TLAMACHTILI 19
Tlaiknelili uan xitlaualistli kema pano tlen amo kuali
“Ta titoTeko Dios tlen axmitspaktia tlen axkuali. Yeka axtikinkauilia axkuajkualmej ma itstokaj mouaya” (SAL. 5:4).
UIKATL 142 Ma timotemachikaj ipan Jehová
TLEN MOIXTOMAS *
1-3. 1) Kej kiijtoua Salmo 5:4-6, ¿kenijkatsa kiita Jehová tlen amo kuali? 2) ¿Kenke tikijtouaj kema se akajya kiitskia se konetl amo moyakana ika Cristo itlanauatil?
JEHOVÁ tlauel amo kipaktia tlen amo kuali (xijpoua Salmo 5:4-6). Yeka, tlauel kiijia se akajya katli kinchiualtia konemej ma motekakaj iuaya, se tlajtlakoli tlen tlauel amo kuali. Sanse kej Jehová, nochi katli tijtekipanouaj nojkia kiampa tikitaj kema se akajya kinchiuilia konemej tlen amo kuali, uan amo tijmanauiaj kema se akajya kichiua nopa tlajtlakoli ipan tlanechikoli (Rom. 12:9; Heb. 12:15, 16).
2 Se akajya katli kinitskia konemej, kinextia amo moyakana ika Cristo itlanauatil, kampa eltok nochi tlen Jesús kiijtok uan tlen kichijki (Gál. 6:2). ¿Kenke tikijtouaj nopa? Pampa kej tikitakej ipan tlamachtili 18, Cristo itlanauatil motlatskilijtok ipan tlaiknelijkayotl uan tlapaleuia ma mochiua tlen xitlauak. Katli melauak Cristo itokilijkauaj timoyakanaj ika nopa tlanauatili, yeka ika tlen tijchiuaj, tikinnextiliaj konemej nelia tikinikneliaj uan tijnekij ma kimatikaj nochipa tikinmokuitlauisej. Kema se akajya kichiualtia se siuapil o se okichpil ma moteka iuaya o kiitskia, kinextia san ya kineki moyolpakiltis uan kichiua tlen tlauel amo kuali, pampa teipa konemej moiljuiaj amo aka kinmanauis uan amo aka kiniknelia.
3 Ni tlamantli pano ipan nochi Tlaltipaktli, uan kemantika nojkia ipan tlanechikoli. ¿Kenke? Pampa ipan ni tonali itstokej miakej maseualmej katli “axkuajkualmej” uan katli “tlakajkayauaj”, uan uelis sekij kinekij kichiuasej tlen amo kuali ipan tlanechikoli (2 Tim. 3:13). Uan sekij katli kiijtouaj elij toikniuaj kikajkej ma kinyoltilana tlen amo kuali uan kinitskijkej konemej o kinchiualtijkej ma motekakaj ininuaya. Achtoui tikitasej ipan ni tlamachtili kenke nopa tlamantli eli se tlajtlakoli tlen tlauel amo kuali. Uan teipa tikitasej tlake kinamiki kichiuasej ueuejtlakamej kema se akajya kichiua se tlajtlakoli tlen tlauel amo kuali, kej kema se akajya kinitskia konemej o kinchiualtia ma motekakaj iuaya, uan kenijkatsa tetajmej uelis kinmokuitlauisej ininkoneuaj. *
SE UEYI TLAJTLAKOLI
4, 5. ¿Kenke tlauel kiixpanoj se konetl kema se akajya kiitskia o kichiualtia ma moteka iuaya?
4 Kema se akajya kiitskia se konetl o kichiualtia ma moteka iuaya, nopa okichpil o siuapil tlauel tlaijiyouia miak xiuitl. Uan amo san ya moyolkokoua, nojkia ichampoyouaj uan toikniuaj tlen tlanechikoli. Nelia se ueyi tlajtlakoli kema se akajya kiitskia se siuapil o se okichpil o kichiualtia ma moteka iuaya.
