IPAN 1910, notatauaj kistejkej altepetl Tiflis (Georgia) uan mochantitoj nechka pilaltepetsi Pelly (Saskatchewan, Canadá). Nitlakatki ipan 1928, nikinpixki makuiltij noikniuaj uan na nieliyaya niteipaejketl. Notata mijki kema poliuiyaya chikuasej metstli ika nitlakatiskia, uan nonana mijki kema nieliyaya nipilkonetsi. Teipa noikni Lucy, katli eliyaya achtouiejketl, mijki kema kipixtoya 17 xiuitl. Yeka notío Nick techmokuitlauik.

Se tonali, nochampoyouaj kiitakej nijkuitlapilitskitoya se caballo. Na san nijpixtoya ome xiuitl. Tlauel momajmatijkej pampa moiljuiyayaj nechxopeuaskia, yeka chikauak nechtsajtsilijkej uan nechiljuijkej ma nimotlalkaui. Na amo nikinitayaya uan amo nikinkajki. Maske amo tleno nechpanok, ipan nopa tonali kiitakej na amo nitlakakiyaya.

Se touampo kiniljuik nochampoyouaj ma nechuikakaj ipan se escuela kampa kinmachtiyayaj konemej katli amo tlakakij. Yeka notío Nick nechuikak ipan se escuela kampa kinmachtiaj katli amo tlakakij ipan altepetl Saskatoon (Saskatchewan). Na tlauel nimajmauiyaya pampa nopa escuela uejka mokauayaya uan na san nijpiayaya makuili xiuitl. San nikinpaxalouayaya nochampoyouaj kema iljuichiuayayaj uan kema nijpiayaya vacaciones. Yolik nijyekojtiajki tlajtoli ika señas uan tlauel nechpaktiyaya nimauiltis ininuaya nopa sekinok konemej.

Ipan 1939, Marion katli eliyaya achtoui ejketl monamiktik iuaya Bill Danylchuck, uan inijuantij techmokuitlauijkej na uan nosiuaikni Frances. Inijuantij kipeualtijkej momachtiaj Biblia ininuaya Jehová itlajtoltemakauaj. Kema amo nimomachtiyaya ipan verano, kichiuayayaj kampeka nechmachtisej tlen inijuantij kiyekouayayaj ipan Biblia. Maske achi ouij kimatiyayaj pampa amo kitekiuiyayaj nopa tlajtoli ika señas, kiitakej tlauel nechpaktiyaya kema nechmachtiyayaj tlen Jehová. Nijmatki tlen kichiuayayaj ya nopa tlen tlamachtiyaya Biblia, yeka nijnejki nias nitlajtolmoyauati ininuaya. Teipa nijnejki nimoatsonpoliuiltis, uan ipan septiembre 5, 1941, Bill nechatsonpoliuiltik ipan se tambo tlachijchiuali ika tepostli. ¡Nopa atl nelia tlauel sesek eltoya!

Kema nitlakuepilik nochaj ipan 1946, tiajkej ipan se ueyi tlanechikolistli tlen mochijki ipan Cleveland (Ohio, Estados Unidos). Nopa achtoui tonali, nosiuaikniuaj kiijkuilojkej tlen moixtonki, kiampa na nojkia nijmatiskia tlen moixtomayaya. Ualmostla, nijmatki kiixtomayayaj ika señas nopa tlamachtili tlen mopanoltiyaya, yeka tlauel niyolpajki. Kiampa nijkuamachilik tlen moixtomayaya, uan nelia tlauel niyolpajki pampa nijkuamachilik tlen Biblia tlamachtia.

Ontlantoya nopa Ompa Ueyi Tlauilankayotl, uan maseualmej kinekiyayaj kinextisej tlauel kipatiitayayaj ininaltepe. Kema sampa nitlakuepilik ipan escuela, nimosentlalijtoya amo kema nikixpanos Jehová. Yeka ayokmo nijtlajpalok bandera, ayokmo niuikak hinmo nacional uan ayokmo niiljuichijki. Nojkia ayokmo niajki iglesia ika nopa konemej katli ininuaya nimomachtiyaya. Katli tekitiyayaj ipan escuela amo kinpaktik, yeka tlauel nechtetsopkej uan nechiljuijkej miak tlamantli tlen amo melauak pampa kinekiyayaj ayokmo ma nimomachti. Katli ininuaya nimomachtiyaya kiitakej tlen nechpanoyaya, yeka uelki nikiniljuik tlen na nijneltokayaya. Se keskij nojkia mochijkej Jehová itlajtoltemakauaj uan nojua kitekipanouaj Jehová, kej Larry Androsoff, Norman Dittrick uan Emil Schneider.

