1-3. 1) ¿Tlake tlamantli nojua moneki tijpatlasej maske ya timoatsonpoliuiltijtokej? 2) ¿Tlake uelis timotlajtlaniaj? (Xikita nopa achtoui tlaixkopinkayomej).

KEMA Kevin pejki momachtia, tlauel kipatiitak kuali mouikas iuaya Jehová. Yeka kikajki nochi tlen amo kuali katli kichiuayaya, ayokmo mauiltik ika tomij, ayokmo tlachichinki, ayokmo moiuintik uan ayokmo kitekiuik drogas ^[1] (xikita nopa nota kampa tlami ni tlamachtili). Ayokmo kichijki nopa pampa motemachik Jehová kipaleuiskia uan pampa momachtik Biblia (Heb. 4:12).

² Maske Kevin moatsonpoliuiltik, nojua monekiyaya kipatlas se keski tlamantli ipan inemilis uan kiampa san kinextis kuajkuali tlamantli (Efes. 4:31, 32). Kevin kiitak tlauel nima kualaniyaya, uan kimatiyaya tlauel ouij ayokmo kiampa kichiuaskia. Kiijtok maske amo tlauel ouij kikajki nochi tlen amo kuali, kena tlauel ouij kimatiskia ayokmo mosisinis. Yeka miakpa kiiljuik Jehová ma kipaleui  uan kuali momachtik tlen Biblia kiijtoua. Nopa kipaleuik ayokmo ma mosisini.

³ Kema ayamo timoatsonpoliuiltiyayaj, ayokmo tijchijkej miak tlamantli tlen amo kuali, uan tijchijkej tlen Biblia kiijtoua pampa tijnekiyayaj timoatsonpoliuiltisej. Uan maske timoatsonpoliuiltijkej, tikitaj nojua moneki tijpatlasej se keski tlamantli uan kiampa tijchiuasej ipan tonemilis kej Jehová uan Jesús (Efes. 5:1, 2; 1 Ped. 2:21). Uelis tikitaj techpaktia titeijilnamikisej, tlauel techtekipachoua tlen sekinok kiijtosej, timokalakijtinemij kampa amo kinamiki, o uelis tijchiuaj sekinok tlamantli. Maske uelis miak xiuitl tijchijtokej kampeka ayokmo tijchiuasej nopa, nojua tijchiuaj uan amo tiuelij tijpatlaj nopa tlamantli ipan tonemilis. Yeka uelis timotlajtlaniaj: “Tlaj nijkajki miak tlamantli tlen tlauel amo kuali, ¿kenke amo ueli nijpatla ni tlamantli ipan nonemilis? ¿Tlake nechpaleuis ma nijchiua tlen Biblia kiijtoua uan kiampa ayokmo nijchiuas nopa tlamantli?”.

4. ¿Kenke amo nochipa tiuelij tijyolpakiltiaj Jehová?

⁴ Tlauel tikikneliaj Jehová uan ika nochi toyolo tijnekij tijyolpakiltisej. Maske tlauel tijnekij tijyolpakiltisej, kemantika amo tiuelij tijchiuaj nopa pampa titlajtlakolejkej. Uelis tijyolmatij kej apóstol Pablo: “Nijneki nijchiuas tlen kuali, pero axniueli” (Rom. 7:18; Sant. 3:2).

5. ¿Tlake tijkajkej pampa tijnekiyayaj timoatsonpoliuiltisej, uan tlake nojua moneki tijchiuasej?

⁵ Uejkajkia tijkajkej miak tlamantli tlen Biblia kiijtoua amo kuali, tlaj amo tijkajtoskiaj, amo ueltoskia timoatsonpoliuiltisej (1 Cor. 6:9, 10). Maske tijchijkej nopa, nojua titlajtlakolejkej (Col. 3:9, 10). Yeka amo kinamiki timoiljuisej ayokmo timokuapolosej pampa ya timoatsonpoliuiltijkej o pampa miak xiuitl tijtekipanojtokej Jehová. Se keski tlamantli tlen timomajtokej tijchiuaj tlauel ouij tijkauasej, yeka nojua moneki tijchiuasej kampeka amo tijchiuasej tlen techyoltilana.

6, 7. 1) ¿Kenke nojua ueli timouampojchiuaj iuaya Jehová maske titlajtlakolejkej? 2) ¿Kenke amo kinamiki timoiljuisej Jehová amo kema techtlapojpoljuis?