5 Kiixpano katli kichiuiliaj nopa amo kuali tlamantli. * Kema se akajya kichiuiliaj tlen amo kuali uan kitlaijiyouiltiaj, eli se tlajtlakoli. Uan kej tikitasej ipan tlamachtili 20, ya nopa kichiua se akajya kema kiitskia se konetl o kichiualtia ma moteka iuaya, pampa nelia tlauel kiyolkokoua. Kiixpano pampa nopa konetl motemachiyaya ipan ya, uan kichiua ma moiljui ayokmo tleno ipati. Yeka, tlauel moneki tikinmokuitlauisej konemej uan kiampa amo kinchiuilisej nopa tlamantli tlen tlauel amo kuali. Uan moneki tikinyolchikauasej uan tikinpaleuisej katli kej nopa kinchiuilijkej (1 Tes. 5:14).
6, 7. ¿Kenke kema se akajya kiitskia se konetl kiixpano tlanechikoli uan tekichiuanij inintlanauatil?
6 Kiixpano tlanechikoli. Kema se akajya katli mosentilia ipan tlanechikoli kiitskia se konetl o kichiualtia ma moteka iuaya, kejuak kisokiuia tlanechikoli pampa maseualmej peuaj teijilnamikij (Mat. 5:16; 1 Ped. 2:12). Amo kinamiki nochi toikniuaj tlen Tlaltipaktli, katli kichiuaj kampeka ‘kimanauisej itlajtol toTeko’, ma kinijilnamikikaj san pampa setsi toikni kichiua se tlamantli tlen tlauel amo kuali (Jud. 3). Tojuantij amo tijkauaj se maseuali nojua ma itsto ipan tlanechikoli tlaj kichiua se tlamantli tlen tlauel amo kuali uan amo moyolkuepa, pampa san kisokiuia tlanechikoli.
7 Kiixpano tekichiuanij inintlanauatil. Cristo itokilijkauaj moneki kintlepanitasej tekichiuanij (Rom. 13:1). Uan tijnextiaj tikintlepanitaj kema tijneltokaj tlen inijuantij tlanauatiaj. Tlaj se akajya katli mosentilia ipan tlanechikoli kiixpano se tlanauatili, kej kema kiitskia se konetl, kinixpano tekichiuanij (nojkia xikita Hechos 25:8). Maske ueuejtlakamej amo kintekimakatokej ma kintlatsakuiltikaj katli kiixpanoj se tlanauatili, amo kimanauiaj katli kiitskia se konetl kema tekichiuanij kitlatsakuiltiaj (Rom. 13:4). Kiampa, katli tlajtlakolchiua kejuak kipixka tlen kitojki (Gál. 6:7).
8. ¿Kenijkatsa kiita Jehová kema se akajya kiixpano seyok maseuali?
8 Nelia tlauel kiixpano Jehová (Sal. 51:4). Kema se maseuali kiixpano seyok maseuali, tlajtlakolchiua iixpa Jehová. Ma tikitakaj se neskayotl ika tlen kiijtouayaya nopa Tlanauatili tlen Jehová kinmakak israeleuanij. Nopaya kiijtouayaya tlaj se akajya kiichtekiliskia seyok se tlenijki o kikajkayauayaya, uajka tlajtlakolchiuayaya iixpa Jehová pampa “axkineltokak” (Lev. 6:2-4). Uajka, kema se akajya katli mosentilia ipan tlanechikoli kiitskia se konetl o kichiualtia ma moteka iuaya, kejuak kitlachtekilia pampa nopa konetl ayokmo kuali kiyolmatis uan tlauel majmauis, yeka nopa maseuali tlauel kiixpano toTeotsij uan kisokiuia itoka. Yeka, tojuantij tikitaj nopa amo kuali tlamantli kej se ueyi tlajtlakoli iixpa Jehová.
9. ¿Tlake tlamachtili kikixtijtok toTeotsij itlanechikol ipan Biblia, uan kenke kiampa kichijtok?
