DANIEL UAN MÍRIAM mosenkajkej ipan xiuitl 2000 uan amo tleno kinpolouayaya kema itstoyaj ipan Barcelona (España). Daniel kiijtoua: “Tiomej tlauel kuali techtlaxtlauiyayaj, yeka tiauiyayaj titlakuaj ipan restaurantes kampa tlauel tlapatiyo, tiauiyayaj tipaxalouaj ipan sekinok uejueyi altepemej uan timokentiyayaj yoyomitl tlen pajpatiyo. Uan nojkia tiueliyayaj titlajtolmoyauaj”. Teipa kipatlakej se keski tlamantli ipan ininnemilis.

Ipan se ueyi tlanechikolistli tlen mochijki ipan 2006, Daniel kikajki se tlamachtili tlen asik ipan iyolo. Ipan nopa tlamachtili kiijtojkej: “¿Tijchiuaj kampeka tikinpaleuisej katli ‘kinuikaj para kinmiktisej’ ma kimatikaj kenijkatsa momakixtisej?” (Prov. 24:11). Ipan nopa tlamachtili moixtonki kinamiki tikiniljuisej maseualmej tlen Biblia tlamachtia pampa kiampa uelis momanauisej (Hech. 20:26, 27). Daniel kiilnamiki: “Nijmatki Jehová kejuak na nechnojnotstoya”. Ipan nopa tlamachtili nojkia moixtonki tlauel tiyolpakij kema tijchiuaj kampeka tlauel tijtekipanosej Jehová. Daniel kimajtoya nopa, pampa Míriam eliyaya precursora uan tlauel yolpakiyaya.

Nopa tlamachtili asik ipan iyolo, yeka moiljuik kipatlaskia se keski tlamantli ipan inemilis. Pejki tekiti san se keski horas uan mochijki precursor. Uan moiljuik tlauel yolpakiskiaj tlaj yaskiaj kampa monekiyayaj tlajtolmoyauanij.

Ipan mayo 2007, Daniel uan Míriam kikajkej ininteki uan yajkej Panamá, se altepetl kampa ipa yajtoyaj. Tlajtolmoyauayayaj ipan se keski islas ipan archipiélago de Bocas del Toro, ipan ueyi atl Caribe. Miakej katli nopaya itstokej kamanaltij tlajtoli ngäbere. Daniel uan Míriam moiljuijkej ueliskiaj mokauasej se chikueyi metstli pampa kinaxiliskia nopa tomij tlen kiajoktoyaj.

Nemiyayaj ipan barco uan ipan bicicleta. Nojua kuali kiilnamikij kema tlejkokej ipan bicicleta kampa tlamimiltipa, ixtlejkokej se 30 kilómetros uan tlauel tonayaya. Daniel tlakayoyamanixki pampa tlauel siajki. Nopa maseualmej katli kinpantijkej tlauel kuali kinselijkej, uan nojua tlauel kuali kinitakej pampa Daniel uan Míriam kiyekojkej se keski tlajtoli ipan ngäbere. Teipa, pejkej kinmachtiaj ika Biblia se 23 maseualmej.

¿Tlake panok kema tlanki inintomij? Daniel kiijtoua: “Tlauel timokuesojkej pampa timoiljuijkej titlakuepiliskiaj España. Amo tijnekiyayaj tikinkauasej katli tikinmachtiyayaj”. Kema panok se metstli, kiselijkej se ueyi tlateochiualistli. Míriam kiijtoua: “Techiljuijkej ma titlatekipanokaj kej precursores especiales. Tlauel tiyolpajkej pampa timokauaskiaj kampa tiitstoyaj”.

Ipan 2015, Jehová itlanechikol kipatlak se keski tlamantli, yeka Daniel uan Míriam ayokmo tlatekipanojkej kej especiales. ¿Tlake kichiuaskiaj? Motemachijkej ipan tlen kiijtoua Salmo 37:5: “Xijkauili toTeko ma mitsnextili kampa tinemis. Ximotemachi ipan ya, uan yajaya kichiuas”. Kipantijkej se tekitl, uan nama tlatekipanouaj kej precursores regulares ipan se tlanechikoli tlen eltok ipan Veraguas (Panamá).

Daniel kiijtoua: “Kema tiitstoyaj España amo tijmatiyayaj tlaj tiueliskiaj tiitstosej san ika se keski tlamantli. Maske amo tijpiaj miak, amo tleno techpoloua”. ¿Kenke tlauel yolpakij? Inijuantij kiijtouaj: “Kema tikinpaleuiaj maseualmej kuali ma kiixmatikaj Jehová kichiua nelia tlauel ma tiyolpakikaj”.