1, 2. 1) ¿Kenijkatsa tikitaj Biblia Jehová itlajtoltemakauaj? 2) ¿Tlake pilamochtsi tlen Biblia tlauel mitspaktia?

JEHOVÁ itlajtoltemakauaj tlauel tijpatiitaj Biblia, pampa kuali techyakana, techyolchikaua uan techiljuia tlen tijselisej teipa (Rom. 15:4). Tojuantij amo tikitaj Biblia kej maseualmej inintlalnamikilis, tikitaj “keja iTlajtol toTeko” (1 Tes. 2:13).

² Uelis ta tlauel mitspaktia se keski pilamochtsitsij tlen Biblia. Miakej kinpaktia kipouasej pilamochtsi Mateo, Marcos, Lucas uan Juan, pampa kiitaj kenijkatsa Jesús kinextik nopa kuajkuali tlamantli tlen Jehová kinextia (Juan 14:9). Sekij kinpaktia kipouasej pilamochtsitsij kampa kiijtoua tlen teipa panos, kej Apocalipsis (Revelación) (Apoc. 1:1). Uan sekij tlauel kinyolchikajtok tlen kiijtoua pilamochtsi Salmos, uan sekinok tlauel kinpaleuijtok tlen tetlajtolmaka Proverbios. Ni kinextia Biblia kinpaleuia maseualmej ipan nochi Tlaltipaktli.

3, 4. 1) ¿Kenijkatsa tikitaj amatlajkuiloli tlen tijpiaj? 2) ¿Tlake sekinok amatlajkuiloli tijpiaj?

³ Pampa tlauel tijpatiitaj Biblia, nojkia tijpatiitaj nochi amatlajkuiloli tlen mokixtijtok ipan Biblia. Jehová techmakatok miak amochtli, pilamochtsitsij uan sekinok amatlajkuiloli tlen techpaleuia  ma tijnechkauikaj uan kuali ‘ma tijneltokakaj toTeko’ (Tito 2:2).

⁴ Maske amatlajkuiloli tlen tijseliaj uelis kinpaleuis nochi Jehová itlajtoltemakauaj, nojkia kichiuaj amatlajkuiloli tlen san uelis kinpaleuis telpokamej o tetajmej. Nojkia, tlamachtili uan videos tlen eltok ipan jw.org uelis kinpaleuis katli amo elij Jehová itlajtoltemakauaj. Uejkajkia Jehová kiijtok techmakaskia “se ueyi tlakualistli”, ni nelia moaxitijtok pampa ipan ni tonali techmakatok miak amatlajkuiloli tlen tlauel techpaleuia (Is. 25:6).

5. ¿Tlake kipatiita Jehová?

⁵ Nochi tijnekiskiaj tijpiasej tonali uan kiampa kuali tijpouasej Biblia uan amatlajkuiloli. Maske amo nochipa kiampa tijchiuaj, Jehová tlauel kipatiita kema ‘amo timotonalpolouaj’ uan tijchiuaj kampeka nochipa tijpouasej uan timomachtisej Biblia uan amatlajkuiloli (Efes. 5:15, 16). Maske kiampa tijchiuaj, ¿tlake uelis techpanos?

6. ¿Tlake panoskia tlaj timoiljuiskiaj se keski tlamachtili tlen uala ipan amatlajkuiloli amo techpaleuis tojuantij?

⁶ Kemantika uelis timoiljuisej se keski tlamachtili tlen uala ipan Biblia uan amatlajkuiloli amo tlauel techpaleuis. ¿Tlake tijchiuasej tlaj timoiljuisej se tlapoualistli tlen Biblia o se amatlajkuiloli amo techpaleuis? ¿Amo tijpouaskiaj san pampa timoiljuiaj kinpaleuia sekinok? ¿San se kentsi tijpouaskiaj? Tlaj kiampa timoiljuiskiaj, nochi nopa kuali tlamachtili amo techpaleuiskia. ¿Tlake moneki tijchiuasej tlaj amo tijnekij kiampa timoiljuisej? Moneki tikilnamikisej nochi nopa tlamachtili tlen uala ipan amatlajkuiloli, Jehová techmakatok. Biblia kiijtoua: “Na [...] niinmoTeko tlen niinmechmachtia para inkimatisej tlen kuali para inkichiuasej” (Is. 48:17). Ipan ni tlamachtili tikitasej eyi tlamantli tlen techpaleuis kema tijpouasej o timomachtisej Biblia uan sekinok amatlajkuiloli.

7. ¿Kenke kema tijpouasej Biblia kinamiki timoiljuisej uelis techpaleuis nochi tlen kiijtoua?