9 Ipan miak xiuitl, Jehová itlanechikol kikixtijtok ipan Biblia miak tlamachtili kampa kamanalti kema se akajya kiitskia se konetl o kichiualtia ma moteka iuaya. Ipan pilamochtsitsij Tlen Tematiltia uan ¡Xitlachixtokaj! kistok tlamachtili kampa kiijtoua tlake uelis kinpaleuis katli kinchiuilijkej tlen amo kuali, uan kenijkatsa sekinok uelis kinpaleuisej uan kinyolchikauasej, uan nojkia kenijkatsa tetajmej kinamiki kinmokuitlauisej ininkoneuaj. Ueuejtlakamej nojkia kinmatiltijtokej ika Biblia tlake kinamiki kichiuasej kema se akajya kichiua nopa tlajtlakoli. ToTeotsij itlanechikol nochipa kitlachilia tlake moneki kichiuasej ueuejtlakamej kema pano nopa tlamantli. Kiampa tijchiuaj pampa tijnekij nochi tlen mochiuas ma moyakana ika Cristo itlanauatil.
¿TLAKE MOCHIUA KEMA SE AKAJYA KICHIUA SE UEYI TLAJTLAKOLI?
10-12. 1) Kema ueuejtlakamej kimatij se akajya tlajtlakolchijtok, ¿tlake kimatij moneki kinextisej, uan tlake kintekipachoua? 2) Kej kiijtoua Santiago 5:14, 15, ¿tlake kinekij kichiuasej ueuejtlakamej?
10 Kema se akajya kichiua se ueyi tlajtlakoli, ueuejtlakamej katli kisenkauasej nopa kuesoli kimatij moneki kinextisej kinikneliaj toikniuaj uan kichiuasej tlen toTeotsij kiijtoua eli xitlauak, kiampa kinextiaj moyakanaj ika Cristo itlanauatil. Yeka, onka miak tlamantli tlen kintekipachoua. Inijuantij kinekij toTeotsij itoka amo ma mosokiui (Lev. 22:31, 32; Mat. 6:9). Uan nojkia tlauel kinekij kinpaleuisej toikniuaj kuali ma tlaneltokakaj uan kipaleuisej katli tlajtlakolchijki.
11 Nojkia, tlaj katli tlajtlakolchijki eli se toikni, ueuejtlakamej kichiuaj kampeka kipaleuisej sampa kuali ma tlaneltoka (xijpoua Santiago 5:14, 15). Se toikni katli kichiua tlen kiyoltilana uan kichiua se ueyi tlajtlakoli, kinextia ayokmo kuali mouampojchijtok iuaya Jehová. * Ueuejtlakamej elij kejuak tepajtianij pampa kipaleuiaj katli mokokoua, ni kiijtosneki katli tlajtlakolchijtok. Tlen kitlajtolmakaj ika Biblia uelis kipaleuis sampa kuali ma mouika iuaya toTeotsij. Nochi tlen kiiljuisej kipaleuis tlaj nelnelia kiyolkokoua tlen kichijki uan moyolkuepa (Hech. 3:19; 2 Cor. 2:5-10).
12 Uajka, ueuejtlakamej kipiaj se ueyi tekitl tlen tlauel ipati. Nelia kintekipachoua tlen kinpano toikniuaj pampa Jehová kinkajtok ininmako (1 Ped. 5:1-3). Inijuantij amo kinekij ma kinpano yon se tlamantli katli itstokej ipan tlanechikoli. Yeka, kema kimatij se akajya kichijki se ueyi tlajtlakoli, kej kema kiitskiaj se konetl, nimantsi kichiuaj tlen kinamiki. ¿Tlake tlamantli? Ma tikitakaj nopa tlajtlanili tlen uala kampa peua párrafo 13, 15 uan 17.
13, 14. ¿Kineltokaj ueuejtlakamej kema tekichiuanij kiijtouaj moneki kiteljuisej se akajya katli kiitskik se konetl? Xikixtoma.
13 Tekichiuanij tlanauatiaj ma kiteljuikaj se akajya katli kiitskik se konetl, ¿kineltokaj ueuejtlakamej nopa tlanauatili? Kena. Kampa eltok nopa tlanauatili, ueuejtlakamej kichiuaj tlen tekichiuaj kiijtouaj (Rom. 13:1). Nochi nopa tlanauatili amo kiixpano tlen Jehová tlanauatia (Hech. 5:28, 29). Yeka, kema ueuejtlakamej kimatij se akajya kiitskik se konetl o kichiualtik ma moteka iuaya, nimantsi tlanojnotsaj Betel pampa kinekij kimatisej tlake moneki kichiuasej uan kiampa kineltokasej tlen tekichiuanij tlanauatiaj.
