1, 2. 1) ¿Kenke kema Jesús nechka mikiskia uejkajki monojnotski ininuaya iapóstoles? (Xikita nopa achtoui tlaixkopinkayotl). 2) ¿Kenijkatsa techpaleuis tlaj tikilnamiktosej kenke titlajtolmoyauaj? 3) ¿Tlake tikixtomasej?

IPAN nopa youali kema nechka kimiktiskiaj, Jesús uejkajki monojnotstoya ininuaya iapóstoles uan kiniljuik tlauel kinikneliyaya. Ipan nopa achtoui tlamachtili tikitakej Jesús kiijtok yaya eliyaya nopa xokomekatsontli, uan kinyololinik itokilijkauaj ma temakakaj “inintlajka”, nopa kiijtosneki monekiyaya nochipa kimoyauasej nopa kuali tlamachtili tlen toTeotsij iTlanauatijkayo (Juan 15:8).

² Jesús amo san kiniljuik tlake monekiyaya kichiuasej, nojkia kiniljuik kenke monekiyaya ma kichiuakaj. Kiniljuik se keski tlamantli tlen kinyololinik nojua ma tlajtolmoyajtokaj. ¿Kenke moneki tikilnamiktosej nopa tlamantli? Pampa nopa techyololinis nojua ma tijmoyajtokaj nopa kuali tlamachtili ipan nochi Tlaltipaktli (Mat. 24:13, 14). Yeka, ma tikitakaj naui tlamantli tlen techyololinis nojua ma titlajtolmoyajtokaj. Uan nojkia tikitasej naui tlamantli tlen Jehová techmaka, tlen techpaleuis nojua ma titemakakaj kejuak totlajka.

3. 1) Kej kiijtoua Juan 15:8, ¿kenke tlauel tijpatiitaj titlajtolmoyauasej? 2) ¿Tlake kiixnextia nopa uvas, uan kenke kinamiki?

³ Tlauel tijpatiitaj titlajtolmoyauasej pampa kiampa tijueyichiuaj toTeotsij uan tijuejkapantlaliaj itoka (xijpoua Juan 15:1, 8). Ipan ni tlapoualistli Jesús kiijtok iTata eli kej se akajya katli kiteki uvas. Nojkia kiijtok ya eli nopa xokomekatsontli uan itokilijkauaj elij imakuayouaj (Juan 15:5). Uajka, nopa uvas kiixnextia inintlajka tlen temakaj Cristo itokilijkauaj kema kimoyauaj nopa kuali tlamachtili tlen toTeotsij iTlanauatijkayo. Jesús kiniljuik itokilijkauaj: “Kema intemakaj miak inmotlajka uan inkichiuaj miak tlamantli tlen ipakilis noTata, nesis más iueyitilis noTata uan nesis nelia innomomachtijkauaj”. Sanse kej se tlakatl tlauel kuali kiyolmati uan yolpaki kema kiita nopa xokomekatsontli temaka miak itlajka, Jehová nojkia kuali kiyolmati uan tlauel yolpaki kema kiita tijchiuaj kampeka nochipa tijmoyauasej nopa kuali tlamachtili tlen iTlanauatijkayo (Mat. 25:20-23).

4. 1) ¿Kenijkatsa tijnextiaj tijuejkapantlaliaj toTeotsij itoka? 2) ¿Tlake tijyolmati pampa nojkia titlapaleuia ma mouejkapantlali toTeotsij itoka?

