1, 2. Tlaj ayamo timoatsonpoliuiltia, ¿kenke amo kinamiki timoyolkokos? (Xikita tlaixkopinkayotl ipan ipantsajka).

 TLAUEL tiyolpakij pampa tijneki timoatsonpoliuiltis, ¿nelnelia uelis kiampa tijchiuas? Tlaj timoiljuia kena, uan tlaj ueuejtlakamej mitsiljuisej kena tiuelis, uajka nima ximoatsonpoliuilti. Tlaj tijchiuas ni tlamantli, nochipa tiyolpaktos tijtekipanos Jehová.

² Tlaj ueuejtlakamej mitsiljuisej ayamo tiuelis o tlaj timoiljuia nojua moneki tijpatlas se keski tlamantli, nojua xijchijto kampeka. Kena uelis tijpatlas monemilis uan kiampa timoatsonpoliuiltis, maske nojua titelpokatl o ya tiueyi.

3. ¿Tlake kiijtok nopa tekichijketl tlen Etiopía, uan tlake kichiua ma timotlajtlanikaj? (Hechos 8:36, 38).

³ (Xijpoua Hechos 8:36, 38 b). Se tekichijketl katli euayaya Etiopía kitlatsintokilik Felipe: “¿Uelis nimoatsonpoliuiltis?”. Ika tlen kiijtok kinextik kinekiyaya kichiuas nopa tlamantli. Uajka, ¿ayokmo monekiyaya kipatlas yon se tlamantli ipan inemilis?

4. ¿Kenijkatsa kinextik nopa etíope kinekiyaya kimatis sekinok tlamantli?

⁴ “Nopa tlakatl yajtoya Jerusalén para kiueyichiuas Toteko” (Hech. 8:27). Uelis ya pejtoya kineltoka religión judía  pampa kuali kiixmatiyaya nopa Escrituras Hebreas. Maske tlen momachtiyaya kipaleuiyaya kiixmatis Jehová, nojua kinekiyaya kimatis sekinok tlamantli. Yeka kema mopantik iuaya Felipe, ya kipojtoya amatlajkuiloli Isaías (Hech. 8:28). Maske ouij tijkuamachilis nopa amochtli, nopa tlakatl kichiuayaya kampeka kimatis sekinok tlamantli.

5. ¿Kenijkatsa kipaleuik tlen momachtijtoya nopa etíope?

⁵ Nopa tlakatl “elki se iueyitekitika nopa siuatlanauatijketl Candace, ipan tlali Etiopía kimokuitlauik nochi itomij” (Hech. 8:27). Maske kipiayaya miak tekitl, kichijki kampeka momaijtos uan kimatis sekinok tlamantli, uan yeka kinejki kiueyichiuas Jehová. Maske uejka mokauayaya Jerusalén uan kiixnamikiskia se keski tlaouijkayotl, ya kichijki kampeka yas kiueyichiuati Jehová.

6, 7. ¿Tlake kichijki nopa eunuco uan kiampa nojua tlauel kiikneli Jehová?

⁶ Felipe kiixtomilik nopa tlakatl tlamachtili tlen tlauel ipati. Kiiljuik Jesús eli nopa Mesías (Hech. 8:34, 35). Tlen kimatki asik ipan iyolo, ¿tlake kichiuaskia ika tlen kimatiyaya? Maske ueltoskia elis sanse tlaneltokaketl judío, ya kinejki moatsonpoliuiltis, uan mochiuas se Jesús itokilijka pampa tlauel kiikneliyaya uan nojkia kiikneliyaya Jehová. Kema Felipe kiitak nopa tlakatl kuali tlaneltokayaya, nima kiatsonpoliuiltik.

⁷ Tlen kichijki nopa eunuco mitspaleuis xikita tlake tlamantli moneki tijchiuas tlaj tijneki timoatsonpoliuiltis, kiampa nojkia uelis tikijtos: “¿Uelis nimoatsonpoliuiltis?”. Ma tikitakaj kenijkatsa nojkia uelis tijchiuasej kej nopa tlakatl: timomachtisej sekinok tlamantli, tijchiuasej ipan tonemilis tlen timomachtiaj uan nojua tlauel tikiknelisej Jehová.