14 Ueuejtlakamej kiniljuiaj katli kinchiuilijkej tlen amo kuali uan inintatauaj, o sekinok katli kimatij tlen panotok, uelis kiteljuisej katli kichijki nopa tlamantli. Uan, ¿tlaj katli kinekij kiteljuisej eli se akajya katli mosentilia ipan tlanechikoli uan miakej ya kimatkej tlen panok? ¿Kinamiki moiljuis toikni katli moteljuik kisokiuia toTeotsij itoka? Amo, pampa katli kisokiuia itoka Jehová eli katli kichijki nopa tlajtlakoli.
15, 16. 1) Kej kiijtoua 1 Timoteo 5:19, ¿kenke moneki omej kiijtosej tlen panok uan kiampa kichiuasej se comité judicial? 2) ¿Tlake kichiuaj ueuejtlakamej kema kiteljuiaj se tlen tlanechikoli pampa kiitskik se konetl o kichiualtik ma moteka iuaya?
15 ¿Kenke ipan tlanechikoli moneki omej maseualmej kiijtosej tlen panotok uan kiampa uelis kichiuasej se comité judicial? Pampa Biblia kiampa kiijtoua ma mochiua, uan toTeotsij tlanauatijtok nopa. Kema katli tlajtlakolchiua kiijtoua amo kichijtok nopa tlajtlakoli, moneki omej maseualmej katli kiitakej tlen panok kiijtosej nochi tlen kimatij. Kiampa, ueuejtlakamej uelis kichiuasej se comité judicial (Deut. 19:15; Mat. 18:16; xijpoua 1 Timoteo 5:19). Uan, ¿moneki itstosej omej katli kiitakej o kikajkej tlen panok uan kiampa uelis kiteljuisej ika tekichiuanij? Amo. Ueuejtlakamej o seyok maseuali uelis kiteljuisej katli kichijki tlen amo kuali.
16 Kema se akajya tlen tlanechikoli kiteljuiaj pampa kiitskik se konetl o kichiualtik ma moteka iuaya, ueuejtlakamej kichiuaj ome tlamantli. Se: kej kiijtoua tekichiuanij inintlanauatil, kinmatiltiaj tekichiuanij nochi tlen panotok. Uan ome: kej Biblia kiijtoua, tlajtlanij nochi tlen panok uan kiitaj tlaj moneki kichiuasej se comité judicial. Tlaj nopa maseuali kiijtoua amo kichijtok nopa tlamantli, ueuejtlakamej kintlakakiliaj nopa omej maseualmej katli kiitakej tlen panok. Tlaj omej maseualmej kinextiaj kena tlajtlakolchijki: katli kiteljuik uan seyok katli nojkia kimati nelia kiitskik nopa konetl o ipa kiampa kinchiuilijtok sekinok konemej, uajka kena mochiuas se comité judicial. * Tlaj amo aka kiijtoua nelia panok nopa tlamantli, amo kiijtosneki san istlakatki katli moteljuik. Uan maske kemantika amo itstokej omej katli kiijtouaj tlen panok, ueuejtlakamej kimatij kena mochijki se ueyi tlajtlakoli, se tlajtlakoli tlen tlauel kinyolkokojtok sekinok. Yeka, nojua kinpaleuiaj katli kinpanok nopa tlamantli uan kuali tlachixtokej pampa amo kinekij nopa maseuali ma kichiuili seyok tlen amo kuali (Hech. 20:28).
17, 18. Xikijto tlake mochiua ipan se comité judicial.
17 ¿Tlake mochiua ipan se comité judicial? Ueuejtlakamej katli kichiuaj se comité judicial kiitaj tlaj katli tlajtlakolchijki nojua uelis itstos ipan tlanechikoli o ayokmo. Nopa tlajtoli judicial amo kiijtosneki ueuejtlakamej kiitaj tlaj tekichiuanij uelis kitlatsakuiltisej o amo katli tlaixpanok. Ueuejtlakamej kitlepanitaj tlen tekichiuanij tlanauatiaj uan kikauaj ininmako se akajya katli tlaixpanotok (Rom. 13:2-4; Tito 3:1).
