1. ¿Tlake tlanauatili techmakatok Jehová, uan kenijkatsa techpaleuia?

JEHOVÁ techmakatok tlanauatili ipan Biblia kampa techiljuia tlake kineki ma tijchiuakaj. Se keski tlen nopa tlanauatili kiijtoua amo ma tijchiuakaj tlen ueli tlamantli iuaya se akajya katli amo tosiua o toueue, amo ma titlachtekikaj, amo ma tikinueyichiuakaj tlaixkopinkayomej o sekinok tlamantli uan amo ma timoiuintikaj (1 Cor. 6:9, 10). Jesús nojkia kinmakak itokilijkauaj se tlanauatili: “Xiakaj, uan xijchiuakaj ma elikaj notokilijkauaj maseualmej tlen nochi altepemej, xikinatsonpoliuiltikaj ika noTata itoka uan ika notoka uan ika noTata itonal, xikinmachtikaj ma kineltokakaj nochi tlen niinmechnauatijtok uan, ¡xikitakaj!, mojmostla niitstos inmouaya uan nojkia kema tlamis nochi tlamantli tlen amo kuali” (Mat. 28:19, 20, TNM). Nopa tlanauatili tlen Jehová uan Jesús techmakatokej techpaleuia kuali ma tiitstokaj, ma tiyolpakikaj uan amo ma tijpiakaj kokolistli, uan nojkia kinpaleuia tochampoyouaj. Uan kema tijneltokaj nochi tlen Jehová technauatia, kuali tiitstokej iixpa uan tlauel techteochiua.

2, 3. 1) ¿Kenke Biblia amo kipia tlanauatili tlen techiljuia nochi tlen moneki tijchiuasej? 2) ¿Tlake tlajtlanili tijnankilisej ipan ni tlamachtili? (Xikita nopa achtoui tlaixkopinkayotl).

² Biblia amo kipia tlanauatili tlen techiljuia nochi tlen moneki tijchiuasej  ipan tonemilis. Amo kiijtoua tlake kinamiki timokentisej uan tlake amo. Ni kinextia Jehová tlauel tlalnamiki, pampa ipan nochi Tlaltipaktli miakej maseualmej amo momajtokej kichiuaj sanse tlamantli uan amo sanse moyoyontiaj. Uan maske maseualmej nochipa kipatlatiauij kej moyoyontiaj, tlen Biblia tetlajtolmaka amo kema mopatla. Nojkia, Biblia amo kipia tlanauatili tlen techiljuia ika tlake kinamiki timopajtisej, ipan tlake uelis titekitisej o ika tlake uelis timoyolpakiltisej. Jehová kikaua toselti ma tijtlapejpenikaj tlake tijchiuasej, uan tlaj se tlakatl mosiuajtijtok, uajka kinamiki ya kitlapejpenis tlake kichiuasej ichampoyouaj.

³ ¿Tlake kinamiki tijchiuasej kema monekis tijtlapejpenisej tijchiuasej se tlenijki uan ipan Biblia amo uala yon se tlanauatili? Kualtiaskia ma timotlajtlanikaj: “¿Kenijkatsa kiitas Jehová tlen nijtlapejpenis nijchiuas? ¿Uelis nijchiuas tlen na nijnekis tlaj amo kiixpano yon se tlanauatili? ¿Kenijkatsa uelis nijmatis tlaj Jehová kipaktis tlen nijchiuas?”. Ni tlajtlanili tijnankilisej ipan ni tlamachtili.

4, 5. ¿Kenke moneki kuali tijtlapejpenisej tlen tijchiuasej?