⁷ Ma timoiljuikaj uelis techpaleuis tlen tijpouasej. Maske tijmatij ipan Biblia se keski tlapoualistli san kiijkuiljuilikej se akajya o san se keskij maseualmej, Biblia kiijtoua “toTeko temakak nochi nopa tlatsejtseloltik Tlajkuiloli” uan tlauel techpaleuia (2 Tim. 3:16). Yeka, kema tijpouasej Biblia kinamiki timoiljuisej uelis techpaleuis tlen tijpouasej. Se toikni kiijtoua kema kipoua Biblia nochipa kiilnamiki se tlapoualistli uelis techmachtis miak tlamantli, kiampa kipantia miak tlamachtili tlen uelis kipaleuis. Uajka, kema tijpouasej Biblia tlauel techpaleuis tlaj achtoui timomaijtosej uan tikiljuisej Jehová ma techmaka tlalnamikilistli, kiampa tikitasej tlake kineki techmachtis (Esd. 7:10; xijpoua Santiago 1:5).

8, 9. 1) ¿Tlake uelis timotlajtlanisej kema tijpouasej Biblia? 2) ¿Tlake techmachtia tlen Jehová kineki ma kichiuakaj ueuejtlakamej?

⁸ Ma timotlajtlanijtiakaj. Kema tijpouasej Biblia, uelis tijpouasej se kentsi uan teipa timotlajtlanisej: “¿Tlake nechmachtia tlen Jehová? ¿Kenijkatsa uelis nechpaleuis ipan nonemilis? ¿Kenijkatsa nijtekiuis tlen nijpojki uan kiampa nikinpaleuis sekinok?”. Tlaj timoyoliljuisej ipan ni tlajtlanili, techpaleuis tikitasej kenijkatsa tijtekiuisej tlen timomachtijkej. Ximoiljui ipan tlen Biblia kiijtoua moneki kichiuas se tlakatl tlen kineki tlatekipanos kej ueuejtlakatl ipan tlanechikoli (xijpoua 1 Timoteo 3:2-7). Miakej amo tiueuejtlakamej, yeka uelis timoiljuisej amo techpaleuis tlen nopaya kiijtoua. Maske kiampa timoiljuiskiaj, uelis tikitasej kenijkatsa tlauel techpaleuis tlaj timochiuilisej nopa eyi tlajtlanili tlen tikitakej.

⁹ “¿Tlake nechmachtia tlen Jehová?”. Tlen Jehová kineki ma kichiuakaj ueuejtlakamej kinextia kineki ma monejnemiltikaj kej ya tlanauatia. Ni  techmachtia Jehová tlauel kinpatiita nochi itekipanojkauaj, pampa Biblia kiijtoua “yajaya kinkojki para ma elikaj iaxkauaj kema [iKone] kitoyajki ieso ininpampa” (Hech. 20:28). Yeka, Jehová kineki ueuejtlakamej kuali ma monejnemiltikaj, kiampa toikniuaj kichiuasej kej inijuantij. Jehová kiijtojtok kintlajtolsenkauas tlaj kintlaijiyouiltisej toikniuaj uan tlaj amo kuali kinmokuitlauisej. Jehová kineki ma tijmajtokaj ueuejtlakamej nochipa techpaleuisej (Is. 32:1, 2). ¿Tlake techmachtia tlen Jehová? Tlen Jehová kineki ma kichiuakaj ueuejtlakamej kinextia tlauel techiknelia.

10, 11. 1) ¿Kenijkatsa techpaleuia kema timoyoliljuiaj ipan tlen toTeotsij kineki ma kichiuakaj ueuejtlakamej? 2) ¿Kenijkatsa uelis tikinpaleuisej sekinok tlaj tikinixtomiliaj tlen toTeotsij kineki ma kichiuakaj ueuejtlakamej?

¹⁰ “¿Kenijkatsa uelis nechpaleuis ipan nonemilis?”. Tlaj titlatekipanouaj kej ueuejtlakamej, moneki sampa ma timomachtikaj tlen toTeotsij kineki tijchiuakaj uan kiampa tikitasej tlake nojua techpoloua tijchiuasej. Uan tlaj tijnekiskiaj titlatekipanosej kej ueuejtlakamej, moneki tijchiuasej kampeka tijchiuasej tlen toTeotsij kineki ma kichiua se ueuejtlakatl (1 Tim. 3:1). Uan nochi katli tijtekipanouaj Jehová uelis tijyekosej miak tlamantli tlaj timoyoliljuiaj ipan tlen ya kineki ma kichiuakaj ueuejtlakamej. Jehová kineki nochi ma tikinchiuilikaj “tlen kuali aki ueli tlakatl” uan nochi ma ‘tijpiakaj kuali totlalnamikilis’ (Filip. 4:5; 1 Ped. 4:7). Kema ueuejtlakamej kichiuaj tlen toTeotsij kineki, toikniuaj uelis kichiuasej kej inijuantij uan kuali tlaneltokasej (1 Ped. 5:3; Heb. 13:7).