8. Kej kiijtoua Juan 17:3, ¿tlake moneki tijchiuas?

⁸ (Xijpoua Juan 17:3). ¿Mitspaleuik ximomachti Biblia tlen Jesús kiijtok ipan ni texto? Miakej tlauel kinpaleuijtok. Ni texto nojkia techyololinia nojua ma timomachtikaj sekinok tlamantli. ¡Uan amo kema tlamis tikixmatisej Jehová! (Ecl. 3:11). Uan maske ya tijpiasej nopa nemilistli tlen axkema tlamis, nojua monekis tijchijtosej kampeka tikixmatisej. Kema kiampa tijchiuasej, techpaleuis nojua tlauel ma timouampojchiuakaj iuaya (Sal. 73:28).

9. ¿Tlake nojua moneki tijchiuas tlaj ya tijyekok tlamachtili tlen amo ouij?

⁹ Kema se ajkeya peua kiixmati Jehová, momachtia tlamantli tlen amo tlauel ouij, kej kiijtok apóstol Pablo ipan amatlajkuiloli hebreos. Maske kiampa kiijtok, ya amo kinekiyaya kiijtos nopa tlamachtili amo kipia ipati, kinekiyaya ma kiitakaj eli kejuak leche tlen kinpaleuia pilkonetsitsij ma moskaltikaj (Heb. 5:12; 6:1). Maske Cristo itokilijkauaj kimatiyayaj se keski tlamantli, Pablo kiniljuik ma momachtikaj tlen ouij. ¿Mitspaktiskia timomachtis sekinok tlamachtili? ¿Tijneki tijchiuas kampeka nojua kuali titlaneltokas uan tijyekos sekinok tlamantli tlen Jehová uan tlen kineki kichiuas?

10. ¿Kenke sekij tlauel ouij kimatij momachtisej?

¹⁰ Sekij tlauel ouij kimatij momachtisej. Uan ta, ¿nojkia ouij tijmati? ¿Mitsmachtijkej titlapouas uan timomachtis ipan escuela? ¿Mitspaktiyaya timomachtis? ¿O tlauel ouij tijmati timomachtis se amochtli? Tlaj kiampa tijmati, amo san ta kiampa mitspano. Jehová uelis mitspaleuis ma mitspakti timomachtis pampa ya eli xitlauak uan tlauel kuali tlamachtia.

11. ¿Kenke Jehová tlauel kuali tlamachtia?

¹¹ Jehová tlauel kuali techmachtia (Is. 30:20, 21). Kema tlamachtia kipia iyolo, kichiua ika tlaiknelili uan mosentlalia ipan kuajkuali tlamantli tlen kinextiaj katli kinmachtia (Sal. 130:3). Ya amo kema techiljuia ma tijchiuakaj se tlamantli tlen amo tiuelij. Ma tikilnamikikaj ya kuali kichijchijki totsontekuich (Sal. 139:14). Nojkia, kichijki ma tijnekikaj tijyekosej miak tlamantli, uan ya kineki nochipa kiampa ma tijchijtokaj uan ma tiyolpakikaj kema timomachtiaj. Yeka, moneki tijchiuasej kampeka ma techpakti timomachtisej tlen Biblia kiijtoua (1 Ped. 2:2). ¿Tlake uelis techpaleuis? Tlaj timosentlaliaj tijchiuasej se keski tlamantli, tijpouasej Biblia uan timomachtisej mojmostla (Jos. 1:8). Jehová techpaleuis ma techpakti timomachtisej uan timoyoliljuisej ipan ya.

12. ¿Kenke moneki timomachtisej tlen Jesús kichijki uan tlamachtik?

¹² Xijchiua kampeka timoyoliljuis kenijkatsa monejnemiltik uan tlamachtik Jesús. Tlaj tijnekij kuali tijtekipanosej Jehová ipan ni tonali tlen tlauel ouij, moneki tijchiuasej kampeka timonejnemiltisej kej Jesús (1 Ped. 2:21). Jesús xitlauak kiniljuik itokilijkauaj tlake tlaouijkayotl kiixnamikiskiaj (Luc. 14:27, 28). Uan kimatiyaya inijuantij nojkia amo kitlauelkauaskiaj toTeotsij (Juan 16:33). Ximomachti tlen Jesús kichijki uan ximosentlali mojmostla timonejnemiltis kej ya.

13. ¿Tlake moneki nojua tijtlajtlanijtos Jehová uan kenke?

