1, 2. 1) ¿Ipan ajkia inijuantij achtoui moaxitik tlen kiijtoua Mateo 24:12? 2) ¿Kenijkatsa kinextia pilamochtsi Hechos miakej Cristo itokilijkauaj kichijkej kampeka tlauel kiiknelisej toTeotsij? (Xikita nopa achtoui tlaixkopinkayotl).

KEMA Jesús itstoya ipan Tlaltipaktli, kiijtok tlake tlamantli panoskia kema nechka ‘tlamiskia ni tonali’. Kiijtok miakej maseualmej katli “kineltokaj toTeko ayok kiiknelisej keja achtoui” (Mat. 24:3, 12). Achtoui, ni tlajtoli moaxitik ipan judíos ipan achtoui siglo. Maske inijuantij kiijtouayayaj eliyayaj toTeotsij ialtepe, ayokmo kiikneliyayaj Jehová.

² Cristo itokilijkauaj katli nojkia itstoyaj ipan nopa tonali amo kiampa kichijkej. Inijuantij tlajtolmoyajkej uan kinmachtijkej maseualmej ika miak pakilistli ajkia eliyaya Cristo, uan kinextiyayaj kiikneliyayaj toTeotsij, kinikneliyayaj toikniuaj uan sekinok katli ayamo kiixmatiyayaj tlen melauak. Inijuantij nochipa kichijkej kampeka tlauel kiiknelisej Jehová (Hech. 2:44-47; 5:42). Se keskij Cristo itokilijkauaj teipa nojkia ayokmo kiiknelijkej toTeotsij. ¿Kenijkatsa tijmatij nopa?

3. ¿Kenke sekij Cristo itokilijkauaj uelis ayokmo tlaiknelijkej kej achtouia?

 ³ Jesús kiniljuik toikniuaj katli itstoyaj Éfeso: “Ayok innechikneliaj uan ayok inmoikneliaj keja achtouia” (Apoc. [Rev.] 2:4). Uelis ayokmo tlaiknelijkej pampa nojkia kichiuayayaj kej sekinok maseualmej uan san kinekiyayaj inijuantij moyolpakiltisej (Efes. 2:2, 3). Ipan altepetl Éfeso tlauel tlatominpiayayaj uan maseualmej san kintekipachouayaya kuali itstosej uan tlapijpiasej. Miakej momekatiyayaj uan amo kitlepanitayayaj toTeotsij itlanauatiljuaj. San kinekiyayaj moyolpakiltisej uan amo kiiknelisej toTeotsij yon kiniknelisej sekinok.

4. 1) ¿Kenke miakej maseualmej ayokmo kiikneliaj toTeotsij? 2) ¿Tlake eyi tlamantli tikixtomasej?

⁴ Tlen Jesús kiijtok nojkia pano ipan ni tonali. Miakej maseualmej ayokmo kiikneliaj toTeotsij. Kema kipiaj kuesoli amo kiiljuiaj toTeotsij ma kinpaleui uan motemachiaj ipan tlen se keskij maseualmej kichiuaj pampa moiljuiaj inijuantij uelis kinpaleuisej. Nopa kichiua ma kiilkajtiakaj toTeotsij uan ayokmo ma kiiknelikaj. Uan ni tlamantli nojkia uelis kinpanos toTeotsij itekipanojkauaj, kej kinpanok katli itstoyaj Éfeso. Yeka, ma tikitakaj kenijkatsa uelis nojua tlauel tikiknelisej Jehová, nojua tlauel tijpatiitasej tlen Biblia tlamachtia uan nojua tikiniknelisej toikniuaj.

5. ¿Kenke kinamiki tikiknelisej toTeotsij?

⁵ ¿San ajkia kinamiki tlauel tikiknelisej? Jesús kiijtok: “Nopa tlanauatili tlen kiijtok: ‘Xikikneli toTeko Dios ika nochi moyolo, uan ika nochi moalma, uan ika nochi motlalnamikilis’. Ya ni nopa tlanauatili tlen más ueyi uan tlen más moneki tijchiuasej” (Mat. 22:37, 38). Pampa tlauel tikikneliaj Jehová, techpaleuia ma tijneltokakaj itlanauatiljuaj, ma tikijiyouikaj kuesoli uan ma tijkualankaitakaj tlen amo kuali (xijpoua Salmo 97:10). Yeka, Satanás uan nochi katli kinnauatia kinekij ayokmo tlauel ma tikiknelikaj toTeotsij uan ma tijtlauelkauakaj.

6. ¿Tlake pano kema maseualmej ayokmo kiikneliaj toTeotsij?