Kema niauiyaya ipan sekinok altepemej nochipa nijchiuayaya kampeka nikinnojnotsas katli nojkia amo tlakakiyayaj. Ipan se altepetl tlen itoka Montreal niajki kampa mosentiliyayaj nochi katli amo tlakakiyayaj. Nopaya nijnojnotski Eddie Tager, se telpokatl katli tlauel amo kuali monejnemiltiyaya. Eddie mijki se xiuijtlaya uan nochipa tlatekipanok ipan se tlanechikoli kampa motekiuia tlajtoli señas ipan Laval (Quebec). Nojkia nikixmatki se telpokatl katli itoka Juan Ardanez. Sanse kej kichijkej katli itstoyaj ipan Berea, Juan kuali momachtik tlen nikixtomiliyaya ika Biblia (Hech. 17:10, 11). Ya nojkia mochijki se tlen Jehová itlajtoltemakauaj uan nochipa tlatekipanok kej ueuejtlakatl ipan Ottawa (Ontario).

Ipan 1950, nimochantito Vancouver. Maske tlauel nechpaktiyaya nimonojnotsas ininuaya nochi katli nojkia amo tlakakiyayaj, amo kema nikilkauas tlen panok kema nikixmatki se siuatl katli nojkia amo tlakakiyaya. Motokaxtiyaya Chris Spicer. Kinejki sejse metstli ma tijuikilikaj se pilamochtsi uan nechiljuik kinekiyaya ma nikixmati iueue, katli motokaxtiyaya Gary. Niajki ichaj uan uejkajki timonojnotsaj, timotlajkuiljuiliyayaj ipan se amatl uan kiampa timonojnotsayayaj. Kema panok se keski xiuitl, sampa timopantijkej ipan se ueyi tlanechikolistli tlen mochijki  ipan Toronto (Ontario). ¡Tlauel niyolpajki kema nechtlajpalotoj! Ipan nopa tonali Gary moatsonpoliuiltiskia. Nopa tlamantli nechpaleuik ma nikita tlauel moneki nochipa titlajtolmoyauasej pampa amo tijmatij tlaj se akajya katli tijnojnotsaj teipa nojkia kitekipanos Jehová.

Teipa, sampa nitlakuepilik Saskatoon. Nopaya nikixmatki se siuatl katli kinpiayaya omej iichpokauaj katli nojkia amo tlakakiyayaj, motokaxtiyayaj Jean uan Joan Rothenberger. Inijuantij nojkia momachtiyayaj ipan nopa escuela kampa na nimomachtik, kampa kinmachtiyayaj katli amo tlakakij. Nima pejkej kiniljuiaj sekinok tlen momachtiyayaj ipan Biblia, uan makuiltij ichpokamej katli nojkia nopaya momachtiyayaj mochijkej Jehová itlajtoltemakauaj. Se tlen nopa ichpokamej motokaxtiyaya Eunice Colin. Nikixmatki Eunice kema na nechka nikisaskia escuela. Ipan nopa tonali kema nikixmatki, nechmakak se dulce uan nechtlajtlanik tlaj nijnekiyaya nielis niiuampo. Teipa, yaya elki se akajya katli tlauel nikiknelik pampa nimosiuajtik iuaya.

Kema inana kimatki momachtiyaya Biblia, kiiljuik nopa director tlen nopa escuela kampa momachtiyaya Eunice ma kiiljui ayokmo ma momachti Biblia. Maske nopa director kichijki tlen Eunice inana kiiljuik uan kikuilik nopa amatlajkuiloli tlen ika momachtiyaya, Eunice mosentlalijtoya amo kitlauelkauas Jehová. Kema kinejki moatsonpoliuiltis, itatauaj kiiljuijkej: “Tlaj tijneki tielis se tlen Jehová itlajtoltemakauaj, uajka ayokmo uelis tiitstos tochaj”. Yeka, kema Eunice kipiayaya 17 xiuitl, kistejki uan mokauato ininchaj toikniuaj. Nojua kimachtijkej ika Biblia uan teipa moatsonpoliuiltik. Nimosiuajtik iuaya ipan xiuitl 1960. Maske itatauaj amo yajkej kema timosenkajkej, teipa itatauaj pejkej techtlepanitaj pampa kuali timonejnemiltiyayaj uan kuali tikiniskaltiyayaj tokoneuaj.