⁴ Kej tikitakej, kema titlajtolmoyauaj tijuejkapantlaliaj toTeotsij itoka. ¿Kenijkatsa tijchiuaj? Tojuantij amo uelis tijchiuasej nojua ma eli tlauel tlatsejtseloltik, pampa itoka ya senkistok tlatsejtseloltik. Ma tikitakaj tlen Jehová kiijtok ika itlajtolpanextijka Isaías: “Na, niinmoTeko tlen nikinyakana noiluikaejkauaj ma tlatlanitij. San na xinechitakaj para nitlatsejtseloltik” (Is. 8:13). Uajka, uelis tijnextisej tijuejkapantlaliaj itoka tlaj tijtlepanitasej uan tijpatiitasej, pampa amo onka seyok tokajyotl kej toTeotsij itoka, uan nojkia uelis tijnextisej nopa kema tikinpaleuiaj maseualmej ma kimatikaj toTeotsij itoka eli tlatsejtseloltik (Mat. 6:9). Kema tikinmachtiaj sekinok nochi nopa kuajkuali tlamantli tlen Jehová kinextia uan nochi tlen kitenkajtok kichiuas, tijnextiaj Satanás san tlakajkayaua uan san kiistlakauia toTeotsij (Gén. 3:1-5). Nojkia tijuejkapantlaliaj itoka kema tikinmachtiaj maseualmej san ya kinamiki ‘ma kitlepanitakaj uan ma kiueyichiuakaj’ (Apoc. [Rev.] 4:11). Rune, katli tlatekipanojtok 16 xiuitl kej precursor, kiijtoua: “Tlauel nijtlaskamatilia toTeotsij pampa nechkajtok ma nikinmachti sekinok ajkia ya. Nopa nechyololinia nojua ma nitlajtolmoyajto”.

5. 1) Kej kiijtoua Juan 15:9, 10, ¿kenke moneki titlajtolmoyauasej? 2) ¿Kenijkatsa Jesús kinextik tlauel monekiyaya ma tikijiyouikaj nochi?

⁵ (Xijpoua Juan 15:9, 10). Nojkia titlajtolmoyauaj pampa tikinikneliaj Jehová uan Jesús ika nochi toyolo (Mar. 12:30; Juan 14:15). Jesús amo san kiniljuik itokilijkauaj ma kipialikaj tlaiknelijkayotl, ya kiniljuik: “Ximokauakaj ipan notlateiknelilis”. ¿Kenke kiampa kiniljuik? Pampa moneki tikijiyouisej nochi uan kiampa nochipa tielisej Cristo itokilijkauaj. Jesús kinextik tlauel monekiyaya tikijiyouisej nochi, pampa miakpa kitekiuik nopa tlajtoli ximokauakaj ipan Juan 15:4-10.

6. ¿Kenijkatsa tijnextiaj nelia tijnekij ‘timokauasej’ ipan Cristo itlaiknelijkayo?

⁶ ¿Kenijkatsa tijnextiaj nelia tijnekij ‘timokauasej’ ipan Cristo itlaiknelijkayo uan kiampa nojkia kuali techitas? Moneki tijneltokasej nochi tlen tlanauatik. Jesús kineki ma tijneltokakaj. Ya san kineki ma tijchiuakaj tlen ya nojkia kichiua. Ya kiijtok: “Nijchiua tlen noTata nechnauatia, [uan] nimokaua ipan itlaiknelilis”. Jesús kuali kinextik tlake kinamiki tijchiuasej (Juan 13:15).

7. ¿Kenke tlaj titlaneltokaj nojkia tijnextiaj tlaiknelili?

⁷ Jesús kiijtok kema se akajya kineltoka,  nojkia kinextia kiiknelia. Ya kiijtok: “Tlen kimatij notlanauatil uan nelia kichiuaj, inijuantij tlen nelia nechikneliaj” (Juan 14:21). Uan kema tijchiuaj tlen Jesús tlanauatik uan titlajtolmoyauaj, nojkia tijnextiaj tlauel tikikneliaj toTeotsij, pampa tlen Cristo technauatia, nojkia ya nopa kineki toTeotsij (Mat. 17:5; Juan 8:28). Uan pampa tijnextiaj tikinikneliaj, Jehová uan Jesús nojkia techikneliaj.

8, 9. 1) ¿Kenke nojkia titlajtolmoyauaj? 2) ¿Kenke Ezequiel 3:18, 19 uan 18:23 techyololinia ma titlajtolmoyauakaj?