⁶ Ipan ni tonali, maseualmej amo kikuamachiliaj tlake kiijtosneki tlaiknelili. Amo kiikneliaj toTeotsij pampa san inijuantij moikneliaj (2 Tim. 3:2). San mosentlaliaj kichiuasej tlen inintlajtlakolchijkanakayo kineki, san kinekij moaxkatisej nochi tlen kiitaj uan moueyimatij ika nochi tlamantli tlen kipiaj (1 Juan 2:16). Apóstol Pablo kiijtok tlake panoskia tlaj san timosentlaliskiaj timoyolpakiltisej. Ya kiijtok: “Intla timoseniljuiaj tlen totlajtlakolchijkanakayo kineki, tijpantisej mikistli”. ¿Kenke kiampa kiijtok? Pampa katli san mosentlaliaj moyolpakiltisej mochiuaj ikualankaitakauaj toTeotsij (Rom. 8:6, 7). Maseualmej katli san mosentlaliaj tlatominpiasej o san momekatisej, teipa tlauel moyolkokouaj (1 Cor. 6:18; 1 Tim. 6:9, 10).

7. ¿Tlake tlamantli uelis kichiuas tojuantij nojkia ayokmo ma tikiknelikaj Jehová?

⁷ Miakej ateos, agnósticos uan katli tlaneltokaj ipan evolución kinekij sekinok nojkia ma tlaneltokakaj ipan evolución uan amo ma kiiknelikaj toTeotsij o ma moiljuikaj ya amo nelia itstok. Kinekij ma moiljuikaj san tlaneltokaj ipan toTeotsij katli amo tlalnamikij o katli amo momachtijtokej. Uan sekij tlauel kintlepanitaj científicos uan amo Jehová, katli kichijchijtok nochi tlen onka (Rom. 1:25). Tlaj nojkia timoiljuisej  kej inijuantij, uelis kichiuas ayokmo kuali ma timouikakaj iuaya Jehová uan ayokmo tlauel tikiknelisej (Heb. 3:12).

8. 1) ¿Kenke Jehová itekipanojkauaj uelis motekipachosej? 2) ¿Kenijkatsa techyolchikaua Salmo 136?

⁸ Tiitstokej kampa Satanás tlanauatia, yeka uelis onka miak tlamantli tlen kichiua ma timotekipachokaj o ma timokuesokaj (1 Juan 5:19). Tlaj tlauel timotekipachosej uelis kichiuas ayokmo kuali ma titlaneltokakaj uan ayokmo tlauel tikiknelisej Jehová. Uelis tijpiaj kuesoli pampa amo tijpiaj tomij, timokokouaj o pampa ya tiueuentsitsij. O uelis timoyolkokouaj pampa amo tiuelij tijchiuaj se tlenijki kej tijnekiskiaj. O timokuesouaj pampa se keski tlamantli amo panotok kej timoiljuiyayaj. Maske tijpiasej miak kuesoli, amo kema ma timoiljuikaj Jehová techtlauelkajtok. Nochipa ma tikilnamikikaj tlen kiijtoua Salmo 136:23: “Yajaya tlen techilnamijki [...] kema ayok tijpiayayaj chikaualistli, pampa iteiknelijkayo axkema tlami”. Uelis timotemachisej Jehová techtlakakilis uan techpaleuis kema tikiljuisej ika nochi toyolo ma techpaleui (Sal. 116:1; 136:24-26).

9. ¿Tlake kipaleuik Pablo nochipa tlauel ma kiiknelijto toTeotsij?

⁹ Pablo nochipa kuali moyoliljuiyaya kenijkatsa Jehová kipaleuiyaya, uan nopa kipaleuik ma kiijiyoui nochi. Ya kiijtok: “ToTeko nechpaleuia. Axnijmakasis tlen tlakamej uelisej nechchiuilisej” (Heb. 13:6). Pampa motemachiyaya ipan Jehová, kipaleuik ma kiijiyoui nochi tlaouijkayotl. Maske kipanok miak tlaouijkayotl, nochipa motemachiyaya ipan Jehová. Uan kema kitsaktoyaj, tlauel kinyolchikajki toikniuaj ika se keski amatlajkuiloli tlen kintitlanilik (Efes. 4:1; Filip. 1:7; Filem. 1). Maske kiixnamijki miak kuesoli, nochipa kiiknelik Jehová ika nochi iyolo. Motemachik ipan toTeotsij katli “techyoltlalia ipan nochi nopa tlaouijkayotl katli techpanotiuala” (2 Cor. 1:3, 4, Icamanal Toteco). ¿Kenijkatsa uelis tijchiuasej kej Pablo?

10. ¿Tlake uelis tijchiuasej uan kiampa nojua tlauel tikiknelisej Jehová?