Tikinpixkej chikomej tokoneuaj uan inijuantij kena tlakakiyayaj. Tijmatkej ouij tikiniskaltisej. Tikinmachtijkej señas, kiampa ueliskia timonojnotsasej ininuaya uan tikinmachtisej tlen melauak. Toikniuaj tlen totlanechikol tlauel techpaleuijkej. Se tonali, se toikni techtlajkuiljuilik uan techiljuik se tokone kiijtojtinemiyaya tlajtoli tlen amo kuali ipan nopa kali kampa timosentiliyayaj. Nimantsi timonojnotskej iuaya tokone. Nauij nokoneuaj, James, Jerry, Nicholas uan Steven, tlatekipanouaj kej ueuejtlakamej uan kitekipanouaj Jehová ininuaya ininchampoyouaj. Nicholas uan isiua, Deborah, tlapaleuiaj kampa motlajtolkuepa amatlajkuiloli ika señas ipan kali Betel ne Gran Bretaña, uan Steven uan isiua, Shannan, tlapaleuiaj kampa motlajtolkuepa amatlajkuiloli ika señas ipan kali Betel ne Estados Unidos.

Kema nechka tikaxitiskiaj 40 xiuitl ika timosenkajtoyaj, nosiua Eunice mijki. Maske miak xiuitl kipixki nopa kokolistli cáncer, tlauel kipaleuik kineltokas sampa moyolkuisej katli miktokej. Nijchixtok ma asi nopa tonali kema sampa nikitas.

 Ipan febrero 2012, niuetski uan nimotsinkechpostejki. Nikitak monekiyaya ma nechpaleuikaj, yeka nimokajki ichaj se nokone. Timosentilijkej ipan se tlanechikoli kampa kitekiuiyayaj señas ipan altepetl Calgary (Alberta), kampa nama nitlatekipanoua kej ueuejtlakatl. Amo kema niitstoya ipan se tlanechikoli kampa kitekiuiyayaj señas. ¿Tlake nechpaleuik kuali nimouampojchijtos iuaya Jehová maske niitstoya ipan se tlanechikoli kampa motekiuia tlajtoli inglés? Jehová nechpaleuik. Yaya kichijtok tlen kitenkajtok kema kiijtok kinmokuitlauiskia katli iknotsitsij (Sal. 10:14). Tlauel nikintlaskamatilia nochi katli nechtlajkuiljuilijkej pampa kinekiyayaj nechiljuisej se tlenijki, katli kiyekojkej señas pampa kinekiyayaj nechpaleuisej uan katli kichijkej kampeka nechixtomilisej ika señas se keski tlamachtili.

Kemantika nimotekipachouayaya uan amo nijmatiyaya tlake nijchiuas pampa amo nijkuamachiliyaya tlen sekinok nechiljuiyayaj o pampa nijmachiliyaya amo aka kimatiyaya kenijkatsa kinpaleuisej katli amo tlakakij. Kema kiampa nijyolmatiyaya, nikilnamikiyaya tlen Pedro kiiljuik Jesús: “ToueyiTeko, san tlapik eliskia tlaj seyok tijtokiliskiaj. San ta titlamachtia nopa tlajtoli tlen ueli kinmaka yolistli yankuik para nochipa” (Juan 6:66-68). Nijneki nijchiuas kej miakej toikniuaj katli amo tlakakij uan uejkajtok kitekipanouaj Jehová, yeka nijchiua kampeka nijpias noyolo. Nojkia nimotemachia ipan Jehová uan itlanechikol. Uan nopa tlauel nechpaleuijtok. Nama onka miak amatlajkuiloli ipan notlajtol, uan ueli nijkuamachilia nopa tlamachtili tlen moixtoma ipan tlanechikoli uan ipan uejueyi tlanechikolistli ika señas americano. Pampa nijtekipanoua Jehová tlauel niyolpaki uan ya nelia nechteochijtok.