⁸ Nojkia titlajtolmoyauaj pampa tijnekij tikinmatiltisej maseualmej tlen panos teipa. Noé nojkia tlauel tlajtolmoyajki pampa Biblia kiijtoua “kinyolmelauayaya sekinok” (xijpoua 2 Pedro 2:5). Kema tlajtolmoyauayaya, kinmatiltik maseualmej kenijkatsa kintsontlamiltiskiaj katli amo kualmej. ¿Kenijkatsa tijmatij nopa? Ma tikitakaj tlake kiijtok Jesús: “Ipan nopa tonali kema aya ualayaya nopa tlauelatl, tlakamej tlakuayayaj uan tlaiyayaj. Sekij mosiuajtiyayaj uan sekinok kisenkauayayaj para ininichpokauaj ma monamiktikaj. Nochi kichiuayayaj tlen ipa kichiuaj hasta nopa tonal kema Noé kalajki ipan nopa kuakanaua. Axtleno kimatiyayaj tlen ininpantiskia hasta kema ualajki nopa tlauelatl uan kinuikak. Kej nopa axaka kimatis achtoui kema na tlen nimokuepki tlakatl, nimokuepas” (Mat. 24:38, 39). Maske amo kinekiyayaj kitlakakilisej, Noé nojua tlajtolmoyajki.

⁹ Ipan ni tonali tijmoyauaj nopa kuali tlamachtili tlen toTeotsij iTlanauatijkayo pampa tijnekij ma kimatikaj tlake mosentlalijtok kichiuas toTeotsij. Kej Jehová, tijnekij ma kitlakakilikaj nopa kuali tlamachtili uan ma momakixtikaj (Ezeq. 18:23). Uan kema titlajtolmoyauaj kajkalpa uan kampa panoj miakej, kichiua ma tikinmatiltikaj miakej maseualmej toTeotsij iTlanauatijkayo nechka kintsontlamiltis katli amo kualmej (Ezeq. 3:18, 19; Dan. 2:44; Apoc. 14:6, 7).

10. 1) Kej kiijtoua Mateo 22:39, ¿kenke nojkia titlajtolmoyauaj? 2) Xikixtoma kenijkatsa Pablo uan Silas kipaleuijkej katli tlamokuitlauiyaya kampa kintsaktoyaj.

¹⁰ Ma tikitakaj seyok tlamantli tlen techyololinia ma titlajtolmoyauakaj: pampa tikinikneliaj maseualmej (Mat. 22:39). Maseualmej moyolpatlaj kema kinpano se tlenijki. Uan pampa tikinikneliaj, nojua tijnekij titlajtolmoyajtosej. Ma tikilnamikikaj tlen kinpanok Pablo uan Silas kema itstoyaj ipan Filipos. Katli kinkualankaitayayaj kintsajkej, uan tlajkoyoual mojmolinik tlali uan motlapok kampa kintsaktoyaj. Katli tlamokuitlauiyaya moiljuik mochololtijtoyaj, uan yeka kinejki momiktis. Pablo kitsajtsilik uan kiiljuik: “Amo ximomikti”. Nopa tlakatl tlauel momajmatijtoya, uan yeka kintlajtlanik: “¿Tlake moneki nijchiuas para nimomakixtis?”. Inijuantij kinankilijkej: “Xijneltoka toueyiteko Jesucristo uan yajaya mitsmakixtis” (Hech. 16:25-34).

11, 12. 1) ¿Tlake techmachtia tlen kipanok nopa tlakatl katli tlamokuitlauiyaya? 2) ¿Kenke tijnekij nojua titlajtolmoyajtosej?

 ¹¹ ¿Tlake techmachtia ni tlapoualistli? Nopa tlakatl katli tlamokuitlauiyaya moyolpatlak uan kinejki ma kipaleuikaj teipa kema ya mojmolinijtoya tlali. Nojkia, miakej maseualmej katli amo kuali techtlakakiliaj uelis moyolpatlasej uan kinekisej ma tikinpaleuikaj teipa kema kinpanos se tlenijki. Sekij tlauel mokuesouaj kema ayokmo kipiaj tekitl, kema kinkauaj ininsiua o ininueue, kema kiniljuiaj kipiaj se kokolistli o kema miki se tlen ininchampoyouaj. Kema kinpano ni, sekij maseualmej kinekij kimatisej kenijkatsa uelis yolpakisej. Uelis nojkia motlajtlaniaj kej nopa tlakatl katli tlamokuitlauiyaya: “¿Tlake moneki nijchiuas uan kiampa nimomakixtis?”. Kema tikinpantiaj, kinekij techtlakakilisej maske achtouia uelis amo kema techtlakakilijtoyaj.