18 Ueuejtlakamej katli itstokej ipan se comité judicial san kichiuaj tlen Biblia kiijtoua. Kema kitlajtolsenkauaj katli tlajtlakolchijki, kiitaj tlaj nelia moyolkueptok. Tlaj amo, uajka kikixtiaj tlen tlanechikoli uan kiniljuiaj nochi toikniuaj ya ayokmo eli se tlen Jehová itlajtoltemakauaj (1 Cor. 5:11-13). Uan tlaj nelnelia moyolkueptok, uajka amo kikixtisej. Maske amo kikixtisej, ueuejtlakamej kiiljuisej uelis amo kema kimakasej yon se tekitl ipan tlanechikoli yon tlatekipanos kej ueuejtlakatl o tlapaleuijketl. Uan pampa kinekij konemej kuali ma itstokaj, ueuejtlakamej kiniljuisej tetajmej ma kinmokuitlauikaj ininkoneuaj kema monechkauiaj ika nopa maseuali katli kiitskik se konetl. Kema kichiuasej ni, moneki amo kema kiijtosej ajkia kiitskijkej o kichiuilijkej tlen amo kuali.
¿KENIJKATSA TETAJMEJ UELIS KINMOKUITLAUISEJ ININKONEUAJ?
Tetajmej kinmokuitlauiaj ininkoneuaj pampa amo kinekij se akajya ma kinitski, yeka kej moskaltijtiauij, kinixtomiliaj tlake kiijtosneki kema omej motekaj sansejko. Inijuantij kitekiuiaj tlamachtili tlen toTeotsij itlanechikol techmakatok. (Xikita párrafos 19-22).
19-22. ¿Kenijkatsa tetajmej uelis kinmokuitlauisej ininkoneuaj? (Xikita nopa achtoui tlaixkopinkayotl).
19 Tetajmej kinamiki kinmokuitlauisej ininkoneuaj uan kiampa amo kinpanos yon se tlamantli tlen amo kuali. * Tetajmej, toTeotsij inmechteochijtok ika inmokoneuaj pampa “itstokej [kej] se regalo tlen toTeko” (Sal. 127:3). Inmojuantij inmoteki inkimokuitlauisej nopa “regalo”. ¿Tlake uelis inkichiuasej uan kiampa amo aka kinchiuilis tlen amo kuali?
20 Se: kuali xijmatikaj tlake kiijtosneki kema se akajya kiitskia se konetl o kichiualtia ma moteka iuaya. Moneki inkimatisej kenijkatsa elij nopa maseualmej katli kinitskiaj konemej uan kenijkatsa kinkajkayauaj pampa kinekij kinchiuilisej tlen amo kuali. Uan nochipa kuali xitlachixtokaj, kiampa amo kinpanos tlen amo kuali (Prov. 22:3; 24:3). Miakpa, konemej kiixmatij uan motemachiaj ipan nopa maseuali katli kinitskia o kinchiualtia ma motekakaj iuaya.
21 Ome: nochipa xikamanaltikaj ininuaya inmokoneuaj (Deut. 6:6, 7). Yeka, tlauel moneki kuali inkintlakakilisej (Sant. 1:19). Uelis majmauij uan moiljuiaj amo inkinneltokasej. Nojkia, uelis katli kinchiuilik tlen amo kuali kinmajmatik uan kiniljuik amo tleno ma kiijtokaj. Tlaj inmoiljuiaj panok se tlenijki, yolik xikintlajtlanijtiakaj se keski tlamantli uan kuali xikintlakakilikaj, uan tlauel moneki tijnextis tikiniknelia uan tijpia moyolo kema tijchiuas ni.
22 Eyi: xikinmatiltikaj inmokoneuaj. Kej moskaltijtiasej, xikiniljuijtiakaj se keski tlamantli tlen pano kema omej motekaj sansejko. Xikinnextilikaj tlake uelis kichiuasej uan kiijtosej kema se akajya kinekis kinijitskis. Xijtekiuikaj tlamachtili tlen toTeotsij itlanechikol kichijchijtok, kampa kiijtoua kenijkatsa uelis inkinmokuitlauisej inmokoneuaj (xikita nopa recuadro “ Tlen kinpaleuis tetajmej uan konemej”).