⁴ Maske miakej maseualmej moiljuiaj uelis kichiuasej tlen inijuantij kinekisej, tojuantij amo kiampa timoiljuiaj pampa tijnekij tijyolpakiltisej Jehová. Yeka, kema tijnekisej tijtlapejpenisej tijchiuasej se tlenijki, moneki timoiljuisej tlake kiijtoua Biblia uan teipa tijchiuasej tlen techtlajtolmaka. Ximoiljui ipan nopa estli. Biblia kiijtoua kenijkatsa kiita Jehová, uan tojuantij tijnekij tijchiuasej tlen ya technauatijtok (Gén. 9:4; Hech. 15:28, 29). Moneki timomaijtosej uan tikiljuisej Jehová ma techpaleui tijchiuasej tlen ya kipaktia.

⁵ Tlen tijtlapejpenisej tijchiuasej uelis techpaleuis o amo. Tlaj kuali tijtlapejpeniaj tlen tijchiuasej, techpaleuis kuali ma timouikakaj iuaya Jehová. Uan tlaj amo kuali tijtlapejpeniaj tlen tijchiuasej, uajka ayokmo kuali timouikasej iuaya. Tlen tijtlapejpenisej tijchiuasej nojkia uelis kinyolkokos sekinok o kichiuas ayokmo kuali ma tlaneltokakaj. Amo tijnekiskiaj tijchiuasej nopa yon tijchiuasej ayokmo kuali ma itstokaj toikniuaj ipan tlanechikoli. Yeka, tlauel moneki kuali tijtlapejpenisej tlen tijchiuasej (xijpoua Romanos 14:19; Gálatas 6:7).

6. ¿Tlake kinamiki tijchiuasej tlaj ipan Biblia amo uala yon se tlanauatili?

⁶ Tlaj ipan Biblia amo uala yon se tlanauatili kampa techiljuia kenijkatsa kinamiki tijchiuasej se tlenijki, ¿tlake uelis tijchiuasej? Amo kinamiki tijchiuasej san tlen tojuantij tijnekij, achtoui moneki kuali timoyoliljuisej kenijkatsa kiita Jehová uan ma tijtlapejpenikaj tlen kipaktia. Kiampa Jehová kiteochiuas tlen tijtlapejpenisej tijchiuasej (xijpoua Salmo 37:5).

7. ¿Kenijkatsa uelis tijmatisej tlake kineki Jehová ma tijchiuakaj?

⁷ ¿Kenijkatsa uelis tijmatisej tlake kipaktia Jehová? Efesios 5:17 kiijtoua: “Ximotlalnamiktikaj uan xijchiuakaj kampeka [...] inkimachilisej tlen toTeko kineki”. Uajka, tlaj ipan Biblia amo eltok se tlanauatili tlen kiijtoua kenijkatsa kinamiki tijchiuasej se tlenijki, moneki ‘tijchiuasej kampeka tijmachilisej’ o timoiljuisej tlake kineki toTeotsij ma tijchiuakaj. ¿Kenijkatsa uelis tijchiuasej ni? Moneki timomaijtosej uan tikiljuisej ma techyakana ika itonal.

8. ¿Kenijkatsa kinextik Jesús moyoliljuiyaya tlake kinekiyaya Jehová ma kichiua?

⁸ Jesús nochipa moyoliljuiyaya tlake kinekiyaya Jehová ma kichiua. Se tonali, kema Jesús kiitak maseualmej mayantoyaj, achtoui momaijtok uan teipa kintlamakak. Ipan seyok tonali nojkia kintlamak tlauel miakej (Mat. 14:17-20; 15:34-37). Maske ompa kiampa kichijki, kema ya mayanki uan Diablo kiiljuik ma kikuepa pantsi se  keski tetl, ya amo kinejki kichiuas nopa (xijpoua Mateo 4:2-4). ¿Kenke amo kinejki kichiuas? Jesús kuali kiixmatiyaya iTata, uan kimajtoya ya amo kuali kiitaskia tlaj kitekiuiskia itonal san pampa kinekiyaya mopaleuis. Kimajtoya Jehová kiyakanaskia uan kitlamakaskia.

9, 10. Xikixtoma ika se neskayotl tlake techpaleuis kuali ma tijtlapejpenikaj tlen tijchiuasej.

