¿Kenke Rut iteixmatka kiijtok kipoloskia nopa tlali tlaj mosenkauaskia iuaya? (Rut 4:1, 6).

Uejkajkia, ¿tlake panoyaya kema se tlakatl mikiyaya uan amo kinpiayaya ikoneuaj? ¿Ajkia moaxkatiyaya itlal? ¿Ixpoliuiyaya itsonkiska? Nochi ni tlamantli moixtomayaya ipan tlanauatili tlen kimakakej Moisés.

Tlaj se tlakatl mikiyaya o kinamakayaya itlal pampa ayokmo kipiayaya tomij, se iikni o se iteixmatka ueliyaya kikoua nopa tlali. Kiampa nopa tlali amo panoyaya ininmako katli amo eliyayaj iteixmatkauaj (Lev. 25:23-28; Núm. 27:8-11).

¿Tlake kichiuayayaj uan kiampa amo ixpoliuiyaya itsonkiska nopa tlakatl katli mijki? Iikni nopa mijkatsi mokuiliyaya iuejpol, kiampa ueliskiaj kipiasej se ininkone, katli kipiaskia itsonkiska nopa mijkatsi uan moaxkatiskia tlen eliyaya iaxka. Ni tlanauatili tlauel kipaleuiyaya katli mikiyaya iueue (Deut. 25:5-7; Mat. 22:23-28). Rut nojkia kiampa monamiktik.

Ma timoiljuikaj ipan tlen kipanok Noemí. Ya monamiktijtoya iuaya se tlakatl katli itoka Elimélec. Kema iueue uan omej itelpokauaj mijkej, ayokmo kipixki ajkia kimokuitlauiskia (Rut 1:1-5). Kema Noemí tlakuepilik Judá, kiiljuik iyex Rut ma kiiljui Booz (o Boaz), se iteixmatka Elimélec, ma kikouili itlal (Rut 2:1, 19, 20; 3:1-4). Maske kiampa kiijtok, Booz kiiljuik Rut itstoya seyok iteixmatka katli achtoui monekiyaya kiijtos tlaj kikouaskia nopa tlali (Rut 3:9, 12, 13). Biblia amo kiijtoua tlake itoka nopa tlakatl.

Maske nopa tlakatl kimatiyaya kitekiuiskia miak tomij, Noemí ya eliyaya ueyi uan ayokmo ueliskia kipias se ikone katli moaxkatiskia itlal Elimélec, kiijtok kena kikouaskia nopa tlali (Rut 4:1-4). Nochi nopa tlali panoskia imako. Nopa tlakatl kiitak tlauel kuali tlaj kikouaskia.

Uan kema kimatki nojkia monekiyaya mokuilis Rut, ayokmo kinejki kikouas nopa tlali. Ya kiijtok: “Axuelis nijkouas niyon axuelis nimokuilis Rut para nosiua, pampa monekiskia nikinkixtiliskia tlen elis ininaxka nonelkoneuaj” (Rut 4:5, 6). ¿Kenke ayokmo kinejki kikouas?

Tlaj nopa tlakatl o se iteixmatka mosenkauaskia iuaya Rut uan kipiaskia se ikone, nopa tlali tlen eliyaya iaxka Elimélec panoskia imako nopa okichpil. ¿Kenke nopa tlakatl kipoloskia nopa tlali? Maske Biblia amo kiijtoua ma tikitakaj se keski tlamantli tlen ueliskia panos.

• Se, uelis moiljuik san kipoloskia itomij pampa itlal Elimélec panoskia imako iokichpil Rut.

• Ome, monekiskia kinmakas tlen kinpoloua Noemí uan Rut.

• Eyi, tlaj Rut uan nopa tlakatl kinpiaskiaj sekinok ininkoneuaj, nopa tlali monekiskia moxejxeljuilisej.

• Naui, tlaj nopa tlakatl amo kinpiayaya ikoneuaj uan kipiaskia se iuaya Rut, uajka nochi nopa tlali tlen kipiaskia panoskia imako nopa okichpil uan kiuikaskia itsonkiska Elimélec. Yeka nopa tlakatl amo kinejki kipaleuis Noemí. Ya kikajki Booz ma kikoua nopa tlali pampa nojkia eliyaya iteixmatka. Uan Booz kena kichijki pampa amo kinekiyaya ma ixpoliui itsonkiska Elimélec (Rut 4:10).

Nopa tlakatl amo kinekiyaya ma ixpoliui itsonkiska yon kipolos tlen eliyaya iaxka. San moiljuiyaya ipan ya. ¡Tlauel amo kuali tlen kichijki pampa itoka kena ixpolijki! Nojkia amo kiselik nopa tlateochiualistli tlen Booz kena kiselik: ya elki se iuejkapantata Jesucristo. Nopa tlakatl san moiljuik ipan tlen ya kinekiyaya uan amo kipaleuik Noemí, yeka amo kiselik nopa tlateochiualistli (Mat. 1:5; Luc. 3:23, 32).