⁶ Maske titlajtlakolejkej, kena uelis timouampojchiuasej iuaya Jehová uan tijtekipanosej. Ma tikilnamikikaj Jehová kinejki mouampojchiuas touaya. Ya kuali techixmati uan kineki tojuantij nojkia kuali ma tikixmatikaj (Juan 6:44). Nojkia kimatiyaya tlake techyoltilana tijchiuasej, yeka kimajtoya kemantika timokuapoloskiaj. Maske kimatiyaya nopa, Jehová kinejki mouampojchiuas touaya.

⁷ Jehová nelia tlauel techiknelia, yeka kititlanki iKone ma mikiki uan ma techmakixtiki tlen totlajtlakoljuaj (Juan 3:16). Yeka kema timokuapolosej uelis tikiljuisej Jehová ma techtlapojpoljui. Tijmatij yaya techtlapojpoljuis uan kiampa nojua timouampojchijtosej iuaya (Rom. 7:24, 25; 1 Juan 2:1, 2). Xikilnamiki Jesús mijki pampa kinejki kinmakixtis katli moyolkuepaj. Yeka, tlaj tlauel timokuesoua pampa timoiljuia tlauel amo kuali tlen uejkajkia tijchijki, moneki timomaijtos uan timotemachis Jehová nelia mitstlapojpoljuis. Tlaj amo tikiljuiskia Jehová ma mitstlapojpoljui, eliskia kej kema tijmajtok timasokiyo uan amo tijneki tijtekiuis atl tlen ika timomajtekis. Tlauel tijtlaskamatiliaj Jehová pampa kineki mouampojchiuas touaya maske titlajtlakolejkej (xijpoua 1 Timoteo 1:15).

8. ¿Kenke moneki nojua tijpatlatiasej se keski tlamantli ipan tonemilis?

⁸ Maske tijmatij Jehová techtlapojpoljuis, amo kinamiki timoiljuisej ayokmo tijchiuasej kampeka tijpatlasej se tlamantli ipan tonemilis. Tlaj tijnekij timouampojchijtosej iuaya Jehová, moneki ipan tonemilis tijchiuasej kej ya uan Jesús, kiampa tijchiuasej tlen inijuantij kinekij (Sal. 15:1-5). Nojkia moneki tijchiuasej kampeka nojua tijpatlasej se keski tlamantli ipan tonemilis,  uan uelis teipa ayokmo tijnekisej tijchiuasej. Tlaj namanok timoatsonpoliuiltijkej o ya panotok miak xiuitl, moneki nojua tijchijtiasej kampeka tijpatlatiasej se keski tlamantli (2 Cor. 13:11).

9. ¿Tlake moneki tijchiuasej tlaj tijnekij ‘tijpiasej tonemilis yankuik’?

⁹ Pablo kiniljuik se keskij Cristo itokilijkauaj: “Inkitlauelkajkej inmonemilis tlen achtoui kema intlakajkayauayayaj uan inkichijtinemiyayaj tlamantli tlen fiero tlen kinekiyaya inmotlakayo xijchiuakaj. Ama inkipiaj tlen yankuik inmopani para kiyankuilis inmotlalnamikilis uan inmoyolo para xijtlapejpenikaj para inkichiuasej tlen kuali. Uajka moneki inkinextisej inmonemilis tlen yankuik [...]. Xijpiakaj inmonemilis yankuik pampa toTeko inmechchijtok se yankuik tlakatl tlen eltok keja ya. Uan ama uelis inkichijtinemisej tlen xitlauak uan tlen tlatsejtseloltik” (Efes. 4:22-24). Nopa tlajtoli “kiyankuilis inmotlalnamikilis” kiijtosneki nochipa moneki tijchijtiasej kampeka ‘tijpiasej tonemilis yankuik’. Yeka, tlaj namanok pejkej tijtekipanouaj Jehová o ya panotok miak xiuitl, nojua moneki tijchiuasej kampeka tijnextijtiasej ipan tonemilis nopa kuajkuali tlamantli, kiampa kejuak tijpiasej se ‘tonemilis yankuik’. Uajka, tlen Biblia tlamachtia techpaleuis ma tijnextikaj nopa kuajkuali tlamantli.