 ¹⁰ Pablo kiijtok se tlamantli tlen techpaleuis nojua tlauel ma tikiknelikaj Jehová: “Ximomaijtojtinemikaj ika toTeko ajachika”. Uan teipa kiijkuilok: “Ika nochi inmoyolo mojmostla ximomaijtokaj” (1 Tes. 5:17; Rom. 12:12). ¿Kenke kema timomaijtouaj techpaleuia kuali ma timouampojchiuakaj iuaya Jehová? Pampa kema timomaijtouaj timonojnotsaj iuaya Jehová (Sal. 86:3). Kema tikiljuiaj nochi tlen timoiljuiaj uan kenijkatsa tijyolmatij, techpaleuia nojua ma tijnechkauikaj (Sal. 65:2). Uan nojua tlauel tikikneliaj kema timomaijtouaj uan tikitaj kenijkatsa technankilia. Kiampa tikitaj nelia “toTeko itstok ininnechka nochi tlen kinotsaj” (Sal. 145:18). Tlaj timotemachisej Jehová nelia techpaleuia uan techiknelia, techpaleuis ma tikixnamikikaj nochi kuesoli tlen nama tijpiaj uan tlen teipa tijpiasej.

11, 12. ¿Tlake techpaleuis nojua ma tijpatiitakaj tlen Biblia tlamachtia?

¹¹ Cristo itokilijkauaj tlauel tijpatiitaj tlen melauak. Jesús kiiljuik iTata: “Motlajtol [...] nelia melauak” (Juan 17:17). Achtoui moneki tijmatisej tlake tlamachtia Biblia uan kiampa uelis tijpatiitasej (Col. 1:10). Nojkia moneki tijchiuasej seyok tlamantli. Katli kiijkuilok Salmo 119 techpaleuia ma tijkuamachilikaj tlake moneki tijchiuasej (xijpoua Salmo 119:97-100). Ipan se tonal, kinamiki timoyoliljuijtinemisej ipan tlen tijpouaj ipan Biblia. Tlaj timoyoliljuisej kenijkatsa techpaleuis tlaj tijchiuasej tlen Biblia tlamachtia, nojua tlauel tijpatiitasej.

¹² Katli kiijkuilok Salmo 119 nojkia kiijtok: “Motlajtol nelia kuali keja se tlatsopelkayotl. Achi más tsopelik nijmati que sayolnektli” (Sal. 119:103). Nochi nopa amatlajkuiloli tlen tijseliaj eli kejuak se ajuiyak tlakualistli. Kema tijkuaj se tlamantli tlen tlauel techpaktia, amo nima tijkuajtiuetsij. Nojkia kiampa moneki tijchiuasej kema timomachtiaj, moneki yolik uan kuali timomachtijtiasej. Tlaj kiampa tijchiuasej, tlauel techpaktis nopa “tlajtoli tlen yejyektsi” uan amo ouij tikilnamikisej tlen tijpouaj, uan nojkia uelis tikinpaleuisej sekinok ika tlen timomachtijkej (Ecl. 12:10).

13. ¿Tlake kipaleuik Jeremías ma kipatiita tlen toTeotsij kiiljuiyaya, uan tlake kichijki pampa kipatiitak?

¹³ Tlajtolpanextijketl Jeremías tlauel kipatiitayaya tlen toTeotsij kiiljuiyaya. Ya kiijtok: “Kema ta tinechkamauik, nijkajki motlajtol uan nijselik. Uan motlajtol nechmakak fuerza keja eliskia se tlakualistli para notonal. Tlauel nipaki pampa motlajtol nechmakak pakilistli ipan noyolo pampa na nimoaxka, ta titoTeko tlen tikinyakana moiluikaejkauaj ma tlatlanitij” (Jer. 15:16). Jeremías nochipa moyoliljuiyaya ipan tlen Jehová kiiljuiyaya, yeka tlauel kipatiitayaya kitekipanos uan tlajtolmoyauas. Tlaj tojuantij nojkia tlauel tijpatiitaj tlen Biblia tlamachtia, uajka nojkia tlauel tijpatiitasej tijtekipanosej Jehová uan tijmoyauasej nopa kuali tlamachtili tlen toTeotsij iTlanauatijkayo.

14. ¿Tlake nojua uelis tijchiuasej tlaj tijnekij nojua tlauel tijpatiitasej tlen melauak katli Biblia tlamachtia?