¹³ Amo tijnekij san tijtsontekontlalisej miak tlamantli kema timomachtiaj, tijnekij tikixmatisej Jehová, tikiknelisej uan tijneltokasej (1 Cor. 8:1-3). Kema timomachtijtias, xijtlajtlani Jehová ma mitspaleui nojua kuali titlaneltokas (Luc. 17:5). Uan ya mitspaleuis ika tlaiknelili. Tlaj kiampa tijchiuas, nojua kuali titlaneltokas (Sant. 2:26).

14. ¿Kenijkatsa kinextik Pedro moneki tijchiuasej tlen timomachtiaj? (Xikita tlaixkopinkayotl).

¹⁴ Apóstol Pedro kiijtok Cristo itokilijkauaj  moneki kichiuasej tlen momachtiaj. Kinixtomilik ika tlen kipanok Noé. Jehová kiiljuik Noé tlauel uetsiskia atl uan kintsontlamiltiskia katli amo kualmej ipan nopa tonali. Noé uan ichampoyouaj amo san monekiyaya kimatisej tlen panoskia, inijuantij monekiyaya kichiuasej se keski tlamantli uan kiampa momanauisej. Pedro kiijtok kema ayamo uetsiyaya tlauel miak atl kinauatijkej “Noé ma kichiua nopa ueyi kuakanaua” (1 Ped. 3:20). Yeka Noé uan ichampoyouaj kichijchijkej nopa ueyi akali pampa kiampa kinnauatijtoya Jehová (Heb. 11:7). Teipa, Pedro kiixnextik tlen kichijki Noé kej kema se akajya moatsonpoliuiltia. Kiijtok: “Ni kiixnextia nopa atsonpoliuilistli, tlen nama nojkia inmechmakixtia” (1 Ped. 3:21, TNM). Tlen tijchiua pampa tijneki timoatsonpoliuiltis, eli sanse kej kema Noé uan ichampoyouaj kichijchijkej nopa ueyi akali. Uajka, ¿tlake moneki tijchiuas tlaj tijneki timoatsonpoliuiltis?

15. ¿Tlake kiijtosneki nelnelia timoyolkuepas?

¹⁵ Moneki timoyolkuepasej ika nochi toyolo tlen totlajtlakoljuaj (Hech. 2:37, 38). Kema se akajya nelnelia moyolkuepa kinextia ika tlen kichiua. ¿Nojua tijchiua tlen Jehová amo kipaktia? ¿Amo kuali timonejnemiltia, titlachichina, titlatelchiua o nojua tijtekiuia tlajtoli tlen sokiyo? (1 Cor. 6:9, 10; 2 Cor. 7:1; Efes. 4:29). Tlaj nojua tijchiua tlen amo kuali, xijchiua kampeka tijkauas. Tlaj tijneki ma mitspaleuikaj uan ma mitstlajtolmakakaj, uelis tikiljuis katli mitsmachtia o tikiniljuis ueuejtlakamej. Uan tlaj titelpokatl uan nojua tiitstok ininuaya motatauaj, uelis tikiniljuis ma mitspaleuikaj tijkauas tlen mitstsakuilia timoatsonpoliuiltis.

16. ¿Tlake nojkia moneki tijchiuas tlaj tijneki kuali titlaneltokas?

¹⁶ Nojkia, moneki nochipa tijchiuas se keski tlamantli tlen mitspaleuis kuali titlaneltokas. Uelis kiampa tijchiuas tlaj tias tlanechikoli uan titlanankilis (Heb. 10:24, 25). Uan kema mitsiljuisej ya  uelis titlajtolmoyauas, nochipa xijchiua. Tlaj kiampa tijchiuas, tlauel mitspaktis titlajtolmoyauas (2 Tim. 4:5). Tlaj titelpokatl uan tiitstok ininuaya motatauaj, uelis timotlasintokis: “¿Nochipa nechiljuijtinemij moneki nias tlanechikoli uan nitlajtolmoyauas? ¿O nijchiua pampa na nijneki?”. Kema tijchiua ni tlamantli ika nochi moyolo tijnextia kuali titlaneltoka, tikiknelia Jehová uan tijtlaskamatilia. Kema tijchiua kampeka kuali titlaneltokas, tijchiua “tlen senkistok kuali”, kejuak tijmaka Jehová tlen tijpia (2 Ped. 3:11; Heb. 13:15). Jehová kipaktia ma tijmakakaj tlen tijpiaj ika pakilistli uan amo pampa techchiualtiaj (nojkia xikita 2 Corintios 9:7). ¡Uan tlauel tiyolpakij kema kiampa tijchiuaj!