10. 1) ¿Tlake moneki tijchiuasej tlaj tijnekij Biblia nojua ma techpaleuijto? 2) ¿Tlake tlamantli uelis timotlajtlaniaj?

¹⁰ Tlaj tijnekij Biblia nojua ma techpaleuijto ipan tonemilis, moneki tijchiuasej kampeka tijchiuasej tlen kiijtoua. ¿Kenke moneki tijchiuasej nopa? ¿Amo ueliskia Jehová kichiuas amo ouij ma tijkauakaj nopa tlamantli tlen techyoltilana?

11-13. ¿Kenke Jehová kineki ma tijchiuakaj kampeka tijpatlasej se keski tlamantli ipan tonemilis?

¹¹ Kema timoiljuiaj ipan nochi tlen onka ipan  iluikaktli, tikitaj Jehová nelia tlauel kipia miak chikaualistli. Ya kichijchijki Tonati, uan sejse segundo Tonati tlauel totonia uan tlauel tlauia. Maske san se kentsi tlen nochi nopa tlauili asi ipan Tlaltipaktli, kichiua ma onka nemilistli (Sal. 74:16; Is. 40:26). Jehová nojkia kinmaka itekipanojkauaj chikaualistli kema moneki (Is. 40:29). Jehová ueliskia techmakas chikaualistli uan kiampa nima tijpatlasej se keski tlamantli ipan tonemilis, kiampa amo ouij tijpatlasej nopa tlamantli uan ayokmo tijnekisej tijchiuasej. Uajka, ¿kenke Jehová amo kichiua nopa?

¹² Jehová kikaua tojuantij ma tijtlapejpenikaj tlake tijchiuasej. Tlaj tijnekij tijneltokasej o amo. Kema tijneltokaj uan tijchiuaj kampeka tijchiuasej tlen ya kipaktia, tijnextiaj tlauel tikikneliaj uan tijnekij tijyolpakiltisej. Satanás kiijtok Jehová amo kinamiki tlanauatis, yeka kema tijneltokaj Jehová, tijnextiaj tijnekij yaya ma eli toTlanauatijka. Tijmatij Jehová tlauel kipatiita nochi tlen tijchiuaj pampa tijnekij tijneltokasej (Job 2:3-5; Prov. 27:11). Kema tijchiuaj kampeka tijpatlasej se keski tlamantli ipan tonemilis maske tijmatij ouij, tijnextiaj amo tijnekij tijtlauelkauasej Jehová uan nojkia nelia tijnekij yaya ma technauati.

¹³ Jehová kineki ma tijchiuakaj kampeka ma tijnextikaj kuajkuali tlamantli ipan tonemilis (Col. 3:12; xijpoua 2 Pedro 1:5-7). Ya kineki ma tijchiuakaj kampeka amo timoiljuisej tlen amo kuali yon tijnekisej tijchiuasej (Rom. 8:5; 12:9). Nelia tlauel tiyolpakij uan kuali tijyolmatij kema tiuelij tijpatlaj se tlamantli ipan tonemilis.

14, 15. ¿Tlake moneki tijchiuasej tlaj tijnekij tijnextisej kuajkuali tlamantli ipan tonemilis? (Xikita nopa recuadro “ Biblia kinpaleuijtok ma kipatlakaj ininnemilis”).

¹⁴ ¿Tlake moneki tijchiuasej tlaj tijnekij tijnextisej kuajkuali tlamantli ipan tonemilis uan kiampa uelis tijyolpakiltisej Jehová? Amo kinamiki san tojuantij tikijtosej tlake tlamantli moneki tijpatlatiasej ipan tonemilis, moneki tijkauasej toTeotsij ma techyakana. Romanos 12:2 techiljuia: “Ayok xijchiuakaj keja ama kichiuaj tlakamej ipan ni Tlaltipaktli. Pero xijkauilikaj toTeko ma inmechyolpatla uan ma inmechchiua inyankuikej tlakamej pampa inkipatlatiauij inmotlalnamikilis ika tlen kuali. Uan keja nopa inkimatisej tlake ipakilis toTeko. Uan inkiitasej para inmechpaktis tlen yajaya kineki xijchiuakaj, uan kisas kuali uan yejyektsi uan tlen senkistok kinamiki para inmojuantij”. Jehová techpaleuia ika iTlajtol uan ika itonal ma tijmatikaj tlake kineki ma tijchiuakaj. Yeka, moneki mojmostla tijpouasej Biblia, kuali timoyoliljuisej ipan tlen tijpouaj uan tijtlajtlanisej Jehová ma techmaka itonal (Luc. 11:13; Gál. 5:22, 23). Tlaj tijkauaj Jehová ma techyakana ika itonal uan kuali timomachtiaj Biblia, uelis timoiljuisej kej ya moiljuia. Kiampa kipaktis tlen timoiljuisej, tlen tikijtosej uan tlen tijchiuasej.  Maske kiampa tijchiuasej, moneki nojua timomokuitlauisej uan amo tijchiuasej tlen timomajtokej tijchiuaj o tlen techyoltilana (Prov. 4:23).