¹² Uajka, tlaj nojua titlajtolmoyajtosej, uelis tikinyolchikauasej maseualmej katli kinekij techtlakakilisej (Is. 61:1). Charlotte, katli senkistok tlatekipanojtok ipan 38 xiuitl, kiijtoua: “Maseualmej kejuak mokuapolojtokej. Moneki ma kitlakakilikaj nopa kuali tlamachtili”. Uan tosiuaikni Ejvor, katli tlatekipanojtok 34 xiuitl kej precursor, kiijtoua: “Ipan ni tonali, maseualmej tlauel mokuesojtokej. Na nijneki nikinpaleuis, uan yeka nitlajtolmoyaua”. Pampa tikinikneliaj maseualmej, techyololinia nojua titlajtolmoyajtosej.

13, 14. 1) ¿Tlake tlamantli kiijtoua Juan 15:11 techmakaskiaj? 2) ¿Kenijkatsa uelis tiyolpakisej kej Jesús? 3) ¿Kenijkatsa techpaleuia ipan tlajtolmoyaualistli kema tiyolpaktokej?

¹³ Ipan nopa youali kema nechka kimiktiskiaj, Jesús kiniljuik iapóstoles se keski tlamantli tlen Jehová kinmakaskia, tlen kinpaleuiskia nojua kejuak ma temakatokaj inintlajka. ¿Tlake kinmakaskia? Uan, ¿kenijkatsa techpaleuia tojuantij?

¹⁴ Pakilistli. ¿Tlauel ouij tijneltokasej Jesús uan titlajtolmoyauasej? Amo. Kema kiijtok tlapoualistli tlen nopa xokomekatsontli, Jesús kiijtok tlauel tiyolpakiskiaj kej ya tlaj tijmoyauaskiaj nopa kuali tlamachtili (xijpoua Juan 15:11). Kej tikitakej, ya kiijtok eli kej nopa xokomekatsontli uan itokilijkauaj kej imakuayouaj. Imakuayo se kuauitl xoxouixtok uan kuali eltok pampa tlatskitok ipan ikuayo. Nojkia, tlaj tiitstosej inechka Jesús uan tijchiuasej kej ya kichijki, uelis tiyolpakisej kej ya yolpaki pampa kichiua tlen Jehová kineki (Juan 4:34; 17:13; 1 Ped. 2:21). Hanne, katli tlatekipanojtok kej precursora kipano 40 xiuitl, kiijtoua: “Pampa tlauel niyolpaki teipa kema nitlami nitlajtolmoyaua, nechyololinia nojua ma nijtekipanojto Jehová”. Pampa tlauel tiyolpakij, tijnekij nojua titlajtolmoyajtosej maske kanajya amo kuali techtlakakiliaj (Mat. 5:10-12).

15. 1) ¿Tlake tlamantli kiijtoua Juan 14:27 techmakaskiaj? 2) ¿Kenijkatsa tlaseuilistli techpaleuia nojua ma titemakakaj totlajka?

¹⁵ Tlaseuilistli (xijpoua Juan 14:27). Ipan nopa youali, Jesús nojkia kiniljuijtoya: “Niinmechkauilijteua [...] notlaseuilis”. ¿Kenijkatsa itlaseuilis Jesús techpaleuia kejuak ma titemakatokaj totlajka? Kema tikijiyouiaj nochi ipan tlajtolmoyaualistli, tijmatij Jehová uan Jesús kuali techitaj, uan nopa kichiua ma tijyolmatikaj tijpiaj tlaseuilistli (Sal. 149:4; Rom. 5:3, 4; Col. 3:15). Ulf, katli senkistok tlatekipanojtok 45 xiuitl, kiijtoua: “Maske tlauel nisiaui kema nitlajtolmoyaua, ni tekitl kichiua kuali ma nijyolmati uan tlauel niyolpaki”. Nelia tlauel tijtlaskamatij toTeotsij pampa nochipa tijpiaj nopa tlaseuilistli.

16. 1) ¿Tlake tlamantli kiijtoua Juan 15:15 techmakaskiaj? 2) ¿Tlake monekiyaya kichiuasej apóstoles uan kiampa mouampojchijtosej iuaya Jesús?