17, 18. ¿Tlake tlamantli mitspaleuis ximoatsonpoliuilti uan kenke? (Proverbios 3:3-6).

¹⁷ Kema tijchijtos kampeka timoatsonpoliuiltis, tikixnamikis se keski tlaouijkayotl. Uelis se keskij mitspinajtisej o mitstetsopasej pampa timomachtia Biblia (2 Tim. 3:12). O uelis maske tijchiua kampeka tijkauas se tlamantli tlen amo kuali, kemantika nojua tijchiua. O uelis timoiljuia, amo nima timoatsonpoliuiltis uan nopa kichiua ximokueso. ¿Tlake uelis mitspaleuis? Tlaj tikiknelia Jehová.

¹⁸ Kema tikikneliaj Jehová, tlauel techpaleuia (xijpoua Proverbios 3:3-6). Tlaj tikiknelia ika nochi moyolo, mitspaleuis amo xijtlauelkaua maske tikixnamikis tlaouijkayotl. Biblia miakpa kiijtoua Jehová kinextia tlaiknelili tlen amo tetlauelkaua. Ni kiijtosneki nochipa kiniknelijtos uan amo kema kintlauelkauas itekipanojkauaj (Sal. 100:5). Xikilnamiki, Jehová mitschijki kej ya itlachialis (Gén. 1:26). Uajka, ¿kenijkatsa nojkia uelis tijnextis nopa tlaiknelili?

19. ¿Tlake uelis tijchiuas uan kiampa tijtlaskamatilis Jehová tlen mitsmaka? (Gálatas 2:20).

¹⁹ Achtoui moneki tijtlaskamatilis Jehová (1 Tes. 5:18). Mojmostla uelis timotlajtlanis: “¿Kenijkatsa kinextik Jehová nechiknelik nama?”. Uan teipa, kema timomaijtos, xijtlaskamatili sejse tlamantli tlen mitsmakak. Xikita kenijkatsa Jehová kinextia mitsiknelia, kej kichijki apóstol Pablo (xijpoua Gálatas  2:20). Uan ximotlatsintoki: “¿Kenijkatsa nojkia uelis nijnextis nikiknelia?”. Nopa tlaiknelili mitspaleuis amo xijchiua tlen mitsyoltilana, tikijiyouis kuesoli uan nojua tijchijtos tlamantli tlen mitspaleuis kuali xitlaneltoka. Kiampa mojmostla tijnextis tikiknelia Jehová.

20. ¿Tlake tijchiuaj kema tijmaktiliaj Jehová tonemilis uan kenke tlauel ipati?

²⁰ Teipa, nopa tlaiknelili tlen tijpialia Jehová mitsyololinis xijchiua se tlamaijtoli kampa tijmaktilis monemilis. Uan kiampa tijpias se ueyi tlateochiualistli pampa uelis tijtekipanos nochipa. Kema tijmaktiliaj Jehová tonemilis, tikiljuiaj nochipa tijtekipanosej maske amo kuali tiitstosej. Ni tlamantli tijchiuaj sempatsi ipan tonemilis. Maske uelis achi timajmauis tijmaktilis Jehová monemilis. Tlaj kiampa tijchiuas, tlauel mitspaleuis. (Sal. 50:14). Satanás kichiuas kampeka ayokmo xikikneli Jehová uan ayokmo xijtekipano. Amo xijkaua kiampa ma kichiua (Job 27:5). Nopa tlaiknelili tlen tijpialia Jehová mitspaleuis xijchiua tlen tikiljuik kema timotemaktilik uan mitspaleuis nojua kuali ximouika iuaya.

21. ¿Kenke kema timoatsonpoliuiltiaj san tijpeualtiaj tijtekipanouaj Jehová?

²¹ Kema ya tijmaktilijtos Jehová monemilis, xikiniljui ueuejtlakamej tlake seyok tlamantli moneki tijchiuas. Xikilnamiki, ipan nopa tonali kema timoatsonpoliuiltis, san tijpeualtis tijtekipanos Jehová. Uajka xijchiua kampeka tikiknelijtos uan xijchiua se keski tlamantli tlen kichiuas nojua tlauel xikikneli. Nopa mitspaleuis timoatsonpoliuiltis. Amo kema tikilkauas nopa tonali, pampa san tijpeualtia tijtekipanos Jehová. Uajka xijchijto kampeka nojua tlauel tikiniknelis Jehová uan ikone.