¹¹ “¿Kenijkatsa nijtekiuis tlen nijpojki uan kiampa nikinpaleuis sekinok?”. Tojuantij uelis tikinixtomilisej katli tikinmachtiaj ika Biblia uan sekinok maseualmej tlen toTeotsij kineki ma kichiuakaj ueuejtlakamej, kiampa inijuantij kiitasej ueuejtlakamej amo elij sanse kej katli tlayakanaj ipan sekinok religiones. Nojkia, kema timomachtiaj tlen toTeotsij kiniljuia ueuejtlakamej ma kichiuakaj, techilnamikilia inijuantij tlauel tekitij, uan nopa techpaleuia nojua ma tikintlepanitakaj (1 Tes. 5:12). Uan tlaj tijnextisej tikintlepanitaj, inijuantij nojua tlatekipanosej ika miak pakilistli (Heb. 13:17).

12, 13. 1) ¿Tlake uelis tijchiuasej kema timomachtisej? 2) Ika se neskayotl xikixtoma tlake uelis tijyekosej kema kuali timomachtiaj.

¹² Xijtemo sekinok tlamachtili. Kema timomachtiaj Biblia uelis tijtemosej tlamachtili tlen kinankilis ni tlajtlanili:

• ¿Ajkia kiijkuilok ni pilamochtsi?

• ¿Kanke uan kema kiijkuilojkej?

• ¿Tlake tlamantli tlen tlauel ipati panok kema kiijkuilojkej ni pilamochtsi?

Tlaj tijchiuaj kampeka tijnankilisej nopa tlajtlanili, uelis tijpantisej tlamachtili tlen amo tijkuamachilijtoskiaj tlaj amo kuali timomachtijtoskiaj.

¹³ Ma tikitakaj kenijkatsa uelis tijchiuasej. Ipan Ezequiel 14:13, 14, Jehová kiijtok tlaj ipan se altepetl tlajtlakolchiuaskiaj uan kiixpanoskiaj, ya kintsontlamiltiskia uan kinkixtiliskia inintlakualis maseualmej uan tlapialmej. Uan kiijtok: “Yonke itstoskiaj nopano Noé, Daniel uan Job, axkinmanauiskiaj nopa tlajtlakolchijkatlakamej. San momanauiskiaj yajuantij pampa itstokej xitlauakej noixpa”. Tlaj tijtemosej kema kiijkuilojkej ni versículos, tikitasej Ezequiel kiijkuilok kema poliuiyaya se 612 xiuitl ika ualaskia Jesús. Maske panotoya tlauel miak xiuitl ika miktoyaj Noé uan Job, Jehová nojua kiilnamikiyaya kenijkatsa kuali kitekipanojtoyaj. Daniel nojua itstoya uan uelis kipixtoya se 20 xiuitl kema Jehová kiiljuik monejnemiltiyaya xitlauak iixpa kej kichijtoya Noé uan Job. Ni techmachtia, Jehová tlauel kipatiita kema kiita itekipanojkauaj kuali kitekipanouaj uan amo kema kitlauelkauaj maske sekij nojua telpokamej (Sal. 148:12-14).

14. 1) ¿Kenijkatsa kinpaleuia telpokamej miak tlamachtili uan amochtli tlen Jehová kinmakatok? 2) ¿Kenijkatsa techpaleuia tojuantij? (Xikita nopa achtoui tlaixkopinkayotl).

¹⁴ Tlen kinpaleuia telpokamej uan ichpokamej. Kej tikitakej, nochi tlen eltok ipan Biblia uelis techpaleuis nochi tojuantij. Nopa amatlajkuiloli tlen tijpiaj nojkia uelis techpaleuis. Ma tikitakaj kenijkatsa techpaleuia. Ipan ni tonali, Jehová kinmakatok telpokamej miak tlamachtili uan amochtli tlen tlauel kinpaleuia ^[1] (xikita nopa nota kampa tlami ni tlamachtili). Nopa tlamachtili kinpaleuia ma kiixnamikikaj se keski kuesoli tlen kipiaj telpokamej o tlaouijkayotl tlen kipiaj kampa momachtiaj. Tlaj nopa tlamachtili uan amochtli kinpaleuia telpokamej, ¿kenijkatsa uelis techpaleuis tojuantij? Kema tijpouaj, tikitaj tlake kuesoli kipiaj telpokamej uan techpaleuia ma tijmatikaj kenijkatsa tikinpaleuisej uan tikinyolchikauasej.

15. ¿Kenke moneki tijpouasej nopa tlamachtili tlen kinpaleuia telpokamej maske ayokmo titelpokamej?