⁹ Tlaj tijchiuaj kej Jesús uan tijkauaj Jehová ma techyakana, kuali tijtlapejpenisej tlen tijchiuasej. Biblia kiijtoua: “Ximotemachi ipan toTeko ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak. Amo ximoueyimati pampa timoiljuia nelia titlalnamiki. Más kuali xikimakasi uan xijtlepanita toTeko uan ximoiyokatlali ika nochi tlen axkuali” (Prov. 3:5-7). Kema timomachtisej Biblia uan tijyekosej kenijkatsa moiljuia Jehová, tijmatisej tlake kineki Jehová ma tijchiuakaj. Uan tlaj nojua kuali tikixmatisej, nochipa tijtlapejpenisej tijchiuasej tlen kipaktia uan tijkauasej nochipa ma techyakana (Ezeq. 11:19).

¹⁰ Ximoiljui se siuatl tlakojtinemi, uan kineki mokouis zapatos tlen tlauel kiixtokak. Maske iueue amo itstok iuaya, ya kimati amo kipaktis tlaj kikouas nopa zapatos pampa tlauel patiyo. ¿Kenke kimati nopa? Pampa kipia se keski xiuitl itstokej sansejko, yeka kuali kiixmati uan kimati kenijkatsa kineki ma kitekiuikaj inintomij. Tojuantij nojkia, tlaj kuali tikixmatisej Jehová uan tijmatisej kenijkatsa kiita se tlamantli, techpaleuis nochipa kuali ma tijtlapejpenikaj tlen tijchiuasej.

11. ¿Tlake uelis timotlajtlanisej kema tijpouasej o timomachtisej Biblia? (Xikita nopa recuadro “ Kema timomachtis Biblia, ximotlajtlani”).

¹¹ ¿Kenijkatsa uelis tijmatisej tlake moiljuia Jehová? Uelis tijmatisej tlaj nochipa tijpouasej  uan timomachtisej Biblia. Yeka kema tijpouasej o timomachtisej, ma timotlajtlanikaj: “¿Tlake nechmachtia tlen Jehová? ¿Kenke kichijki tlen nikaj kiijtoua?”. Kej David, ma tikiljuikaj Jehová ma techpaleui kuali tikixmatisej. David kiijtok: “ToTeko, xinechnextili moojui. Kena, xinechnextili nopa pilojtsi kampa tijneki ma ninejnemi. Xinechyakana ipan moojui tlen xitlauak uan xinechmachti, pampa ta tinoTeko Dios uan tinotemakixtijka. Mopan ta nimotemachia ipan tlen ueli hora” (Sal. 25:4, 5). Kema tijyekosej se tlamantli tlen Jehová, ma timoiljuikaj kema uelis techpaleuis tlen tijyekojkej. Uelis timotlajtlanisej: “¿Kenijkatsa uelis nechpaleuis tlen nijyekok ika nochampoyouaj, ipan noteki, kampa nimomachtia o kampa nitlajtolmoyaua?”.

12. ¿Kenijkatsa techpaleuia amatlajkuiloli uan tlanechikoli?

¹² ¿Tlake sekinok tlamantli techpaleuis ma tijmatikaj tlake moiljuia Jehová? Moneki kuali tikitasej tlake techmachtia itlanechikol. Nopa Índice de las publicaciones Watch Tower uan nopa Guía de estudio para los testigos de Jehová uelis techpaleuis ma tijmatikaj tlake moiljuia Jehová. Tlen timomachtiaj ipan tlanechikoli nojkia techpaleuia. Tlaj kuali tijtlakakiliaj nopa tlamachtili, titlanankiliaj uan timoyoliljuiaj ipan nopa tlamachtili tlen nopaya moixtoma, techpaleuis ma tijtlapejpenikaj tijchiuasej tlen Jehová kipaktia uan ya techteochiuas.