23. ¿Kenijkatsa tikitaj kema se akajya kiitskia se konetl, uan tlake tlajtlanili tijnankilisej ipan nopa seyok tlamachtili?
23 Jehová itlajtoltemakauaj tlauel amo techpaktia kema se akajya kiitskia se konetl, pampa tikitaj kej se ueyi tlajtlakoli uan se tlamantli tlen tlauel amo kuali. Nochi toikniuaj katli itstokej ipan tlanechikoli moyakanaj ika Cristo itlanauatil uan yeka amo kimanauiaj yon se maseuali katli kiitskia se konetl o kichiualtia ma moteka iuaya. Uan, ¿kenijkatsa uelis tikinpaleuisej katli kinchiuilijtokej nopa tlamantli tlen tlauel amo kuali? Ni tijnankilisej ipan nopa seyok tlamachtili.
UIKATL 103 Ueuejtlakamej elij se tlateochiualistli
^ párr. 5 Ipan ni tlamachtili tikitasej tlake tijchiuasej uan kiampa amo aka kichiualtis se siuapil o se okichpil ma moteka iuaya. Tikitasej tlake uelis kichiuasej ueuejtlakamej uan kiampa kinmokuitlauisej toikniuaj, uan kenijkatsa tetajmej uelis kuali kinmokuitlauisej ininkoneuaj.
^ párr. 3 TLEN TLAUEL IPATI: Kema tikijtouaj kinitskia konemej o kinchiualtia ma moteka, tijnekij tikijtosej kema se akajya katli ya ueyi san tlemach kichiuilia se konetl pampa kineki moyolpakiltis. Eli se tlamantli tlen tlauel amo kuali, uan kichiua ni tlamantli: kinchiualtia konemej ma motekakaj iuaya, kinchiualtia o kiniljuia ma kipipitsokaj o ma kichichikaj kampa amo kinamiki (sexo oral) o kinchiuilia miak tlamantli tlen amo kuali ipan inintsinteno (sexo anal); nojkia kiijtosneki kinteijitskia, kinchichiijitskia o kintsinijitskia. Maske katli kinchiuiliaj ni tlamantli elij siuapilmej, nojkia kiampa kinpano okichpilmej. Uan maske katli kichiuaj ni tlamantli elij tlakamej, nojkia itstokej siuamej katli kiampa kichiuaj.
^ párr. 5 TLEN TLAUEL IPATI: Ipan ni uan ipan nopa seyok tlamachtili, se akajya katli kiitskijkej kema konetsi tikiljuisej kej katli kichiuilijkej tlen amo kuali. Ika ni tlajtoli tijnekij tijnextisej ya amo itlajtlakol tlen kipanok uan katli kiampa kichiuilik tlauel kiixpanok uan kichiuilik tlen amo kuali.
^ párr. 11 Se akajya katli kichiua se tlajtlakoli amo uelis motechtis uan kiijtos kichijki nopa san pampa amo kuali tlaneltokayaya. Ya iselti kitlapejpenik kichiuas nopa tlamantli uan kuali kimatiyaya tlake kichiuayaya, yeka Jehová kitlajtolsenkauas nopa maseuali (Rom. 14:12).
^ párr. 16 Itata o inana nopa konetl o seyok katli ipan motemachia uelis kiniljuis ueuejtlakamej tlen kipanok, kiampa amo tlauel tlaijiyouis o amo kuali kiyolmatis. Ueuejtlakamej amo kema kiiljuisej se konetl ma itsto ininuaya kema inijuantij kamanaltitosej iuaya nopa maseuali katli kiitskik o kichiualtik ma moteka iuaya.
^ párr. 19 Tlen nikaj kiniljuiaj tetajmej, nojkia kiampa kinamiki kichiuasej katli kinkauilijtokej ma kinmokuitlauikaj konemej, kej ininuikaljuaj o sekinok maseualmej.