¹⁵ Toikniuaj katli motlantokej amo kinamiki moiljuisej nopa tlamachtili tlen kinpaleuia telpokamej ayokmo kinamiki kipouasej. Tlaj kiampa kichiuaskiaj, kinextiskiaj tlauel moueyimatij. Maske ayokmo titelpokamej, nojkia tijpiaj se keski tlaouijkayotl tlen inijuantij kipiaj, kej kema moneki tikiniljuisej sekinok tlen tijneltokaj, amo tijchiuasej tlen sekinok kinekij, amo timoyolpakiltisej ika tlen amo kuali, kuali tikintlapejpenisej touampoyouaj uan sekinok tlamantli. Nochi nopa tlamachtili mokixtijtok ipan Biblia, yeka nochi uelis techpaleuis.

16. ¿Kenijkatsa nojkia techpaleuia miak amatlajkuiloli?

¹⁶ Nopa amatlajkuiloli nojkia kinpaleuia telpokamej kuali ma mouikakaj iuaya Jehová (xijpoua Eclesiastés 12:1, 13). Katli ya motlantokej nojkia uelis kinpaleuis. Ipan pilamochtsi ¡Despertad! abril 2009, kiski se tlamachtili tlen motokaxtik “¿Cómo disfrutar la lectura de la Biblia?”. Nopa tlamachtili kiijtouayaya tlake ueliskia tijchiuasej kema tijpouasej Biblia uan kiualikayaya se recuadro tlen ueliskia titejtekisej uan teipa timomachtiskiaj. ¿Kinpaleuik ni tlamachtili katli ya motlantokej? Kena. Se siuatl kiijtok tlauel ouij kimatiyaya kipouas Biblia, yeka pejki kichiua tlen kiijtouayaya nopa tlamachtili. Nama tlauel kipaktia kipouas Biblia, uan kiita kenijkatsa nopa miak pilamochtsitsij kipia sanse tlamachtili. Ya kiijtoua: “Amo kema tlauel nechpaktijtoya nijpouas Biblia”.

17, 18. Maske miak tlamachtili kichijchijtokej pampa kinekij ma kinpaleui sekinok maseualmej, ¿kenijkatsa techpaleuia tojuantij?

 ¹⁷ Tlamachtili tlen kinpaleuia sekinok maseualmej. Ipan xiuitl 2008, pejki mochijchiua nopa pilamochtsi Tlen Tematiltia tlen ika timomachtiaj, ni pilamochtsi kinpaleuiskia Jehová itlajtoltemakauaj. Nojkia pejki mochijchiua pilamochtsitsij tlen kinpaleuiskia sekinok maseualmej. ¿Kenijkatsa uelis nojkia techpaleuis? Ma timoiljuikaj tijtlaneuij se maseuali ma yaui tlanechikoli, uan tlauel tiyolpakij pampa kineki yas. Kema moixtontos nopa tlamachtili, uelis timoiljuiaj kenijkatsa kiyolmati kema kitlakakilijtok nopa tlamachtili uan kenijkatsa uelis kipaleuis. Yeka, maske nopa tlamachtili moixtoma pampa kinekij ma kinpaleui sekinok maseualmej, tojuantij nojkia tlauel tijpatiitaj.

¹⁸ Kiampa pano kema tijpouaj amatlajkuiloli tlen kinpaleuia sekinok. Ma timoiljuikaj ipan nopa pilamochtsi Tlen Tematiltia tlen ika titlajtolmoyauaj uan ipan tlamachtili tlen eltok ipan jw.org. Nochi nopa tlamachtili amo ouij kinixtomilia maseualmej tlen Biblia kiijtoua. Kema tijpouaj, nojkia techpaleuia nojua kuali ma tijkuamachilikaj tlen Biblia tlamachtia maske ya tikixmatij nopa tlamachtili. Nopa techpaleuia nojua ma tijpatiitakaj tlen Biblia tlamachtia. Nojkia technextilia kenijkatsa uelis tikinixtomilisej maseualmej kema titlajtolmoyauasej. Uan pilamochtsi ¡Despertad! nojkia tlauel techpaleuia, pampa nopa tlamachtili tlen kipia kichiua nojua ma titlaneltokakaj ipan toTeotsij uan ma tijneltokakaj yaya kichijchijtok nochi tlen onka. Nojkia techpaleuia kuali ma tikinixtomilikaj sekinok tlen tijneltokaj (xijpoua 1 Pedro 3:15).

19. ¿Kenijkatsa tijnextilisej Jehová nelia tijtlaskamatiliaj pampa techmakatok tlauel miak tlamachtili?

¹⁹ Jehová techmakatok miak tlamachtili tlen tlauel techpaleuia (Mat. 5:3). Yeka, moneki nochipa tijpouasej nochi amatlajkuiloli uan tijchijtiasej tlen timomachtiaj. Tlaj kiampa tijchiuasej, kuali tiitstosej uan tijnextilisej Jehová nelia tijtlaskamatiliaj pampa techmakatok miak tlamachtili (Is. 48:17).