13. Xikijto ika se neskayotl kenke techpaleuia kuali ma tijtlapejpenikaj tlen tijchiuasej kema kuali tikixmatij Jehová.

¹³ Tlaj tijmatij tlake moiljuia Jehová uan timoyoliljuiaj kenijkatsa kiita se tlamantli, techpaleuia kuali ma tijtlapejpenikaj tlen tijchiuasej. Ximoiljui tijneki timochiuas tiprecursor. Maske tijkajtok se keski tlamantli pampa tijneki nojua tlauel titlajtolmoyauas, uelis timoiljuia tlaj nelia tiuelis kiampa titlatekipanos maske amo tijpias miak tomij o sekinok tlamantli. Ta tijmati Biblia amo kiijtoua moneki timochiuasej tiprecursores tlaj tijnekij tijtekipanosej Jehová, uelis tijtekipanosej maske amo timochiuasej tiprecursores. Maske tijmajtok nopa, nojkia tijmati Jesús kiijtok Jehová kinteochiua katli kikauaj se keski tlamantli pampa kinekij nojua tlauel kitekipanosej (xijpoua Lucas 18:29, 30). Biblia nojkia kiijtoua Jehová kipaktia kema tijchiuaj miak tlamantli pampa tijnekij tijueyichiuasej, ya kineki ma tijtekipanokaj ika pakilistli (Sal. 119:108; 2 Cor. 9:7). Tlaj timomaijtouaj uan kuali timoyoliljuiaj ipan ni tlamantli, uelis kuali tijtlapejpenisej tlen tijchiuasej uan Jehová techteochiuas.

14. ¿Tlake techpaleuis tijmatisej kenijkatsa kiita Jehová kej timoyoyontiaj?

¹⁴ ¿Kema nojkia techpaleuis kuali tijtlapejpenisej tlen tijchiuasej tlaj kuali tikixmatij Jehová? Ximoiljui sekij toikniuaj amo kuali kiitaj kej ta mitspaktia timoyoyontis. Maske ta tijmati amo kiixpano tlen Biblia kiijtoua tlaj kiampa timoyoyontis, ¿tlake mitspaleuis tijmatis kenijkatsa kiita Jehová? Biblia kiijtoua: “Nijneki siuamej ma moyoyontikaj uan [ma] moyektlali[kaj] keja kinamiki para sekinok ma kintlepanitakaj. Ma axuejkauakaj para mokualtlalisej ika miak oro, uan perlas, uan yoyomitl tlen tlauel patiyo para [maseualmej] ma kintlachilikaj. Achi kuali ma kinitakaj siuatlaneltokanij para yejyektsitsij pampa kichiuaj miak tlamantli tlen kuali keja kinamiki siuamej tlen kineltokaj toTeko” (1 Tim. 2:9, 10). Tlen kiijtoua ni texto nojkia kinpaleuia tlakamej. Tlaj amo timoueyimatij uan titeikneliaj, kema tijtlapejpenisej tlake timokentisej, timoiljuisej kenijkatsa kiitasej sekinok, pampa amo tijnekij tikinyolkokosej (1 Cor. 10:23, 24; Filip. 3:17). Tlaj timoyoliljuiaj ipan tlen Biblia kiijtoua uan ipan tlen Jehová moiljuia, tlen tijtlapejpenisej kiyolpakiltis.

15, 16. 1) ¿Kenijkatsa kiyolmati Jehová kema timoiljuiaj ipan tlen amo kuali? 2) ¿Kenijkatsa tijmatisej tlaj Jehová kipaktia tlen ika timoyolpakiltiaj? 3) ¿Tlake uelis tijchiuasej tlaj monekis tijtlapejpenisej tijchiuasej se tlenijki tlen tlauel ipati?