 ¹⁶ Timouampojchiuaj iuaya Jesús. Teipa kema kiniljuik iapóstoles kinekiyaya ma yolpaktokaj, Jesús nojkia kiniljuik monekiyaya kinextisej moikneliaj (Juan 15:11-13). Teipa kiniljuik: “Niinmechnotsas innouampoyouaj”. ¡Nelia se ueyi tlateochiualistli! ¿Tlake monekiyaya kichiuasej tlaj kinekiyayaj nochipa mouampojchijtosej iuaya? Monekiyaya nojua temakasej inintlajka (xijpoua Juan 15:14-16). Se ome xiuitl achtoui, Jesús kiniljuijtoya: “Xikinyolmelauatij para kinnechkauia itlanauatilis toTeko tlen itstok ipan iluikak” (Mat. 10:7). Uan kema nechka kimiktiskiaj, Jesús kiniljuik monekiyaya kiijiyouisej nochi uan nojua tlajtolmoyajtosej (Mat. 24:13; Mar. 3:14). Maske tlauel ouij kichiuaskiaj tlen Jesús kinnauatijtoya, kena ueliskiaj kichiuasej uan kiampa nojua mouampojchijtosej iuaya, pampa nojua kinmakaskiaj seyok tlamantli.

17, 18. 1) ¿Tlake tlamantli kiijtoua Juan 15:16 techmakaskiaj? 2) ¿Kenijkatsa nopa tlamantli kinpaleuiskia Jesús itokilijkauaj? 3) ¿Tlake techpaleuia nojua ma titlajtolmoyajtokaj?

¹⁷ Techtlakakiliaj kema timomaijtouaj. Jesús kiijtok: “Nochi tlen inkitlajtlanisej noTata ipan notoka yajaya inmechmakas” (Juan 15:16). ¡Nelia tlauel moyolchikajkej apóstoles kema kikajkej ni! * Jesús nechka mikiskia, uan maske inijuantij amo kuali kikuamachiliyayaj nopa, nojua kinpaleuiskiaj. Kema momaijtoskiaj uan kiiljuiskiaj Jehová ma kinpaleui kimoyauasej toTeotsij iTlanauatijkayo, ya kintlakakiliskia. Kema panok se keski tonali, apóstoles kiitakej kenijkatsa Jehová kinnankiliyaya (Hech. 4:29, 31).

¹⁸ Ipan ni tonali nojkia kiampa pano. Tlaj nojua kejuak titemakaj totlajka o kuali tijchiuaj toteki, nochipa kuali timouikasej iuaya Jesús. Uan uelis timotemachisej Jehová techtlakakilis kema tikiljuisej ma techpaleui tikijiyouisej nochi tlaouijkayotl tlen tikixnamikisej ipan tlajtolmoyaualistli (Filip. 4:13). ¡Tlauel tijtlaskamatiliaj Jehová pampa techtlakakilia kema timomaijtouaj uan pampa kuali timouikaj iuaya Jesús! Nochi ni techpaleuia nojua ma titlajtolmoyajtokaj (Sant. 1:17).

19. 1) ¿Kenke nojua titlajtolmoyauaj? 2) ¿Tlake techpaleuis ma tijtlamichiuakaj nopa tekitl tlen techmakatokej?

¹⁹ Kej tikitakej ipan ni tlamachtili, nojua titlajtolmoyauaj pampa tijnekij tijueyichiuasej Jehová uan tijuejkapantlalisej itoka, tijnextisej kenijkatsa tlauel tikinikneliaj Jehová uan Jesús ika nochi toyolo, tikinmatiltisej maseualmej tlen panos teipa uan tijnextisej tikinikneliaj maseualmej. Uan tlen Jehová techmaka, kej pakilistli, tlaseuilistli, timouampojchiuasej iuaya Jesús uan pampa kitlakakilia kema timomaijtouaj, techyolchikaua nojua ma tijchijtokaj nopa tekitl tlen technauatijtokej. Jehová nelia tlauel yolpaki kema kiita tijchiuaj kampeka ika nochi toyolo nojua titemakatosej totlajka o nojua titlajtolmoyajtosej.