¹⁴ ¿Tlake sekinok tlamantli techpaleuis ma tijpatiitakaj tlen Biblia tlamachtia? Moneki nochipa tiasej ipan tlanechikoli, pampa nopaya Jehová techmachtia. Sejse chikueyi toTeotsij techmachtia ika pilamochtsi Tlen Tematiltia, kampa moixtoma tlen kiijtoua  Biblia. Tlaj tijnekij ma techpaleui nopa tlanechikoli, uajka achtoui moneki kuali timokualchijchiuasej. Uelis tijpouasej nochi textos tlen nopaya uala. Ipan ni tonali miakej toikniuaj uelis kipouasej o kikixtisej nopa pilamochtsi ipan ininteléfono o ipan sekinok tlamantli, pampa eltok ipan miak tlajtoli ipan jw.org uan ipan aplicación JW Library. Ipan sekij formatos uelis nima tijpantis nopa textos. Maske tojuantij tijtlapejpenisej kenijkatsa timomachtisej sejse tlamachtili, moneki kuali tijpouasej nochi textos uan timoiljuisej ipan tlen kiijtoua. Tlaj kiampa tijchiuasej, nojua tlauel tijpatiitasej tlen melauak katli Biblia tlamachtia (xijpoua Salmo 1:2).

15, 16. 1) ¿Tlake tlanauatili kiijtok Jesús ipan Juan 13:34, 35? 2) ¿Kenke tlaj tikikneliaj Jehová uan Biblia tijnextiaj nojkia tikinikneliaj toikniuaj?

¹⁵ Ipan nopa youali kema Jesús nechka kimiktiskiaj, kiniljuik itokilijkauaj: “Uajka niinmechmaka se yankuik tlanauatili para xijchiuakaj: Ximoiknelikaj se ika seyok keja na niinmechiknelia. Kena, keja nopa moneki ximoiknelikaj. Nochi tlakamej kimachilisej para nelia innomomachtijkauaj intla nelia inmoiknelisej” (Juan 13:34, 35).

¹⁶ Kema tikinikneliaj toikniuaj tijnextiaj nojkia tikikneliaj Jehová. Tlaj amo tikikneliaj toTeotsij, uajka amo uelis tikiniknelisej toikniuaj. Uan tlaj amo tikinikneliaj toikniuaj, nojkia amo uelis tikiknelisej toTeotsij. Apóstol Juan kiijtok: “Pampa aki axkiiknelia se iikni tlen kiitstok, axuelis kiiknelis toTeko tlen axkiitstok” (1 Juan 4:20). Uan kema tikikneliaj Jehová uan tikinikneliaj toikniuaj, nojkia tijnextiaj tikikneliaj Biblia, pampa tlaj tijpatiitaj tlen tijyekouaj nopaya, uajka tijneltokasej kema technauatia ma tikiknelikaj toTeotsij uan ma tikiniknelikaj toikniuaj (1 Ped. 1:22; 1 Juan 4:21).

17. ¿Kenijkatsa tijnextiaj tlauel tikinikneliaj toikniuaj?

¹⁷ (Xijpoua 1 Tesalonicenses 4:9, 10). ¿Kenijkatsa uelis tijnextisej tlauel tikinikneliaj toikniuaj katli itstokej ipan  totlanechikol? Se toikni katli ya ueyi uelis tijpaleuisej uan kiampa uelis yas tlanechikoli. O uelis se tosiuaikni katli ayokmo kipia iueue moneki ma tijkualchijchiuilikaj se tlenijki ipan ichaj (Sant. 1:27). Uan toikniuaj katli motekipachojtokej, katli moyolkokouaj miak tonali o kipiaj sekinok kuesoli, moneki ma tiitstokaj ininuaya uan ma tikinyolchikauakaj (Prov. 12:25; Col. 4:11). Ika tlen tikijtouaj uan tijchiuaj tijnextiaj tlauel tikinikneliaj “toikniuaj ipan Cristo” (Gál. 6:10).

18. ¿Tlake techpaleuis ma tijsenkauakaj kuesoli ininuaya tokniuaj?

¹⁸ Biblia kiijtok ipan “itlamia tonali” miakej maseualmej moueyimatiskiaj uan kinekiskiaj kichiuasej san tlen inijuantij kinekij (2 Tim. 3:1, 2). Yeka nochi Cristo itokilijkauaj moneki tijchiuasej kampeka nojua tlauel tikiknelijtiasej Jehová uan iTlajtol, uan tikiniknelisej toikniuaj. Nochi tojuantij titlajtlakolejkej uan yeka kemantika timokualanisej ininuaya toikniuaj. Maske kiampa panos, nopa tlaiknelili tlen kichiua ma tiitstokaj sansejko techyololinis nima ma tijsenkauaj se kuesoli (Efes. 4:32; Col. 3:14). ¡Amo kema ma tijkauakaj ma tlami nopa tlaiknelili tlen tijpiaj! Tijnekij nojua tlauel tikiknelijtiasej Jehová ika nochi toyolo, tikiknelisej o tijpatiitasej iTlajtol uan tikiniknelisej toikniuaj.