¹⁵ ¿Tlake techpaleuis tijmatisej kenijkatsa kiita  Jehová tlen timoiljuiaj? Biblia kiijtoua Jehová tlauel mokuesoua uan kiyolkokoua kema kiita maseualmej moiljuiaj uan kichiuaj tlamantli tlen amo kuali (xijpoua Génesis 6:5, 6). Jehová amo kineki ipan totlalnamikilis ma timoiljuikaj tijchiuaj tlamantli tlen amo kuali iuaya se akajya. Tlaj timoiljuiaj ipan nopa tlamantli, teipa uelis titlajtlakolchiuasej. Yeka Jehová kineki ma timoiljuikaj ipan tlamantli tlen kuali uan tlen amo sokiyo. Santiago kiijkuilok: “Tlakamej tlen kipiaj nopa tlalnamikilistli tlen toTeko temaka, kichiuaj tlen senkistok kuali. Tlayoltlaliaj uan teikneliaj. Kipiaj ininyolo. Tetlasojtlaj uan techiuiliaj tlen kuali. Tlen kipiaj itlalnamikilis toTeko, axkinchikoikneliaj tlakamej, niyon axkipiaj ome [inin]ixayak” (Sant. 3:17). Kej nikaj kiijtoua, amo kinamiki timoyolpakiltisej ika tlamantli tlen uelis kichiuas ma timoiljuikaj o ma tijnekikaj tijchiuasej tlamantli tlen amo kuali. Tlaj kuali tijmatij tlake kipaktia Jehová uan tlake amo kipaktia, amo monekis tikintlajtlanilijtinemisej toikniuaj tlake amochtli tijpouasej, tlake películas tikitasej o ika tlake uelis ika timauiltisej. Toselti tijmatisej tlake amo kinamiki tijchiuasej.

¹⁶ Kema tijtlapejpenisej tijchiuasej se tlenijki, onka miak tlamantli tlen uelis tijtlapejpenisej tijchiuasej uan amo kiixpanos tlen Jehová kiijtoua. ¿Tlake uelis tijchiuasej tlaj monekis tijtlapejpenisej tijchiuasej se tlenijki tlen tlauel ipati? Uajka kualtiaskia tikiljuisej se ueuejtlakatl ma techpaleui o se toikni katli kuali tlaneltoka (Tito 2:3-5; Sant. 5:13-15). Kema tikiljuisej se toikni ma techpaleui, amo kinamiki tikiljuisej yaya ma techiljui tlake moneki tijchiuasej. Apóstol Pablo kiijtok: “Sejse tojuantij tijpiaj toteki para tijmokuitlauisej tlen tojuantij tonemilis” (Gál. 6:5). Yeka, moneki timoyoliljuisej ipan tlen timomachtijtokej ipan Biblia uan teipa tojuantij tijtlapejpenisej tlake tijchiuasej (Heb. 5:14).

17. ¿Kenijkatsa techpaleuia kema tijtlapejpeniaj tijchiuasej tlen Jehová kipaktia?

¹⁷ Kema tijtlapejpeniaj tijchiuasej tlen Jehová kipaktia, techpaleuia nojua kuali ma timouikakaj iuaya, uan ya techteochiua pampa kuali tiitstokej iixpa (Sant. 4:8). Nojkia techpaleuia kuali ma titlaneltokakaj. Yeka, kuali ma timoyoliljuikaj ipan tlen Biblia tlamachtia, kiampa uelis tijmatisej tlake moiljuia Jehová. Maske tijchiuasej nopa, nochipa tijyekojtiasej miak tlamantli tlen toTeotsij (Job 26:14). Tlaj tijchiuasej kampeka nojua kuali tikixmatisej, techpaleuis ma tijpiakaj tlalnamikilistli uan uelis kuali tijtlapejpenisej tlen tijchiuasej (Prov. 2:1-5). Maske tlen maseualmej moiljuiaj uan tlen kinekij kichiuasej nochipa mopatla, Jehová amo kema mopatla. Yeka, se toTeotsij itekipanojka kiijkuilok: “Tlen toTeko moiljuijtok kichiuas axkema mopatlas. Tlen ya kineki, ya nopa elis para nochipa” (Sal. 33:11). Uajka, uelis kuali tijtlapejpenisej tlen tijchiuasej uan tijchiuasej tlen Jehová kipaktia tlaj timoiljuisej kej ya moiljuia.