekiyayaj kipiasej tlanauatili uan ma kintlepanitakaj (Mat. 23:6, TNM, nojkia xikita video Asientos del frente en la sinagoga ipan nota de estudio). Katli tlayakanayayaj ipan religión judía moiljuiyayaj san inijuantij tlauel ininpati (Luc. 18:9-12). f Jesús kimatiyaya tlen kichiuayayaj nopa maseualmej ueliskia kinmauas iapóstoles (Prov. 19:11). Ya amo moiljuiyaya nochipa kichiuaskiaj tlen xitlauak, yeka amo kualaniyaya kema mokuapolouayayaj. Jesús kimatiyaya iapóstoles kipiayayaj kuali ininyolo, yeka kinpaleuik ayokmo ma moueyimatikaj, ayokmo ma kinekikaj tlauel pankisasej uan ma teiknelikaj.

15. ¿Tlake techmachtia tlen kinpanok Santiago uan Juan?

¹⁵ Uelis tijyekosej miak tlamantli ika tlen kinpanok Santiago uan Juan. Inijuantij amo kinamikiyaya tlajtlanisej ma kintekimaka Jesús kampa tlanauatiskia. Uan nopa sekinok apóstoles nojkia amo kinamikiyaya kualanisej ika tlen kikajkej. Maske inijuantij kiampa kichijkej, Jesús kinextik kinikneliyaya iapóstoles. ¿Tlake techmachtia? Moneki tikitasej tlake tijchiuaj kema se akajya mokuapoloua. Yeka kema se toikni techyolkokoua, ma timotlajtlanikaj: “¿Kenke nechkualankamakak tlen kichijki? ¿Moneki na nijpatlas se keski tlamantli? ¿Kiixnamiktok ni toikni se tlaouijkayotl? ¿Uelis nijnextis nikiknelia uan nikilkauas tlen kichijki maske nelia nechyolkokok?”. Tlaj nochipa tijnextiaj tikinikneliaj sekinok, tijnextisej nelnelia tielij Cristo itokilijkauaj.

16. ¿Tlake sekinok tlamantli techmachtia tlen Jesús kichijki?

¹⁶ Tlen Jesús kichijki, nojkia techmachtia moneki tijchiuasej kampeka tikinkuamachilisej toikniuaj (Prov. 20:5). Maske amo ueli tikitaj tlen kipia ipan iyolo se akajya, kej kichijki Jesús, kena uelis tijchiuasej kampeka tijpiasej toyolo kema se toikni mokuapoloua (Efes. 4:1, 2; 1 Ped. 3:8). Tlauel techpaleuis tlaj kuali tikinixmatisej. Ma tikitakaj tlen kipanok se toikni katli tepaxaloua.

17. ¿Tlake panok kema se toikni katli tepaxaloua kichijki kampeka kiixmatis se toikni?

¹⁷ Se toikni katli tepaxaloua chijchikuasej metstli, katli tlatekipanouayaya ipan África oriental, kiixmatki se toikni katli nesiyaya mosisinia. ¿Tlake kichijki kema kiixmatki? Ya kiijtoua: “Amo nimouejkatlalik tlen nopa toikni, nijchijki kampeka kuali nikixmatis”. Nopa kipaleuik ma kiita tlen kipanotoya  nopa toikni kichijtoya ma nesi mosisinia. Ya kiijtoua: “Kema nikitak kenijkatsa kichijtoya kampeka kiijiyouis tlen kipanotoya uan kipatlas inemilis, nechpaleuik kuali ma nikita. Teipa tlauel kuali timouampojchijkej”. Tlaj tijchiuasej kampeka kuali tikinixmatisej uan tikinkuamachilisej toikniuaj, techpaleuis tikiniknelisej.

18. ¿Tlake uelis timotlajtlanisej tlaj se toikni techyolkokok? (Proverbios 26:20).

¹⁸ Uelis kemantika timoiljuisej moneki tikamanaltisej iuaya se toikni katli techyolkokok. Kema kiampa tijnekisej tijchiuasej, achtoui ma timotlajtlanikaj: “¿Nijmati nochi tlen panok?” (Prov. 18:13). “¿Nelnelia kinekiyaya nechyolkokos? (Ecl. 7:20). “¿Nojkia kiampa nijchijtok kemantika?” (Ecl. 7:21, 22). “Tlaj nikamanaltis iuaya, ¿nijsenkauas o nijueyilis ni kuesoli?” (xijpoua Proverbios 26:20). Tlaj timotlajtlanisej ni tlamantli, uelis tijnextisej titeikneliaj uan tikilkauasej tlen techchiuilijkej.

19. ¿Tlake timosentlalijtokej tijchiuasej?

¹⁹ Nochi Jehová itlajtoltemakauaj kinextiaj nelnelia elij Cristo itokilijkauaj, uan sejse tlen tojuantij nojkia uelis kiampa tijnextisej: kema tikinikneliaj toikniuaj ika nochi toyolo maske mokuapolouaj. Tlaj kiampa tijchiuasej, sekinok maseualmej kiitasej tiitstokej ipan religión tlen melauak. Uan nojkia kinekisej kiueyichiuasej Jehová, katli tlauel teiknelia. Yeka, ma timosentlalikaj tijnextisej nopa tlaiknelili, tlen kinextia nelnelia tielij Cristo itokilijkauaj.