¹⁵ Amo san moneki tijpouasej Biblia, nojkia moneki timomachtisej sekinok amatlajkuiloli, kej pilamochtsi Tlen Tematiltia uan ¡Despertad! Miak tlamachtili tlen nopaya uala technextilia kenijkatsa uelis tijnextisej nopa kuajkuali tlamantli tlen Jehová kinextia uan kenijkatsa uelis tijpatlasej se keski tlamantli. Uelis tijpantisej se keski tlamachtili o textos tlen tlauel techpaleuis. Nochi nopa tlamachtili o textos uelis tijsentilisej uan tikajoktiasej, uan tikompauisej kema monekis.

16. ¿Tlake moneki tijchiuasej tlaj tikitaj nojua techpoloua tijpatlasej miak tlamantli ipan tonemilis?

¹⁶ Amo nima tiuelij tijnextiaj kuajkuali tlamantli ipan tonemilis. Yeka, tlaj tikitaj nojua techpoloua tijpatlasej miak tlamantli ipan tonemilis, moneki tijpiasej toyolo uan nojua tijchiuasej kampeka tijchiuasej tlen Biblia kiijtoua. Teipa, uelis timoiljuisej kej Jehová moiljuia uan tijchiuasej tlen kipaktia. Kiampa ayokmo ouij tijmatisej timonejnemiltisej kej Jehová kineki (Sal. 37:31; Prov. 23:12; Gál. 5:16, 17).

17. ¿Kenijkatsa tiitstosej teipa tlaj nochipa tijtekipanosej Jehová?

¹⁷ Tijchiaj ika miak pakilistli nopa tonali kema ayokmo tielisej titlajtlakolejkej uan uelis nochipa tijtekipanosej Jehová. Ipan nopa tonali ayokmo monekis tijpatlasej tonemilis uan ayokmo ouij tijnextisej nopa kuajkuali tlamantli tlen Jehová kinextia. Maske nojua titlajtlakolejkej, uelis tijueyichiuasej Jehová. Ni tiuelij tijchiuaj pampa Jesús motemaktilik. Uajka uelis tijyolpakiltisej Jehová tlaj nochipa tijchiuaj tlen Biblia kiijtoua.

18, 19. ¿Kenijkatsa tlen kipanok Kevin kinextia Biblia uelis techpaleuis tijpatlasej se keski tlamantli ipan tonemilis?

¹⁸ Kevin, katli tikijtojkej kampa peua ni tlamachtili, kichijki kampeka ayokmo mosisinis. Moyoliljuik ipan tlen Biblia tetlajtolmaka uan kichijki tlen kiyekouayaya. Nojkia kiniljuik sekinok toikniuaj ma kipaleuikaj. Maske miak xiuitl kichijki kampeka ayokmo mosisinis, teipa ayokmo mosisinik uan pejki tlatekipanoua kej tlapaleuijketl. Uan ya kipia 20 xiuitl tlatekipanojtok kej ueuejtlakatl. Maske ya panotok miak xiuitl, nojua kichiua kampeka amo mosisinis.

¹⁹ Kej Kevin, tojuantij nojkia uelis tijpatlasej se keski tlamantli ipan tonemilis. Tlaj kiampa tijchiuasej, nojua tlauel kuali timouikasej iuaya Jehová (Sal. 25:14). Kema tojuantij tijchiuaj kampeka tijchiuasej tlen Jehová kipaktia, ya techpaleuis uan techteochiuas. Kiampa tikitasej kenijkatsa Biblia techpaleuijtias nojua ma tijpatlakaj se keski tlamantli tlen nojua techpoloua tijpatlasej ipan tonemilis (Sal. 34:8).