JESÚS kiijtok itokilijkauaj kejuak tekitiskiaj ipan se ueyi pixkistli ipan itlamia tonali (Mat. 9:37; 24:14). Tlen kiijtok nelia moaxitia ipan se keski pilaltepetsitsij tlen Transcarpatia (Ucrania). San ipan eyi pilaltepetsitsij katli nejnechka eltok, onka 50 tlanechikoli uan itstokej kipano 5,400 tlajtolmoyauanij. * Tlaj tikinsansejkotiliskiaj nochi maseualmej katli itstokej ipan nopa eyi pilaltepetsitsij, ueliskia tikijtosej se tlen nauij maseualmej eli se tlen Jehová itlajtoltemakauaj.

¿Kenijkatsa elij nopa maseualmej? Se toikni tlen itoka Vasile, kiijtoua: “Nelia tlauel kitlepanitaj Biblia, kinpaktia tlen xitlauak, tlauel kuali mouikaj ika ininchampoyouaj uan kichiuaj kampeka mopaleuisej nochi katli itstokej nopaya”. Uan nojkia kiijtoua: “Maske kemantika amo kinpaktia tlen tijneltokaj, tlaj tikinnextilis se texto ipan Biblia, uajka kuali mitstlakakilisej”.

Toikniuaj nojkia kiixnamikij sekinok kuesoli pampa kampa tlajtolmoyauaj itstokej miakej tlajtolmoyauanij. Se tlanechikoli kampa itstokej 134 tlajtolmoyauanij moneki tlajtolmoyauasej san ipan 50 kalmej. ¿Tlake kichiuaj toikniuaj?

Miakej kichiuaj se ueyi kampeka tlajtolmoyauasej kampa amo itstokej miakej tlajtolmoyauanij. Toikni Ionash, katli kipia 90 xiuitl, kiijtoua: “Ipan totlanechikol, se toikni moneki tlajtolmoyauas san ipan ome kali. Nama na nitlajtolmoyaua ipan ni pilaltepetsi. Kema ayamo tlauel nimokokouayaya, niauiyaya ipan se pilaltepetsi tlen mokaua 160 kilómetros iuejkaka, uan nopaya nitlajtolmoyauayaya ipan tlajtoli húngaro”. Toikniuaj kichiuaj se ueyi kampeka kema yauij tlajtolmoyauaj uejka. Ionash kiijtoua: “Tlayouayok nimeuayaya a las cuatro, kiampa ueliyaya nia ipan tren. Uan nitlamiyaya nitlajtolmoyaua a las seis ika tiotlak, pampa ipan nopa hora tlakuepiliyaya nopa tren. Sejse chikueyi niauiyaya ompa o expa”. ¿Moiljuia san tlapik nochi tlen kichijki? Ya kiijtoua: “Tlauel niyolpakiyaya pampa kiampa nitlajtolmoyauayaya. Uan nikitak kej se ueyi tlateochiualistli nijpaleuis se maseuali iuaya ichampoyouaj ipan nopa pilaltepetsi”.

Maske sekij amo uelij yauij uejka, nochi toikniuaj, ueuentsitsij uan telpokamej, kichiuaj kampeka kinnojnotsasej nopa maseualmej katli itstokej kampa tlajtolmoyauaj. Yeka, kema moilnamijki Cristo imikilis ipan 2017, ipan nopa eyi pilaltepetsitsij mosentilijkej nechka ompa imiaka tlen nochi tlajtolmoyauanij katli itstokej. Nopa kiijtosneki mosentilijkej tlajko tlen nochi maseualmej katli itstokej ipan nopa eyi pilaltepetsitsij. Ni kinextia kampa ueli nojua onka miak “tekitl tlen toueyiTeko” techmakatok (1 Cor. 15:58).